Kam Kataia ni Karekea Kamaiuami n Aromi ni Kakawari Auti?

Ti aki. Ti katoatai ni kawari auti, ma ti aki kakoauaa ae ti na karekea kamaiuara ibukina bwa ti karaoa te aeka ni mwakuri aei. (I-Ebeto 2:8) Bukin tera?

Iangoa te kabotau aei: Iangoa te mwaane ae e akoi ae e berita bwa e na anga te bwaintangira ae bobuaka nakoia aomata nako ake a roko n te tabo teuana n te tai are e baireia. Ngkana ko kakoauaa raoi ana berita te mwaane anne, tiaki ngkanne ko na bon ira nanon ana kaetieti? Eng! Ko na boni bae naba n tuangia raoraom ao am utu taekan te berita anne, bwa e aonga naba n reke irouia. E ngae n anne, ko aki karekea te bwaintangira ibukina bwa ko ira ana kaetieti te mwaane anne. Ko karekea te bwaintangira ibukina bwa e boni kani bwaintangiraiko.

N aron naba anne, a kakoauaa ana berita te Atua Ana Tia Kakoaua Iehova, ae taekan te maiu n aki toki ibukia ake a ongeaba irouna. (I-Rom 6:23) Ti kakorakoraira n tataekina ara onimaki nakoia aomata, n ataakin ae a na kakabwaiaaki man ana berita nako te Atua. Ma ti aki kakoauaa ae ti na karekea kamaiuara mani karaoan ara mwakuri ni minita. (I-Rom 1:17; 3:28) Ni koauana, akea te aomata ae kona ni karaoa ae boraoi ma ana kakabwaia ae rianako aei te Atua. “E kamaiura, tiaki i bukin ara makuri aika raraoi aika ti karaoi, ma boni i bukin ana nanoanga.”​—Tito 3:5, BK.