Tṍó eo gé bugi Kpá Káí, bugi togó boo bé eo é láá tú nú eo bugì lọl mm̀ Kpá Káí siimá tóm naa. Tṍó eo bugì ene kà dọ̀ Kpá Káí, bĩiná o bá kọọ̀ ‘Mósĩ́ deè ní em é láá tú nú em gé bugií siimá tóm kátogóí nè dì deèsĩ́ ẽ́?’ Dì belí nu dòòmà bá, dòòmà dẽe ló kọọ̀ ò gé bugi 1 Tẹ̀sàlónaikà 5:​17, 18. Tṍó eo ni bugi pálaa kà gã́belá lọ̀l, òé láá elá vaá bugi togó boo bé eo ólò tã̀àgã̀ ló Bàrì naa, nè gã́bug tṍó eo ólò naamá vó buù dee. Bugi nagé togó boo gbò nú e nyíé ni palàge ẹẹ ló. Buù dee, òé láá beeláfùl ge õá Jìhóvà zaa boo taa kà nú ea ni náa nè ni. Kọbèè pọ́ì ńkem̀ tṍó ní eo túù bùgmà togó boo gbò nú eo nóò lọl mm̀ Kpá Káí é, àé náa kọ ó dã́ Moǹ Bel Bàrì vaá naa nú ea kọ́. Be ò ólòó tú nú eo bugì lọl mm̀ Kpá Káí buù dee siimá tóm, àé nveè bá nè ni kọ ó láá fã̀ Jìhóvà leevè. w24.09 4-5 ¶9-10

Jìhóvà beè dèmii mm̀ sĩ́deè ea dú kele. Náa kal ló béè kọọ̀ nyíéi ólò ẹẹ tṍó e bà dõo nu nèi, nyíéi ólò palàge ẹẹ tṍó e beele ní e dõò nu nè dõona gbò e. Nyíéi ólò ẹẹ tṍó e láà nvèè bá nè pá vígà. Vaá nyíéi ólò ẹẹ nagé tṍó e bà ṍái zaa. Sõò, kọbèè à gá náa vaá nen e dõò nu nè náa ṍái zaa, nyíéi á ẹẹ boo béè kọ è náà nú ea dú lé. Á gá tá ní nyíe kọọ̀ kọ̀láá kà nú eo neè, “Jìhóvà é láá nè ni nú ea el boo nú eo beè nèa.” (2 Kró. 25:9) Née é láá dõo nu nè dõona gbò èlmà bé e Jìhóvà ólò dõo nu nèi naa! Vaá tọ́ọ̀ nú eé láá doolé ló kpẽ́ e Jìhóvà é néi á gé. Vóà naa, naanii èé bééláfùl ge nó bẹẹ Tẹ̀ Jìhóvà ea ólò dõo nu taalẹ bá. w24.09 31 ¶20-21

Jìhóvà ólò ié sàn nyíe nè tóè sàn. (Ps. 103:13; Àìz. 49:15) À ólò tọáẹ́ ló tṍó e bà tú pọ́lọ́ bá sẹ̀ẹ̀mài. (Zèk. 2:8) À ólò naa kọ á valíí ló gè tõo bã̀é ló vaá dú a kóò. (Ps. 25:14; Tóm 17:27) À ólò kìlmà kpá ló kẽ; “à ólò kẹ̀ẹ̀à ẹ̀b káála nè boo kunukẽ̀, [vaá] dàlà gbò e bà kil kẽ lọl gbàà dúu.” (Ps. 113:​6, 7) Dénè nuí ní ea náa kọ é gbĩ́ gè nvèè ka ló Jìhóvà ẹ? È ólò nvèè ka ló Jìhóvà boo béè kọ è gbĩ́ì kọ dõona gbò á nyimáe ló. Gã́bug nen náa nyímá kà-kà bel ea kil ló Jìhóvà. Ló éé? Boo béè kọ gã́bug nen zigà ló gbò kyáá bel e Sétàn ni kpọ́ kilma ló Jìhóvà. (2 Kọ́r. 4:4) Sétàn a náa kọ gbò nen á zìgà kọọ̀ Jìhóvà dú Bàrì ea ólò palàge bã̀ súng, náa ólò ẹ̀b nú ea kilíí ló, vaá ẹlẹ ní ea náa kọ é mòn tã̀àgã̀ ẽ. Sõò è nyímà kà-kà bel ea kil ló bẹẹ Bàrì! È íè nèà deè ge naa kọ gbò nen á nyimá ló íb nen ea dú vaá lèèlàẹ.​—Àìz. 43:10. w25.01 3 ¶6-7