Tisro Juanv
1 Eka vhoddila thaun mogall Gaiusa pasot hi chitt. Tacho hanv khub mog kortam.
2 Mhojea mogall bhava, aiz tujem jivit khuxalkaien bhorlolem asa toxench, fuddem-i aschem ani tuka bori bholaiki aschi mhunn hanv magnnem kortam. 3 Tum sotachea vatten cholot astana, tum sotak kitlo ghott dhorun asa, hea vixim bhavamnim ieun mhaka govai dili tednam hanv khub khuxal zalom. 4 Mhojim bhurgim sotache vatten cholot asat, hem aikon mhaka jitli khuxalkai melltta,* titli anik dusrea khoincheach vostunt mellona.
5 Mogachea bhava, tum vollkhona tea bhavam pasot jem kitem korta, tantuntlean tujem visvaxiponn dison ieta. 6 Hea bhavamnim tunvem dakhoilolea moga vixim sobhe mukhar govai dilea. Upkar korun, te voitana tankam Devachea nodren sarkem asa tea ritin dhadd. 7 Karonn te tacheach nanva khatir bhair sorleat, ani raxttrantlea lokam koddlean kainch ghenant. 8 Taka lagon, oslea bhavank kallji dakhovop* amchi zobabdari zaun asa. Hea toren sot ximpddaunk ami tanchea sangata kam korpi zatat.
9 Hanvem sobhek kitem tori boroilʼlem, punn sobhent sogleam poros poilo zago gheuncho proitn korta to Diotrefes, ami sanglolea khoincheach vostunk man dina. 10 Taka lagon, hanv ailom zalear tachea kamacher dhean ditolom, karonn to amchem nanv piddʼddear korunk lagon amchea vixim vaitt khobro posrait asa. Ani itlem soglem korunui taka suseg na. To bhavank manan ieukar dina, ani oxem korunk sodhtat tankam-i addauncho ani sobhentlean bhair kaddcho proitn korta.
11 Mogall bhava, vaitt udharonnam pormonnem nhoi punn borea udharonnam pormonnem chol. Zo borem korta to Deva thaun asa. Punn zo vaitt korta tannem Devak pollounk na. 12 Demetriusa vixim sogle bhav borem uloitat, ani to sota pormonnem cholta tantuntlean pasun hem dison ieta. Khorem mhunnttlear, ami pasun hich govai ditat, ani amchi govai khori zaun asa mhunn tum zannam.
13 Hanv tuka zaiteo vostu borounk sodhtalom, punn mhaka teo pen ani inkan borounk nakat. 14 Hanv beginuch tuka mellttolom mhunn mhaka bhorvonso asa, ani tednam ami sangata boson uloum-ia.
Tuka xanti mellom.
Sogle ixtt tuka aplo mog dhaddttat. Thoinchea dor eka ixttak, tanchea ek-ekleachea nanvan mhozo nomoskar sang.