શું બાઇબલની ભવિષ્યવાણીઓ બતાવે છે કે ઈસુ જ મસીહ છે?

હા. ઈસુ પૃથ્વી પર હતા ત્યારે તેમણે “મસીહ, એટલે કે આગેવાન” વિશેની ઘણી ભવિષ્યવાણીઓ પૂરી કરી હતી. બાઇબલમાં જણાવ્યું છે કે એ મસીહ “દુનિયાનો ઉદ્ધાર” કરશે. (દાનિયેલ ૯:૨૫; ૧ યોહાન ૪:૧૪) ઈસુના મરણ પછી પણ મસીહ વિશેની ઘણી ભવિષ્યવાણીઓ તેમનામાં પૂરી થઈ હતી.—ગીતશાસ્ત્ર ૧૧૦:૧; પ્રેરિતોનાં કાર્યો ૨:૩૪-૩૬.

• “મસીહ” એટલે શું?

• શું એક કરતાં વધારે વ્યક્તિ મસીહ હોઈ શકે?

• શું એવું બની શકે કે મસીહ હજી સુધી આવ્યા નથી?

• બાઇબલમાં મસીહ વિશેની કેટલી ભવિષ્યવાણીઓ છે?

• મસીહ વિશેની ભવિષ્યવાણીઓ ઈસુમાં પૂરી થઈ

મસીઆક (મસીહ) હિબ્રૂ શબ્દ છે જેનો અર્થ થાય “અભિષિક્ત વ્યક્તિ.” ગ્રીક શબ્દ ખ્રિસ્તોસનો (ખ્રિસ્ત) પણ એ જ અર્થ થાય છે. એટલે “ઈસુ ખ્રિસ્ત”નો અર્થ થાય કે ઈસુ જ અભિષિક્ત વ્યક્તિ છે અથવા ઈસુ જ મસીહ છે.

બાઇબલમાં જણાવ્યું છે કે જૂના જમાનામાં કોઈ વ્યક્તિને ખાસ અધિકાર કે હોદ્દો આપવામાં આવતો ત્યારે, તેનો અભિષેક કરવા તેના પર તેલ રેડવામાં આવતું. (લેવીય ૮:૧૨; ૧ શમુએલ ૧૬:૧૩) ઈશ્વરે ઈસુને મસીહ તરીકે પસંદ કર્યા હતા, એટલે કે તેમને બહુ મોટો અધિકાર આપ્યો હતો. (પ્રેરિતોનાં કાર્યો ૨:૩૬) પણ ઈશ્વરે તેલ રેડીને નહિ, પવિત્ર શક્તિથી ઈસુને અભિષિક્ત કર્યા હતા.—માથ્થી ૩:૧૬.

ના. જ્યારે આપણે બાઇબલ ભવિષ્યવાણીઓની વિગતોને ધ્યાનથી તપાસીએ છીએ, ત્યારે જાણવા મળે છે કે એક જ વ્યક્તિ મસીહ કે ખ્રિસ્ત હોય શકે છે. પણ બાઇબલમાં ચેતવણી આપી છે: “જૂઠા ખ્રિસ્ત અને જૂઠા પ્રબોધકો ઊભા થશે. તેઓ મોટાં મોટાં ચમત્કારો અને કરામતો દેખાડશે. અરે, શક્ય હોય તો ઈશ્વરે પસંદ કરેલાઓને પણ તેઓ ભમાવવાની કોશિશ કરશે!”—માથ્થી ૨૪:૨૪.

ના. બાઇબલમાં પહેલેથી જણાવ્યું હતું કે મસીહ ઇઝરાયેલના રાજા દાઉદના વંશજ હશે. (ગીતશાસ્ત્ર ૮૯:૩, ૪) ઈસુ પૃથ્વી પર હતા ત્યારે યહૂદીઓ પાસે હજી વંશાવળીના અહેવાલો હતા. ઈસુએ પોતે જણાવ્યું હતું કે તે દાઉદના વંશજ છે. જો એ વાત ખોટી હોત, તો તેમના દુશ્મનોએ યહૂદી વંશાવળીના અહેવાલોથી એ વાત સાબિત કરી હોત. પણ એવું આપણને ક્યાંય જોવા મળતું નથી. એ બતાવે છે કે ઈસુ ખરેખર દાઉદના વંશજ હતા. (માથ્થી ૨૨:૪૧-૪૬) પણ જ્યારે ઈસવીસન ૭૦માં રોમનોએ યરૂશાલેમનો નાશ કર્યોa, ત્યારે યહૂદી વંશાવળીના અહેવાલો પણ નાશ થઈ ગયા હતા. એ પછી કોઈ પણ વ્યક્તિ સાબિત કરી શકતી ન હતી કે તે દાઉદના વંશની છે.

એ સ્પષ્ટ રીતે જણાવવું અઘરું છે કે મસીહ વિશે કેટલી ભવિષ્યવાણીઓ છે. શા માટે? કારણ કે બાઇબલમાં જણાવેલી મસીહ વિશેની ભવિષ્યવાણીઓને લોકો અલગ અલગ રીતે ગણે છે. દાખલા તરીકે, યશાયા ૫૩:૨-૭માં મસીહ વિશે ઘણી બાબતો જણાવી છે. અમુક લોકો એ આખા અહેવાલને એક જ ભવિષ્યવાણી ગણે છે. જ્યારે કે બીજા લોકો એમાંની દરેક વિગતને અલગ અલગ ભવિષ્યવાણી ગણે છે.