૧૦, ૧૧. (ક) આદમ અને હવાએ પાપ કર્યું પછી, દુષ્ટતા કઈ રીતે ફેલાઈ? (ખ) હનોખે કેવી ભવિષ્યવાણી કરી અને એ સાંભળીને લોકોએ શું કર્યું?

^૧૦ આદમે પાપ કર્યું પછી દુષ્ટતા કેટલી ઝડપથી ફેલાઈ ગઈ એનો વિચાર કરો. બાઇબલ કહે છે કે આદમનો પ્રથમ દીકરો કાઈન, પોતાના ભાઈ હાબેલને મારી નાખીને ખૂની બન્યો. (ઉત્પત્તિ ૪:૮-૧૦) હાબેલના ખૂન પછી, આદમ અને હવાને બીજો દીકરો થયો. તેનું નામ તેઓએ શેથ પાડ્યું. તેના વિષે બાઇબલ કહે છે: “શેથને પણ દીકરો થયો; અને તેનું નામ તેણે અનોશ પાડ્યું: ત્યારે લોક યહોવાહને નામે પ્રાર્થના કરવા લાગ્યા.” (ઉત્પત્તિ ૪:૨૫, ૨૬) દુઃખની વાત છે કે લોકોએ જે રીતે “યહોવાહને નામે પ્રાર્થના” કરવી જોઈતી હતી એ રીતે પ્રાર્થના કરતા ન હતા.b એમ લાગે છે કે લોકોએ ઈશ્વરનું નામ માણસોને કે મૂર્તિઓને આપી દીધું હતું. પછી હકીકતમાં ઈશ્વરને બદલે તેઓને પ્રાર્થના કરતા હતા. અનોશના જન્મના ઘણાં વર્ષો પછી, કાઈનના વંશમાંથી આવતા લામેખે તેની બે પત્નીઓ માટે એક કવિતા લખી. એમાં તેણે કહ્યું કે ‘એક માણસે મને ઘાયલ કર્યો, પણ મેં તેને મારી નાખ્યો.’ લામેખે ચેતવણી આપતા કહ્યું: “જો કાઈનને મારવાનો બદલો સાતગણો લેવાય, તો જરૂર લામેખનો સિત્તોતેરગણો લેવાશે.”—ઉત્પત્તિ ૪:૧૦, ૧૯, ૨૩, ૨૪.