યહોવાહના દિવસથી કોણ બચશે?

“તે દિવસ આવે છે, તે ભઠ્ઠીની પેઠે બળે છે.”​—⁠માલાખી ૪:⁠૧.

યહોવાહે માલાખી પ્રબોધકને એકદમ નજીકના ભવિષ્યમાં થનારા ભયંકર બનાવો વિષે લખવા પ્રેર્યા. આ બનાવોની અસર પૃથ્વી પરના સર્વ રહેવાસીઓને થશે. માલાખી ૪:૧ ભાખે છે: “જુઓ, તે દિવસ આવે છે, તે ભઠ્ઠીની પેઠે બળે છે; અને સર્વ ગર્વિષ્ઠો તથા સર્વ દુરાચારીઓ ખૂંપરારૂપ થશે; સૈન્યોનો [દેવ] યહોવાહ કહે છે, કે જે દિવસ આવે છે તે તેમને એવા બાળી નાખશે કે તે તેમનું મૂળ કે ડાળી રહેવા દેશે નહિ.” આ દુષ્ટ જગતનો કેવી રીતે વિનાશ કરવામાં આવશે? એક વૃક્ષને જડમૂળમાંથી ઊખેડી નાખ્યા પછી એ ક્યારેય ઊગતું નથી તેમ, આ દુષ્ટ જગતનો પણ સંપૂર્ણ વિનાશ કરવામાં આવશે.

^૨ તમે પૂછી શકો કે, ‘માલાખી અહીં કયા “દિવસ” વિષે ભાખી રહ્યા છે?’ આ એ જ દિવસ છે જેનો ઉલ્લેખ યશાયાહ ૧૩:૯માં કરવામાં આવ્યો છે, જે કહે છે: “જુઓ, યહોવાહનો દિવસ આવે છે; તે દુઃખદાયક, કોપ તથા ઉગ્ર ક્રોધ સહિત દેશને ઉજ્જડ કરવા ને તેમાંથી પાપીઓનો વિનાશ કરવા સારૂ આવે છે.” સફાન્યાહ ૧:​૧૫ એ દિવસનું આવું વર્ણન કરે છે: “તે દિવસે કોપનો દિવસ, દુઃખ તથા સંકટનો દિવસ, ઉજ્જડપણાનો તથા વેરાનપણાનો દિવસ, અંધકારનો તથા ઝાંખનો દિવસ, વાદળાં તથા ગાઢ અંધકારનો દિવસ.”

“મોટી વિપત્તિ”

^૩ ‘યહોવાહના દિવસ’ વિષે માલાખીએ જે ભવિષ્યવાણી કરી હતી એની મહાન પરિપૂર્ણતાના સમયગાળાને “મોટી વિપત્તિ” કહેવામાં આવી. ઈસુએ ભાખ્યું: “કેમકે તે વેળા એવી મોટી વિપત્તિ આવી પડશે કે તેના જેવી જગતના આરંભથી તે હમણાં સુધી થઈ નથી, ને કદી થશે પણ નહિ.” (માત્થી ૨૪:૨૧) હમણાં, ખાસ કરીને ૧૯૧૪થી જગત જે મુશ્કેલ સમયમાંથી પસાર થઈ રહ્યું છે એનો વિચાર કરો. (માત્થી ૨૪:​૭-​૧૨) ફક્ત બીજા વિશ્વયુદ્ધમાં જ ૫ કરોડથી વધારે લોકો માર્યા ગયા! તોપણ, ‘મોટી વિપત્તિમાં’ એનાથી પણ વધારે આફતો આવશે. એ બનાવ યહોવાહનો દિવસ હશે કે જેનો આર્માગેદ્દોનમાં અંત આવી જશે અને એ સાથે જ દુષ્ટ જગતના આ છેલ્લા દિવસો પણ પૂરા થઈ જશે.​—⁠૨ તીમોથી ૩:​૧-૫, ૧૩; પ્રકટીકરણ ૭:​૧૪; ૧૬:૧૪, ૧૬.

^૪ યહોવાહના દિવસે શેતાનના જગત અને તેના ટેકેદારોનો સંપૂર્ણ વિનાશ કરવામાં આવશે. સૌ પ્રથમ, સર્વ જૂઠા ધર્મોનો નાશ થશે. ત્યાર પછી, શેતાનની રાજકીય અને વ્યાપારી વ્યવસ્થા વિરુદ્ધ યહોવાહ ન્યાયચુકાદો લાવશે. (પ્રકટીકરણ ૧૭:૧૨-​૧૪; ૧૯:૧૭, ૧૮) હઝકીએલ ભવિષ્યવાણી કરે છે: “તેઓ પોતાનું રૂપું રસ્તાઓમાં ફેંકી દેશે, ને તેમનું સોનું અશુદ્ધ વસ્તુના જેવું થઈ પડશે; યહોવાહના કોપને દિવસે તેઓનું સોનુંરૂપું તેમને ઉગારી શકશે નહિ.” (હઝકીએલ ૭:૧૯) એ દિવસ વિષે સફાન્યાહ ૧:૧૪ કહે છે: “યહોવાહનો મહાન દિવસ નજીક છે, તે નજીક છે, ને બહુ ઝડપથી આવે છે.” યહોવાહના દિવસ વિષે બાઇબલ જે કહે છે એને ધ્યાનમાં રાખીને, આપણે પરમેશ્વરની ન્યાયી જરૂરિયાતોના સુમેળમાં ચાલવાનો સંકલ્પ કરવો જોઈએ.

^૯ આ ભવિષ્યવાણીની પ્રથમ પરિપૂર્ણતા પ્રથમ સદી સી.ઈ.માં થઈ. યહુદીઓના શેષભાગે યહોવાહની સેવા કરી અને આત્માથી અભિષિક્ત થયેલા ખ્રિસ્તીઓના નવા ‘રાષ્ટ્રનો’ ભાગ બન્યા, જેમાં વિદેશીઓનો પણ સમાવેશ થયો. પરંતુ, મોટા ભાગના મૂળ ઈસ્રાએલીઓએ ઈસુનો નકાર કર્યો. એ કારણે ઈસુએ ઈસ્રાએલ રાષ્ટ્રને કહ્યું: “જુઓ, તમારે સારૂ તમારૂં ઘર ઉજ્જડ મુકાયું છે.” (માત્થી ૨૩:૩૮; ૧ કોરીંથી ૧૬:૨૨) માલાખી ૪:૧માં ભાખવામાં આવ્યું તેમ, ૭૦ સી.ઈ.માં ‘ભઠ્ઠીની પેઠે બળતો દિવસ’ ઈસ્રાએલીઓ પર સાચે જ આવી પડ્યો. યરૂશાલેમ અને એના મંદિરનો નાશ કરવામાં આવ્યો અને નોંધવામાં આવ્યું કે દસ લાખ કરતાં વધુ લોકો દુકાળમાં, રાજકીય સંઘર્ષમાં અને રોમન સૈન્યના હુમલાથી માર્યા ગયા. તેમ છતાં, યહોવાહની વફાદારીથી સેવા કરનારાઓ એમાંથી બચી ગયા.​—⁠માર્ક ૧૩:૧૪-૨૦.