Éxodo

34 Upémarõ Jehová heʼi Moiséspe: “Eprepara mokõi ita ipéva ha ojoguáva umi anteve guarépe.+ Ha askrivíta umi itáre umi mbaʼe askrivi vaʼekue umi ótro ita+ rejokapa vaʼekuére.+ 2 Ejepreparákena koʼẽrõ pyharevete g̃uarã, pórke rejupíta pe Sérro Sinaípe ha rejúta che rendápe pe montáña ruʼãme.+ 3 Péro avave ndoúi vaʼerã nendive pe montáñape, ha aníketi avavete ojekuaa pe montáñape. Ni umi ovecha ni umi vaka ndokarúi vaʼerã pe montáña ypýpe”.+

4 Upémarõ Moisés oprepara umi mokõi ita ipéva ojoguáva umi anteve guarépe. Ha pyharevete, voi porã opuʼã ha ojupi pe Sérro Sinaípe Jehová heʼi haguéicha chupe, ha ojagarra ogueraha umi mokõi ita ipéva. 5 Upéi Jehová oguejy+ pe araípe ha opyta Moisés ndive, ha oikuaauka chupe héra Jehová.+ 6 Ha Jehová ohasa henondérupi ha heʼi chupe: “Jehová, Jehová, che hína peteĩ Dios oporoporiahuverekóva+ ha oporombyasýva,*+ ndaipochyreíriva,*+ oporohayhuetereíva*+ ha nopyrũiva iñeʼẽre,*+ 7 ohayhu añetéva hetaitereípe,+ operdonáva umi ojavývape, hembiapo vaíva ha opekávape,+ péro ni mbaʼevéicharõ ndohejareimoʼãiva umi ofallávape.+ Pe túa ofalláramo che akastigáta chupe, ha upe kastígo ohupytýta itaʼýrape, iniétope ha avei ivisniétope”.+

8 Upémarõ Moisés pyaʼe porã oñesũ ha oñakãityete. 9 Upéi heʼi: “Jehová, oiméramo nde cheguerohory, ehomína orendive ore viáhepe ha epyta ore apytépe Jehová.+ Ore ningo peteĩ puévlo irrevélde ha ikaprichósova,+ upéicharõ jepe oreperdonamína umi mbaʼe vai rojapo vaʼekuére ha ore pekádore,+ ha oreaseptána nde puevlorã”. 10 Ha Jehová heʼi chupe: “Koʼág̃a ajapo hína peteĩ kompromíso: ajapóta heta milágro nde puévlo Israel renondépe, umi núnka ndojejapóiva ko yvy ape ári ni umi ótra nasiónpe.+ Ha umi nasión oĩva pende jerére katuete ohecháta umi mbaʼe che ajapóva, pórke tuichaiterei mbaʼe hína ko ajapóva penendive.+

11 Peñatende porãke koʼã mbaʼe haʼévare peẽme koestedía:+ che amosẽta hína pene renonderãgui umi amorreo, cananeo, hitita, perizita, heveo ha jebuséope.+ 12 Ha peñatendéke ani pejapo peteĩ kompromíso umi hénte oikóvandi umi lugár pehotahápe,+ pórke haʼekuéra katuete ojapokáne peẽme mbaʼe vai ha péicha penemoñuhãta.+ 13 Peẽ pehundipa vaʼerã chuguikuéra umi altár, pemonguʼi vaʼerã umi kolúmna sagráda ha peikytĩmba vaʼerã umi póste sagrádo orekóva hikuái.+ 14 Animoʼãke peñesũ ótro dios renondépe,+ pórke enterovénte oikuaa hína, che Jehová, aipotaha chéve añoiténte pecheadora. Che hína peteĩ Dios oipotáva chupe añoiténte ojeadora.+ 15 Peñatendéke ani pejapo mbaʼeveichagua kompromíso umi hénte oikóvandi umi lugár pehotahápe, pórke haʼekuéra oadora* ha ojapo vove sakrifísio idioskuérape,+ katuete peneinvitáne ha peẽ peʼúne hendivekuéra umi mbaʼe osakrifika vaʼekue.+ 16 Upéi pemomendáne pende raʼy umi itajyrakuérare.+ Ha umi itajyrakuéra oadoráne idioskuérape ha katuete ogueraháne hapykuéri pende raʼýpe oadora hag̃ua umi idioskuérape.+

17 Ndapejapói vaʼerã mbaʼeveichagua dios de metál.+

18 Pemboarete vaʼerã pe Fiésta del Pan Ilevaduraʼỹva.+ Siete día aja peʼu vaʼerã pan ilevaduraʼỹva haʼéma haguéicha peẽme. Upéva pejapo vaʼerã pe mes de Abíbpe,*+ pórke upe méspe peẽ pesẽ vaʼekue Egíptogui.

19 Entéro umi pende raʼy ypykue chembaʼe hína,+ chembaʼe avei umi animál raʼy ypykue, tahaʼe peteĩ tóro térã peteĩ ovecha raʼy ypykue.+ 20 Pe vúrro raʼy ypykuére pemeʼẽ vaʼerã peteĩ ovecha, pórke ndapepagáirõ hese, peinupã vaʼerã inúkape ha pejuka pe vúrro raʼy. Ha enterovete pende raʼy ypykuére pepaga vaʼerã avei.+ Avave noñepresentái vaʼerã che renondépe po nandi.

21 Seis día aja pembaʼapóta, péro pe séptimo díape pepytuʼu vaʼerã.+ Pe ojearaha tiémpope ha pe kosécha tiémpope avei pepytuʼu vaʼerã pe séptimo díape.

22 Pemboarete vaʼerã pe Fiésta de la Kosécha, upe jave ningo peẽ pemeʼẽ vaʼerã chéve umi trígo primeroite pekosecha vaʼekue. Ha pemboarete vaʼerã avei pe Fiésta de la Última Kosécha,* upéva pejapo vaʼerã opakuévo pe áño.+

23 Káda áño, 3 vése umi kuimbaʼe oñepresenta vaʼerã Jehová, Israel Jára renondépe.+ 24 Amosẽta pene renonderãgui umi ótra nasión+ ha ambotuicháta pende território. Peẽ peho aja peñepresenta Jehová renondépe 3 vése káda áño, avave ndojagarramoʼãi pendehegui pende yvy.

25 Pesakrifika vove peteĩ animál, ndapeofreséi vaʼerã chéve huguykue mbaʼeve orekóvandi levadúra.+ Pe sakrifísio pejapóva pe Páskuape ndapehejái vaʼerã ikoʼẽmba pe altárpe.+

26 Pegueru vaʼerã pende Jára Jehová rógape iporãnguete umi primeroite pemonoʼõ vaʼekue pende kokuégui.+

Napembojýi vaʼerã peteĩ kavara raʼy roʼokue isy kambykuépe”.+

27 Upéi Jehová heʼi Moiséspe: “Reskrivi vaʼerã koʼã mbaʼe haʼéva ndéve,+ pórke koʼã ñeʼẽ rupive ajapo peteĩ kompromíso nendive ha Israel ndive”.+ 28 Moisés opyta upépe Jehová ndive 40 día, ára ha pyhare. Upe aja haʼe ndoʼúi mbaʼevete ni ndoyʼúi.+ Ha Ñandejára oskrivi umi mokõi ita ipévare umi Diez Mandamiénto,+ umi mbaʼe Haʼe heʼi vaʼekue ojapokuévo pe kompromíso.

29 Upéi Moisés oguejy pe Sérro Sinaígui ha ogueru ipópe+ umi mokõi ita ipéva orekóva umi mandamiénto.* Ha haʼe ndopillái hova omimbipaha oñeʼẽ haguére Ñandejárandi. 30 Aarón ha umi israelita ohechávo Moisés rova omimbipaha, okyhyje oñemboja hag̃ua hendápe.+

31 Moisés katu ohenói chupekuéra, upémarõ Aarón ha umi kuimbaʼe omoakãva israelitakuérape oñemboja hendápe. Upépe Moisés oñepyrũ oñeʼẽ hendivekuéra. 32 Upe rire enterovete umi israelita oñemboja avei hendápe, ha haʼe omombeʼu chupekuéra umi mandamiénto Jehová omeʼẽ vaʼekue chupe pe Sérro Sinaípe.+ 33 Ha oñeʼẽmba rire hendivekuéra, Moisés ojahoʼi hova peteĩ páñope.+ 34 Péro haʼe oipeʼa pe páño oike jave Jehová rendápe oñeʼẽ hag̃ua hendive, ha osẽ rire hendágui ojahoʼi jey hova pe páñope.+ Upéi omombeʼu umi israelítape umi mandamiénto Ñandejára omeʼẽ vaʼekue chupe.+ 35 Umi israelita ohecha Moisés rova omimbipaha, upévare Moisés ojahoʼi jey hova pe páñope oho jey peve oñeʼẽ Ñandejára ndive.+