Números

35 Jehová oñeʼẽ Moiséspe desiérto de Moábpe, Jordán ypýpe,+ Jericó rovái, ha heʼi: 2 “Ere umi israelítape omeʼẽ vaʼerãha iñerénsiagui umi levítape umi siuda oiko hag̃ua,+ ha omeʼẽ vaʼerã avei chupekuéra umi pastoty oĩva umi siuda jerére.+ 3 Umi levita oikóta umi siudápe ha umi pastoty katu hymbakuérape g̃uarã, omopuʼã hag̃ua igalponkuéra ha oimeraẽ ótro animál rendag̃ua. 4 Ha umi pastoty pemeʼẽtava umi levítape, oreko vaʼerã 445 métro* pe murálla guive kompletoite pe siuda jerére. 5 Peẽ pemedi vaʼerã pe siuda murálla guive ha oreko vaʼerã 890 métro* káda ládo, tahaʼe éste, sur, oéste ha nórte gotyo, ha pe siuda opyta vaʼerã mbytépe. Péichata hína umi pastoty oĩtava pe siuda jerére.

6 Pemeʼẽta umi levítape 6 siuda ikatuhápe okañy* umi oporojuka vaʼekue.+ Pemeʼẽ vaʼerã avei chupekuéra 42 siuda. 7 En totál pemeʼẽ vaʼerã 48 siuda umi ipastoty reheve.+ 8 Oñemeʼẽ vaʼerã chupekuéra umi siuda umi israelita erénsiagui.+ Umi trívu tuichavévagui peipeʼa vaʼerã hetave, ha umi trívu michĩvévagui peipeʼa vaʼerã saʼive.+ Káda trívu omeʼẽta umi siuda umi levítape, asegún pe erénsia oñemeʼẽ vaʼekue chupekuéra”.

9 Jehová osegi oñeʼẽ Moiséspe ha heʼi: 10 “Ere umi israelítape: ‘Pehasáta pe Jordán ha peikéta Canaánpe.+ 11 Peẽ peiporavo vaʼerã umi siuda opyta porãtava peẽme oho hag̃ua okañy upépe umi oporojuka vaʼekue ojaposeʼỹre.+ 12 Koʼã siudápe ikatúta oho okañy ojukaséramo chupe pe omano vaʼekue pariénte.*+ Upéicharõ ndojejukamoʼãi chupe ojehusga mboyve umi hénte renondépe.+ 13 Umi 6 siuda peẽ pemeʼẽtava oservíta ojeho hag̃ua oñekañy upépe. 14 Peẽ pemeʼẽta mbohapy siuda pe Jordángui éste gotyo,+ ha mbohapy Canaánpe.+ Koʼã siuda oservíta hína oñekañy hag̃ua. 15 Koʼã 6 siuda oservíta okañy hag̃ua umi israelita, umi extranhéro+ ha umi aréma oikóva pende apytépe. Ikatu hag̃uáicha oho upépe oimeraẽ oporojuka vaʼekue ojaposeʼỹre.+

16 Péro oĩramo oinupãva hapichápe iérrope ha omano, haʼe upéicharõ peteĩ asesíno. Upe oporojuka vaʼekuépe ojejuka vaʼerã katuete.+ 17 Péro olastimáramo hapichápe peteĩ ita ikatu vaʼerãichaguápe ojuka, ha ojuka voi chupe, upéicharõ haʼe peteĩ asesíno hína. Upe oporojuka vaʼekuépe ojejuka vaʼerã katuete. 18 Ha oinupãrõ hapichápe peteĩ yvyra ikatu vaʼerãichaguápe ojuka, ha ojuka voi chupe, upéicharõ haʼe peteĩ asesíno hína. Upe oporojuka vaʼekuépe ojejuka vaʼerã katuete.

19 Pe ovengáva pe ojejuka vaʼekue ruguykue ojuka vaʼerã pe asesínope. Otopa vove hese ojukáta chupe. 20 Péro oĩramo omyañáva hapichápe ndaijaʼéigui hese térã ojapi chupe álgope ojaposégui voi upéicha,+ 21 térã ndaijaʼéigui hese ombyepoti chupe ha ojuka, upéicharõ upe mbaʼe vai apoha ojejuka vaʼerã katuete. Péva peteĩ asesíno hína. Pe ovengáva pe ojejuka vaʼekue ruguykue ojukáta chupe otopa vove hese.

22 Péro oiméramo ojuka raʼe hapichápe ojukaseʼỹre, omyaña rupi chupe térã ojapi rupi chupe álgope, péro ndahaʼéi ndaijaʼéigui hese la ojapóva upéva,+ 23 térã ndohechái chupe ha oity hese peteĩ ita ha ojuka pe hapichápe, péro ndahaʼéi kuri iñenemígo ni ndoperhudikaséi kuri chupe, 24 upéicharõ pe mbaʼe vai apoha ha pe ovengáva pe ojejuka vaʼekue ruguykue oho vaʼerã umi hénte renondépe, ojehusga hag̃ua chupekuéra ko léipe heʼiháicha.+ 25 Ha umi hénte osalva vaʼerã upe oporojuka vaʼekuépe ani hag̃ua pe ovengáva pe ojejuka vaʼekue ruguykue ojuka chupe, ha oñemondo jey vaʼerã chupe pe siuda ikatuhápe oñekañy, upe oho haguépema voi. Ha haʼe opyta vaʼerã upépe, omano meve pe súmo saserdóte oñenombra vaʼekue oñeñohẽrõ guare iñakãre aséite.+

26 Péro pe oporojuka vaʼekue osẽramo pe siuda oho haguégui okañy, 27 ha pe ovengáva pe ojejuka vaʼekue ruguykue otopa hese osẽ hague pe siudágui ha ojuka chupe, upéicharõ ndojekulpamoʼãi ko persónape ojuka haguére chupe. 28 Pórke haʼe opyta vaʼerã oiko pe siuda ikatuhápe oñekañy omano meve pe súmo saserdóte. Péro omano rire pe súmo saserdóte, upe oporojuka vaʼekue ikatúma oho jey ijyvy teépe.+ 29 Koʼãva hína umi léi pekumpli vaʼerã peẽ ha pene familiare peporohusga jave, peiko peikohápe.

30 Oimeraẽ ojukáva peteĩ persónape* ojejuka vaʼerã chupe, haʼe rupi peteĩ asesíno.+ Péro upearã oĩ vaʼerã unos kuánto ohecháva upe oiko vaʼekue,+ pórke avavépe ndojejukái vaʼerã oĩramo peteĩ testígonte. 31 Ndovaléi pejagarra mbaʼeve pe oporojuka vaʼekuégui opagaséramo* hekovére,* haʼe omerese voi hína omano, ha katuete ojejuka vaʼerã chupe.+ 32 Ha ndapejagarrái vaʼerã avei mbaʼeve peteĩ oho vaʼekuégui pe siuda ikatuhápe oñekañy, peichahágui opagaséramo* oho jey hag̃ua oiko ijyvýpe omano mboyve pe súmo saserdóte.

33 Peẽ napemongyʼái vaʼerã pe yvy peikoha, pórke pe tuguy oñeñohẽva omongyʼa hína pe yvy,+ ha ndaikatúi ojepaga pe tuguy oñeñohẽ vaʼekuére, ndahaʼéiramo pe oporojuka vaʼekue ruguy rupive.+ 34 Napemongyʼái vaʼerã pe yvy peikoha, pórke che aiko avei upépe, ha che, Jehová, aime hína umi israelita apytépe’”.+