Éxodo

25 Upémarõ Jehová heʼi Moiséspe: 2 “Ere umi israelítape ogueru hag̃ua chéve ikontrivusión, enterove omeʼẽséva ipyʼaite guive ikatu okontrivui, ha peẽ pembyaty vaʼerã umíva.+ 3 Koʼã mbaʼe ikatu ogueru chéve hikuái: óro,+ pláta,+ kóvre,+ 4 ílo hovy, lána líla, ílo pytã asýva, líno iporãva, kavara raguekue, 5 ovecha mácho kuerokue oñeteñi vaʼekue pytãme, fóka* pirekue, madéra de akásia,+ 6 aséite umi lamparaʼípe g̃uarã,+ aséite perfumádo* ojejapo hag̃ua pe aséite ojejapo hag̃ua nombramiénto+ ha ojejapo hag̃ua pe insiénso hyakuã asýva,+ 7 ita ónise ha umi ótro ita iporãva oñemoĩ hag̃ua pe súmo saserdóte delantál*+ ha pe ipechéra* rehe.+ 8 Peẽ pejapo vaʼerã peteĩ lugár chemombaʼeguasu hag̃ua, ha che aiméta pende apytépe.+ 9 Pe tavernákulo* ha entéro mbaʼe ojepurútava pype ojejapo vaʼerã pe modélo ahechaukatahaichaite ndéve.+

10 Peẽ pejapo vaʼerã peteĩ árka* madéra de akásiagui: ipuku vaʼerã 1 métro 11 sentímetro,* ipe vaʼerã 67 sentímetro* ha ijyvate vaʼerã 67 sentímetro.*+ 11 Upéi perrevesti vaʼerã óro púrope+ hyepýguio ha ijapéguio. Ha pejapo avei chupe peteĩ vórde de óro kompletoite ijerére.+ 12 Pejapo vaʼerã 4 argólla de óro pemoĩ hag̃ua pe árka kostádore káda eskínape, upéicharõ mokõi argólla opytáta hetyma arimi peteĩ kostádope, ha mokõi pe ótro kostádope. 13 Pejapo vaʼerã avei umi yvyra puku de madéra de akásia ha perrevesti vaʼerã órope.+ 14 Ha umi yvyra puku pembohasa vaʼerã umi argólla kuárupi pe árka kostádore, ikatu hag̃uáicha pegueraha. 15 Umi yvyra puku peheja vaʼerã umi argólla kuápe, ndapeipeʼái vaʼerã upégui.+ 16 Pemoĩ vaʼerã pe árkape umi ita ipéva orekóva umi mandamiénto* ameʼẽtava ndéve.+

17 Pejapo vaʼerã pe árka taparã de óro púro: ipuku vaʼerã 1 métro 11 sentímetro* ha ipe vaʼerã 67 sentímetro.*+ 18 Pejapo vaʼerã mokõi keruvín* de óro, pemoldea vaʼerã martíllope ha oĩ vaʼerã pe árka tápa ári káda púntape.+ 19 Pejapo vaʼerã umi keruvín opyta hag̃uáicha peteĩ keruvín pe árka tápa ári káda púntape. 20 Umi keruvín oĩ vaʼerã ojovái ha oñakãity vaʼerã omaña hag̃uáicha pe tápare, ha oipyso vaʼerã mokõive ipepo henonde gotyo ikatu hag̃uáicha omoʼã pe árka tápa.+ 21 Pe árkape pemoĩta umi ita ipéva orekóva umi mandamiénto* ameʼẽtava ndéve, ha upéi pemoĩ vaʼerã pe árka tápa.+ 22 Che ajechaukáta ndéve pe árka tápa ári ha añeʼẽta ndéve umi mokõi keruvín mbyte guive.+ Pe Árka del Pákto* ári guive haʼéta ndéve opa mbaʼe ojapo vaʼerã umi israelita.

23 Pejapo vaʼerã avei peteĩ mesa+ de madéra de akásia: ipuku vaʼerã 89 sentímetro,* ipe vaʼerã 44 sentímetro imédio* ha ijyvate vaʼerã 67 sentímetro.*+ 24 Perrevesti vaʼerã óro púrope ha pejapo vaʼerã avei chupe hembeʼyrã de óro. 25 Pemoĩ vaʼerã pe mesa vórde kompletoitére peteĩ pláka ipéva 7,4 sentímetro,* ha pe pláka vórdere pejapo vaʼerã kompletoite peteĩ adórno de óro. 26 Pejapo vaʼerã 4 argólla de óro ha pemoĩ vaʼerã umi 4 eskínape, oĩháme pe mesa retyma. 27 Umi argólla oĩ vaʼerã pe pláka guýpe ikatu hag̃uáicha oñemoĩ upépe umi yvyra puku ha ojegueraha pe mesa. 28 Pejapo vaʼerã avei yvyra puku madéra de akásiagui ha perrevesti vaʼerã órope, koʼãva peipurúta hína pegueraha hag̃ua pe mesa.

29 Pejapo vaʼerã avei de óro púro umi pláto, kópa, hárra ha umi tasón oĩtava pe mesa ári ha ojepurútava oñeñohẽ hag̃ua umi ofrénda líkida.+ 30 Ha pe mesa ári siémpre oĩ vaʼerã pe pan oñepresentáva Ñandejárape.+

31 Pejapo vaʼerã peteĩ kandelávro+ de óro púro ha pemoldea vaʼerã martíllope, pejapo vaʼerã de unoite ha napembojoapýi vaʼerã: pe iváse, pe vráso prinsipál, umi vráso osẽva chugui, umi yvoty ryru,* umi yvoty ha umi potykuru.+ 32 Pe ivásegui osẽ vaʼerã peteĩ vráso prinsipál oĩtava mbytépe, ha upévagui osẽ vaʼerã 6 vráso: mbohapy osẽta peteĩ kostádogui ha el mísmo lugárgui pe ótro kostádope osẽta avei mbohapy. 33 Káda vráso ojejapo vaʼerã mbohapy yvotýgui, mbohapy potykurúgui ha mbohapy yvoty ryru ojoguáva alméndro potýpe, ha koʼã mbaʼe oĩ vaʼerã interkaládo: primero peteĩ yvoty, segundo peteĩ potykuru ha tercero peteĩ yvoty ryru. Péicha peho vaʼerã hese káda vráso oreko peve mbohapy de káda uno. Upéicharõ pe vráso prinsipálgui osẽta 6 vráso. 34 Pe vráso prinsipál katu opuʼã pe kandelávro vásegui ha oreko vaʼerã 4 yvoty, 4 potykuru ha 4 yvoty ryru ojoguáva alméndro potýpe, ha koʼã mbaʼe oĩ vaʼerã interkaládo: primero peteĩ yvoty, segundo peteĩ potykuru ha tercero peteĩ yvoty ryru. Péicha peho vaʼerã hese pekompleta peve 4 de káda uno. 35 Pe vráso prinsipálgui osẽta 6 vráso: mbohapy peteĩ kostádogui ha el mísmo lugárgui pe ótro kostádope osẽta avei mbohapy, ha káda vráso osẽha guýpe pemoĩ vaʼerã peteĩ potykuru. 36 Pe kandelávro kompletoite, umi potykuru ha umi vráso ojejapo vaʼerã de unoite. Pejapo vaʼerã de óro púro, ha martíllope pemoldea vaʼerã.+ 37 Pejapo vaʼerã 7 lamparaʼi oñemoĩtava pe kandelávrore,* ha pemyendy vove ohesapéta upe lugár oĩha.+ 38 Pejapo vaʼerã avei de óro púro umi pínsa ojepurútava ojepeʼa hag̃ua umi lamparaʼi mécha, ha avei umi mbaʼyruʼi ojepurútava oñemoĩ hag̃ua umi mécha tujakue.+ 39 Pe kandelávro ha hembiporukuéra oreko vaʼerã 34 kílo 200 grámo* de óro púro. 40 Ehechákena tojejapo ko modélo ahechauka hagueichaite ndéve ko montáñape”.+