1 Crónicas

12 Koʼãva hína umi kuimbaʼe ou vaʼekue David rendápe Ziclágpe,+ upérõ haʼe okañy hína kuri oikóvo Saúlgui,+ haʼéva Quis raʼy. Ha koʼã kuimbaʼe oĩ vaʼekue umi gerréro ipoderósova apytépe oipytyvõva Davídpe gerrahápe.+ 2 Hiʼarmakuéra haʼe vaʼekue árko ha flécha, ha oipurukuaa vaʼekue hikuái ipo derécha ha ijiskiérda+ opoi hag̃ua ita umi óndape*+ ha flécha umi árkope. Haʼekuéra hína Saúl ermanokuéra,* Benjamín trivugua.+ 3 Omoakã chupekuéra Ahiézer, ha upéi oĩ Joás, koʼãva hína Semaá pe guibeatita+ raʼy, avei oĩ Jeziel ha Pélet, koʼãva hína Azmávet+ raʼy, avei Beracá, Jehú pe anatotita, 4 Ismayá pe gabaonita,+ haʼe peteĩ gerréro ipoderósova umi 30 apytépe+ ha omoakã vaʼekue avei umi 30-pe, avei Jeremías, Jahaziel, Johanán, Jozabad pe guederatita, 5 Eluzái, Jerimot, Bealías, Semarías, Sefatías pe harifita, 6 Elcaná, Isías, Azarel, Joézer, Jasobeam, umi coreíta,+ 7 avei Joelá ha Zebadías, koʼãva hína Jeroham raʼy, haʼe hína Guedorgua.

8 Unos kuánto gadita ohasa vaʼekue David ládo, ha oho hendápe pe lugár isegúro porãvape pe desiértope.+ Haʼekuéra ningo gerréro ipoderósova, soldádo oĩva entrenádo oñorairõ hag̃ua ha oipurukuaáva eskúdo guasu ha lánsa. Hovakuéra ojogua leónpe ha iñakuãiterei hikuái umi guasuʼi oikóvaicha umi montáñare. 9 Omoakã vaʼekue chupekuéra Ézer, pe segundo Abdías, pe tercero Eliab, 10 pe cuarto Mismaná, pe quinto Jeremías, 11 pe sexto Atái, pe sieteha Eliel, 12 pe ochoha Johanán, pe nueveha Elzabad, 13 pe diezha Jeremías, pe onceha Macbanái. 14 Koʼãva hína umi gadita,+ haʼekuéra omoakã vaʼekue pe ehérsito. Pe ikangyvéva ijapytepekuéra ikatu vaʼekue ogana 100 kuimbaʼépe ha pe imbaretevéva ikatu vaʼekue ogana 1.000 kuimbaʼépe.+ 15 Koʼãva hína umi kuimbaʼe ohasa vaʼekue pe Jordán pe primer méspe, pe rrío orrevosa ha osẽmbárõ guare pe ijoríllare. Haʼekuéra omosẽ ha omosarambipa éste ha oéste gotyo enterove umi oiko vaʼekuépe umi yvy ivahovehápe.

16 Unos kuánto kuimbaʼe Benjamín ha Judá trivugua ou avei David rendápe pe lugár isegúro porãvape.+ 17 Upémarõ David osẽ hendapekuéra ha heʼi: “Oiméramo pendepyʼaporãgui peju chepytyvõ hag̃ua, upéicharõ ñande oñoamígota. Péro oiméramo peju chetraisiona ha chentrega hag̃ua che kontrariokuérape, che ndajapóiramo jepe mbaʼeve ivaíva, upéicharõ ñande tuakuéra ypykue Jára tohecha ha tohusga upéva”.+ 18 Upépe Ñandejára espíritu oipytyvõ Amasáipe,+ pe omoakãvape umi 30-pe, ha heʼi:

“David, ore ningo nde siérvo, ha roime nendive Jesé+ raʼy.

Upémarõ David orresivi ha onombra chupekuéra omoakã hag̃ua umi soldadokuérape.

19 Unos kuánto kuimbaʼe Manasés trivugua oheja avei Saúl ehérsito ha oho omoirũ Davídpe, haʼe oúrõ guare umi filistéondi oñorairõ hag̃ua Saúl kóntrape. Péro haʼe noipytyvõi umi filistéope, pórke umi governánte filisteo+ heta oñemongeta rire oñondive omondo jeýnte Davídpe, pórke heʼi hikuái: “Haʼe ningo ohasa jeýta hína Saúl ládope ha ñandejukáta”.+ 20 Ha David ohórõ guare Ziclágpe,+ Manasés trívugui ohasa vaʼekue iládo koʼãva: Adná, Jozabad, Jediael, Miguel, Jozabad, Elihú ha Ziletái, haʼekuéra omoakã umi mílespe Manasés trívupe.+ 21 Haʼekuéra oipytyvõ vaʼekue Davídpe oñorairõrõ guare una partída mondahándi, pórke umi kuimbaʼe Manasés trivugua ipoderóso ha ipyʼaguasu,+ ha oiko vaʼekue chuguikuéra ehérsito ruvicha. 22 Káda día heta hetave umi oúva David rendápe+ oipytyvõ hag̃ua chupe, ha amo ipahápe oĩma hetaiterei soldádo ha ojoguáma voi hikuái Ñandejára ehérsitope.+

23 Koʼápe oñemombeʼu mboýpa oĩ en totál umi gerréro oĩva preparádo oñorairõ hag̃ua, ha ou vaʼekue David rendápe Hebrónpe+ omoĩ hag̃ua chupe hikuái ogoverna hag̃ua Saúl rekovia, omanda haguéicha Jehová.+ 24 Umi kuimbaʼe Judá trivugua oipurúva eskúdo guasu ha lánsa, umi oĩva preparádo oñorairõ hag̃ua oĩ vaʼekue 6.800. 25 Umi kuimbaʼe Simeón trivugua, ipoderóso ha ipyʼaguasúva pe ehersitopegua oĩ vaʼekue 7.100.

26 Umi kuimbaʼe Leví trivugua 4.600. 27 Jehoiadá+ omoakã vaʼekue Aarón raʼykuérape,+ ha hendive oĩ vaʼekue 3.700 kuimbaʼe, 28 avei Sadoc,+ peteĩ kariaʼy ipoderóso ha ipyʼaguasúva, ha hendive 22 kuimbaʼe omoakãva itúa ypykue familiarépe.

29 Umi kuimbaʼe Benjamín trivugua, Saúl ermanokuéra,*+ oĩ vaʼekue 3.000, umíva apytégui heta oĩ oñangareko vaʼekue umi mbaʼerepy oĩvare Saúl rógape. 30 Umi kuimbaʼe Efraín trivugua oĩ vaʼekue 20.800 kuimbaʼe, ipoderóso, ipyʼaguasu ha ifamósova umi omoakãva ituakuéra ypykue familiare apytépe.

31 Manasés trívu alamitarégui oĩ vaʼekue 18.000 kuimbaʼe, káda únope ojeporavo vaʼekue hérarupi ou hag̃ua omoĩ rréiramo Davídpe. 32 Umi kuimbaʼe Isacar trivugua, umi kuimbaʼe omoakãva chupekuéra apytépe oĩ vaʼekue 200 kuimbaʼe oikuaáva mbaʼe tiempoitépepa Israel ojapo vaʼerã káda kósa, ha kompletoite umi iñermanokuéra oĩ vaʼekue ipoguypekuéra. 33 Umi kuimbaʼe Zabulón trivugua oĩ vaʼekue 50.000 ikatúva oservi pe ehérsitope, ha oĩva preparádo oho hag̃ua oñorairõ ha orekopaitéva umi árma gerrahápe g̃uarã. Enterovete haʼekuéra ou omoirũ Davídpe ipyʼaite guive.* 34 Neftalí trivugua oĩ vaʼekue 1.000 kuimbaʼe oporomoakãva, ha hendivekuéra oĩ 37.000 kuimbaʼe oipurúva eskúdo guasu ha lánsa. 35 Umi kuimbaʼe Dan trivugua, umi oĩva preparádo oho hag̃ua oñorairõ oĩ 28.600. 36 Umi kuimbaʼe Aser trivugua oĩ vaʼekue 40.000 ikatúva oservi pe ehérsitope, ha oĩva preparádo oho hag̃ua oñorairõ.

37 Pe ótro ládo pe Jordángui,+ umi rubenita, umi gadita ha Manasés trívu alamitarégui, oĩ vaʼekue 120.000 soldádo orekóva opaichagua árma gerrahápe g̃uarã. 38 Kompletoite koʼã kuimbaʼe oñorairõkuaa ha oñemoĩ vaʼekue chupekuéra por grúpo oho hag̃ua oñorairõ, haʼekuéra oñomoirũ ha ou Hebrónpe oapoja hag̃ua Davídpe ipyʼaite guive ha omoĩ hag̃ua chupe rréiramo Israélpe. Ha kompletoite umi ótro israelita oĩ peteĩ ñeʼẽme oipotágui David oĩ rréiramo.+ 39 Ha opyta hikuái upépe David ndive 3 día aja, okaru ha hoʼu víno, umi kuimbaʼe Judagua ningo opreparapáma voi kuri chupekuéra g̃uarã koʼã mbaʼe. 40 Umi oĩva ag̃ui chuguikuéra ha avei umi oĩva mombyry, tahaʼe Isacar, Zabulón ha Neftalí trivugua ou ogueru hiʼupy vúrro ári, kaméllo ári, mburika ha guéi ári. Ogueru hikuái hetaiterei arína, tórta ojejapóva ígo ha úva pásagui, víno, aséite, vaka ha ovecha, pórke umi hénte ovyʼapa hína kuri Israélpe.