2 Reyes

10 Acab+ ningo oreko vaʼekue 70 itaʼýra Samáriape. Upéi Jehú oskrivi kárta ha oguerahaka Samáriape, umi ofisiál omanda guasúvape oĩva Jezreélpe, umi kuimbaʼe omoakãvape*+ pe puévlo ha umi oñangarekóvape Acab raʼykuérare. Ha heʼi kóicha: 2 “Ko kárta og̃uahẽ vove peẽme, pende ruvicha raʼykuéra oĩta penendive ha avei umi kárro de gérra, umi kavaju, umi armakuéra ha peiméta pe siuda imurallapávape. 3 Peiporavo pe ivalevéva ha ikatupyryvéva pende ruvicha raʼykuéra apytégui ha pemoĩ chupe oguapy hag̃ua itúa trónope. Upéi peñorairõ ha pedefende pende ruvicha róga”.

4 Péro haʼekuéra okyhyjeterei ha heʼi ojupe: “Mokõi rréi ndaikatúi kuri ipuʼaka hese,+ ¿ha mbaʼéicha piko ñande ñandepuʼakáta hese?”. 5 Upémarõ pe oñenkargáva pe palásiore, ha pe governadór pe siudapegua, umi omoakãva pe puévlo ha umi oñangarekóva Acab raʼykuérare, omondo ko mensáhe Jehúpe: “Ore ningo nde siérvo ha rojapóta entéro mbaʼe eréva oréve. Ore noromoĩmoʼãi ótrope rréiramo. Ore roiméta nde ykére opa mbaʼe rejapóvape”.

6 Upémarõ Jehú oskrivi jey chupekuéra ótra kárta, ha heʼi: “Peẽ peiméramo che ládo ha peime pejapo hag̃uáicha haʼéva peẽme, upéicharõ pegueru chéve pende ruvicha raʼykuéra akãngue, ha peju che rendápe koʼẽrõ koʼã órape Jezreélpe”.

Ha umi 70 rréi raʼy oĩ hína kuri umi kuimbaʼe iñimportántevandi pe siudápe, umi omongakuaa vaʼekuéndi chupekuéra. 7 Ha og̃uahẽmírente chupekuéra pe kárta, ojagarra ojuka hikuái pe rréi raʼykuérape, umi 70 itaʼýrape+ ha umi iñakãngue omoĩ hikuái kanástope ha oguerahaka Jehúpe, Jezreélpe. 8 Pe mensahéro oike Jehú rendápe ha heʼi chupe: “Haʼekuéra ogueru hína pe rréi raʼykuéra akãngue”. Upémarõ haʼe heʼi: “Pemoĩ ojoʼári mokõi hendápe pe siuda entrádape ha topyta upépe koʼẽrõ pyhareve peve”. 9 Ha Jehú osẽrõ guare pyharevete, oñemboʼy pe puévlo renondépe ha heʼi: “Peẽ ndapejapói mbaʼeve ivaíva.* Che la apuʼã vaʼekue ñemiháme che ruvicháre ha ajuka chupe,+ ¿péro máva piko ojuka raʼe koʼãvape? 10 Peikuaa porãke Jehová ñeʼẽ oñekumpliha katuete, ni peteĩ mbaʼe Jehová heʼi vaʼekue Acab rogayguáre ndopytamoʼãi oñekumpliʼỹre.+ Jehová ojapo upe heʼi vaʼekue isiérvo Elías rupive”.+ 11 Upéi, Jehú ojuka avei enterovete Acab rogaygua hembývape Jezreélpe, kompletoite umi kuimbaʼe iñimportántevape, umi isaserdotekuéra ha Acab amigokuérape,+ ha ni peteĩ ndojesalvái chugui.+

12 Upéi Jehú opuʼã oho Samáriape, ha tapére oĩ pe óga oñeñapytĩha umi ovechakuéra.* 13 Upépe Jehú otopa pe rréi Ocozías+ de Judá ermanokuérare ha heʼi chupekuéra: “¿Peẽ piko máva hína?”. Ha haʼekuéra heʼi chupe: “Ore ningo Ocozías ermanokuéra, ha rovahea hína rohecha hag̃ua oĩ porãntepa hína pe rréi raʼykuéra ha avei pe rréina membykuéra”. 14 Ensegída heʼi Jehú: “¡Pejagarra chupekuéra, péro ani pejuka!”. Upémarõ ojagarra chupekuéra hikuái ha ogueraha ojuka umi 42 kuimbaʼépe pe alhíve* ypýpe, oĩva pe óga oñeñapytĩháme umi ovechakuéra. Ha ni peteĩ ndojesalvái Jehúgui.+

15 Haʼe osẽvo upégui, ojotopa Jehonadab+ ndive, haʼéva Recab+ raʼy, oúva hína ohug̃uaitĩ hag̃ua chupe. Ha Jehú osaludávo* chupe, heʼi: “¿Ndépa cheapoja nde pyʼaite guive, che roapojaháicha che pyʼaite guive?”.

Ha Jehonadab heʼi: “Si, che roapoja”.

Upémarõ Jehú heʼi chupe: “Oiméramo upéicha, embohasa chéve nde po”.

Ha haʼe ombohasa chupe ipo ha Jehú oitira chupe ojupi hag̃ua hendive ikárrope. 16 Upéi Jehú heʼi chupe: “Eju jaha chendive ha tahechauka ndéve mbaʼéichapa ndahejái avave opuʼã Jehová kóntrape”.+ Upémarõ Jehú ogueraha chupe hendive ikárro de gérrape. 17 Upéi Jehú og̃uahẽ Samáriape ha ojukapaite Acab rogaygua hembývape Samáriape, ha péicha ohundipaite chupekuéra,+ Jehová heʼi hagueichaite Elías rupive.+

18 Jehú ombyatypaite avei umi héntepe ha heʼi: “Acab ndojapói vaʼekue opa ikatúva oadora hag̃ua Baálpe,+ péro che, Jehú, katu ajapóta ikatumíva entéro aadora hag̃ua chupe. 19 Upévare pehenoika enterovete Baal profetakuérape,+ enterove umi oadorávape chupe ha kompletoite isaserdotekuérape.+ Aníkena ofalta ni peteĩ, pórke ajapose peteĩ sakrifísio tuicháva Baálpe g̃uarã. Oimeraẽ ofaltáva, ojejukáta”. Péro Jehú omoñuhãnte hína kuri chupekuéra ikatu hag̃uáicha ohundi umi oadorávape Baálpe.

20 Upéi Jehú heʼi: “Tojejapo* peteĩ rreunión sagráda Baálpe g̃uarã”. Upémarõ oanunsia hikuái upéva. 21 Upéi Jehú omondo peteĩ mensáhe Israel tuichakuére, ha kompletoite umi oadoráva Baálpe oupaite. Haʼekuéra oikepaite Baal témplope,*+ ni peteĩ ndopytái okápe, ha Baal témplo henyhẽte. 22 Ha Jehú heʼi pe kuimbaʼe oñenkargávape pe kotýre oñeñongatuhápe ao: “Emeʼẽ ijaorã enterovete umi oadorávape Baálpe”. Upémarõ oguenohẽ ha omeʼẽ chupekuéra umi ao. 23 Upéi Jehú ha Jehonadab,+ Recab raʼy, oike Baal témplope, ha heʼi umi oadorávape Baálpe: “Peheka porãke ndaipóripa hína koʼápe umi oadoráva Jehovápe, umi oadoráva Baálpe añoiténte oĩ vaʼerã”. 24 Upéi hasypeve oho hikuái oofrese hag̃ua sakrifísio ha ojapo hag̃ua ofrénda ojehapýva. Jehú omoĩ kuri okápe 80 kuimbaʼe ha heʼi chupekuéra: “Peẽ pehejáramo odipara pendehegui peteĩva koʼã kuimbaʼe, upéicharõ peẽ pemanóta hekovia”.*

25 Ha ojapopamírente hikuái pe ofrénda ojehapýva, Jehú heʼi umi guárdia ha umi ajudántepe: “¡Peike ha pejuka chupekuéra! Aníke peheja ni peteĩ okañy”.+ Upémarõ umi guárdia* ha umi ajudánte ojuka chupekuéra espádape ha omombo umi hénte reʼongue okápe, ha oho hese hikuái Baal témplo ruguaite peve, oĩháme pe santuário.* 26 Upéi haʼekuéra oguenohẽ umi kolúmna sagráda+ oĩva Baal témplope ha ohapypaite hikuái.+ 27 Haʼekuéra oity avei Baal kolúmna sagráda+ ha oitypaite Baal témplo.+ Upéi ojapo chugui hikuái váño púvliko ha péicha opyta koʼag̃aite peve.

28 Péicha Jehú ohundi Baálpe Israélgui. 29 Péro Jehú osegi ojapo umi mbaʼe vai ojapo vaʼekue Jeroboán, Nebat raʼy, haʼe omboliga vaʼekue Israélpe oadora hag̃ua umi vaka raʼy raʼanga de óro oĩva Betel ha Dánpe.+ 30 Upévare Jehová heʼi Jehúpe: “Rejapo rupi iporãva ha umi mbaʼe che aguerohorýva, rekumplívo entéro mbaʼe adesidi vaʼekue ajapo Acab rogayguáre,+ upévare ne familiare, pe cuarta henerasión peve oguapýta Israel trónope”.+ 31 Péro Jehú noñatendéi oiko hag̃ua ipyʼaite guive Israel Jára Jehová léi heʼiháicha.+ Haʼe osegi ojapo umi mbaʼe vai ojapo vaʼekue Jeroboán ha ojapoka vaʼekue avei Israélpe.+

32 Upe tiémpope Jehová oheja vaʼekue ojejagarra* Israel território párte por párte. Ha Hazael osegi oataka chupekuéra Israel território tuichakuére,+ 33 oñepyrũ éste gotyo pe Jordán guive, Galaad território kompletoite, oĩháme umi trívu de Gad, Rubén ha Manasés,+ ha Aroer guive, oĩva Arnón Ñu* ypýpe, Galaad ha Basán peve.+

34 Jehú istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu entéro mbaʼe ojapo vaʼekue ha mbaʼeichaitépa ipoderóso. 35 Jehú omano ha oñeñotỹ chupe Samáriape, ha itaʼýra Jehoacaz+ opyta rréiramo hekovia. 36 Jehú ogoverna vaʼekue Israel 28 áñore Samaria guive.