Mateo

25 “Upéicharõ pe Rréino yvagapegua ojogua 10 kuñataĩ vírhenpe ojagarráva ilámpara+ ha osẽva ohug̃uaitĩ pe nóvio omendátavape.+ 2 Umíva apytépe oĩ 5 oñembotavýva ha 5 iñarandúva.+ 3 Umi oñembotavýva ogueraha la ilámpara, péro ndorahái aséite oikotevẽvérõ g̃uarã. 4 Umi iñarandúva katu oraha ilámpara ha aséite peteĩ mbaʼyrúpe. 5 Péro pe nóvio nog̃uahẽi ha umi kuñataĩ hopehyietereíma, upémarõ enterovéva opyta oke. 6 Upéi pyharepytépe oñehendu peteĩ osapukáiva: ‘¡Koʼápe ou la nóvio! Pesẽ pehug̃uaitĩ chupe’. 7 Upémarõ enterove umi kuñataĩ opuʼã ha oprepara ilamparakuéra.+ 8 Umi oñembotavýva heʼi umi iñarandúvape: ‘Pemeʼẽna oréve michĩmi pende aséite, pórke ore lámpara ogue potaitéma hína’. 9 Umi iñarandúva okontesta chupekuéra: ‘Romeʼẽramo peẽme, ikatu nañanderupytypái hína. Tapehóna pejogua penembaʼerã’. 10 Haʼekuéra oho aja ojogua, og̃uahẽ pe nóvio, ha umi kuñataĩ ojeprepara vaʼekue oike hendive pe kasamientohápe,+ ha pe okẽ oñemboty. 11 Upéi ou avei umi ótra kuñataĩ ha heʼi: ‘¡Karai, karai, eavrimína oréve!’.+ 12 Pe nóvio okontesta chupekuéra: ‘Añetehápe haʼe peẽme, che ndapoikuaái’.

13 Upévare, peñatende porãke siémpre,+ pórke ndapeikuaái mbaʼe día ni mbaʼe órapa oikóta koʼã mbaʼe.+

14 Pe Rréino yvagapegua ojogua peteĩ karaípe oviahátava ótro paíspe. Péro oho mboyve, ohenoika ijesklavokuérape ha oheja ikargopekuéra umi mbaʼe orekóva.+ 15 Pe patrón oikuaa mboýpa káda uno ikatu okuida porã. Upévare peteĩvape omeʼẽ 5 vosa henyhẽva monéda de plátagui,* ótrope mokõi ha ótrope katu peteĩ. Upéi pe karai osẽ oho ótro paíspe. 16 Pe orresivi vaʼekue 5 vosa, pyaʼe voi oho omombaʼapo ha oganave 5 vosa henyhẽva monéda de plátagui. 17 Péicha avei pe orresivi vaʼekue mokõi, oganave mokõi. 18 Péro pe esklávo orresivi vaʼekue peteĩnte oho ojoʼo peteĩ yvykua ha upépe omokañy ipatrón pláta.

19 Heta tiémpo rire ou jey pe patrón ha ohenói umi ijesklávope oikuaa hag̃ua mbaʼépa ojapo hikuái pe plátagui.+ 20 Primeroite ou pe orresivi vaʼekue 5 vosa henyhẽva monéda de plátagui ha oganave vaʼekue 5. Haʼe heʼi: ‘Che patrón, ndéngo remeʼẽ kuri chéve 5 vosa henyhẽva monéda de plátagui, ha emañamína, aganave 5’.+ 21 Ipatrón heʼi chupe: ‘Oĩ porãiterei la rejapóva. Nde ningo peteĩ esklávo de konfiánsa ha ndeguápo. Nde rehechauka ikatuha akonfia nderehe, upévare amoĩta nde poguýpe hetave mbaʼe.+ Evyʼa chendive’.+ 22 Upéi ou pe orresivi vaʼekue mokõi vosa henyhẽva monéda de plátagui, ha heʼi: ‘Che patrón, ndéngo remeʼẽ kuri chéve mokõi vosa henyhẽva monéda de plátagui, ha emañamína, aganave mokõi’.+ 23 Ipatrón heʼi chupe: ‘Oĩ porãiterei la rejapóva. Nde ningo peteĩ esklávo de konfiánsa ha ndeguápo. Nde rehechauka ikatuha akonfia nderehe, upévare amoĩta nde poguýpe hetave mbaʼe. Evyʼa chendive’.

24 Ipahápe ou pe esklávo orresivi vaʼekue peteĩ vosa henyhẽva monéda de plátagui, ha heʼi: ‘Che patrón, chéngo aikuaa nde rejopyetereiha nde rapichándi. Nde ningo remonoʼõ nereñotỹi haguépe, ha rembyaty trígo ótro omopotĩ vaʼekue.+ 25 Upévare akyhyje ha aha amokañy yvyguýpe pe vosa remeʼẽ vaʼekue chéve henyhẽva monéda de plátagui. Koʼápe agueru jey ndéve’. 26 Upémarõ ipatrón ombohovái chupe: ‘Nde tembiguái ateʼỹ ha nderevaléiva mbaʼeverã.* Nde ningo ere che amonoʼõha nañotỹi haguépe, ha ambyatyha trígo ótro omopotĩ vaʼekue. 27 ¿Mbaʼére piko upéicharõ ndereguerahái raʼe che pláta vánkope? Upéicharire, ag̃uahẽvo oñemeʼẽ vaʼerãmoʼã chéve che pláta kon interés’.

28 Ha heʼi isiervokuérape: ‘Peipeʼa chugui pe vosa ha pemeʼẽ pe orekóvape 10 vosa henyhẽva monéda de plátagui.+ 29 Enterove oguerekóvape álgo oñemeʼẽvéta oguereko hag̃ua hetave, pe ndoguerekóivagui katu, upe oguerekomíva jepe ojepeʼáta chugui.+ 30 Ha pe esklávo ndovaléiva mbaʼeverã, pemombo amo okápe, pytũmbýpe. Upépe haʼe hasẽ soróta ha ojedesesperáta’.*

31 Pe Yvypóra Raʼy+ og̃uahẽ vove tuicha autorida reheve ha entéro umi ánhel ndive,+ oguapýta itróno omimbipávape. 32 Ha entéro tetãnguéra oñembyatýta henondépe, ha haʼe oseparáta umi héntepe, pe pastór oseparaháicha umi ovecha, umi kavarágui. 33 Omoĩta umi ovecha+ ideréchape ha umi kavara katu omoĩta ijiskiérdape.+

34 Upéi che, pe Rréi, haʼéta umi oĩvape che deréchape: ‘Peẽ perekóva che Túa vendisión, peju ha perresivi umi vendisión oguerúva* Ñandejára Rréino. Umíva ojeprepara vaʼekue peẽme g̃uarã oñepyrũ mboyve ifamília* umi yvypóra. 35 Pórke che cheñembyahýi kuri ha peẽ chemongaru, cheuhéi ha peẽ pemeʼẽ chéve y haʼu hag̃ua. Ndachekuaáiramo jepe cherresivi vyʼápe pende rógape.+ 36 Che ndacheaóirõ guare, pemeʼẽ chéve che aorã.+ Cherasýrõ guare peñangareko cherehe. Aimérõ guare kárselpe, peẽ chevisita’.+ 37 Upérõ umi ihústova heʼíta chéve: ‘Che Ruvicha, ¿arakaʼe piko rohecha neñembyahyiha ha romongaru, térã ndeuheiha ha romeʼẽ ndéve y?+ 38 ¿Arakaʼe piko rorresivi ore rógape vyʼápe ndoroikuaáiramo jepe mávapa nde? ¿Arakaʼe piko rohecha nandeaoiha ha romeʼẽ ndéve nde aorã? 39 ¿Arakaʼe piko rohecha raʼe nderasyha térã reimeha kárselpe ha roho rovisita?’. 40 Ha che, pe Rréi, akontestáta chupekuéra: ‘Añetehápe haʼe peẽme: pejapórõ guare iporãva peteĩ koʼã che ermáno michĩvéva rehehápe jepe, cherehehápe pejapo kuri’.+

41 Upéi che haʼéta umi oĩvape che iskiérdape: ‘Tapeho koʼágui,+ pórke Ñandejára penekondena peho hag̃ua pe tatarendy núnka ndoguéivape,+ pe kastígo orresivítava pe Diablo ha idemoniokuéra.*+ 42 Cheñembyahýi kuri ha peẽ nachemongarúi, cheuhéi ha napemeʼẽi kuri chéve y haʼu hag̃ua. 43 Ndarekói kuri moõpa apytáta ha peẽ ndacherresivíri pende rógape, ndacheaói kuri ha napemeʼẽi chéve che aorã, cherasy ha aime kuri kárselpe péro napeñangarekói cherehe’. 44 Haʼekuéra katu heʼíta: ‘Che Ruvicha, ¿arakaʼe piko ore rohecha neñembyahyiha, ndeuheiha, ndereguerekoiha moõpa repytáta, nandeaoiha, nderasyha térã reimeha kárselpe ha noroñatendéi nderehe?’. 45 Che akontestáta chupekuéra: ‘Añetehápe haʼe peẽme: napeipytyvõirõ guare peteĩva koʼã che ermáno michĩvévape, chéve nachepytyvõi’.+ 46 Ha umi ojapóva péicha oñehundíta opa ára g̃uarã,+ péro umi ihústova oikovéta pára siémpre”.+