2 Tesalonicenses

1 Che Pablo, Silvano,* ha Timoteo,+ romondo ko kárta pe kongregasión oĩvape Tesalónicape, haʼéva Ñandejára pe Túa mbaʼe ha ñande Ruvicha Jesucristo mbaʼe:

2 Aipotaite Ñandejára, haʼéva pe Túa, ha ñande Ruvicha Jesucristo mbaʼeporã* ha ipyʼaguapy toĩ penendive.

3 Ermanokuéra, ore ningo roreko pe rresponsavilida roagradesévo Ñandejárape penderehe. Iporã rojapo upéva pórke pende jerovia imbareteterei ohóvo ha pejoayhuetereive.+ 4 Upévare ore oreorgullóso pendereheve+ Ñandejára kongregasionkuéra apytépe, pórke peẽ peaguanta ha pehechauka pejeroviaha pejepersegi ha pehasáramo* jepe heta mbaʼe ijetuʼúva.*+ 5 Upéva ohechauka Ñandejára oporohusgaha hustísiape ha upéicha rupi haʼe heʼíta peẽ pemereseha perresivi Ñandejára Rréino, ha añetehápe upévare voi peẽ pehasa asy hína.+

6 Ñandejára ihústo rupi okastigáta umi penembohasa asývape.+ 7 Ág̃a ñande Ruvicha Jesús ojechauka+ vove yvága guive tatarendýpe hiʼanhelkuéra ipoderósovandi,+ haʼe penemombytuʼúta peẽ pehasa asývape koʼág̃a ha oréve avei. 8 Upe tiémpope haʼe okastigáta umi ndoikuaáivape Ñandejárape ha umi naiñeʼẽrendúivape umi notísia porãme, oñeʼẽva ñande Ruvicha Jesús rehe.+ 9 Ñande Ruvicha ohusgáta koʼãvape ha okastigáta chupekuéra ohundívo pára siémpre.+ Upéicharõ haʼe nomañamoʼãvéima hesekuéra ha ndoipurumoʼãvéima ipodér tuichaitéva oipytyvõ hag̃ua chupekuéra. 10 Ñande Ruvicha ou vove oñembotuicha hag̃ua iñermanokuéra ojeporavo vaʼekuéndi,* entéro umi ojeroviáva hese ohecharamóta chupe. Ha peẽ peguerovia rupi umi mbaʼe roʼe vaʼekue peẽme, peiméta avei ijapytepekuéra.

11 Upévare ore siémpre roñemboʼe penderehe ha rojerure Ñandejárape heʼi hag̃ua penderehe pemereseha haʼe penerenói,+ ha péicha haʼe tokumpli entéro mbaʼe porã haʼe ojaposéva ipodér rupive ha tapenepytyvõ osẽ porã hag̃ua peẽme entéro mbaʼe porã pejapóva pejerovia rupi. 12 Péicha ñande Ruvicha Jesús réra oñembotuicháta peẽ rupive ha peẽ avei peñembotuicháta haʼe rupive. Péva oikóta ojehechauka hag̃ua Ñandejára ha ñande Ruvicha Jesucristo imbaʼeporãitereiha.