Ezequiel

40 Roimérõ guare prisionéroramo ótro tetãme, pe áño 25-pe,+ oñepyrũvo pe áño, pe día 10 del méspe, 14 áño ojejagarra haguépe pe siuda de Jerusalén,+ upe diaitépe voi Jehová podér* ou che ári ha chegueraha pe siudápe.+ 2 Umi visión oúva rupive Ñandejáragui, haʼe chegueraha Israel yvýpe ha cherupi peteĩ montáña ijyvatetereíva ári,+ upépe oĩ peteĩ óga guasu ojoguáva peteĩ siuda oĩvape sur gotyo.

3 Cheguerahárõ guare upépe, ahecha peteĩ kuimbaʼe omimbíva kóvreicha.+ Haʼe oreko ipópe peteĩ piolín de líno* ha peteĩ takuára ojepurúva oñemedi* hag̃ua,+ ha haʼe oñemboʼy hína kuri pe okẽme. 4 Pe kuimbaʼe heʼi chéve: “Yvypóra raʼy, emaña porãke ha ejapysaka porã ha eñatende porã* opa mbaʼe ahechaukátavare ndéve, pórke upearã rejegueru hína koʼápe. Emombeʼúke Israel rogayguápe entéro mbaʼe rehecháva”.+

5 Ahecha peteĩ murálla ojeréva pe témplore* oka gotyo. Ha pe kuimbaʼe pópe oĩ peteĩ takuára ojepurúva oñemedi hag̃ua, ipukúva 3 métro 11 sentímetro.* Ha haʼe oñepyrũ omedi pe murálla, ha ipe 3 métro 11 sentímetro* ha ijyvate 3 métro 11 sentímetro.*

6 Upéi pe kuimbaʼe ou oĩháme pe okẽ guasu omañáva éste gotyo+ ha ojupi umi igrádare. Upéi omedi pe okẽ entráda, ha ipe 3 métro 11 sentímetro,* upéi omedi pe ótra entráda, ha ipe avei 3 métro 11 sentímetro.* 7 Káda guárdia koty ipuku 3 métro 11 sentímetro,* ha ipe 3 métro 11 sentímetro,* ha umi guárdia koty+ oĩ ojuehegui káda 2 métro 59 sentímetro.* Ha pe okẽ itechopáva entráda omañáva pe témplo gotyo oreko 3 métro 11 sentímetro.*

8 Omedi avei pe okẽ itechopáva entráda hyepy gotyo ha oreko 3 métro 11 sentímetro.* 9 Upéi omedi pe okẽ itechopáva entráda, ha oreko 4 métro 14 sentímetro,* ha upe okẽ itechopáva entráda omaña pe témplo gotyo. Ha omedi avei umi pilár kostadopegua, ha umíva oreko 1 métro 4 sentímetro.*

10 Ha oĩ mbohapy koty umi guardiakuérape g̃uarã, káda ládo pe okẽ oĩvagui éste gotyo. Umi mbohapy koty oreko la mísma medída, ha umi pilár káda kostadopegua peteĩchaite tuicha.

11 Upéi omedi ipekue pe okẽ entráda, ha oreko 5 métro 18 sentímetro,* ha pe okẽ entráda oĩva oka gotyo ipe 6 métro 73 sentímetro.*

12 Ha umi guárdia koty oĩva ojovái oreko henonde gotyo peteĩ muroʼi ijyvatéva 51,8 sentímetro.* Umi guárdia koty oĩva ojovái, káda uno oreko 3 métro 11 sentímetro.*

13 Upéi omedi pe okẽ, ha omedi umi guardiakuéra koty pe itécho* guive pe ótro koty técho oĩva hovái peve, ha ipe 12 métro 95 sentímetro.* Káda guárdia koty entráda oĩ ojovái.+ 14 Upéi omedi umi pilár oĩva káda kostádope, ha umíva ijyvate 31 métro 8 sentímetro,* upéicha avei ijyvate umi pilár orekóva umi okẽ káda ládo oĩva pe korapy jerére. 15 Ha oreko 25 métro 90 sentímetro* pe okẽ frentepegua entráda guive pe ótro okẽ itechopáva entráda peve, upe omañáva hyepy gotyo.

16 Oĩ avei ventána ijuru poʼíva oka gotyo ha ijuru guasúva hyepy gotyo+ umi guárdia kotýpe, ha umi pilár oĩvape umi okẽ kostádope. Umi okẽ itechopáva ryepýpe oĩ avei ventána káda ládo, ha umi pilár káda ládope oreko palméra raʼanga.+

17 Upéi pe kuimbaʼe chegueraha pe korapy okapeguápe, ha ahecha umi komedór*+ ha pe píso oĩva pe korapy jerére. Ha pe píso oĩháme oĩ 30 komedór. 18 Pe píso ojepysóva umi okẽ kostádope oreko la mísma medída orekóva umi okẽ... ko píso ikarapeve pe korapy hyepypeguágui.

19 Upéi omedi ipukukue* pe okẽ entradapegua guive, upéva hína pe okẽ orílla oĩva hyepy gotyo, oñepyrũha meve pe korapy hyepypegua. Upéva oreko 51 métro 80 sentímetro* éste gotyo ha nórte gotyo.

20 Pe korapy okapegua oreko peteĩ okẽ omañáva nórte gotyo, ha haʼe omedi mboýpa ipuku ha ipe. 21 Káda ládo oĩ mbohapy koty umi guárdiape g̃uarã. Umi pilár kostadopegua ha pe entráda itechopáva oreko avei la mísma medída orekóva pe primer okẽ. Upéva ipuku 25 métro 90 sentímetro* ha ipe 12 métro 95 sentímetro.* 22 Umi ventána, pe entráda itechopáva ha umi palméra raʼanga+ oreko la mísma medída orekóva pe okẽ estepegua. Umi hénte ikatu og̃uahẽ upépe ojupívo umi 7 gráda, ha koʼãva oĩ hína pe entráda itechopáva renondépe.

23 Pe korapy hyepypeguápe oĩ peteĩ okẽ opytáva pe okẽ nortepegua rovái, ha ótro okẽ opyta pe okẽ estepegua rovái. Ha pe kuimbaʼe ohecha mboýpa omedi peteĩ okẽgui pe ótro okẽme, ha otopa orekoha 51 métro 80 sentímetro.*

24 Upéi haʼe chegueraha sur gotyo, ha ahecha peteĩ okẽ oĩva sur gotyo.+ Haʼe omedi umi pilár kostadopegua ha pe entráda itechopáva, ha imedidakuéra elmimoite umi ótroicha. 25 Ha káda ládope oreko umi ventána, ha pe entráda itechopáva oreko avei ventána ha umíva ojogua umi ótro ventánape. Upe entráda itechopáva ipuku 25 métro 90 sentímetro* ha ipe 12 métro 95 sentímetro.* 26 Oñeg̃uahẽ hag̃ua upépe ojejupi vaʼerã 7 gráda,+ ha koʼãva renondépe oĩ pe entráda itechopáva. Ha umi pilár kostadopegua oreko palméra raʼanga, peteĩ palméra raʼanga káda pilár rehe.

27 Pe korapy hyepypegua oreko peteĩ okẽ omañáva sur gotyo, ha haʼe omedi sur gotyo peteĩ okẽgui pe ótro okẽme, ha otopa orekoha 51 métro 80 sentímetro.* 28 Upéi chemoinge pe korapy hyepypeguápe, pe okẽ oĩva sur gotyo rupive, ha omedírõ guare pe okẽ oĩva sur gotyo, oreko la mísma medída umi ótro orekóva. 29 Umi koty guárdiape g̃uarã, umi pilár kostadopegua ha pe entráda itechopáva oreko la mísma medída umi ótro orekóva. Ha káda ládope oreko umi ventána, ha pe entráda itechopáva oreko avei ventána. Upéva ipuku 25 métro 90 sentímetro* ha ipe 12 métro 95 sentímetro.*+ 30 Enterove umi okẽ ojepurúva ojehasa hag̃ua pe korapy hyepypeguápe oreko iñentráda itechopáva, ha káda uno ipuku 12 métro 95 sentímetro* ha ipe 2 métro 59 sentímetro.* 31 Pe iñentráda itechopáva omaña pe korapy okapegua gotyo, ha oĩ palméra raʼanga umi pilár kostadopegua rehe,+ ha upépe oñeg̃uahẽ hag̃ua ojejupi vaʼerã 8 gráda.+

32 Chemoingérõ guare pe korapy hyepypeguápe ésteguio ládo, haʼe omedi pe okẽ, ha oreko la mísma medída umi ótro orekóva. 33 Umi koty guárdiape g̃uarã, umi pilár kostadopegua ha pe entráda itechopáva oreko la mísma medída umi ótro orekóva. Ha káda ládope, pe okẽ oreko umi ventána ha pe entráda itechopáva oreko avei ventána. Upéva ipuku 25 métro 90 sentímetro* ha ipe 12 métro 95 sentímetro.* 34 Pe iñentráda itechopáva omaña pe korapy okapegua gotyo, ha oĩ palméra raʼanga umi pilár kostadopegua rehe, ha upépe oñeg̃uahẽ hag̃ua ojejupi vaʼerã 8 gráda.

35 Upéi chegueraha pe okẽ oĩvape nórte gotyo+ ha omedi, ha oreko la mísma medída umi ótro orekóva. 36 Umi koty guárdiape g̃uarã, umi pilár kostadopegua ha pe entráda itechopáva oreko la mísma medída umi ótro orekóva. Ha káda ládope, pe okẽ oreko umi ventána ha pe entráda itechopáva oreko avei ventána. Upéva ipuku 25 métro 90 sentímetro* ha ipe 12 métro 95 sentímetro.* 37 Umi pilár kostadopegua omaña pe korapy okapegua gotyo, ha oĩ palméra raʼanga umi pilár kostadopegua rehe, ha upépe oñeg̃uahẽ hag̃ua ojejupi vaʼerã 8 gráda.

38 Umi pilár ykére oĩ peteĩ komedór, umi pilár oĩ hína umi okẽ kostádope, ha upépe ojejohéi vaʼekue umi ofrénda ojehapypaitéva.+

39 Oĩ vaʼekue mokõi mesa pe entráda itechopáva kostádope, káda ládope, umíva ári ojejuka umi animál ojejapo hag̃ua ofrénda ojehapypaitéva,+ umi ofrénda ojepaga hag̃ua umi pekádore+ ha umi ofrénda por la kúlpa.+ 40 Pe tape ojehohápe pe okẽ oĩvape nórte gotyo, oĩ vaʼekue mokõi mesa oka gotyo pe entrádagui. Oĩ vaʼekue avei mokõi mesa pe okẽ itechopáva entrádape pe ótro ládo. 41 Oĩ vaʼekue 4 mesa káda ládope pe okẽ entrádape, 8 mesa en totál, umíva ári ojejuka vaʼekue umi animál sakrifisiorã. 42 Umi 4 mesa ojepurúva ojejuka hag̃ua umi animál sakrifisiorã, ojejapo vaʼekue ita oñekytĩ ha oñemoldea pyrévagui. Ipukukue oreko 77,7 sentímetro,* ha ipekue oreko 77,7 sentímetro* ha ijyvatekue oreko 51,8 sentímetro.* Umíva ári oĩ vaʼekue umi tembiporu ojepurúva jepi ojejuka hag̃ua umi animál ojejapo hag̃ua ofrénda ojehapýva ha umi sakrifísio. 43 Oĩ vaʼekue umi estánte ipéva 7,4 sentímetro* oñemoĩva alrrededór pe pare rehe hyepy gotyo, ha umi mesa ári oĩ umi animál roʼo ojepurútava ojejapo hag̃ua umi ofrénda oñemeʼẽva rregáloramo.

44 Umi opurahéiva+ komedór oĩ oka gotyo pe okẽ oĩvagui hyepy gotyo. Upéva oĩ pe korapy hyepypeguápe, pe okẽ nortepegua ypýpe, ha omaña sur gotyo. Ótro komedór oĩ pe okẽ estepegua ypýpe, ha omaña nórte gotyo.

45 Haʼe heʼi chéve: “Ko komedór omañáva sur gotyo, oipuru umi saserdóte oñenkargáva umi traváho ojejapóvare pe témplope.+ 46 Pe komedór omañáva nórte gotyo, oipuru umi saserdóte oñenkargáva umi traváho ojejapóvare pe altárpe.+ Umíva hína Sadoc+ raʼykuéra, haʼekuéra ningo levita oñenkargáva oñemboja hag̃ua Jehová renondépe ha oservi hag̃ua chupe”.+

47 Upéi haʼe omedi pe korapy hyepypegua. Ha ipukukue oreko 51 métro 80 sentímetro* ha ipekue oreko 51 métro 80 sentímetro,* pe korapy kuadrádo vaʼekue. Pe altár oĩ vaʼekue pe témplo rovái.

48 Upéi chemoinge pe témplo entráda itechopávape,+ ha omedi pe pilár kostadopegua orekóva pe entráda itechopáva, káda pilár ipe 2 métro 59 sentímetro* peteĩ kostádope, ha pe ótro kostádope ipe 1 métro 55 sentímetro.* Peteĩ pilár oĩ a la iskiérda ha pe ótro a la derécha.

49 Pe entráda itechopáva ipe 10 métro 36 sentímetro* ha ipuku 5 métro 70 sentímetro.* Ha umi hénte og̃uahẽ hag̃ua upépe ojupi vaʼerã umi gráda. Oĩ vaʼekue pilár umi pare kostadopegua ykére, peteĩ pilár káda ládo.+