Judas

1 Che Judas, Santiago+ ermáno ha Jesucristo esklávo, askrivi umi hénte Ñandejára oiporavo+ ha ohayhúvape ha oñangarekóvare ikatu hag̃uáicha oĩ Jesucristo+ ndive:

2 Ñandejára poriahuvereko, pyʼaguapy ha mborayhu taheta hetave peẽme g̃uarã.

3 Che ermanokuéra pohayhuetéva, añehaʼãmbaite kuri askrivi peẽme peteĩ kárta omombeʼúva mbaʼéichapa jajesalváta,+ péro koʼág̃a ahechakuaa tekotevẽha askrivi peẽme ha pomokyreʼỹ peñorairõ mbarete ha pedefende hag̃ua pende jerovia.+ Ko jerovia oñemeʼẽ vaʼekue umi ojeporavo vaʼekuépe* una ves pára siémpre. 4 Askrivi peẽme pórke oĩ kuimbaʼe ñemihaitépe oikéva pende apytépe, umívare ningo Ñandejára Ñeʼẽ yma heʼíma vaʼekue voi ojehusgataha. Koʼã kuimbaʼe aña oipuru Ñandejára mbaʼeporã* ojapo hag̃ua umi mbaʼe ohechaukáva notĩriha hembiapo vai hag̃ua,*+ ha otraisiona ñande Ruvicha peteĩetéva Jesucrístope.+

5 Peẽ peikuaa porãramo jepe entéro koʼã mbaʼe, che pomomanduʼasénte Jehová* oguenohẽ hague peteĩ puévlo Egíptogui,+ péro upéi ohundi umi ndojeroviái vaʼekuépe.+ 6 Ha umi ánhel ndopytái vaʼekuépe iñasignasiónpe* ha oheja rei pe lugár okorrespondéva chupekuéra oiko hag̃ua,+ haʼe oñapytĩ chupekuéra pára siémpre pytũmbyetépe og̃uahẽ meve pe ára guasu ojehusga hag̃ua chupekuéra.+ 7 Upéicha oiko vaʼekue avei Sodoma ha Gomorra ha umi siuda oĩvare ijerére, haʼekuéra oñemeʼẽ avei umi rrelasión sexuál ikyʼávape, ha oreko umi rrelasión sexuál oĩva proivído.+ Chupekuéra ojekastiga vaʼekue tatarendy ogueʼỹvape arakaʼeve, ha opyta ñandéve ehemplorã.+

8 Upéicharõ jepe, koʼã kuimbaʼe opensánte* voi oikóvo mbaʼe tieʼỹre, omongyʼa hapichakuéra rete, ndorrespetái umi orekóvape autorida ha oiko oñeʼẽ vai umi Ñandejára omombaʼévare.+ 9 Péro pe arkánhel*+ Miguel+ oiko vaírõ guare pe Diablo ndive Moisés retekuére,+ haʼe iñumílde ha ndohusgái chupe ha noñemoĩri ojaʼo vaipa chupe,+ síno heʼi: “Jehová* tandekorrehi”.+ 10 Upéicharamo jepe, koʼã kuimbaʼe oiko oñeʼẽ vai entéro mbaʼe oikuaaʼỹvare.+ Ha umi mbaʼe oikuaáva ijehegui rei oikuaaháicha umi animál opensaʼỹva,+ umíva rapykuéri haʼekuéra oñehundi.

11 Hoʼa vaietéta chupekuéra, pórke osegi hikuái Caín rape,+ ha pyaʼe voi osegi Balaam+ ehémplo vai oipotágui ojepaga chupekuéra. Coré+ ojapo haguéicha, haʼekuéra oñeʼẽ vai+ umi orekóvare hesekuéra autorida, ha upévare oñehundi haʼéicha. 12 Koʼãva hína umi ita okañýva y guýpe, oĩva penendive pende karu guasuhápe* pejapo jave umi fiésta ermanokuérandi,+ pastór ndokyhyjéiva+ Ñandejáragui ha opensáva ijehe okaru hag̃uánte. Haʼekuéra ojogua umi arai ohóvape ápe ha pépe yvytu oipejuha gotyo péro ndoguerúiva ama,+ ojogua umi yvyramáta ndahiʼáivape itiémpope, ipirupaitéva ha ojehapoʼóvape. 13 Koʼã kuimbaʼe ojogua umi oláda pochy oĩvape márpe, oguerúva y rembeʼýpe umi mbaʼe kyʼa omotĩ vaʼerã chupekuéra,+ umi estrélla ndorekóivape haperã, ha umívape Ñandejára omoĩta pára siémpre pe lugár pytũ hũvape.+

14 Enoc+ haʼe hína pe séptima persóna oúva Adán familiarégui, ha haʼe heʼi vaʼekue avei hesekuéra oprofetisárõ guare: “¡Pemañami! Jehová* oúma hetaiterei* ánhel ipoderósova ndive,+ 15 ohusgávo opavavépe,+ ha okastiga hag̃ua entéro iñañávape umi mbaʼe vai ojapo vaʼekuére. Ñandejára ojapota upéicha pórke haʼekuéra hembiapo vai. Haʼekuéra ningo pekadór nomombaʼéiva chupe ha oñeʼẽ vaíva hese”.+

16 Koʼã kuimbaʼe ojekehánte voi oikóvo+ ha ojeplagea noñekontentáigui umi mbaʼe orekóvare, oñemeʼẽ umi deséo vai orekóvape+ ha oiko oñembovale. Avei ombojuruheʼẽ hapichakuérape* okonveni rupi chupekuéra.+

17 Péro peẽ che ermanokuéra ahayhuetéva, penemanduʼákena ñande Ruvicha Jesucristo apostolkuéra heʼi* vaʼekuére peẽme ymave. 18 Haʼekuéra heʼími vaʼekue peẽme: “Umi ára pahápe* oúta umi hénte oñembohorýva umi mbaʼe porãre, ha ojapóta hikuái umi mbaʼe vai chupekuéra ogustávante”.+ 19 Koʼãva hína umi oporomoingo vaipáva kongregasiónpe,+ kuimbaʼe oikóva animálcha,* ndoguerekóiva Ñandejára espíritu.* 20 Péro peẽ che ermanokuéra ahayhuetéva, peñemombaretéke pende jerovia sagrádo rupive, ha pe espíritu sánto tapenepytyvõ peñemboʼe jave,+ 21 ikatu hag̃uáicha pesegi peiko Ñandejára mborayhúpe,+ pehaʼarõ aja ñande Ruvicha Jesucristo poriahuvereko ñandegia jaikove hag̃ua pára siémpre.+ 22 Avei pesegíkena peiporiahuvereko+ umi ipyʼamokõivape,+ 23 ha pyaʼe porã pesalva+ chupekuéra peguenohẽvo tatágui. Ha peiporiahuvereko meme umi ótrope, péro peñatendéke pendejehe pejapóvo upéva ani hag̃ua ipekadokuéra máncha penemongyʼa. Peẽ ndapechaʼéi vaʼerã ipekadokuérare.+

24 Ñandejára ikatu oñangareko penderehe ani hag̃ua pepeka,* ha penepotĩ+ hag̃ua ipodér tuichaitéva renondépe ha upéva penembovyʼaitereíta. 25 Ñandejára peteĩetéva ñandesalva Jesucristo rupive, chupe toñembotuicha. Haʼe ningo tuichaiterei, ipoderóso ha oreko autorida pára siémpre, tahaʼe yma, koʼág̃a ha opa árare. Amén.*