Jeremías

38 Upéi Sefatías haʼéva Matán raʼy, Guedalías haʼéva Pasjur raʼy, Jucal+ haʼéva Selemías raʼy, ha Pasjur+ haʼéva Malkiya raʼy ohendu Jeremías oñeʼẽha pe puévlo kompletoitépe, heʼívo: 2 “Péicha heʼi Jehová: ‘Pe opytáva ko siudápe omanóta ñembyahýigui, mbaʼasýgui*+ ha espádape. Péro pe oñentregáva* umi caldéope osegíta oikove* ha ojesalváta, ha péicha oikovéta’.+ 3 Péicha heʼi Jehová: ‘Ko siuda katuete oñentregáta pe rréi de Babilonia ehérsitope, ha haʼe ojagarráta ko siuda’”.+

4 Umi prínsipe heʼi rréi Sedequíaspe: “Ejukaukána ko kuimbaʼépe,+ pórke haʼe omokangy* hína umi soldádo opytávape gueteri ko siudápe, ha omokangy enterovete umi héntepe heʼívo koʼã mbaʼe. Ko kuimbaʼe ningo ndoipotái pyʼaguapy ko puévlope g̃uarã, síno oipotánte voi ou sarambi guasu”. 5 Rréi Sedequías heʼi chupekuéra: “Opyta pende kárgope, pórke che haʼéramo jepe rréi, ndaikatúi ajapo mbaʼeve pojoko hag̃ua”.

6 Upémarõ ojagarra hikuái Jeremíaspe ha opoi chupe peteĩ alhívepe* oĩva pe Guárdia Korapýpe,+ upe alhíve hína Malkiya mbaʼe, haʼe hína pe rréi raʼy.* Haʼekuéra oipuru pióla omboguejy hag̃ua Jeremíaspe. Pe alhíve ningo ndahiʼyvéima, tujúntema la oĩva pype ha Jeremías oñepyrũ oike pe tujukuápe.

7 Pe etíope Ébed-Mélec,+ peteĩ ofisiál* pe rréi palasiopegua oikuaa oñemoinge hague Jeremíaspe pe alhívepe. Ha pe rréi katu upérõ oguapy hína kuri Benjamín Rokẽme.+ 8 Upémarõ Ébed-Mélec osẽ pe rréi palásiogui, ha oho oñeʼẽ pe rréi ndive ha heʼi chupe: 9 “¡Rréi, koʼã mbaʼe ojapo vaʼekue umi kuimbaʼe proféta Jeremías rehe ningo ivaieterei! Haʼekuéra opoi chupe pe alhívepe, ha haʼe omanóta upépe ñembyahýigui, pórke ndaiporivéima hiʼupy ko siudápe”.+

10 Pe rréi omanda pe etíope Ébed-Mélecpe ha heʼi: “Egueraha nendive 30 kuimbaʼe koʼágui ha tapeho peguenohẽ proféta Jeremíaspe pe alhívegui omano mboyve”. 11 Upémarõ Ébed-Mélec ogueraha hendive umi kuimbaʼépe ha oike pe rréi palásiope, peteĩ koty opytávape pe tesorería+ guýpe. Ha ojagarra upégui unos kuánto trápo tuja ha umi téla pedáso itujáva, ha umíva omboguejy piólape pe alhívepe Jeremíaspe. 12 Upéi pe etíope Ébed-Mélec heʼi Jeremíaspe: “Emoĩna umi trápo tuja ha umi téla pedáso nde jyvaguýpe ani hag̃ua nderapy pe pióla”. Ha Jeremías ojapo upéicha, 13 ha ohupi hikuái Jeremíaspe piólape ha oguenohẽ chupe pe alhívegui. Upéi Jeremías opyta pe Guárdia Korapýpe.+

14 Upéi rréi Sedequías omondo proféta Jeremías piári ou hag̃ua hendápe pe tercera entrádape, oĩva Jehová rógape. Ha pe rréi heʼi Jeremíaspe: “Aporanduse ndéve álgo. Aníke reñomi chehegui mbaʼeve”. 15 Ha Jeremías heʼi Sedequíaspe: “Amombeʼúramo ndéve, nde katuete chejukáta, ha añemoñeʼẽramo ndéve, nde nacherendumoʼãi”. 16 Upémarõ rréi Sedequías ohura ñemihaitépe Jeremíaspe ha heʼi: “Ñandejára Jehová oikovévare, pe omeʼẽvare ñandéve ñande rekove,* ahura ndéve ndorojukamoʼãiha, ni noromeʼẽmoʼãiha koʼã kuimbaʼe oikóvape ndejukase”.*

17 Jeremías heʼi Sedequíaspe: “Péicha heʼi Israel Jára Jehová, umi ehérsito yvagapegua ruvicha: ‘Reñentregáramo* pe rréi de Babilonia prinsipekuérape, neremanomoʼãi,* ha ko siuda ndojehapymoʼãi, ha nde ha nde rogaygua napemanomoʼãi.+ 18 Péro nereñentregáiramo* rréi de Babilonia prinsipekuérape, ko siuda oñemeʼẽta umi caldéope, ha haʼekuéra ohapýta,+ ha nde nderejesalvamoʼãi chuguikuéra’”.+

19 Upépe rréi Sedequías heʼi Jeremíaspe: “Chéngo akyhyje umi judío ohasa vaʼekuégui umi caldeo ládope, pórke chentregáramo hikuái umi judíope ikatu hína ohuga vaipa cherehe hikuái”. 20 Péro Jeremías heʼi chupe: “Nanentregamoʼãi hikuái. Neñeʼẽrendumíntena Jehovápe ko mbaʼe haʼévape ndéve, ha resẽ porãta ha péicha nde* resegíta reikove. 21 Péro nereñentregaséirõ,* Jehová heʼi chéve oikotaha koʼã mbaʼe: 22 umi kuña opytáva gueteri pe rréi de Judá palásiope oñeguenohẽta umi rréi de Babilonia prinsipekuérape,+ ha heʼíta hikuái:

‘Umi kuimbaʼe nde rejerovia hague* nembotavy ha ipuʼaka nderehe.+

23 Ha kompletoite ne rembirekokuéra ha nde raʼykuérape oñeguenohẽta umi caldéope, ha nde nderejesalvamoʼãi chuguikuéra, ha pe rréi de Babilonia+ ndejagarráta ha nde káusare ko siuda ojehapýta”.+

24 Upéi Sedequías heʼi Jeremíaspe: “Aníke oikuaa avave koʼã mbaʼe, ani hag̃ua remano. 25 Ha umi prinsipekuéra oikuaáramo añeʼẽ hague nendive, ha ou ne rendápe ha heʼi ndéve: ‘Emombeʼúna oréve mbaʼépa ere kuri pe rréipe, ha aníke reñomi orehegui mbaʼeve, ha ore ndorojukamoʼãi.+ ¿Mbaʼe piko heʼi raʼe ndéve pe rréi?’. 26 Upéicharõ ere vaʼerã chupekuéra: ‘Ajerure hína kuri pe rréipe ani hag̃ua chemondo jey Jehonatán rógape namanoséigui upépe’”.+

27 Tiémpo rire kompletoite umi prínsipe ou Jeremías rendápe ha ombaʼeporandu chupe. Jeremías heʼipaite chupekuéra pe rréi omanda vaʼekue chupe heʼi hag̃ua. Upémarõ ndeʼivéi chupe hikuái mbaʼeve, pórke avave nohendúi kuri chupekuéra oñemongetárõ guare. 28 Ha Jeremías opyta pe Guárdia Korapýpe ojejagarraha día peve Jerusalén.+ Haʼe oĩ gueteri kuri upépe Jerusalén ojejagarrárõ guare.+