Éxodo

9 Upévare Jehová heʼi Moiséspe: “Tereho faraón rendápe ha ere chupe: ‘Ñandejára Jehová, umi hebreokuéra Jára heʼika ndéve: “Epoi che puévlogui oho hag̃ua cheadora.*+ 2 Péro nderepoíriramo chuguikuéra ha resegínteramo rejoko, 3 eikuaa porãke Jehová oipurutaha ipodér+ ha ombohasýta ne rymbakuéra. Hasypaitéta umi animál erekóva guive: umi kavaju, vúrro, vaka, kaméllo, ovecha ha kavarakuéra.+ 4 Ha Jehová nopermitimoʼãi ni peteĩ umi israelita rymbakuéra omano, péro umi egipcio rymbakuéra katu omanombaitéta”’”.+ 5 Jehová omombeʼu avei arakaʼetépa oikóta koʼã mbaʼe, heʼívo: “Che Jehová koʼẽrõ ajapóta koʼã mbaʼe ne retãme”.

6 Ha Jehová ojapo heʼi hagueichaite: al día sigiénte oñepyrũ omano umi egipcio rymbakuéra,+ péro nomanói ni peteĩ umi israelita rymbakuéra. 7 Upéi faraón omondo isiervokuérape oikuaa hag̃ua mbaʼépa oiko raʼe umi israelita rymbakuéragui, ha heʼi chupe hikuái ni peteĩ nomanói hague. Upéicharõ jepe, faraón osegi oñembopyʼahatã ha ndopoíri umi israelítagui.+

8 Jehová upéi heʼi Moisés ha Aarónpe: “Peraha tanimbu pende po renyhẽte, ha Moisés opoi vaʼerã yvate faraón renondépe. 9 Ha oikóta chugui yvytimbo ha ojagarrapaitéta Egipto, ha pe yvytimbo oguenohẽmbaitéta kuru ipeupáva umi egipcio ha umi animalkuérare”.

10 Upémarõ haʼekuéra ogueraha pe tanimbu ha oho faraón rendápe. Ha upépe Moisés opoi yvate pe tanimbu ha oguenohẽmbaite kuru ipeupáva umi egípciore ha umi animalkuérare. 11 Umi saserdóte ojapóva máhia ndaikatúi opyta Moisés renondépe ha osẽ ohopa hese, pórke umi kuru ipeupáva osẽmbaite hesekuéra ha avei enterove umi egípciore.+ 12 Péro Jehová oheja faraón oñembopyʼahatã, upévare nohendúi chupekuéra. Péicha oiko Jehová heʼi hagueichaite Moiséspe.+

13 Upémarõ Jehová heʼi Moiséspe: “Epuʼã pyharevete ha tereho faraón rendápe ha ere chupe: ‘Ñandejára Jehová, umi hebreokuéra Jára, heʼika ndéve: “Epoi che puévlogui oho hag̃ua cheadora. 14 Nderejapóiramo upéicha, amboúta hetaiterei mbaʼe vai nde ári, nde siervokuérare ha nde puévlore. Péicha reikuaáta ndaiporiha ótro cheichagua ko yvy ape ári.+ 15 Che ikatúma kuri aipuru che podér ambou hag̃ua pende ári peteĩ mbaʼasy vai, ha péicha pohundipaite ko yvy ape árigui, ndéve ha avei nde puévlope. 16 Péro che aheja gueteri reikove ahechauka hag̃ua ndéve che podér, ha che réra ojekuaa hag̃ua opárupi ko yvy ape ári.+ 17 Péro nde reikónte reñemombaʼeguasu ha nderepoíri che puévlogui. 18 Upéicha rupi koʼẽrõ pyhareve, koʼã órarupi, amboúta peteĩ torménta ha hoʼáta hetaiterei amandáu. Peichagua torménta amandáu reheve núnka ndoikóiva gueteri Egíptope. 19 Upévare ere nde siervokuérape togueru ne rymbakuéra ha opa mbaʼe reguerekóva técho guýpe. Pórke entéro hénte ha animál opytáva okápe ha ndoikéiva técho guýpe, omanombaitéta hoʼa vove pe amandáu”’”.

20 Faraón siervokuéra ogueroviáva guive Jehová heʼíva,* pyaʼe oho oguerupa técho guýpe umi ijesklávo ha hymbakuéra. 21 Péro umi ndogueroviáiva Jehová heʼíva, ohejánte ijesklavokuéra ha hymbakuéra okápe.

22 Upéi Jehová heʼi Moiséspe: “Emopuʼã nde po yvága gotyo hoʼa hag̃ua amandáu Egíptope.+ Pe amandáu hoʼáta umi héntere, umi animál rehe ha entéro umi plantasión ha yvyramáta oĩvare Egíptope”.+ 23 Upémarõ Moisés ohupi ivastón yvága gotyo ha Jehová ombou pe torménta vai, oñepyrũ osunu, hoʼa rrájo ha amandáu. Péicha Jehová oheja hoʼa kontinuadoite amandáu Egíptope. 24 Ha hoʼa aja pe amandáu, overa, oguyguypa ha hoʼa avei rrájo. Hetaiterei amandáu hoʼa, núnka ndoikóiva gueteri péicha Egíptope.+ 25 Pe amandáu ohundipaite opa mbaʼe opyta vaʼekue okápe. Ojuka hetaiterei hénte ha animál, ohundipaite umi plantasión ha yvyramatakuéra oĩva Egíptope.+ 26 Ha Gosénpe añoite ndoʼái amandáu, upe lugár oikohápe umi israelitakuéra.+

27 Upévare faraón ohenoika Moisés ha Aarónpe ha heʼi chupekuéra: “Koʼág̃a arrekonose afalla hague Jehová kóntrape, haʼe ojapo porã orekastigávo, pórke che ha che retãygua la rofalláva. 28 Ha aipota pejerure cherehe Jehovápe anivéma hag̃ua pe ára ipochy ha hoʼa amandáu. Upéicharõ apoíta pendehegui ha ahejáta peho”. 29 Upémarõ Moisés heʼi chupe: “Asẽmírente ko siudágui ahupíta che po yvága gotyo ha añemboʼéta Jehovápe. Upéi opátama pe ára pochy ha ndoʼamoʼãvéima pe amandáu, péicha reikuaáta Jehová mbaʼeha ko yvy.+ 30 Péro che aikuaa porãma nde ha nde siervokuéra lomímonte ndapejapomoʼãiha Ñandejára Jehová heʼíva”.

31 Upérõ umi plánta de líno* ipotypáma ha pe seváda hiʼapáma avei, upévare oñehundipa oúrõ guare pe amandáu. 32 Péro umi trígope* ndojehúi mbaʼeve pórke umíva tardevéma hoky. 33 Ha Moisés osẽ rire pe siuda faraón oikohágui, ohupi ipo yvága gotyo ha oñemboʼe Jehovápe. Upepete opi, pe ára ndaipochyvéi ha ndoʼavéi pe amandáu.+ 34 Péro faraón ohechávo opimaha, ndaipochyveiha pe ára ha ndoʼaveimaha pe amandáu, haʼe ha isiervokuéra oñembopyʼahatã jeýma.+ 35 Ha Jehová heʼi haguéicha Moiséspe, faraón osegi oñembopyʼahatã ha ndopoíri umi israelítagui.+