Mateo

9 Upémarõ haʼe ojupi pe varkoʼípe, okrusa pe mar ha og̃uahẽ ivállepe.+ 2 Ha upépe ojegueru chupe tupápe peteĩ paralítiko. Ohechávo mbaʼéichapa ojerovia hikuái, Jesús heʼi pe paralítikope: “Ani rejepyʼapy che raʼy, nde pekadokuéra oñeperdonáma”.+ 3 Algúno umi mboʼehára leipegua oĩva upépe oñepyrũ opensa: “Kóva ko kuimbaʼe ndorrespetái Ñandejárape”. 4 Jesús oikuaágui mbaʼépa opensa hikuái, heʼi chupekuéra: “¿Mbaʼére piko pepensa vaiete cherehe?+ 5 ¿Mbaʼépa ifasilve jaʼe? ¿‘Nde pekadokuéra oñeperdonáma’, térã, ‘epuʼã eguata’?+ 6 Péro peikuaa hag̃ua che, pe Yvypóra Raʼy, arekoha autorida aperdona hag̃ua umi pekádo ko yvy ape ári...”, ojere heʼi pe paralítikope: “Epuʼã, ejagarra nde rupa ha tereho nde rógape”.+ 7 Ha haʼe opuʼã oho hógape. 8 Umi hénte ohechávo upe oikóva oñesorprendepa, ha ombotuicha hikuái Ñandejárape omeʼẽ haguére peichagua autorida peteĩ persónape.

9 Upe rire Jesús oho upégui, ha ohecha peteĩ kuimbaʼe hérava Mateo oguapy hína ojekovrahápe impuésto. Jesús heʼi chupe: “Eju chemoirũ”. Ha haʼe opuʼã ha oho hendive.+ 10 Upéi oho Mateo rógape, ha okaru* idisipulokuéra ndive. Upérõ ou avei heta umi okovráva impuésto ha pekadór, ha okaru* hendivekuéra.+ 11 Umi fariséo ohechávo upéva, heʼi Jesús disipulokuérape: “¿Mbaʼére piko pene mboʼehára okaru umi okovrávandi impuésto ha umi pekadór ndive?”.+ 12 Jesús ohendu la heʼíva hikuái ha heʼi: “Umi hesãiva noikotevẽi doktór, péro umi hasýva si oikotevẽ.+ 13 Tapeho pejepyʼamongeta ko mbaʼe Ñandejára heʼívare: ‘Aipota peiporiahuvereko pende rapichápe, pejapo rangue ofrénda’.+ Che ndajúi ajerure umi ihústovape oñarrepenti hag̃ua, síno aju ajerure umi pekadórpe toñarrepenti”.

14 Upéi Juan disipulokuéra ou Jesús rendápe ha heʼi chupe: “Ore ha umi fariséo ningo roajuna, ¿mbaʼére piko upéicharõ nde disipulokuéra noajunái?”.+ 15 Upémarõ Jesús heʼi chupekuéra: “Peteĩ kasamientohápe pe nóvio amigokuéra ndoikói oñembyasy, pórke pe nóvio+ oĩ hendivekuéra, ¿ajépa? Péro upéi pe nóvio ja ndaiporimoʼãvéima hendivekuéra,*+ ha upe tiémpope oajunáta hikuái. 16 Ndaipóri ningo oipurúva peteĩ téla ipyahúva orremenda hag̃ua peteĩ ao tuja osoróva, pórke pe téla ipyahúva imbareteve ha oitiráta pe téla tuja ha osoropavéta.+ 17 Ndaipóri avei omoĩva víno pyahu peteĩ mbaʼyru* tujápe, pórke pe mbaʼyru ikatu orreventa ha pe víno ndoservimoʼãvéima. Upéva rangue pe víno pyahu oñemoĩ mbaʼyru pyahúpe, péicha ni pe víno ni pe mbaʼyru noñembyaíri”.

18 Heʼi aja koʼã mbaʼe, ou hendápe peteĩ governánte, omombaʼe* chupe ha heʼi: “Che rajy ningo hasyete kuri, péro oiméne koʼág̃a omanóma raʼe. Terehóna emoĩmi nde po hiʼári oikove jey hag̃ua”.+

19 Upémarõ Jesús ha idisipulokuéra opuʼã oho pe governántendi. 20 Ha peteĩ kuña 12 áñorema oikóva iñemorráhia,+ oñemboja Jesús rehe hapykuéguio ha opoko ijao ruguáire.+ 21 Pe kuña opensa: “Apokóramo ijaóre jepe akuerátama”. 22 Jesús ojere ha ohechávo chupe heʼi: “Anína rekyhyje che rajy. Rejerovia rupi ningo rekuera”.+ Ha upe guive pe kuña okuera.+

23 Upéi Jesús og̃uahẽ pe governánte rógape, ha ohecha hetaiterei hénte ojaheʼóva ha oĩ umi ombopúva músika jaheʼo fláutape.+ 24 Jesús heʼi chupekuéra: “Pesẽmi koʼágui, pe mitãkuñaʼi ningo nomanói, okénte hína”.+ Ohendúvo upéva umi hénte oñepyrũ opukapa ha oñembohory hese. 25 Osẽmba rire umi hénte, Jesús oike pe mitãkuñaʼi oĩháme, ojagarra chupe ipógui+ ha pe mitãkuñaʼi opuʼã.+ 26 Ha enterove siuda ha puévlo oĩva upe território jerére oikuaa upe oiko vaʼekue.

27 Jesús osẽvo upégui, mokõi siégo+ oho hapykuéri ha osapukái: “David Raʼy, oreporiahuverekomína”. 28 Jesús oike rire peteĩ ógape, oñemboja hendápe umi siégo ha haʼe oporandu chupekuéra: “¿Peẽ piko pejerovia che ikatuha pomonguera?”.+ Haʼekuéra okontesta: “Si, rojerovia ore Ruvicha”. 29 Upémarõ Jesús opoko umi siégo resáre+ ha heʼi chupekuéra: “Pejerovia haguére, pehecha jeýta”. 30 Ha mokõivéva ohecha jey. Upéi Jesús heʼi jey jey chupekuéra: “Aníkena pemombeʼu avavépe”.+ 31 Haʼekuéra katu osẽmíre upégui ohóma omombeʼu entéro siuda ha puévlo oĩvape upe jerére.

32 Umi kuimbaʼe oho rire, umi hénte ogueru Jesús rendápe peteĩ endemoniádo iñeʼẽngúva.+ 33 Jesús omosẽ rire pe demóniope, pe kuimbaʼe iñeʼẽngúva oñeʼẽ.+ Ha umi hénte ohecharamoiterei upe oikóva ha heʼi: “Núnka ndojehecháiva koʼã mbaʼe Israélpe”.+ 34 Umi fariséo katu heʼi: “Haʼe ningo omosẽ umi demóniope pórke oipytyvõ chupe umi demónio ruvicha”.+

35 Ha Jesús okorre umi siuda ha puévlore, omboʼe umi sinagogahárupi ha omombeʼu umi notísia porã oñeʼẽva Ñandejára Rréinore. Avei omonguera opaichagua mbaʼasy.+ 36 Jesús omañávo umi héntere ombyasyeterei chupekuéra,+ pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór.+ 37 Upémarõ heʼi idisipulokuérape: “Hetaiterei oĩ la oñemonoʼõ vaʼerã, péro saʼi travahadór oĩ omonoʼõ hag̃ua.+ 38 Upévare, pejerurékena pe kokue Járape tombou hetave travahadór omonoʼõ vaʼerã”.+