Números

16 Coré+ haʼe hína Izhar+ raʼy, Izhar hína Cohat+ raʼy ha Cohat hína Leví+ raʼy, upéi Coré oho oñomoirũ Datán ha Abiram ndive, haʼekuéra hína Eliab+ raʼy. Omoirũ avei chupekuéra On, Pélez raʼy, Rubén+ familiare. 2 Haʼekuéra opuʼã Moisés rehe, ha omoirũ avei chupekuéra 250 israelita, koʼãva hína umi kuimbaʼe omoakãva pe puévlo, umi ojeporavo vaʼekue, umíva hína umi kuimbaʼe omanda guasúva. 3 Haʼekuéra oñembyaty Moisés ha Aarón kóntrape+ ha heʼi chupekuéra: “¡Orekueráima pendehegui! Enterovete israelita ningo hekopotĩ,*+ ha Jehová oĩ ijapytepekuéra.+ ¿Mbaʼére piko upéicharõ peẽ peñembotuichase Jehová kongregasiónpe?”.

4 Moisés ohendúvo upéva oñesũ ha oñakãityete. 5 Upéi Moisés heʼi Coré ha iñirũnguérape: “Koʼẽrõ pyhareve Jehová oikuaaukáta mávapepa haʼe oiporavo imbaʼerã,+ mávapa ipotĩ ha mávapa oñemoag̃ui vaʼerã hese.+ Ha upe haʼe oiporavóvape,+ upéva oñemoag̃uíta hese. 6 Pejapo ko haʼétava peẽme: Coré, nde ha ne irũnguéra+ pejagarra umi mbaʼyru ojehapyha insiénso,+ 7 ha pemoĩ pype tatapỹi ha hiʼári insiénso, ha pegueraha Jehová renondépe koʼẽrõ. Upe kuimbaʼe Jehová oiporavóva,+ upéva hína la ipotĩva.* ¡Peẽ Leví familiare+ ja pehasáma la rrája!”.

8 Ha Moisés heʼi Corépe: “Pehendumína peẽ Leví familiare. 9 ¿Napemombaʼeiete voi piko Ñandejára pendeporavo hague entéro israelitakuéra apytégui,+ ha opermiti peẽme peñemoag̃ui hese, ikatu hag̃uáicha pembaʼapo Jehová tavernákulope ha peipytyvõ umi ótro israelítape?+ 10 ¿Ha ndéve g̃uarã piko ndahaʼeiete voi mbaʼeve Ñandejára ndegueru hague, ndéve ha umi ne ermanokuéra levítape peñemoag̃ui hag̃ua hese, ha koʼág̃a katu peñehaʼãma oiko hag̃ua pendehegui saserdóte?+ 11 Upévare nde ha enterove umi nemoirũva peñembyaty hína pepuʼã hag̃ua Jehováre. ¿Ha mbaʼéreiko Aarón rehe peñeʼẽ vaíta?”.+

12 Upe rire Moisés ohenoika Datán ha Abirámpe,+ Eliab raʼykuérape, péro haʼekuéra heʼika chupe: “¡No, ndorohomoʼãi! 13 ¿Ndahaʼeiete voi piko ndéve g̃uarã mbaʼeve la oreguenohẽ pe yvy osyryhágui kamby ha eirete orejukapa hag̃ua ko desiértope?+ Ha koʼág̃a katu remandapaséma avei orerehe. 14 ¿Péro moõiko oime pe yvy osyryhápe kamby ha eirete+ ere vaʼekue oréve oreguerahataha? Nde ningo neremeʼẽi oréve pe yvy ore erensiarã ni ore parraltyrã. ¿Ha reipota piko umi kuimbaʼe ndesegi peteĩ siégoicha? ¡No, ndorohomoʼãi asy!”.

15 Moisés katu orrenegaiterei ha heʼi Jehovápe: “Ñandejára, aníkena reguerohory chuguikuéra iñofrénda de semílla. Che ningo ni peteĩ vúrro ndaipeʼáiva chuguikuéra, ha arakaʼeve ndaperhudikáiva chupekuéra”.+

16 Upémarõ Moisés heʼi Corépe: “Koʼẽrõ pyhareve eñepresenta Jehová renondépe, nde ha enterove umi nemoirũva. Reju vaʼerã nde, umi nemoirũva ha Aarón. 17 Káda uno ojagarra vaʼerã imbaʼyru ha omoĩ pype insiénso, ha káda uno opresenta vaʼerã imbaʼyru insiénso reheve Jehová renondépe. Nde, Aarón ha umi 250 kuimbaʼe oñepresenta vaʼerã imbaʼyru reheve”. 18 Upémarõ káda uno ojagarra imbaʼyru ha omoĩ pype tatapỹi ha insiénso, ha opyta oñemboʼy hikuái Moisés ha Aarón ndive pe tavernákulo* entrádape. 19 Coré ha umi omoirũva chupe+ oñembyaty avei ikontrapekuéra pe tavernákulo entrádape, ha upe jave ojechauka Jehová podér tuichaitéva enterove umi israelítape pe tavernákulo ári.+

20 Ha Jehová heʼi Moisés ha Aarónpe: 21 “Pejaparta koʼã héntegui, ikatu hag̃uáicha ahundi chupekuéra peteĩ tesapirĩme”.+ 22 Upépe haʼekuéra oñesũ ha oñakãityete, ha heʼi: “Ñandejára, nde hína pe remoingovéva enterovépe.+ ¿Peteĩ kuimbaʼe opeka haguérente piko ndepochýta enterovete israelítandi?”.+

23 Upémarõ Jehová heʼi Moiséspe: 24 “Ere umi israelítape: ‘¡Pejeíke Coré, Datán ha Abiram róga* ypýgui!’”.+

25 Ha Moisés oho Datán ha Abiram rendápe, ha umi kuimbaʼe omoakãva*+ Israel oho avei hendive. 26 Moisés heʼi umi israelítape: “¡Pejeíkena koʼã kuimbaʼe aña róga ypýgui, ha ani pepoko ni peteĩ ikosakuérare, ani hag̃ua peñehundi avei ipekadokuéra káusare!”. 27 Upepete umi hénte ojei Coré, Datán ha Abiram róga ypýgui. Datán ha Abiram katu osẽ oñemboʼy hóga entrádape ha hendivekuéra hembireko, itaʼyrakuéra ha umi mitã mimi jepe.

28 Upéi Moisés heʼi: “Péicha peikuaáta Jehová chembou hague ajapo hag̃ua entéro koʼã mbaʼe, ha ndahaʼeiha chejehegui reínte ajapóva. 29 Koʼã hénte omanóramo omanoháichante avei umi ótro hénte, ojehúramo chupekuéra la mísma kósa ojehúva enterove umi héntepe, upéicharõ Jehová nachemboúi.+ 30 Péro Jehová ojapóramo hesekuéra peteĩ mbaʼe oñeimoʼãʼỹva, ha pe yvy ojeavríramo ha omokõmbaite chupekuéra vívo* ha avei entéro mbaʼe orekóva, upéicharõ peẽ peikuaa porãta koʼã kuimbaʼe ndorrespetái hague Jehovápe”.

31 Heʼipamírente koʼã mbaʼe, pe yvy ojeka ipy guypekuéra.+ 32 Ha pe yvy ojeavri ha omokõ chupekuéra ha hogakuéra, avei kompléto Coré hentekuérape,+ ijesklavokuéra ha opa mbaʼe orekóva hikuái. 33 Pe yvy omokõmbaite chupekuéra vívo,* avei ihentekuéra ha ijesklavokuérape, ha pe yvy oñemboty jey hiʼarikuéra. Péicha haʼekuéra oñehundi umi israelitakuéra apytégui.+ 34 Ohendúvo chupekuéra osapukái, enterove israelita oĩ vaʼekue ijerére odipara oho upégui, pórke okyhyjeterei hikuái ha heʼi: “¡Cháke pe yvy ñanemokõta avei!”. 35 Upévo osẽ tata Jehová oĩhágui,+ ha ojuka umi 250 kuimbaʼe opresenta vaʼekuépe insiénso.+

36 Upéi Jehová heʼi Moiséspe: 37 “Ere Eleazar, Aarón raʼýpe, toipeʼa pe tatágui umi mbaʼyru ojehapyha insiénso,+ pórke umíva sagrádo hína. Ere avei chupe tomosarambi pe tata mombyrymi upégui. 38 Umi mbaʼyru oipuru vaʼekue umi kuimbaʼe omanómava opeka haguére, oñemopererĩ vaʼerã ojejapo hag̃ua chugui chápa ha ojerrevesti pype pe altár,+ pórke koʼãva oñepresenta kuri Jehová renondépe ha sagrádoma avei. Koʼãva omomanduʼáta umi israelítape la oiko vaʼekue”.+ 39 Upémarõ Eleazar ojagarra umi mbaʼyru de kóvre opresenta vaʼekue umi okaipa ha omano vaʼekue. Upéi haʼe oinupã umi mbaʼyru ha omopererĩ orrevesti hag̃ua pe altár, 40 Jehová heʼi haguéicha Moisés rupive. Upéva omomanduʼáta umi israelítape ni peteĩ ndahaʼéiva saserdóte* ndaikatuiha oñemoag̃ui Jehová renondépe ohapy hag̃ua insiénso,+ ha avave ndojapói vaʼerãha Coré ha iñirũnguéra ojapo vaʼekue.+

41 Al día sigiénte enterovete umi israelita oñeʼẽ vai jey Moisés ha Aarón rehe,+ ha heʼi: “Peẽ mokõive pejukapa Jehová puévlope”. 42 Umi israelita oñembyatypárõ guare Moisés ha Aarón kóntrape, ojere hikuái omaña pe tavernákulo oĩha gotyo, ha upepete pe arai ojahoʼipa pe tavernákulo, ha Jehová podér tuichaitéva ojechauka chupekuéra.+

43 Upémarõ Moisés ha Aarón oho pe tavernákulo renondépe,+ 44 ha Jehová heʼi Moiséspe: 45 “Pejaparta koʼã hénte apytégui, ikatu hag̃uáicha ahundi chupekuéra peteĩ tesapirĩme”.+ Upepete haʼekuéra oñesũ ha oñakãityete.+ 46 Upéi Moisés heʼi Aarónpe: “Ejagarra pe mbaʼyru ha emoĩ pype tatapỹi pe altárgui.+ Ha emoĩ avei insiénso ha pyaʼe porã tereho umi hénte oĩháme, ha ejerure hesekuéra ikatu hag̃uáicha oñeperdona chupekuéra ipekádo,+ pórke Jehová ipochyetereíma hína ha peteĩ mbaʼasy ivaietereíva oñepyrũma”. 47 Upémarõ Aarón pyaʼe porã ojagarra koʼã mbaʼe Moisés heʼi vaʼekue, ha odipara oho umi hénte apytépe, ha upérõ g̃uarã pe mbaʼasy ivaietéva oñepyrũma ojagarra umi héntepe. Ha Aarón omoĩ insiénso imbaʼyrúpe ha ojerure hesekuéra, ikatu hag̃uáicha oñeperdona chupekuéra ipekádo. 48 Haʼe opyta oñemboʼy umi omano vaʼekue ha umi oikovéva gueteri apytépe, ha mbeguekatúpe opa ohóvo pe mbaʼasy vai. 49 Umi omano vaʼekue pe mbaʼasy vaígui ohupyty en totál 14.700, péro umívape ndoikéi hína umi omano vaʼekue Coré káusare. 50 Upéi Aarón oho jey Moisés rendápe pe tavernákulo entrádape opa rire pe mbaʼasy vaiete.