2 Tesalonicenses

2 Ermanokuéra, ñande Ruvicha Jesucristo oĩ* vove+ ha ñande ñañembyaty vove hendive,+ upe mbaʼére rojerure peẽme 2 ani hag̃ua peheja avave okambia pendehegui pepensa lája upe oĩ porãvagui, ni pejepyʼapyeterei oĩramo heʼíva peẽme Jehová* ára+ oĩmaha koʼápe. Ani pejepyʼapy heʼíramo jepe hikuái pe mensáhe ouha Ñandejáragui,+ térã haʼekuéra oleéramo upéva peteĩ kártape ha heʼi hikuái ore roskrivi hague.

3 Aníke avave penembotavy, pórke og̃uahẽ mboyve upe ára, ou raẽ vaʼerã umi opuʼãva Ñandejárare,*+ ha ojehecha porãta pe kuimbaʼe añáme.+ Haʼe hína pe kuimbaʼe oñehundítava.+ 4 Haʼe hína peteĩ enemígo ha oñembotuichavéta entéro oñehenóivagui “ñandejára”, ha entéro mbaʼe yvypóra oadorávagui. Upévare haʼe oguapýta Ñandejára témplope, ha ojapóta upéva enterove renondépe haʼeramoguáicha peteĩ dios. 5 ¿Napenemanduʼái piko che haʼéma hague voi peẽme koʼã mbaʼe aimérõ guare penendive?

6 Koʼág̃a peẽ peikuaáma mávapa ojoko hína pe kuimbaʼe añáme, ani hag̃ua ojehecha porã chupe og̃uahẽ mboyve itiémpo. 7 Umi mbaʼe vai ojapóva ko kuimbaʼe oĩ hína ñemiháme ha ombaʼapóma hína,+ péro ko mbaʼe vai opytáta gueteri ñemiháme ndaiporivéi peve upe ojokóva chupe. 8 Upépe ojehecha porãta pe kuimbaʼe añáme,* ha ñande Ruvicha Jesús ohundíta chupe umi ñeʼẽ ipoderósovape osẽva ijurúgui,*+ ha ág̃a ojehechauka vove ñande Ruvicha oĩmaha* opytáta ndovalevéi mbaʼeverã+ pe kuimbaʼe aña. 9 Péro pe kuimbaʼe aña oĩ haʼégui Satanás rembiapokue,+ ha Satanás omeʼẽ chupe podér ojapo hag̃ua milágro, señál japu, umi mbaʼe ijojahaʼỹva,+ 10 ha entéro mbaʼe iñinhústova oporombotavy+ hag̃ua. Koʼã mbaʼe ombotavy umi hénte oñehundítavape ha péicha ojekastiga hag̃ua, pórke nomombaʼéi ipyʼaite guive pe añetegua oñemboʼéva ha ikatúva osalva chupekuéra. 11 Upévare Ñandejára oheja ombotavy chupekuéra umi enseñánsa japu, ikatu hag̃uáicha oguerovia hikuái umi japu.+ 12 Péicha enterovépe ojehusgáta pórke oguerovia rangue pe añetegua, oguerohory hikuái umi inhustísia.

13 Péro penderehe ermanokuéra, ore siémpre roagradese katuete Jehovápe,* Ñandejára penderayhuetévape. Pórke Ñandejára pendeporavo vaʼekue peẽme iñepyrũme+ pejesalva hag̃ua. Haʼe ojapo upéva penesantifikávo+ ijespíritu rupive, peẽ pejerovia rupi pe añeteguáre. 14 Haʼe pendeporavo* pejesalva hag̃ua umi notísia porã ore roikuaaukáva rupive, ikatu hag̃uáicha peẽ avei peñembotuicha ñande Ruvicha Jesucrístoicha.+ 15 Upéicharõ ermanokuéra, pejepytaso mbaretékena+ ha peñakarama hatã umi mbaʼe peaprende vaʼekuére,+ tahaʼe ojeʼéramo peẽme peteĩ mensáhe rupive térã peleéramo peteĩ kárta ore romondo vaʼekuépe peẽme. 16 Ñande Ru Ñandejára, ñanderayhu+ ha imbaʼeporãiterei rupi* ñanekonsola opa ára g̃uarã ha omeʼẽ ñandéve esperánsa.+ Roñemboʼe haʼe ha ñande Ruvicha Jesucristo 17 penekonsola ha pejepytaso mbarete* hag̃ua, ikatu hag̃uáicha siémpre peje ha pejapo iporãva.