Peteĩ paraíso pyahu Yvy ape ári

EMAÑAMI umi yvyra máta guasu, yvoty iporã porãva ha umi montáña ijyvatetéva rehe. Ajépa iporãite koʼã mbaʼe? Ehechami pe guasu okaruhína pe mitãʼi pógui. Ha emañami umi león ha avei umi kavaju oñemboʼyvahína amo kapiʼipépe. Ndereikoséipa peteĩ ógape oĩva peteĩ lugár peichaguápe?

Ñandejára oipota nde reikove opa ára g̃uarã peteĩ paraísope ko Yvy ape ári. Ha ndoipotái rehasa asy la hénte ohasa asyháicha koʼág̃a. Pe paraíso pyahúpe oikótavape la Biblia opromete: ‘Ñandejára oĩta hendivekuéra. Ndaiporimoʼãvéima ñemano, ni tasẽ ni mbaʼasy. Umi mbaʼe ymaguare ohasapáma’.

Jesús oguerúta ko kámbio iporãitereíva. Ndépa reikuaa arakaʼépa? Oipeʼapa rire Yvy ape árigui opa mbaʼe vai ha opaichagua hénte aña. Nemanduʼáne, Jesús oĩrõ guare ko Yvy ape ári omongueravaʼekue umi héntepe opaichagua mbaʼasýgui, ha omoingove jey avei umi omanovaʼekuépe. Péicha ohechauka ojapótava ko Yvy ape ári haʼe vove Rréi Ñandejára rréinope.

Epensamína mbaʼeichaitépa javyʼáta pe paraíso pyahúpe! Jesús, ha umi haʼe oiporavovaʼekue, ogovernáta yvágape. Haʼekuéra oñangarekóta enterove oĩvare ko Yvy ape ári ikatu hag̃uáicha ovyʼa hikuái. Jahechami mbaʼépa jajapovaʼerã Ñandejára omeʼẽ hag̃ua ñandéve tekove opaʼỹva iparaíso pyahúpe.