¿Ogustápa Ñandejárape opaichagua fiésta?

¿REHOSÉPA fiestahápe?... Ikatu ningo javyʼa umichahárupi. Péro ¿ogustánepa pe Mboʼehára Guasúpe jaha umi fiéstape?... Haʼe oho vaʼekue idisipulokuéra ndive peteĩ kasamientohápe. La Biblia heʼi avei Jehová haʼeha “Ñandejára ovyʼáva”. Upéicharõ, Jehová ovyʼa ohechávo jajedivertiha umi fiésta ndaivaírivape (1 Timoteo 1:11; Juan 2:1-11).

Páhina 29-pe jahecha kuri Jehová odividi hague mar Rojo umi isrraelíta ohasa hag̃ua. ¿Nemanduʼápa?... Upéi haʼekuéra opurahéi, ojeroky ha oagradese Jehovápe. Ojapo hikuái peteĩ fiésta ovyʼaiterei rupi, ha katuete Jehová ovyʼáne avei (Éxodo 15:1, 20, 21).

Ohasa rire 40 áñorupi, umi isrraelíta oho jey peteĩ fiésta tuichávape. Péro upérõ guare umi ojapóva pe fiésta ndoadorái Jehovápe. Haʼekuéra omombaʼeguasu heta ñandejára guaʼúpe ha oreko rrelasión sexuál umi ndahaʼéivandi iména térã hembireko. ¿Iporãnepa jaha koʼãichagua fiéstape?... Jehovápe ndogustái vaʼekue ha upévare okastiga umi isrraelítape (Números 25:1-9; 1 Corintios 10:8).

La Bíbliape jatopa avei ojefesteha hague mokõi kumpleáño. ¿Ojefestehápa Mboʼehára Guasu kumpleáño peteĩme?... Nahániri. Koʼã mokõi fiésta ojapo vaʼekue umi ndoadoráiva Jehovápe. Peteĩva hína rréi Herodes Antipas, pe omanda vaʼekue Galiléape Jesús oikórõ guare upépe.

Rréi Herodes ojapo vaʼekue heta mbaʼe vai, por ehémplo, oipeʼa iñermánogui hembireko hérava Herodías. Upéi Juan el Bautista heʼi Heródespe ivaiha la ojapóva. Upévare pe rréi ipochy ha oguerahaka chupe kárselpe (Lucas 3:19, 20).

Juan oĩ aja kárselpe Herodes ofesteha ikumpleáño. Ojapo peteĩ fiésta tuicháva ha oinvita heta hénte iñimportántevape. Enterovéva okaru, omokõ ha ovyʼajoa. Upéi osẽ Herodías membykuña ojeroky henondepekuéra, ha enterovévape ogustaiterei. Upévare pe rréi omeʼẽse chupe peteĩ rregálo ha heʼi pe mitãkuñáme: “Oimeraẽ mbaʼe rejeruréva ameʼẽta ndéve, che rréino jepe ambojaʼóne ndéve”.

¿Mbaʼépa ojeruréta pe mitãkuña? ¿Pláta? ¿Ao iporãva? ¿Peteĩ óga tuicháva? Pe mitãkuña ndoikuaái mbaʼépa ombohováita ha upémarõ oho oporandu isýpe: “¿Mbaʼéiko la ajerurétava?”.

Herodías ndochaʼeiete vaʼekue Juan rehe. Upévare heʼi imembýpe ojerure hag̃ua Juan akãngue. Pe mitãkuña oho jey pe rréi rendápe ha heʼi chupe: “Aipota regueru chéve koʼag̃aite peteĩ vandéhape Juan el Bautista akã”.

Rréi Herodes oikuaa Juan ivuenoha ha ndojukaséi chupe. Péro heʼi jepéma pe mitãkuñáme omeʼẽtaha chupe la ojeruréva ha ndopytavaiséi umi hénte renondépe. Upévare omondo peteĩ soldádo oñakãʼo hag̃ua Juánpe. Upe riremínte pe soldádo ogueru Juan akãngue peteĩ vandéhape ha omeʼẽ pe mitãkuñáme, ha haʼe ogueraha isýpe (Marcos 6:17-29).

Pe ótro kumpleáño omombeʼúva la Biblia naiporãi avei. Upérõ ojefesteha peteĩ rréi Egiptogua kumpleáño. Pe fiésta aja pe rréi heʼi oñeñakãʼo hag̃ua peteĩ kuimbaʼépe ha oñemosaingo hag̃ua hetekue guyrakuéra hoʼu hag̃ua (Génesis 40:19-22). ¿Ndépa ere ogustáne hague Ñandejárape koʼã mokõi fiésta?... ¿Revyʼánepa reimérire upépe?...

La Bíbliape ojehaíva katuete ñanemboʼe peteĩ mbaʼe iñimportánteva. Pype oñeñeʼẽ mokõi kumpleáñorente ha mokõivévape ojejapo mbaʼe vai. Upéicharõ, ¿mbaʼépa ndéverõ g̃uarã heʼise ñandéve Ñandejára? ¿Oipotánepa jafesteha ñane kumpleáño?...

Koʼág̃arupi noñeñakãʼói avavépe umi kumpleáñope, péro umi ofesteha ñepyrũ vaʼekue ndoadorái Jehovápe. Peteĩ ensiklopédia heʼi koʼã kumpleáñore: “Umi mbaʼe vai apoha añónte [...] oprepara vaʼekue umi fiésta tuicháva upe fécha onase haguépe” (The Catholic Encyclopedia). ¿Rejoguasépa chupekuéra?...

¿Mbaʼépa ikatu jaʼe pe Mboʼehára Guasúre? ¿Ofestehápa rakaʼe ikumpleáño?... Nahániri, la Biblia ndeʼíri ojapo hague. Ha idisipulokuéra ndojapói vaʼekue avei. ¿Ndépa reikuaa mbaʼérepa upe rire umi hénte ofesteha Jesús kumpleáño 25 de diciémbrepe?...

Peteĩ ensiklopédia omombeʼu upe féchape “umi hénte oikóva Rómape ojapómi hague pe fiésta de Saturno ha ofesteha hikuái kuarahy kumpleáño” (The World Book Encyclopedia). Upéicharõ, umi ndoadoráiva Jehovápe ojapóma vaʼekue voi peteĩ fiésta káda 25 de diciembre, ha upe día ojeporavo ojefesteha hag̃ua Jesús kumpleáño.

¿Mbaʼérepa jaʼekuaa Jesús nonaséi hague diciémbrepe?... La Biblia heʼi Jesús onasérõ guare oĩ hague pe ñúre ovecharerekua opytáva upérupi pyharekue (Lucas 2:8-12). Ha diciémbrepe upe lugárpe roʼy ha pyʼỹi oky. Upévare ni mbaʼevéicharõ umi ovecharerekua ndoikomoʼãi hikuái ñúre ijovechakuérare.

Heta oĩ oikuaáva 25 de diciembre ndahaʼeiha Jesús kumpleáño. Avei oikuaa upe féchape yma ojejapo hague peteĩ fiésta ndogustáiva Ñandejárape. Upéicharõ jepe ofesteha hikuái Navidad. Haʼekuéra ojedivertisénte ha nopensái oimépa ogusta Ñandejárape upe fiésta. Péro nde rembovyʼase Jehovápe, ¿ajépa?...

Upévare, rejapóta jave peteĩ fiésta repensa porã vaʼerã ogustátapa Jehovápe. Oimeha día ikatu rejapo, natekotevẽi rehaʼarõ peteĩ fécha. Ikatu oĩ umi tembiʼu héva, rehuga ha revyʼa ne amigokuérandi. ¿Rejaposépa peichagua fiésta?... Ikatu reñeʼẽ nde tuvakuérandi nepytyvõ hag̃ua. ¡Igustoiténepa! ¿Ajépa?... Péro nemanduʼákena rehecha raẽ vaʼerãha ombovyʼátapa Jehovápe.