¿Mbaʼépa oiko umi omano vaʼekuégui?

JAIKUAAHÁICHA, la hénte ituja, hasy ha omano. Sapyʼánte umi mitã jepe omano. Péro, ¿rekyhyje vaʼerãpa ñemanógui térã umi omano vaʼekuégui?... ¿Ndépa reikuaa mbaʼépa oiko umi omanóvagui?...

Ñane tiémpope ndaipóri ni peteĩ omano vaʼekue oikove jeýva ha omombeʼúva ñandéve mbaʼépa oiko omano rire. Péro Jesús oĩrõ guare ko yvy ape ári, oĩ vaʼekue peteĩ kuimbaʼe omanóva ha upéi oikove jeýva. Jaleéramo ijistória la Bíbliape ñantendéta mbaʼépa oiko umi omanóvagui. Ko kuimbaʼe ningo Jesús amígo ha oiko namombyrýi Jerusaléngui, peteĩ puévlo héravape Betania. Haʼe héra Lázaro ha oreko mokõi ermána, Marta ha María. Jahechamína mbaʼépa la oiko vaʼekue.

Peteĩ díape Lázaro ou hasyete. Upérõ Jesús mombyry oĩ upégui, upévare Marta ha María heʼika chupe Lázaro hasyha. Haʼekuéra oikuaa haʼe ikatuha omonguera iñermánope, upévare pyaʼe oavisaka chupe la oikóva. Jesús ningo ndahaʼéi doktór, péro Itúva Jehová omeʼẽ chupe podér omonguera hag̃ua opaichagua mbaʼasy (Mateo 15:30, 31).

Péro Lázaro omano jepe Jesús oho mboyve. Haʼe heʼi idisipulokuérape Lázaro okenteha ha ohotaha omombáy chupe. Péro haʼekuéra nontendéi mbaʼépa la heʼiséva, upévare Jesús heʼi porã chupekuéra: “Lázaro omanóma”. ¿Mbaʼépa ñanemboʼe Jesús heʼi vaʼekue?... Ñamanóramo haʼete ku jake hatãva ha ni ndaikatúi jahecha mbaʼeve ñande képe.

Jesús osẽ oho Marta ha María rógape. Upépe oñembyatýma heta hénte okonsola hag̃ua Lázaro ermanakuérape. Marta oikuaávo Jesús og̃uahẽtamaha, osẽ ohug̃uaitĩ chupe. Upéi María og̃uahẽ ohóvo avei hendápe, oñesũ henondépe ha hasẽ. Umi iñamigokuéra oĩva upépe hasẽmbajoa avei.

Jesús oporandu moõpa oñemoĩ raʼe Lázaro retekue. Upéi ojegueraha Jesúspe pe sepultúra oĩháme, upéva ningo oĩ itakuápe. Haʼe ohecha mbaʼéichapa enterovéva hasẽ, ha upéva opokoiterei hese ha hasẽ avei. Jesús oikuaa jahasa asyha omano jave peteĩ jahayhúva.

Pe sepultúra oñemboty peteĩ ita guasúpe, upévare Jesús heʼi umi héntepe: “Peipeʼa pe ita”. ¿Iporãtapa ojejapóramo upéva?... Marta opensa ndovaleiha ha heʼi: “Karai, ojapóma ningo cuatro día omano hague ha oiméne inéma”.

Péro Jesús heʼi chupe: “¿Ndaʼéi piko ndéve raʼe regueroviáramo rehechataha Ñandejára tuichaha?”. Jesús heʼise vaʼekue Mártape ohechataha peteĩ mbaʼe omombaʼeguasútava Jehovápe. ¿Mbaʼe piko la ojapótava Jesús? Ojepeʼa rire pe ita, Jesús oñemboʼe Jehovápe enterovéva renondépe ha upéi hatã heʼi: “¡Lázaro, esẽ!”. ¿Osẽnepa Lázaro?...

¿Ikatúpa remombáy peteĩ nde rapicha okévape?... Ikatu, reñeʼẽ hatãramo chupe. Péro ¿ikatúpa remombáy peteĩ omanóvape?... Nahániri, ni reñeʼẽ hatãvéramo chupe. Ndaipóri ni peteĩ persóna ikatúva omombáy umi omano vaʼekuépe.

Péro Jesús idiferénte ñandehegui Jehová omeʼẽgui chupe podér. Upévare Jesús ohenóivo Lázarope oiko peteĩ mbaʼe ñaimoʼãʼỹva. Jepe ojapóma cuatro día omano hague, Lázaro opuʼã ha osẽ pe itakuágui. ¡Oikove jey ha ikatu jeýma oguata ha oñeʼẽ! Lázaro omanóma kuri péro Jesús omombáy chupe (Juan 11:1-44).

Koʼág̃a epensami koʼã mbaʼére: ¿mbaʼépa oiko raʼe Lázarogui omanórõ guare? ¿Orekópa raʼe peteĩ álma térã peteĩ espíritu osẽva hetégui ha ohóva oiko ótro hendápe? ¿Ohópa raʼe yvágape? ¿Oĩpa raʼe Ñandejára ha umi ánhel ndive umi cuatro día aja?...

Nahániri. Oiméne nemanduʼa Jesús heʼi hague Lázaro okénte hague. ¿Mbaʼépa oiko reke jave?... Reke hatãramo nderepillái la oikóva nde jerére, ¿ajépa?... Ha repáyvo, ni ndereikuaái mboy tiémpopa reke raʼe.

Umi omanóva upéicha avei. Haʼekuéra noñandúi ni ndaikatuvéima ojapo mbaʼevete. Péicha oĩ vaʼekue Lázaro omanórõ guare. Umi omanóva haʼete oke hatãva ha naimanduʼavéima mbaʼevére. La Biblia heʼi: “Umi omanóma vaʼekue [...] ndoikuaái mbaʼeve” (Eclesiastés 9:5, 10, ÑÑB).

Epensamína avei ko mbaʼére: oimérõ Lázaro oho raʼe umi cuatro día aja yvágape, ¿nomombeʼumoʼãi piko upéva?... Ha oimérõ siérto oho Ñandejára ykére, ¿ndépa ere Jesús ogueru jeytaha chupe upe lugár porãitégui oiko hag̃ua ko yvy ape ári?... ¡Ni mbaʼevéicharõ!

Péro oĩ tapicha ogueroviáva jarekoha peteĩ álma nomanóiva. Haʼekuéra heʼi Lázaro álma oho hague oikove ótro lugárpe. Péro la Biblia nomboʼéi upéva. Por ehémplo, omombeʼu mbaʼéichapa Ñandejára ojapo vaʼekue Adánpe, ha heʼi Adán haʼeha peteĩ ‘álma oikovéva’. Upéicharõ Adán voi haʼe vaʼekue peteĩ álma. Ñandejára Ñeʼẽ ohechauka haʼe omanórõ guare ndoikovéima hague mamove. Adángui oiko jey yvy pórke Jehová yvýgui ojapo chupe. La Biblia heʼi avei Adán ombohasa hague enterovévare pekádo ha ñemano (Génesis 2:7; 3:17-19; Números 6:6; Romanos 5:12).

Péicha jahecha ndajarekoiha peteĩ álma osẽva ñande retégui, síno ñande voi hína pe álma. Ha la Biblia omombeʼu mbaʼépa ojehu ñandéve Adán ombohasa haguére enterovévare pe pekádo. Heʼi: ‘Pe álma opekáva omanóta’ (Ezequiel 18:4).

Heta hénte okyhyje umi omanóvagui ha upévare ni ndohoséi sementério ypýrupi. Opensa umi omanóva retégui osẽha hiʼálma ha ikatuha ojapo mbaʼe vai umi oikovévare. Péro, ¿añetépa upéva?... Nahániri, upéva ningo japu.

Oĩ avei oimoʼãva umi omano vaʼekue ikatuha ou jey peteĩ espírituicha ñane rendápe, ha upévare oheja chupekuéra tembiʼu hoʼu hag̃ua. Umi hénte ojapóva upéicha, ndogueroviái Ñandejára heʼíva umi omano vaʼekuére. Péro ñande jagueroviáramo Jehová heʼíva ndajakyhyjemoʼãi umi omano vaʼekuégui. Ha jaagradeséramo Ñandejárape omeʼẽ haguére ñandéve ñande rekove jajapóta umi mbaʼe haʼe oipotáva.

Péro nde ikatu reñeporandu: “¿Omoingove jeýtapa Jehová umi mitã omano vaʼekuépe? ¿Ojaposépa upéva?”. Ñañeʼẽta upévare pe ótro kapítulope.