¿Mbaʼérepa jahayhu vaʼerã Jesúspe?

ÑAMOĨMI chupe reimeha hína peteĩ várko oñapymimbotaitévape. ¿Reipotánepa oĩ peteĩ ndesalváva?... ¿Ha oĩramo peteĩ ojapeligráva ha omanóva voi ndesalva hag̃ua?... Jaʼe porãsérõ g̃uarã Jesús ojapo vaʼekue upéva. Jahecháma haguéicha kapítulo 37-pe haʼe omano vaʼekue opavave rehehápe.

Jaikuaa ningo Jesús ndahaʼéi ñandesalváva pono jajahoga. ¿Nemanduʼápa mbaʼéguipa ñandesalva raʼe?... Haʼe ñandepeʼa pekádo ha ñemano poguýgui. Oĩ tapicha ojapóva heta mbaʼe ivaietereíva, péro Jesús omano vaʼekue osalva hag̃ua umichaguápe avei. ¿Ndépa rejapeligráne resalva hag̃ua umi mbaʼe vai apohápe?...

La Biblia heʼi: “Hasy hína oĩ hag̃ua omanóva peteĩ hekojojáva rehehápe, péro añetehápe ikatu oĩ omanoséva peteĩ ivuénova rehehápe”. Jesús katu omano osalva hag̃ua umi ‘iñañávape’ avei. La Biblia heʼi omano hague ñanderehehápe “ñande pekadór aja gueteri”, térã jajapo aja gueteri mbaʼe vai (Romanos 5:6-8).

¿Nemanduʼápa mávapa ojapo vaʼekue hetaite mbaʼe vai oiko mboyve chugui apóstol?... Pablo. Upévare ohai vaʼekue: “Cristo Jesús ou ko múndope osalva hag̃ua umi pekadórpe. Umíva apytégui che hína pe ipekádo hetave vaʼekue”. Haʼe heʼi peteĩ tiémpope ‘ivýro ha iñaña’ hague (1 Timoteo 1:15; Tito 3:3).

Epensamína mbaʼeichaitépa Ñandejára ohayhu opavavépe, upévare ombou Itaʼýra omano hag̃ua iñañáva rehehápe. Eavrimína nde Biblia, Juan kapítulo 3, versíkulo 16-pe, upépe heʼi: “Ñandejára ohayhuetereígui pe múndo [térã umi héntepe] omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva”.

Jesús ñanderayhueterei avei Itúvaicha. Kapítulo 30-pe jahecha kuri hetaite mbaʼe vai ojejapo hague hese pe pyhare ojejagarrárõ guare. Primero ojegueraha chupe saserdóte guasu Caifás rógape, ohecha hag̃ua hikuái mbaʼépa ojapóta chugui. Upépe oĩ testígo japu oñeʼẽ vaíva hese ha oĩ avei ombyepotíva chupe. Upérõ guare Pedro onega oikuaaha Jesúspe. Koʼág̃a ñapensami ñaimeha hína upépe ha jahechaha la oikóva.

Koʼẽmbáma katu ha Jesús ndokéi ni michĩmi. Pe Léi heʼi vaʼekue pyharekue ndaikatuiha ojehusga peteĩ tapichápe. Upévare koʼẽmba rire umi saserdóte oñembyaty pe trivunál tuichavévandi hérava Sanedrín, ohusga jey hag̃ua Jesúspe. Haʼekuéra heʼi jey Jesús ojapo hague heta mbaʼe oĩ vaíva Ñandejára renondépe.

Upéi oipokua Jesúspe ha ogueraha hikuái pe governadór rrománo rendápe hérava Pilato. Ha heʼi chupe: ‘Jesús opuʼã goviérno kóntrape ha upévare ojejuka vaʼerã’. Péro Pilato opilla umi saserdóte ijapuha, ha heʼi chupekuéra: ‘Chéverõ g̃uarã ko kuimbaʼe ndojapói mbaʼeve ivaíva ha apoíta chugui’. Upémarõ umi saserdóte ha umi hénte osapukaijoa: “¡Ejuka chupe!”.

Tardemie, Pilato heʼi jey chupekuéra opoitaha Jesúsgui. Péro umi saserdóte omboliga umi héntepe osapukái hag̃ua: ‘Repoíramo chugui, nde avei repuʼã goviérno kóntrape. ¡Ejuka chupe!’. Umi hénte osegi osapukái hatã hatãve. ¿Reikuaápa mbaʼépa ojapo upémarõ Pilato?...

Omeʼẽ chupekuéra igústo. Oinupãka Jesúspe ha upéi omeʼẽ umi soldádope ogueraha hag̃ua ojuka. Umi soldádo ojapo peteĩ koróna ñuatĩgui ha omoĩ chupe iñakãre, upéi oñesũ henondépe oñembohory hag̃ua hese. Upe rire omeʼẽ hikuái Jesúspe peteĩ yvyra pohýi, ogueraha hag̃ua ijapére peteĩ lugár héravape Akãngue renda, oĩva oñesẽvo pe siudágui. Upépe haʼekuéra oklava chupe ipo ha ipýgui ha omoñemboʼy pe yvyra opyta hag̃ua osaingo. Jesús huguypa ojeklava haguépe ha hasyeterei chupe.

Péro Jesús nomanopyaʼéi, heta ohasa asy raẽ omano meve. Upe aja umi saserdóte oñembohory hese ha umi hénte ohasáva upérupi katu osapukái: “¡Ndéramo Ñandejára raʼy, eguejýna pe yvyrágui!”. Péro haʼe oikuaa porã Itúva ombou hague chupe omano hag̃ua ñanderehehápe, ikatu hag̃uáicha jahupyty jeikove opaʼỹva. Upéi, las tres potárupi, Jesús oñeʼẽ Itúvape ha omano (Mateo 26:36–27:50; Marcos 15:1; Lucas 22:39–23:46; Juan 18:1–19:30).

¡Jesús ndojoguaiete Adánpe! Adán ndohayhúi vaʼekue Ñandejárape ha ndojapói haʼe heʼíva. Haʼe ombohasa ñanderehe pe pekádo ha upévare jaʼekuaa nañanderayhuiha avei. Jesús katu ohechauka ohayhuha Jehovápe ha ñanderayhuha ñandéve. Haʼe siémpre ojapo Itúva heʼíva, ha omano osolusiona hag̃ua umi mbaʼe vai oiko vaʼekue Adán káusare.

Tuichaite mbaʼe Jesús ojapo ñanderehehápe, ¿ajépa?... Reñemboʼe jave Ñandejárape, ¿reagradesépa chupe ombou haguére Itaʼýrape ko yvy ape ári?... Apóstol Pablo oagradese vaʼekue ha heʼi voi Jesús ‘ohayhu ha oñemeʼẽ hague hesehápe’ (Gálatas 2:20). Jesús omano enterove rehehápe. Omeʼẽ hekove perfékto jahupyty hag̃ua jeikove opaʼỹva. Ha upévare jahayhu vaʼerã chupe.

Apóstol Pablo oskrivi vaʼekue umi kristiáno Corintoguápe: “Cristo mborayhu oreovliga”. Ndéverõ g̃uarã, ¿maʼerãpa ñandeovliga?... Apóstol Pablo heʼi jey: “Cristo omano enterove rehehápe ha oñemopuʼã jey, ikatu hag̃uáicha umi oikovéva ndojapovéima haʼekuéra oipotávante, ojapo hag̃ua guei Cristo oipotáva” (2 Corintios 5:14, 15).

¿Mbaʼéichapa ikatu rehechauka rejaposeha Cristo oipotáva?... Por ehémplo, ikatu remombeʼu nde rapichakuérape umi mbaʼe reaprendéva Jesúsgui. Térã ñamoĩmi chupe reimeha neaño, nde sy, nde túva ni avave nanderechái. Péicha jave, ¿rehechánepa télepe térã Internétpe umi mbaʼe ndogustáiva Jesúspe?... Aníkena nderesarái Jesús oikoveha ha ohechaha opa mbaʼe jajapóva.

Ñandejára ohayhu itaʼýrape. Peteĩ jey Jesús heʼi: “Pe Túva cherayhu”. Jajaposérõ Jehová ojapoháicha, jahayhu vaʼerã Jesúspe. ¿Ndépa reikuaa mbaʼérepa Jehová ohayhu Jesúspe ha mbaʼérepa ñande jahayhu vaʼerã chupe?... Ou rupi omano oñekumpli hag̃ua Ñandejára rembipota (Juan 10:17). Upévare jajapo vaʼerã heʼiháicha la Biblia: “Pehaʼangáke Ñandejárape, peẽ itaʼýra haʼe ohayhuetéva. Ha pesegíkena pejoayhu Cristo penderayhu haguéicha. Penderehehápe haʼe omeʼẽ hekove” (Efesios 5:1, 2).