Opredika Galiléare

Jesús ha umi cuatro idisípulo un diaite ombaʼapo Capernáumpe. Pyhare peve umi hénte ogueru Jesúspe heta hasýva, ikatu hag̃uáicha omonguera chupekuéra. Upévare Jesús ndaikatúi ni sapyʼaite jepe oĩ haʼeño.

Koʼág̃a neʼĩra gueteri koʼẽ, péro Jesús opuʼãma ha oho oheka peteĩ lugár ikatutahápe oĩ haʼeño oñemboʼe hag̃ua Itúvape. Péro amo ipahápe sapyʼaitemínte opyta upépe, pórke “Simón ha iñirũnguéra” osẽ oheka chupe. Ikatu oime Pedro raʼe la heʼíva umi ótrope Jesús ndaiporiha, pórke Jesús oĩ kuri hógape (Marcos 1:36; Lucas 4:38).

Pedro otopávo Jesúsre, heʼi chupe: “Enterove ndereka oikóvo” (Marcos 1:37). Umi hénte oikóva Capernáumpe oipota haʼe opyta upépe. Añetehápe haʼekuéra omombaʼeterei Jesús ojapóva, upévare ojokose chupe hikuái “ani hag̃ua oho chuguikuéra” (Lucas 4:42). Péro, ¿oúpa raʼe Jesús ko yvy ape ári ojapo hag̃ua milágronte? ¿Opyta vaʼerãpa rakaʼe peteĩ siudápente? ¿Mbaʼépa haʼe opensa?

Jesús heʼi idisipulokuérape: “Jaha katu ótro lugárpe, umi puévlo hiʼag̃uívape, apredika hag̃ua avei upépe. Upearã ningo aju vaʼekue”. Umi hénte oinsisti Jesúspe opyta hag̃ua, péro haʼe heʼi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Marcos 1:38; Lucas 4:43).

Jahechaháicha, Jesús ou ko yvy ape ári opredika hag̃ua pe marandu porã oñeʼẽva Ñandejára Rréinore. Upe Rréino rupive oñemopotĩta Itúva réra ha oñesolusionáta opaichagua provléma ombohasa asýva yvyporakuérape. Jesús ojapo vaʼekue milágro ohechauka hag̃ua umi héntepe Ñandejára ombou hague chupe. Ymave Moisés avei ojapo vaʼekue milágro ohechauka hag̃ua haʼeha Ñandejára remimbou (Éxodo 4:1-9, 30, 31).

Jesús osẽ Capernáumgui opredika hag̃ua umi ótra siudárupi, ha umi cuatro disípulo oho avei hendive. Koʼãva hína Pedro ha iñermáno Andrés, ha Juan ha iñermáno Santiago. Oiméne ñanemanduʼa pe semána ohasa vaʼekuépente Jesús oinvita hague chupekuéra raẽvete, ikatu hag̃uáicha omoirũ ha oipytyvõ meme chupe.

Jesús ha umi cuatro disípulo ohupyty hetaiterei mbaʼe porã opredikávo Galiléare. “Ha umi mbaʼe [Jesús] ojapóva ojekuaa Siria peve”, por ehémplo umi 10 siudápe oĩva Decápolispe ha avei rrío Jordán mboypýri (Mateo 4:24, 25). Heta hénte koʼã lugárgui ha avei Judéagui osegi Jesús ha idisipulokuérape. Umi hénte ogueru Jesúspe heta hasýva ha heta endemoniádo, ha haʼe omonguerapaite chupekuéra.