Mbaʼérepa tekotevẽ ñañemboʼe ha ñaneumílde

Jesús heʼíma kuri idisipulokuérape tekotevẽha oñemboʼe meme, ha omoĩ voi chupekuéra peteĩ ehémplo upearã (Lucas 11:5-13). Oiméne Jesús oĩ gueteri Samáriape térã Galiléape, ha heʼi jey iñimportantetereiha jasegi ñañemboʼe. Péro koʼág̃a omoĩ jey ótro ehémplo:

“Peteĩ siudápe oĩ vaʼekue peteĩ hués ndokyhyjéiva Ñandejáragui ha ndorrespetáiva hapichápe. Upe siudápe oĩ avei peteĩ viúda, ha haʼe manterei oho pe hués rendápe ha heʼi: ‘Ehechamína tojejapo chéve hustísia, ani hag̃ua pe chepleiteáva ipuʼaka cherehe’. Heta tiémpore [ko hués] noipytyvõséi chupe, péro upéi heʼi ipyʼapýpe: ‘Ndakyhyjéiramo jepe Ñandejáragui ha ndarrespetái che rapichápe, ko viúda chemolestaiterei rupi ahecháta tojejapo chupe hustísia. Upéichamante ndoumoʼãvéima manterei ojerure chéve hustísia chemonguerái peve’” (Lucas 18:2-5).

Jesús omyesakã ko ehémplo heʼívo: “¡Pehendu piko mbaʼépa heʼi ko hués, ndahekojojáiramo jepe! ¿Ha piko Ñandejára koʼýte ndohechamoʼãi tojejapo hustísia umi haʼe oiporavo vaʼekuépe, ojerure asýva chupe ára ha pyhare? Hiʼarive haʼe ipasiénsia hesekuéra” (Lucas 18:6, 7). ¿Mbaʼépa Jesús omboʼese Itúvagui?

Jesús ndeʼiséi hína Jehová ojoguaha pe hués ndahekojojáivape. Upéva rangue heʼise peteĩ hués aña jepe oñatendeha umi oinsistívare chupe. Upéicharõ, koʼytevéntema Ñandejára ohendúta isiervokuérape oñemboʼe meméramo chupe, pórke haʼe imbaʼeporã ha hekojoja. Upévare Jesús heʼi avei: “Haʼe pyaʼeterei ohecháta tojejapo chupekuéra hustísia” (Lucas 18:8).

Heta vése ningo umi iplátava ha omanda guasúvape pyaʼe voi ojejapo hustísia, ha umi imboriahu ha iñumíldevare katu noñepenái. Péro Ñandejára ndojapói koʼã mbaʼe. Haʼe katuete ojapóta hustísia itiempoitépe, okastigáta umi iñañávape ha omeʼẽta isiervokuérape jeikove opaveʼỹva.

¿Mávapa umi ojoguáva pe viúdape? ¿Mboýpa oĩ okonfiáva Ñandejára ‘pyaʼeterei ohechataha tojejapo chupekuéra hustísia’? Jesús ningo ohechaukánte mbaʼeichaitépa iñimportánte ñañemboʼe meme. Péro ohechauka hag̃ua tekotevẽha jajerovia Ñandejára ohendutaha ñane ñemboʼe, heʼi: “Og̃uahẽ vove pe Yvypóra Raʼy, ¿añetehápepa otopáta koichagua jerovia ko yvy ape ári?” (Lucas 18:8). Oiméne haʼe ontendekase saʼi oĩtaha umi ojeroviáva pe viúdaicha ág̃a Cristo oñepyrũ vove ogoverna.

Heta ohendúva Jesúspe opensa ojeroviaitereiha. Haʼekuéra oimoʼã ihustoitereiha, péro oapoʼi hapichakuérape. Jesús omombeʼu ótro ehémplo umichagua persónape. Haʼe heʼi:

“Mokõi kuimbaʼe ojupi pe témplope oñemboʼe hag̃ua, peteĩva fariséo ha pe ótro katu impuésto kovraha. Pe fariséo oñemboʼy, ha oñemboʼévo heʼi ipyʼapýpe: ‘Aagradesete ningo ndéve Ñandejára, ndajoguái haguére umi ótro kuimbaʼépe, haʼekuéra imonda, ndahekojojái, ha oporomoakãratĩ, ha ndajoguái avei pe impuésto kovrahápe. Aajuna dos vése káda semána, ha ameʼẽ pe diésmo opa mbaʼe arekóvagui’” (Lucas 18:10-12).

Umi fariséo ningo oñembohustoiterei guaʼu umi hénte rovake, ha ojechauka voi opavavépe. Upe tiémpope umi hénte ojepokuaámi oho lunes ha jueves merkádope, upévare umi fariséo oajuna umi díape hetave hénte ohecha hag̃ua chupekuéra. Avei katuete opaga hikuái pe diésmo umi plánta michĩvévagui jepe (Lucas 11:42). Ndaʼareieténte umi fariséo ohechauka kuri mbaʼeichaitépa oapoʼi umi héntepe heʼívo: “Koʼã henteita ndoikuaáiva pe Léi [térã umi fariséo ontende lája pe Léi] nomereséi Ñandejára oguerohory chupekuéra” (Juan 7:49).

Jesús osegi omombeʼu pe ehémplo: “Péro pe impuésto kovraha katu oñemboʼy mombyrymínte voi, ha noñanimái omaña yvágare, upéva rangue ojepytiʼanupã ha heʼi: ‘Cheporiahuverekomína Ñandejára, che ningo ajapo heta mbaʼe ivaíva’”. Jahechaháicha, ko kuimbaʼe iñumílde, pórke orrekonose haʼeha pekadór. Upéi Jesús omohuʼã ko ehémplo heʼívo: “Oho rire hógape, ko kuimbaʼe hekojojave Ñandejára renondépe pe fariséogui. Upévare pe oñembotuichávape, ojeapoʼíta, ha pe oñemomirĩvape katu oñembotuicháta” (Lucas 18:13, 14).

Péicha Jesús ohechauka jey tekotevẽha ñaneumílde. Ko konsého ou porãiterei entéro idisípulope. ¿Mbaʼérepa? Pórke haʼekuéra okakuaa haguépe, umi fariséo omombaʼeterei umi ipuésto yvatéva ha iplátavape, upévare opavave lénto umi hudío opensa avei haʼekuéraicha. Pe konsého Jesús omeʼẽva katuete oipytyvõta isegidorkuérape iñumílde hag̃ua.