Cristo oĩ Ñandejára deréchape

Diez día Jesús oho rire yvágape, pe Pentekostés árape, oñemeʼẽ espíritu sánto idisipulokuérape. Upéva ohechauka porã Jesús oĩmaha yvágape. Ha upe rire oiko jey peteĩ mbaʼe ohechauka porãva upéva. Peteĩ disípulo hérava Esteban pyʼaguasúpe opredika kuri oikóvo, ha upévare ojejuka chupe. Péro omano mboyvemi, haʼe heʼi: “¡Péina! Ahecha pe yvága ojavri ha pe Yvypóra Raʼy oñemboʼyha Ñandejára deréchape” (Hechos 7:56).

David heʼíma vaʼekue espíritu sánto rupive mbaʼépa Jesús ojapóta oĩ aja Ñandejára deréchape. Haʼe heʼi: “Jehová heʼi che Ruvichápe [Jesúspe]: ‘Eguapy che deréchape amoĩ peve nde py guýpe entéro umi ne enemígope’”. Ha og̃uahẽ vove upe tiémpo, ikatútama ojapo Itúva omandáva chupe: “Tereho egoverna ne enemigokuéra apytépe” (Salmo 110:1, 2, NM). Péro, ¿mbaʼépa ojapóta Jesús ohaʼarõ aja og̃uahẽ upe tiémpo?

Oñeformárõ guare pe kongregasión kristiána Pentekostés áño 33-pe, Jesús oñepyrũma ogoverna yvága guive umi disípulo ojeporavóva espíritu sánto rupive ári (Colosenses 1:13). Haʼe ogia chupekuéra ikatu hag̃uáicha opredika, ha avei opreparáma chupekuéra okumpli hag̃ua pe traváho orresivítava upe rire. ¿Mbaʼépa hína upéva? Haʼekuéra iñeʼẽrendúramo omano meve, oñemoingove jeýta yvágape ha oservíta kómo rréi Jesús ndive Ñandejára Rréinope.

Jahechamína koʼág̃a Saulo ehémplo. Haʼe ningo peteĩ disípulo ogovernátava avei yvágape. Chupe ojekuaave kómo Pablo, haʼéva hína pe héra rrománo. Saulo hudío vaʼekue ha ohayhueterei Ñandejára Léi, péro umi líder rrelihióso hudío ohekomboʼe vai chupe. Upévare haʼe opensa kuri iporãha ojejuka Estébanpe. Ha ndopái voi upépe, Saulo “oamenasa gueteri ñande Ruvicha disipulokuérape ha ojukapase voi chupekuéra”. Upévare Caifás, pe saserdóte prinsipál, omeʼẽ chupe autorida oho hag̃ua Damáscope, ikatu hag̃uáicha ojagarra ha ogueru Jerusalénpe Jesús disipulokuérape (Hechos 7:58; 9:1). Péro ohokuévo Damáscope, peteĩ mbaʼerendy oúva yvágagui omimbipásapyʼa ijerére, ha haʼe hoʼa yvýpe.

Saulo ohendu peteĩ heʼíva chupe: “Saulo, Saulo, ¿mbaʼére piko chepersegi hína?”. Haʼe heʼi: “¿Máva piko nde Karai?”. Ha pe oñeʼẽva hendive heʼi chupe: “Che hína Jesús, upe nde repersegíva reikóvo” (Hechos 9:4, 5).

Jesús heʼi Sáulope oike hag̃ua Damáscope ha ohaʼarõnte hag̃ua upépe ojeʼe peve chupe mbaʼépa ojapóta. Péro pe mbaʼerendy ohecha vaʼekue oheja chupe siégo, upévare ojerahámante chupe pe siudápe. Damáscope oiko peteĩ disípulo hérava Ananías, ha Jesús ojeaparese chupe peteĩ visiónpe ha heʼi chupe oho hag̃ua Sáulo rendápe. Ananías ñepyrũrã ndohoséi kuri, péro Jesús otrankilisa chupe ha heʼi: “Ko kuimbaʼépe che aiporavóma oikuaauka hag̃ua che réra umi tetãnguérape, umi mburuvicha guasúpe, ha Israel raʼykuérape”. Upéi Saulo ohecha jey ha “upepete oñepyrũma voi opredika umi sinagógare Jesús haʼeha Ñandejára Raʼy” (Hechos 9:15, 20).

Jesús oĩrõ guare ko yvy ape ári opredika meme vaʼekue, ha koʼág̃a oipytyvõ Pablo ha ambue disipulokuérape osegi hag̃ua ojapo upe tembiapo. Ha Ñandejára tuicha ovendesi chupekuéra. Ohasa rire 25 áñorupi Jesús ojeaparese hague Páblope Damasco rapére, ko apóstol heʼi ‘umi marandu porã ojepredikamaha oparupiete ko múndope’ (Colosenses 1:23).

Tiémpo rire, Jesús ohechauka apóstol Juánpe heta visión, koʼág̃a jatopáva lívro de Apocalípsispe. Koʼã visión rupive, Juan ohecha Jesúspe oúvo tuicha podér reheve Irréinope (Juan 21:22). Juan heʼi: “Espíritu sánto rupive ajegueraha ñande Ruvicha árape” (Apocalipsis 1:10). ¿Mbaʼe tiémporepa oñeʼẽ?

Ñahesaʼỹijo porãvo la Biblia, jahechakuaa ‘ñande Ruvicha ára’ oñepyrũ hague ñane tiémpope. Áño 1914-pe oñepyrũ vaʼekue pe primera gérra mundiál. Ha upe guive, oiko hetaiterei gérra ha terremóto, ha avei oĩ hetaitereive mbaʼasy ha ñembyahýi. Koʼã mbaʼe okumpli pe señál Jesús omeʼẽ vaʼekue ijapostolkuérape, ikatu hag̃uáicha oikuaa hikuái haʼe oñepyrũmaha ogoverna ha pe fin hiʼag̃uimbaitemaha (Mateo 24:3, 7, 8, 14). Avei koʼág̃a ojepredika pe marandu porã oñeʼẽva pe Rréinore ko yvy tuichakuére, ndahaʼéi yma guaréicha, pe Império Rrománo territóriopente.

Upéi, pe visiónpe Juan ohendu peteĩ heʼíva yvága guive: “¡Péina! Ñandejára oguerúma salvasión yvyporakuérape, ipodér ojehechaukáma, Irréino oñemoĩma hendag̃uáme, ha Cristo oñepyrũma oiporu ijautorida” (Apocalipsis 12:10). ¡Pe Rréino Jesús hetaite oñeʼẽ hague oĩrõ guare ko yvy ape ári, koʼág̃a ogovernáma yvágape!

Añetehápe, péva haʼe peteĩ notísia iporãitereíva entéro Jesús disípulope g̃uarã. Upévare ñanemokyreʼỹ apóstol Juan heʼi vaʼekue: “¡Tovyʼákena umi yvága ha umi oikóva upépe! Aichejáranga pe yvy ha pe mar, oguejy rupi peẽme pe Aña, haʼe orrenegaiterei hína oikuaágui mbykypaitemaha itiémpo” (Apocalipsis 12:12).

Koʼág̃a ningo Jesús nohaʼarõvéima hína Itúva deréchape og̃uahẽ meve pe tiémpo Ñandejára omoĩ vaʼekue. Jesús haʼéma Rréi ha ogovernáma yvágape, ha koʼẽrõite ohundíta entéro iñenemigokuérape (Hebreos 10:12, 13). ¿Mbaʼe mbaʼépa ñaneraʼarõ upéicharõ?