Nde ikatu regueropuʼaka umi provléma

KOʼÃ ára ijetuʼúvape hetaiterei tapicha ombohovái provléma ivaíva torméntaicha. Péro kristianokuéra ogueropuʼaka koʼãva ohayhúgui Ñandejárape ha iñeʼẽrendúgui chupe. Upéva jahecha peteĩ káso Jesús omombeʼuvaʼekuére. Haʼe ombojoja hemimboʼekuéra iñeʼẽrendúva ‘peteĩ karai iñakãporãvare hogarã omopuʼãvaʼekue ita ári’. Jesús heʼi: “Upéi ou oky ha okakuaa umi ysyry. Yvytu hatã oipeju ha ojejapi pe ógare. Péicharõ jepe ndoʼái, oñemboguapýgui ita ári” (Mateo 7:​24, 25).

Ko karai iñakãporãramo jepe ombohovái heta provléma. Umíva hína pe ama, ysyry okakuaáva ha yvytu atã. Upéicharõ Jesús ndeʼíri hemimboʼekuéra ndohasaʼasymoʼãiha térã oikotaha vyʼa ha pyʼaguapýpe (Salmo 34:19; Santiago 4:​13-15). Péro heʼi Ñandejára siervokuéra ikatuha ojeprepara ha ogueropuʼaka umi provléma.

Jesús oñeʼẽ ñepyrũvo pe karaíre heʼi: “Oimeraẽ ohendúva koʼã che ñeʼẽ ha upéi ojapo, ojogua ku karai iñakãporãvape hogarã omopuʼãvaʼekue ita ári”. Koʼápe Jesús nomombeʼúi mbaʼéichapa ojejogapovaʼerã, ohechauka guei mbaʼéichapa oikovaʼerã kristianokuéra. Umi iñeʼẽrendúva Jesúspe ohechakuaa ha ontende heta mbaʼe. Haʼekuéra ojapóvo Jesús heʼíva ojogapóvaicha ita ári. Pe karai ojogapo hag̃ua ita ári “ojoʼo raẽ vaʼekue pypuku porã” (Lucas 6:48). Upéicha avei Jesús remimboʼekuéra oñehaʼãvaʼerã oiko Ñandejára oipotaháicha oñemoag̃ui hag̃ua hese (Mateo 5:5-7; 6:33).

Mbaʼépa oipytyvõ Jesús remimboʼekuérape ou jave hiʼarikuéra provlemaita? Haʼekuéra ombohovái porã umi provléma iñeʼẽrendúgui Jesúspe ha oikóvo haʼe oikohaguéicha. Upéva iñimportánte koʼág̃a ha koʼýte og̃uahẽvo Armagedón (Mateo 5:​10-12; Apocalipsis [Revelación] 16:​15, 16). Upéicharõ, jajapóramo Jesús heʼíva jagueropuʼakáta umi provléma torméntaicha ivaíva (1 Pedro 2:​21-23).