‘Penekyreʼỹkena pejapo hag̃ua opa mbaʼe iporãva’

¹ Jesús ningo opreparavaʼekue hemimboʼekuérape omondo mboyve chupekuéra opredika jey hag̃ua (Mat. 10:5-14). Ñande ningo heta ñane rembiapo. Péro, jahupytýta heta mbaʼe porã jajepreparáramo sapyʼami jepe ñasẽ mboyve predikasiónpe (2 Cor. 9:6).

² Mbaʼéichapa jajepreparavaʼerã. Jajeprepara porã hag̃ua jaikuaa raẽ vaʼerã mbaʼérepa oñeʼẽ ñane puvlikasionkuéra ñaikuaveʼẽtava. Ñapensavaʼerã avei umi ñande rapicha oikóvare ñande territóriope. Mbaʼépa oipyʼapy chupekuéra? Mbaʼe rrelihiónpa hikuái? Ñane Rembiapo Rréino Rehegua ha lívro Razonamiento a partir de las Escrituras ningo ohechauka ñandéve mbaʼéichapa ikatu ñaikuaveʼẽ ñande rrevísta.

³ Iporãta avei ñañatendéramo umi demostrasión ojejapóvare Rreunión de Servísiope. Ha ñandekatupyryvévo, sapyʼamíntema tekotevẽta jajeprepara. Upéicharõ jepe, ikatu ñañembokatupyryve ñañehaʼãramo jaikuaa porãve mbaʼépa jaʼéta japredika jave. Ha ñapensavaʼerã upévare ñasẽ mboyve. Jarrevisavaʼerã avei oĩmbápa ñande kartérape ñaikotevẽtava predikasiónpe.

⁴ Mbaʼépa ikatu jajapo ani hag̃ua ñanderesarái jaʼétavagui japredika jave? Jaʼe jey jey vaʼerã hatã ñanemanduʼa porã hag̃ua. Upévare oĩ ermáno ostudia jave ifamília ndive oñensajáva opredika hag̃ua. Oĩ katu oanotáva peteĩ kuatiaʼíre mbaʼépa heʼíta ha omaña jepi hese og̃uahẽ mboyve umi óga ahénope.

⁵ Mbaʼérepa iporã. Jajepreparáramo japredika porãvéta ha javyʼavéta. Ñanepytyvõ ani hag̃ua jakyhyje ñañeʼẽta jave umi óga járape. Upéicharõ jajapysaka porãta avei ñande rapicháre jajepyʼapyrangue jaʼétavare chupekuéra. Ha jaikuaáramo mbaʼérepa oñeʼẽ ñane puvlikasionkuéra, ñanekyreʼỹvéta ñaikuaveʼẽ hag̃ua.

⁶ Ñandejára Ñeʼẽ heʼi ‘kyreʼỹme jajapo hag̃ua opa mbaʼe iporãva’ (Tito 3:1). Ñande ningo ñamombeʼuñaína ñande rapichakuérape pe marandu porã. Upéva ningo peteĩ tembiapo ijojahaʼỹva. Ha jajeprepara porãramo, jahechaukáta jarrespetaha umi ñande rapicha ñanerendusévape ha avei Jehovápe, ñañeʼẽ rupi hérape (Isa. 43:10).