Ñandejára opromete ñane planéta iporãmba jeytaha

Péicha heʼi kuri unos kuánto investigadór diferénte paisgua oñeʼẽrõ guare pe kámbio klimátikore. Oiméramo nde ejerovia oĩha peteĩ Kreadór ojepyʼapýva ñanderehe, koʼã investigadór heʼíva katuete nemopensáne umi proséso Ñandejára omoĩ vaʼekuére pe naturalésape oñemantene ha oñembopyahu jey hag̃ua ijeheguiete.

Péro umi hénte tuichaitereíma operhudika rupi pe naturalésape, ijehegui reínte ndaikatuvéima ojerrekupera jey. ¿Mbaʼérepa ikatu jajerovia Ñandejára ojapotaha álgo osalva hag̃ua ñane planéta ha opa mbaʼe oĩva pype?

Umi téxto bíblico oĩva koʼápe ohechauka porã ñande yvy noñehundimoʼãiha ha ojeikotaha pype pára siémpre.

•  Ñandejára ojapo ñane planéta. “Iñepyrũme Ñandejára ojapo vaʼekue yvága ha yvy” (Génesis 1:1).

•  Ko planéta Ñandejára mbaʼe hína. “Jehováa mbaʼe hína ko yvy ha opa mbaʼe oĩva pype” (Salmo 24:1).

•  Ñandejára odiseña ñane planéta ani hag̃ua núnka oñehundi. “Ñandejára, nde remopyenda porã ko yvy. Ndaipóri mbaʼeve omomýi vaʼerã hendágui, opytáta upépe opa ára g̃uarã” (Salmo 104:5).

•  Ñandejára opromete siémpre oĩtaha oikovéva ñane planétape. “Jehová hína umi yvága Apohare, pe Dios verdadéro. Haʼe okrea ha omopyenda porã ko yvy, haʼe hína Ijapohare. Haʼe ojapo ko yvy ojeiko hag̃ua pype, ndahaʼéi ojapo rei reínte vaʼekue” (Isaías 45:18).

•  Ñandejára opromete umi hénte oikotaha ko yvýpe pára siémpre. “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

Ñandejára ojapórõ guare ko yvy omoĩ pype la tekotevẽva guive ofunsiona porã hag̃ua, ha ñande jakuida porãramo hese osegíta péicha. Umi profesía oĩva la Bíbliape ohechauka porã Ñandejára Jehová orekomaha peteĩ fécha ohundi hag̃ua umi persóna iñañávape ha ombyaívape ko yvy (Apocalipsis 11:18).

La Biblia opromete oñehundi vove umi iñañávape ñane planéta iporãmba jeytaha. Ñande yvýgui oikóta peteĩ hardín neporãva ha Ñandejára omeʼẽta enterovépe opa mbaʼe oipotáva (Salmo 145:16).