Último rréi ivuénova oguerekovaʼekue Israel

JOSÍAS oguereko ocho áñonte oikórõ guare chugui rréi ha ogoverna umi mokõi trívu oĩva súr gotyo Israélpe. Haʼe imitãiterei gueteri. Upévare, iñepyrurã umi kakuaa oipytyvõ chupe ogoverna hag̃ua pe tetã.

Ohasa rire siete áño Josíasgui oikohague rréi, oñepyrũ oheka Jehovápe. Ojapo pe iporãva ojapohaguéicha rréi David, Jehosafat ha Ezequías. Imitãme gueteri, ojapo peteĩ mbaʼe guasu.

Heta tiémpo umi isrraelitakuéra hembiapo vaieterei. Oadora hikuái umi ñandejára guaʼúpe. Ojayvy hikuái umi taʼanga renondépe. Upévare Josías ha isiervokuéra oñepyrũ oipeʼa hetãgui pe adorasión fálsa. Kóva heta omombaʼapo chupekuéra, hetágui umi hénte oadoráva ñandejára guaʼúpe. Koʼápe ikatu rehecha Josías ha isiervokuérape ojokarõhína umi taʼanga.

Upe rire, Josías omoĩ mbohapy kuimbaʼépe omyatyrõ hag̃ua Jehová témplo. Oñembyaty pe puévlogui pláta ha oñemeʼẽ umi kuimbaʼépe ojapo hag̃ua pe tembiapo. Ombaʼapo aja hikuái pe témplore, pe saserdóte guasu Hilquías otopa peteĩ mbaʼe iñimportantetereíva: pe lívro oguerekóva Jehová léi oskriviukavaʼekue Moiséspe, ha okañyvaʼekue.

Ojeguerahávo pe lívro Josíaspe, haʼe ojerure ojelee hag̃ua chupe. Ohendúvo, Josías ohechakuaa pe puévlo ndojapoihague oikóvo Jehová léipe heʼiháicha. Haʼe ombyasyeterei, ha upévare omondoro ijao, rehechaháicha koʼápe. Heʼi: ‘Jehová ipochy ñanendive, pórke ñande tuvakuéra ndojapói umi léi ko lívrope oĩva’.

Josías omondo pe saserdóte guasu Hilquíaspe oporandu hag̃ua mbaʼépa Jehová ojapóta hesekuéra. Hilquías oho profetísa Huldá rendápe, ha oporandu chupe. Huldá heʼi ogueraha hag̃ua Josíaspe ko mensáhe oúva Jehovágui: ‘Jerusalén ha enterove hénte ojekastigáta oadorahaguére umi ñandejára guaʼúpe ha henyhẽhaguére mbaʼe vaígui ko Yvy. Péro nde Josías, rejapohaguére iporãva, ko kastígo oúta nde remano rire’.