Mávapa umi ndaijaʼéiva Ñandejárare?

Satanás el Diablo omoakã umi ndaijaʼéiva Ñandejárare. Satanás haʼe peteĩ tekove espiritual opuʼãvaʼekue Jehováre. Satanás oñorairõnte oikóvo Ñandejára cóntrape ha heta akãrasýma omeʼẽ yvyporakuérape. Satanás haʼe peteĩ tekove aña, ijapu ha oporojukáva (Juan 8:44).

Ambue tekovekuéra espiritual oñemoĩ Satanás ykére ha opuʼã Ñandejárare. La Biblia ohenói chupekuéra demonio. Haʼeháicha Satanás, umi demoniokuéra avei ndaijaʼéi yvypórare. Ojapose mbaʼe vai tapichakuérare (Mateo 9:32, 33; 12:22). Jehová ohundíta Satanás ha idemoniokuérape opa ára g̃uarã. Opapotaitéma chuguikuéra tiempo ojapo hag̃ua ivaíva yvypórare (Revelación 12:12).

Jaikosérõ Ñandejára amígorõ, ndajajapoivaʼerã Satanás oipotáva. Satanás ha idemoniokuéra ipyʼaro Jehová ndive. Ndaijaʼéi Ñandejárare ha oipota ñande avei jajapo upéicha. Upévare, tekotevẽ jaiporavo mávapepa ñambovyʼase: Satanáspe térã Jehovápe. Jaikosérõ opa ára g̃uarã, tekotevẽ jadecidi ha jajapo Jehová oipotáva. Satanás ombotavykuaa tapichápe ha upearã oiporu opaichagua ñuhã. Upéicha ombotavy opavavenunga tapichápe (Revelación 12:9).