Mbaʼérepa Jesús haʼe vaʼekue pe Mboʼehára Guasu

OJAPÓMA dos mil áño rasa onase hague peteĩ mitã idiferénteva umi ótrogui. Tuicha rire oiko chugui peteĩ kuimbaʼe ijojahaʼỹva, ndaipóri ótro iñimportantevéva chugui ko yvy ape ári. Upe tiémpope ndaipóri vaʼekue avión, áuto, komputadóra, téle ni Internet.

Ko mitãme oñembohéra Jesús. Okakuaapa rire oiko chugui pe kuimbaʼe iñaranduvéva ha mboʼehára ivalevéva oĩva ko yvy ape ári. Oĩ heta mbaʼe hasýva oñentende hag̃ua, péro Jesús omboʼe oñentende hag̃uáicha koʼã mbaʼe.

Jesús omboʼe vaʼekue oimehápe: mar rembeʼýpe, kanóape, ogahárupi ha tapére. Upérõ ndaipóri áuto, tren ni kolektívo, upévare Jesús heta oguatámi vaʼerã omboʼe hag̃ua umi héntepe.

Heta mbaʼe ikatu ñaaprende ñande rapichakuéragui. Péro umi mbaʼe iñimportantevéva ñaaprende Jesúsgui, pe Mboʼehára Guasu. La Bíbliape jatopa umi mbaʼe haʼe heʼi vaʼekue. Jaleévo umíva haʼete ku haʼe voi oñeʼẽva hína ñandéve.

¿Mbaʼérepa Jesús ivalete vaʼekue oporomboʼe hag̃ua? Primeroite voi, oĩ rupi peteĩ omboʼéva chupe. Ha Jesús oikuaa avei iñimportanteha ohendu. Péro, ¿mávapepa ohendu? ¿Mávapa omboʼe chupe?... Itúva, ha Jesús Túva hína Ñandejára.

Ou mboyve ko yvy ape ári, Jesús oiko vaʼekue yvágape Ñandejára ndive. Upévare idiferénte enterovévagui, ndaipóri ótro oikóva yvágape onase mboyve ko yvy ape ári. Amo yvágape, Jesús oñatende porã Itúva omboʼévare chupe. Upévare ikatu vaʼekue omboʼe heta mbaʼe umi héntepe. Nde avei rehendúramo nde tuvakuérape, rehechaukáta rejapoha Jesús ojapo haguéicha.

Jesús haʼe avei pe Mboʼehára Guasu ohayhu rupi umi héntepe ha oipytyvõségui chupekuéra oikuaave hag̃ua Ñandejárape. Jesús ohayhu avei umi mitãme, ndahaʼéi umi kakuaápente. Haʼe oñemongeta umi mitã mimi ndive ha ohendu chupekuéra, upévare ovyʼa hikuái hendive.

Peteĩ jey, umi hénte ogueraha ifamília mimi Jesús rendápe. Péro umi disípulo haʼéva hína umi kuimbaʼe omoirũva chupe, oimoʼã haʼe naitiempoiha oñeʼẽ hag̃ua mitã ndive. Upémarõ heʼi umi héntepe oho hag̃ua upégui. ¿Mbaʼépa ojapo Jesús?... Haʼe heʼi idisipulokuérape: “Pehejána umi mitã mimíme tou che rendápe, ha ani pejokosétei”. Jesús oipota vaʼekue umi mitã oñemoag̃ui hese. Haʼe ningo peteĩ kuimbaʼe iñimportánte ha ivaletereíva, upéicharamo jepe oñemotiémpo omboʼe hag̃ua chupekuéra (Marcos 10:13, 14).

¿Ndépa reikuaa mbaʼérepa Jesús omboʼe ha ohendu vaʼekue umi mitãme? Primero oipotágui ovyʼa hikuái. Upévare oñeʼẽ chupekuéra Ñandejárare, Itúva yvagapegua. ¿Mbaʼéichapa nde avei ikatu rembovyʼa nde rapichakuérape?... Remombeʼúvo chupekuéra umi mbaʼe reaprendéva Ñandejáragui.

Peteĩ jey, Jesús omboʼe iñamigokuérape peteĩ mbaʼe iñimportánteva. Omoĩ imbytepekuéra peteĩ mitãʼípe, ha heʼi chupekuéra okambia vaʼerãha ilája ojogua hag̃ua pe mitãme.

¿Mbaʼépa heʼise raʼe Jesús? ¿Mbaʼéicha piko peteĩ kakuaa térã peteĩ mitãrusu ikatu ojogua mitãme?... Peteĩ mitã ningo ndoikuaáiti heta mbaʼe ha oaprendeseterei voi. Upéicharõ, Jesús heʼise vaʼekue idisipulokuéra oheja vaʼerãha ótro omboʼe chupekuéra ojapoháicha umi mitã. Añetehápe, enterove ikatu ñaaprende heta mbaʼe ótrogui. Avei jahechakuaa vaʼerã Jesús omboʼéva iñimportanteveha umi mbaʼe ñande ñapensávagui (Mateo 18:1-5).

Jaʼekuaa avei Jesús ivaleterei hague oporomboʼe hag̃ua oñeʼẽ rupi umi mbaʼe la hénte oikuaasévare. Haʼe omboʼe umi mbaʼe ndahasýiva oñentende hag̃ua. Jesús oñeʼẽ umi guyraʼíre, yvotykuérare ha heta mbaʼe umi hénte ohecha ha oiporu memévare. Péicha oipytyvõ chupekuéra oikuaave hag̃ua Ñandejárape.

Peteĩ díape, Jesús oĩ jave peteĩ sérrope heta hénte oho hendápe. Rehechaháicha ko divúhope, Jesús oguapy ha oñepyrũ omboʼe umi hénte atýpe. Ha heʼi: ‘Pemaña porãmína umi guyraʼi ovevéva yvágare. Haʼekuéra noñemitỹi ni nombyatýi hembiʼurã. Péro Ñandejára yvagapegua omongaru chupekuéra. ¿Ndapevalevéingaʼu piko peẽ chuguikuéra?’.

Ha upéi heʼive: ‘Pemañamíntena mbaʼéichapa okakuaa ha iporã umi lírio oĩva ñúre. Haʼekuéra nombaʼapói ni ndojapói ijaorã. Péro ni rréi Salomón noñemondeporãi vaʼekue haʼekuéraicha. Ñandejára oñangarekóramo péicha umi yvotýre oĩva ñúme, ¿mbaʼégui piko noñangarekomoʼãi penderehe?’ (Mateo 6:25-33).

¿Rentendépa Jesús omboʼe vaʼekue?... Haʼe ndoipotái jajepyʼapyeterei umi mbaʼe jaʼu térã ñamondétavare. Ñandejára oikuaa ñaikotevẽha koʼã mbaʼe. Jesús ndeʼiséi natekotevẽiha ñambaʼapo jajogua hag̃ua ñane rembiʼurã térã ñande aorã, haʼe heʼise guei ñamotenonde vaʼerãha Ñandejárape. Jajapóramo upéicha, Ñandejára omeʼẽta ñandéve ñaikotevẽva. ¿Regueroviápa nde upéva?...

¿Mbaʼépa opensa raʼe umi hénte ohendupa rire Jesúspe?... La Biblia omombeʼu ogustaiterei hague chupekuéra Jesús omboʼe lája. Umi hénte ohenduseterei voi chupe, ha umi mbaʼe heʼíva oipytyvõ chupekuéra ojapo hag̃ua iporãva (Mateo 7:28).

Upévare iñimportanteterei ñaaprende Jesúsgui. Péro, ¿reikuaápa mbaʼéichapa ikatu rejapo upéva?... Umi mbaʼe Jesús heʼi vaʼekue ojehai peteĩ lívrope. ¿Ndépa reikuaa mbaʼe lívropa upéva?... Ñandejára Ñeʼẽ, la Biblia. Ikatu ñahendu Jesúspe jalee ha jajapóramo la Bíbliape heʼíva. Upépe jatopa peteĩ istória ohechaukáva Ñandejára voi ojerure hague ñahendu hag̃ua Jesúspe. Jahechamína mbaʼépa oiko vaʼekue.

Peteĩ ára, Jesús ojupi Pedro, Santiago ha Juan ndive peteĩ sérrope. Haʼekuéra ningo Jesús amigoite vaʼekue, ko lívrope ñañeʼẽvéta hína hesekuéra. Upérõ Jesús rova omimbi kuarahýicha, ijao katu morotĩ sakã ha omimbipa, rehechaháicha ko divúhope.

Upeichaháguinte, Jesús ha iñamigokuéra ohendu ojeʼérõ yvága guive: “Kóva hína che Raʼy ahayhuetéva ha aguerohorýva, pehendúke chupe” (Mateo 17:1-5). ¿Reikuaápa mávapa upe oñeʼẽva?... Ñandejára. Haʼe voi ojerure oñehendu hag̃ua Itaʼýrape.

Ha ñande, ¿jajapótapa Ñandejára heʼíva ha ñahendúta Itaʼýrape?... Enterove jajapo vaʼerã upéva. ¿Nemanduʼápa mbaʼéichapa ikatu rehendu chupe?...

Upeichaite, ikatu rehendu Ñandejára Raʼýpe releéramo la Bíbliape umi mbaʼe haʼe ojapo vaʼekue. Upépe retopáta heta mbaʼe porã pe Mboʼehára Guasu oipotáva reikuaa. Releérõ umíva ha remombeʼúramo ne amigokuérape katuete revyʼáta.