¿Oúpa Ñandejáragui umi notísia porã?

La Bíbliape jatopa pe notísia porãite ikatutaha ojeiko pára siémpre ko yvy ape ári (Salmo 37:29). Ñandejára oipuru 40 kuimbaʼérupi oskrivika hag̃ua umi 66 lívro oĩva la Bíbliape. Umi 5 lívro oĩva oñepyrũvo la Biblia oskrivi vaʼekue Moisés, ha ojapóma 3.500 áñorupi upe hague. Pe último lívro oskrivi vaʼekue apóstol Juan, ojapóma mas de 1.900 áño. ¿Oskrivípa umi kuimbaʼe haʼekuéra opensávante? Nahániri, Ñandejára oipuru ijespíritu sánto oñekomunika hag̃ua umi eskritór ndive (2 Samuel 23:2). Umi eskritór nomoĩri la Bíbliape ijideakuéra síno oskrivi Ñandejára pensamiénto. Upéicharõ, la Biblia haʼe hína Ñandejára ñeʼẽ.​—Elee 2 Timoteo 3:16 ha 2 Pedro 1:20, 21.

Ehecha pe vidéo ¿Mávaguipa ou la Biblia?

Ikatu ñakonfia la Biblia ouha Ñandejáragui pórke omombeʼu mbaʼépa oikóta amo gotyove, ha omombeʼu umi detalleʼi jepe. Ni peteĩ persóna ndaikatúi ojapo upéva (Josué 23:14). Ñandejára Todopoderóso añoite ikatu omombeʼu mbaʼépa añetehápe oikóta amo gotyove.​—Elee Isaías 42:9 ha 46:10.

La Biblia oúramo Ñandejáragui idiferénte vaʼerã entéro umi ótro lívrogui. Ha añetehápe idiferénte, por ehémplo oparupiete ko múndope ikatu oñekonsegi la Biblia hetaiterei idiómape. Ha jepe aretereíma ojeskrivi hague, heta mbaʼe koʼág̃arupi umi sientífiko odeskuvríva ñane planétagui, oĩma vaʼekue la Bíbliape. Ha oskrivíramo jepe 40 kuimbaʼérupi, haʼekuéra noñokontradesíri umi mbaʼe heʼívape. Jaleévo la Biblia jahechakuaa Ñandejára ñanderayhuetereiha. Iñeʼẽ oreko podér, upévare koʼág̃a peve oipytyvõ heta héntepe okambia hag̃ua. Koʼã mbaʼére heta persóna oĩ segúro la Biblia haʼeha Ñandejára ñeʼẽ.​—Elee 1 Tesalonicenses 2:13.

Ehecha pe vidéo ¿Mbaʼérepa ikatu jajerovia la Bíbliare?

La Biblia oreko peteĩ mensáhe prinsipál. Omombeʼu Ñandejára volunta porãite umi héntepe g̃uarã. Por ehémplo, heʼi iñepyrũme Adán ha Eva operde hague pe oportunida oikovévo pára siémpre pe paraísope. La Biblia oexplika avei mbaʼéicha oiko jeýta ko yvýgui peteĩ hardín.​—Elee Apocalipsis 21:4, 5.

Ñandejára Ñeʼẽme oĩ avei heta léi ha konsého ñanepytyvõva javyʼave hag̃ua. La Bíbliape oñemombeʼu mbaʼéichapa Ñandejára otrata vaʼekue umi hénte ojapóvape iporãva ha mbaʼéichapa otrata umi ojapóvape ivaíva. Péicha ikatu ñaaprende mbaʼeichagua persónapa Ñandejára. Upéicharõ la Biblia rupive ikatu jaikuaa Ñandejárape ha avei mbaʼépa jajapo vaʼerã jareko hag̃ua iñamista.​—Elee Salmo 19:7, 11; Santiago 2:23 ha 4:8.

Jesús oporomboʼérõ guare, osita vaʼekue umi héntepe umi téxto oĩva la Bíbliape ha “upéi oipytyvõ chupekuéra ontende porãmbaite hag̃ua Ñandejára Ñeʼẽ heʼíva”. Péicha avei ko folléto nepytyvõta rentende porã hag̃ua umi téxto oĩva la Bíbliape.​—Elee Lucas 24:27, 45.

Añetehápe igustoiterei ñaaprende umi notísia porã oúva Ñandejáragui. Péro koʼã mbaʼe heta héntepe nointeresái, ha ótro katu ndoipotái voi ni oñeñeʼẽ chupe koʼã mbaʼére. Ani reheja umíva nemokangy, pórke resegíramo reikuaa Ñandejárape, ikatúta reikove pára siémpre.​—Elee Juan 17:3.