LEKSIÓN 8
¿Mbaʼérepa Ñandejára oheja oĩ sufrimiénto ha mbaʼe vai?
1. ¿Mbaʼéichapa oñepyrũ vaʼekue umi mbaʼe vai?
Ñandejára oheja umi umáno ogoverna ohechauka hag̃ua haʼekuéra ndaikatuiha osolusiona umi provléma
Satanás ningo haʼe vaʼekue peteĩ ánhel perfékto, péro haʼe “omboyke pe añetegua” ha heʼi pe primer japu, péicha haʼe omoñepyrũ umi mbaʼe vai (Juan 8:44). Haʼe oipota vaʼekue ojeadora chupe, ha upe derécho Ñandejára añoite oreko. Satanás ijapu Évape, pe primer kuña, ha omboliga Évape iñeʼẽrendu hag̃ua chupe Ñandejárape rangue. Adán omoirũ avei Évape ha naiñeʼẽrenduvéi Ñandejárape. Upe mbaʼe odesidi vaʼekue ogueru heta sufrimiénto ha ñemano.—Elee Génesis 3:1-6, 19.
Satanás okonvensérõ guare Évape omboyke hag̃ua Ñandejára heʼíva, oñepyrũ oñemoĩ pe derécho Ñandejára orekóvare ogoverna hag̃ua, ha omboliga ótrope ojapo hag̃ua avei upéva. Hetaiterei hénte omoirũ Satanáspe ha orrechasa Ñandejárape igovernánteramo. Upéicha rupi Satanás haʼe hína “pe ogovernáva ko múndo”.—Elee Juan 14:30 ha 1 Juan 5:19.
2. ¿Orekópa defékto Ñandejára kreasión?
Entéro mbaʼe ojapóva Ñandejára ningo perfékto ha iporã. Umi umáno ha umi ánhel orekopaite oikotevẽva iñeʼẽrendu hag̃ua Ñandejárape (Deuteronomio 32:4, 5). Ñandejára ñandeapórõ guare omeʼẽ ñandéve liverta jadesidi hag̃ua jajapótapa iporãva térãpa ivaíva. Ko liverta omeʼẽ ñandéve pe oportunida jahechauka hag̃ua jahayhuha Ñandejárape.—Elee Santiago 1:13-15 ha 1 Juan 5:3.
3. ¿Mbaʼérepa Ñandejára opermiti oĩ sufrimiénto?
Oĩ ningo oñemoĩva Ñandejára goviérnore ha haʼe opermiti oiko upéva peteĩ tiémpore. ¿Mbaʼérepa? Ohechauka hag̃ua ndaiporiha avave ikatúva ogoverna porã heseʼỹ (Eclesiastés 7:29; 8:9). Ohasáma 6.000 áño upe hague ha ojehecha porãiterei ndaiporiha ni peteĩ goviérno umáno ikatúva oipeʼa umi gérra, inhustísia, mbaʼasy ha umi mbaʼe vai.—Elee Jeremías 10:23 ha Romanos 9:17.
Ñandejára goviérno idiferénte, pórke añetehápe oipytyvõ umi hénte oñemoĩvape ipoguýpe (Isaías 48:17, 18). Koʼẽrõitéma Jehová ohundipaitéta umi goviérno umánope ha sólamente umi hénte oelehíva Ñandejárape igovernanterã opytáta oikove ko yvy ape ári (Isaías 11:9).—Elee Daniel 2:44.
Ehecha pe vidéo ¿Mbaʼérepa Ñandejára oheja jasufri?
4. ¿Mbaʼe oportunidápa jareko Ñandejára ipasiénsia rupi?
Satanás heʼi vaʼekue umi hénte iñeʼẽrenduha Ñandejárape okonveni javénte chupekuéra. ¿Rehechaukasépa ijapuha? Ikatu rejapo upéva. Ñandejára ipasiénsia rupi jareko pe oportunida jahechauka hag̃ua ñañemoĩtapa Ñandejára goviérno ládo térãpa umi goviérno umáno favórpe. Jaiko lájare ikatu jahechauka mbaʼépa jadesidi.—Elee Job 1:8-12 ha Proverbios 27:11.
5. ¿Mbaʼéichapa jaapoja Ñandejára goviérno?
Umi mbaʼe jadesidívare ojekuaa jaipotápa Ñandejára ñanegoverna
Jahechaukáta ñañemoĩha Ñandejára Rréino poguýpe ñaaprendévo umi enseñánsa verdadéra de la Biblia ha jajegia umívare (Juan 4:23). Jahechauka jarrechasaha Satanáspe jasegívo Jesús ehémplo ha nañañentremetéi polítikape ni ndajahái gerrahápe.—Elee Juan 17:14.
Satanás oipuru ipodér omoinge hag̃ua la hénte akãme ndaivairiha hekovai térã ojapo umi mbaʼe vai. Ñamboykéramo umi mbaʼe, ikatu ñane amígo ha ñane hénte oñembohory térã oñemoĩ ñane kóntrape (1 Pedro 4:3, 4). Upévare jadesidi vaʼerã ñamoirũtapa umi ohayhúvape Ñandejárape, térãpa nahániri. Ñandejára léi ohechauka haʼe iñarandu ha ñanderayhuha, péro, ¿jajapótapa iléi heʼíva? Péicha jahechaukáta Satanás ijapuha heʼívo ndaiporiha iñeʼẽrendúva Ñandejárape ijetuʼu jave chupe.—Elee 1 Corintios 6:9, 10 ha 15:33.
Ñandejára ñanderayhueterei ha upéva ohechauka koʼẽrõitéma ohunditaha umi mbaʼe vai ha pe sufrimiénto. Umi ogueroviáva upéva oikóta vyʼápe ko yvy ape ári pára siémpre.—Elee Juan 3:16.