Jesús ojevautisa

Oiméne seis méserupi Juan oñepyrũ rire opredika, Jesús oho hendápe rrío Jordánpe. Upérõ Jesús orekóma 30 áñorupi. Péro, ¿maʼerãpa oho Juan rendápe? Ndohói ningo ovisita hag̃uánte chupe, ni oikuaa hag̃ua mbaʼetekópa oho chupe hembiapo. Jesús oho Juan rendápe ojevautisa hag̃ua.

Péro Juan ndovautisaséi Jesúspe, ha heʼi chupe: “Che ningo la aikotevẽva nde chevautisa, ¿ha piko nde reju che rendápe?” (Mateo 3:14). Juan oikuaa Jesús haʼeha Ñandejára Raʼy. Oiméne ñanemanduʼa María hyeguasu ñepyrũrõ guare Jesúsgui, oho hague ovisita Elisabétpe. Upérõ Elisabet hyeguasu avei Juángui, ha pe mitã opo vyʼágui isy ryépe ohendúvo María og̃uahẽha hógape. Oime vaʼerã Elisabet omombeʼu rakaʼe imembýpe koʼã mbaʼe oiko vaʼekue. Ha oiméne Juan oikuaa avei peteĩ ánhel oanunsia hague Jesús onasetaha. Avei oñemombeʼúne raʼe chupe heta ánhel ojeaparese hague umi pastórpe pe pyhare Jesús onasérõ guare.

Juan ovautisa umi héntepe oñarrepenti rupi ipekádogui. Péro Jesús ningo arakaʼeve ndopekáiva. Upévare Juan ndovautisaséi chupe. Péro Jesús heʼi: “Anína chejokosétei, péichamante ikatúta jajapopa porã Ñandejára oipotáva” (Mateo 3:15).

¿Mbaʼérepa tekotevẽ Jesús ojevautisa, si haʼe ndopekáiva arakaʼeve? Ikatu hag̃uáicha ohechauka oñepresentaha ojapo hag̃ua Itúva volunta (Hebreos 10:5-7). Jesús ningo karpintéro vaʼekue, péro koʼág̃a og̃uahẽma pe tiémpo ojapo hag̃ua pe traváho Ñandejára onkarga vaʼekue chupe. Péro, ¿mbaʼépa Juan ohaʼarõ oiko ovautisa vove Jesúspe?

Juan omombeʼu: “Upe chembou vaʼekue aporovautisa hag̃ua ýpe heʼi chéve: ‘Rehecha vove pe espíritu sánto oguejy ha opytaha peteĩ kuimbaʼe ári, reikuaáta upéva haʼeha pe oporovautisáva espíritu sántope’” (Juan 1:33). Jahechaháicha, Juan ohaʼarõnte voi Ñandejára espíritu oguejy peteĩ kuimbaʼe haʼe ovautisáva ári. Upévare noñesorprendéi ohechávo Jesús osẽ rire pe ýgui, ‘Ñandejára espíritu oguejyha hiʼári peteĩ palómaicha’ (Mateo 3:16).

Péro Jesús ojevautisárõ guare oiko avei ótra kósa. La Biblia heʼi: “Pe yvága ojavri”. ¿Mbaʼépa heʼise upéva? Oiméne heʼise Jesús ojevautisávo imanduʼapaite hague umi mbaʼe ohasa vaʼekuére oikórõ guare yvágape Jehovándi. Avei heʼise imanduʼa hague opa mbaʼe Itúva omboʼe vaʼekuére chupe ou mboyve ko yvy ape ári.

Avei, Jesús ojevautisávo oñehendu peteĩ oñeʼẽva yvágagui ha heʼíva: “Kóva hína che Raʼy ahayhuetéva ha aguerohorýva” (Mateo 3:17). ¿Mávapa la oñeʼẽva? Ndahaʼéi ningo Jesús, pórke haʼe oĩ hína Juan ndive upépe. Upéicharõ, Ñandejára la oñeʼẽ vaʼekue. Péicha ojehecha porãiterei Jesús ndahaʼeiha Ñandejára, síno Ñandejára Raʼy.

Oĩ aja ko yvy ári, Jesús haʼe vaʼekue yvypóra haʼe haguéicha Adán, pe kuimbaʼe ypykue, ha ojeʼe avei hese haʼeha Ñandejára Raʼy. Pe disípulo Lucas omombeʼu rire mbaʼépa oiko Jesús ojevautisárõ guare, heʼi: “Oñepyrũrõ guare oporomboʼe Jesús oreko treinta áñorupi ha ojeʼe haʼeha José raʼy, Helí raʼy, [...] David raʼy, [...] Abrahán raʼy, [...] Noé raʼy, [...] Adán raʼy, Ñandejára raʼy” (Lucas 3:23-38).

Adán haʼe haguéicha “Ñandejára raʼy”, Jesús haʼe vaʼekue avei Ñandejára raʼy oĩrõ guare ko yvy ape ári. Péro ojevautisávo, oiko chugui Ñandejára Raʼy teete ha ikatúta oiko jey yvágape. Upéicha Jesús oĩma preparádo omboʼe hag̃uáicha pe añetegua oúva Jehovágui, ha ohechauka hag̃ua mbaʼéichapa ojeiko vaʼerã. Upéi oñepyrũma ojapo ko yvy ape ári pe tembiapo oñemeʼẽ vaʼekue chupe, ha otermináta ontrega vove hekove osalva hag̃ua yvyporakuérape.