Jaikókena Ñandejára oipotaháicha

“Cristo omano opavavére, ikatu hag̃ua umi oikovéva ndoikovéima ijupe g̃uarã.” (2 CORINTIOS 5:15.)

 1. Mbaʼépa ohasavaʼekue peteĩ misionéro?

“ORE mbaʼyru raẽvete oike upe tavaʼi oĩva Áfricape, oiko rire peteĩ ñorairõ upépe, heʼi peteĩ misionéro hérava Aarón.a Ndoroikuaavéi mbaʼeve pe kongregasión upépe oĩvagui. Ha roikuaase mbaʼépa oikotevẽ ore ermanokuéra. Rogueraha tembiʼurã, ao ha heta puvlikasión, avei rogueraha pe vidéo Los testigos de Jehová... la organización tras el nombre.b Roiporu peteĩ óga kapiʼi guasu, orekohápe hikuái peteĩ téle ha reproductor de video. Hetaiterei hénte oho ohecha hag̃ua, upévare rohechauka jey ótro día. Ojehechapa rire, hetaiterei oĩ ostudiáva la Biblia. Rohechakuaa noroñehaʼãreirihague.”

 2. a) Mbaʼérepa heta kristiáno oñemeʼẽ Ñandejárape oservi hag̃ua chupe? b) Mbaʼe porandúpa ñambohováita?

² Mbaʼérepa ojaporakaʼe Aarón ha iñirũnguéra upéicha? Haʼekuéra omombaʼeterei Jesús omanohague hesehapekuéra. Upévare oñemeʼẽ hikuái Ñandejárape ha oiko Haʼe oipotaháicha. Haʼekuéra ojapohaguéicha, ñande ñañemeʼẽmavaʼekue Ñandejárape ha ‘ndajaikovéima ñandejupe g̃uarã’. Ñañehaʼã jajapo ‘opa mbaʼe marandu porã rehehápe’ (2 Corintios 5:15; 1 Corintios 9:23). Jaikuaa porã ningo ko múndo oñehundi vove, ndovalemoʼãiha ñandéve ñande pláta ni umi mbaʼe jajapóva ko múndope. Upévare ñane mbaretekue omeʼẽha peve, ñañehaʼãmbaitékena jaiko Ñandejára oipotaháicha (Eclesiastés 12:1). Mbaʼéichapa ikatu jajapo upéva? Mávapa ñanemombaretéta ha ñanembopyʼaguasúta jaservi hag̃ua Ñandejárape? Ha mbaʼépa ikatu jajapo jaservi porãve hag̃ua Ñandejárape?

Oĩ heta mbaʼe jajapovaʼerã

 3. Emombeʼumi mbaʼe mbaʼépa jajapovaʼerã jaiko hag̃ua Ñandejára oipotaháicha.

³ Ñande kristiáno jaikuaa, jaikove aja pukukue jajapovaʼerãha Ñandejára oipotáva. Upearã jaleevaʼerã la Biblia koʼẽ koʼẽre, jajapo ñande párte Eskuéla dél Ministério Teokrátikope, japredika ha upe rire jajevautisa. Upéicha jajapóvo, akóinte ñanemanduʼa apóstol Pablo heʼivaʼekuére: “Ejepyʼamongetákena koʼã mbaʼe rehe ha ejapo upéicha opavave ohecha hag̃ua oho porãha ndéve” (1 Timoteo 4:​15, BNP). Oho porãha ñandéve ndeʼiséi jaserviha Ñandejárape jajekuaa hag̃uánte opárupi. Upéva rangue jahechaukañaína jajaposeha Ñandejára oipotáva ñande pyʼaite guive. Upéicha avei jaheja Haʼe ñanehekomboʼe. Ha jaikuaa ndaiporiha haʼeichagua ñanehekomboʼe porãve vaʼerã (Salmo 32:8).

 4. Mbaʼérepa ndajajepyʼapyivaʼerã ñandejehe?

⁴ Upéicharamo jepe, ñandepyʼamokõi térã jajepyʼapyetereíramo ñandejehe ndaikatumoʼãi jaservi porã Ñandejárape (Eclesiastés 11:4). Upévare javyʼa hag̃ua jaservívo Ñandejárape ha ñande rapichakuérape, ndajajepyʼapyivaʼerã ñandejehe. Jahechami Erik ojapovaʼekue. Haʼe ohecha ikatútapa oservi peteĩ kongregasión oñeñeʼẽhápe ótro idióma. Péro oñeporandúvami: “Hasýnepa chéve aha vove upépe? Ajogueraha porãtapa umi ermanokuéra ndive? Mbaʼépa heʼíne cherehe hikuái?”. Haʼe heʼi: “Hasýpe ahechakuaa ajepyʼapyvevaʼerãha umi ermanokuérare, ajepyʼapyrangue chejehe. Upévare, añehaʼãmbaite aipytyvõ enterove ikatúvape. Añemboʼe Ñandejárape chepytyvõmi hag̃ua umi mbaʼe ajapótavape. Ahechakuaa ajapo porã hague. Koʼág̃a avyʼaiterei aservihaguére upe kongregasiónpe” (Romanos 4:20). Upeichaite, ñañehaʼãmbaitéramo jaservi Ñandejárape ha ñande rapichakuérape javyʼavéta.

 5. Mbaʼérepa jahecha porã vaʼerã jajapótava jaikoséramo Ñandejára oipotaháicha? Emoĩ peteĩ ehémplo.

⁵ Jaiko hag̃ua Ñandejára oipotaháicha, jahecha porã vaʼerã avei mbaʼépa jajapóta. Ñañeñangarekovaʼerã, anítei jadevepa. Ikatu rupi upéva ñanemboyke ani hag̃ua jajapopaite Ñandejára servísiope. Ñandejára Ñeʼẽ ñanemomanduʼa: ‘Umi viru oiporukáva oreko ipoguýpe umi ombaʼeporúvape’ (Proverbios 22:7). Jajeroviavaʼerã Jehováre ha ñamotenonde ñande rekovépe umi mbaʼe chupe ombovyʼáva. Upéicha jajapóta opa mbaʼe hendaitépe. Jahechami Guoming ohasavaʼekue. Haʼe oiko isy ha mokõi iñermána ndive peteĩ lugár hepyetereihápe umi óga, avei hasy ojetopánte hag̃ua oñembaʼapo hag̃ua. Sapyʼánte ndahaʼéi enterovete ombaʼapóva, upéicharamo jepe oñopytyvõ hikuái ha oiporukuaa umi mbaʼe orekomíva. Guoming heʼi: “Sapyʼánte saʼieterei ore pláta, upéicharamo jepe ikatu rojapo ore prekursorádo ha avei roñangareko porã ore sýre. Haʼe ndojeruréi oréve hetaiterei mbaʼe. Ndoipotái romboyke umi mbaʼe rojapóva Ñandejára servísiope, ha upéva roagradeseterei.” (2 Corintios 12:14; Hebreos 13:5.)

 6. Mbaʼéichapa jahecha tekotevẽha jaheja heta mbaʼe jaiko hag̃ua Ñandejára oipotaháicha?

⁶ Ñañemeʼẽtereíramo ko múndope ojejapóvape, tahaʼe negósio térã hetave mbaʼe, tekotevẽta jaheja ñamotenonde hag̃ua Ñandejára rembipota. Umi mbaʼe ndojehejái péicha péichante. Upévare nañanekangyivaʼerã, ñañehaʼã ha nosẽporãiramo jepe ñandéve iñepyrũrãme. Jahechami Koichi ojapovaʼekue. Haʼe oiporuvaʼekue hetaiterei tiémpo ovyʼa hag̃uánte. Ostudiáramo jepe la Biblia imitãrusu guive, heta áñore umi videojuego iñimportanteve chupe g̃uarã. Peteĩ jey oñeporandu: “Mbaʼe piko ajaporaʼe che rekovépe? Arekóma ningo 30 áño rasa ha ndajapói gueteri mbaʼevete chepytyvõtava”. Koichi oñepyrũ jey ostudia la Biblia, ha oheja oipytyvõ chupe umi ermáno kongregasionpegua. Ohasáramo jepe heta tiémpo oheja hag̃ua umi videojuego, haʼe naikangýi. Oñemboʼe meme Ñandejárape ha mborayhúpe oñepytyvõ rupi chupe, ohejaite umi videojuego (Lucas 11:9). Koʼág̃a Koichi ovyʼaiterei oservihaguére ikongregasiónpe, oiko chugui peteĩ siervo ministerial.

Jahechaukákena ñaneakãguapyha

 7. Mbaʼérepa ñaneakãguapyvaʼerã jajapo hag̃ua Ñandejára oipotáva?

⁷ Jehová ningo omerese jajapo opa mbaʼe jaservi hag̃ua chupe. Jaiko hag̃ua haʼe oipotaháicha ñañehaʼãmbaite ha nañaneateʼỹivaʼerã (Hebreos 6:​11, 12). Péro, Jehová ndoipotái ñanekaneʼõ. Jahechakuaáramo ndaikatuiha jajapo Ñandejára oipotáva ñandejeheguínte, jahechauka ñaneakãguapyha. Ha upéicha avei ñamombaʼeguasu Jehovápe (1 Pedro 4:11). Añete, Jehová ningo opromete omeʼẽtaha ñandéve pe puʼaka ñaikotevẽva jajapo hag̃ua haʼe oipotáva. Upéicharamo jepe, nañañehaʼãivaʼerã jajapo umi mbaʼe haʼe ndojeruréiva (2 Corintios 4:7). Jaservi meme hag̃ua Ñandejárape ñanekaneʼõʼỹre, jaiporukuaavaʼerã ñane mbaretekue.

 8. Mbaʼépa ojehu peteĩ ermánape oñehaʼã rupi omeʼẽmbaite ijehegui Jehovápe ha ko múndope avei, ha mbaʼépa ojapo upe rire?

⁸ Peteĩ precursora Asiaygua hérava Ji Hye, dos áño pukukue ombaʼapo peteĩ traváho omokaneʼõitereíva chupe. Haʼe omombeʼu: “Añehaʼã ameʼẽmbaite chejehegui Jehovápe g̃uarã ha ko múndope avei, péro cinco órante ake káda día. Upe rire che reʼõnguetéma aikóvo. Chekangyetereíma ajapo hag̃ua Jehovápe g̃uarã, upévare ndavyʼavéi aservívo chupe.” Ikatu hag̃uáicha omombaʼe Jehovápe ‘ipyʼaite guive, hiʼánga rugua guive, iñarandukue ha opa imbaretekue reheve’, Ji Hye oheka peteĩ traváho saʼive ojeruréva chugui (Marcos 12:30). “Che família chejopyetereivaʼekue ambaʼapo porã hag̃ua. Péro che amotenonde Ñandejárape ha aiko haʼe oipotaháicha. Pe aganáva omeʼẽma chéve aiko porã hag̃ua, ikatu avei ajogua ao iporãva. Ha igustoiterei ningo jake porãve! Koʼág̃a avyʼave apredika jave ha avei añemoag̃uive Ñandejárare. Upéva ahupyty nambaʼapoitereivéima rupi ko múndope g̃uarã.” (Eclesiastés 4:6; Mateo 6:​24, 28-30.)

 9. Mbaʼéichapa ikatu oipytyvõ heta ñande rapichápe ñane predikasión?

⁹ Ndaikatumoʼãi enterovete jaservi Ñandejárape peteĩ precursor regular ojapoháicha. Ñandetuja, ñanderasy térã jareko rupi ótro provléma ndaikatúiramo jaservi porã Ñandejárape, upéva nañanemokangyirivaʼerã. Jehová omombaʼeterei jajeroviáramo hese, ha jaservi chupe ñande pyʼaite guive (Lucas 21:​2, 3). Avei ñapensavaʼerã ikatuha oipytyvõ ótrope ñande japredikáramo. Haʼetéramo jepe ñandéve saʼieterei upe jajapóva. Ñamoĩ chupe, ñasẽha japredika ha ndajatopái ni peteĩ ohendusévape. Péro ikatu upe rire umi hénte opyta oñeʼẽ ñande ñag̃uahẽhague hógape. Ikatu voi umíva apytépe oĩ umi nosẽivaʼekue ohendu hag̃ua. Jaikuaa voi oĩtaha nohenduséiva pe marandu porã, péro oĩta avei ohendútava (Mateo 13:​19-23). Ikatu oĩ upe riréma ohendúva, ohasa rire peteĩ mbaʼe térã ohechávo mbaʼéichapa ojeiko ko múndope. Tahaʼe haʼeháicha, ñañehaʼãmbaitéramo japredika jajapoñaína Ñandejára oipotáva. Ñande niko ‘ñamoirũ Ñandejárape hembiapópe’ (1 Corintios 3:9).

10. Mbaʼépa ikatu jajapo enterovete?

¹⁰ Avei enterovete ikatu ñaipytyvõ ñane famíliape ha ñane ermanokuérape kongregasiónpe (Gálatas 6:10). Ikatu voi ñane ehémplo tuicha oipytyvõ chupekuéra hekovépe (Eclesiastés 11:​1, 6). Umi ansiáno ha siervo ministerial hembiapo rupive omombarete kongregasiónpe. Ha upéicha hetaitereive mbaʼe ojejapo Ñandejárape g̃uarã. La Biblia heʼi ‘ñambaʼapóramo Ñandejárape g̃uarã’, umi mbaʼe jajapóva “ndareiriha” (1 Corintios 15:58).

Jaikókena Ñandejára oipotaháicha

11. Mbaʼéichapa ikatu jajapove Ñandejára servísiope?

¹¹ Ñande kristiáno ñamombaʼeterei ñande rekove. Ha jaikose ñamombaʼeguasu hag̃uáicha Ñandejárape (1 Corintios 10:31). Ñañehaʼãmbaitevaʼerã ñamosarambi marandu porã Ñandejára Goviérno rehegua. Avei ñamboʼe ñande rapichápe ojapo hag̃ua umi mbaʼe Jesús omboʼevaʼekue. Upéicharamo, ikatúta jajapo hetave mbaʼe Ñandejára servísiope (Mateo 24:14; 28: 19, 20). Oiméne ñaipytyvõ voi ñane kongregasiónpe, péro ikatu avei jaha ñaipytyvõ oñekotevẽhápe. Oñeñeʼẽhápe ótro idióma térã ikatu voi ótro tetãme. Umi ansiáno ha siervo ministerial nomendáiva ikatu oho Escuela de Entrenamiento Ministerial-pe. Ha upe rire oservi peteĩ kongregasión oñekotevẽhápe, tahaʼe hetãme térã ótro tetãme. Umi omendáva katu, ojapovahína iprekursorádo regular térã espesiál ikatu oho Galaádpe ha oiko chuguikuéra misionéro. Ha katuete oñekotevẽ ombaʼapovaʼerã avei Betélpe ha construksiónpe.

12, 13. a) Mbaʼépa ñanepytyvõta jaiporavo hag̃ua jajapótava? b) Emombeʼu mbaʼéichapa umi mbaʼe ñaaprendéva jaservívo Ñandejárape ikatu avei jaiporu ótro hendápe.

¹² Mbaʼépa nde rejapóta? Reñemeʼẽma rupi Ñandejárape rehejavaʼẽra tanepytyvõ haʼe ha avei iñorganisasión. ‘Imbaʼe porã rupive’ Jehová ñanepytyvõta jaiporavo porã hag̃ua jajapótava (Nehemías 9:20). Jajapóramo ojejeruréva ñandéve Ñandejára servísiope ikatúta jajapo hetave mbaʼe. Ha umi mbaʼe ñaaprendéva umichahápe ñanepytyvõta avei ótro hendápe.

¹³ Jahechami Dennis ha Jenny ojapovaʼekue. Haʼekuéra oipytyvõ oñemopuʼã hag̃ua umi Salón del Reino. Oúrõ guare pe yvytu vaiete oñembohérava Katrina Estados Únidospe, haʼekuéra oipytyvõ upépe. Dennis heʼi: “Umi mbaʼe roaprendevaʼekue romopuʼãhápe umi Salón roiporu roipytyvõ hag̃ua ore ermanokuérape. Ha upéva orembovyʼaiterei. Rohecharamoiterei mbaʼéichapa umi ermáno oagradese oréve. Heta oĩ oipytyvõva oñemopuʼã jey hag̃ua umi óga, péro saʼieterei ojapo hikuái. Ore Testigos de Jehová katu romyatyrõma térã romopuʼã jeýma cinco mil óga rupi ha hetaiterei Salón del Reino. Ohechávo koʼã mbaʼe, heta hénte ohenduseve pe marandu porã”.

14. Mbaʼépa ñanepytyvõta jajaposéramo pe prekursorádo regular?

¹⁴ Mbaʼérepa nereñehaʼãi rejapo pe prekursorádo regular? Upéicha avei rejapóta Ñandejára oipotáva, ha rehupytýta heta mbaʼe porã. Koʼág̃a ndaikatúiramo, ehechamína mbaʼépa ikatu rejapo upearã. Eñemboʼe Ñandejárape Nehemías oñemboʼehaguéicha ojapótarõ guare peteĩ mbaʼe iñimportantetereíva: “[Jehová] eipytyvõmíkena koʼág̃a ne rembiguáipe tosẽ porãmbami” (Nehemías 1:​11, ÑÑM). Upe rire, jajerovia añete vaʼerã pe ‘Ohendúvare ñane ñemboʼe’, ha jajapo jajerurehaguéicha (Salmo 65:2). Ñanemanduʼákena: jaipotáramo Jehová ovendesi ñañehaʼãhaguére jaservi chupe, jahechauka raẽ vaʼerã ñañehaʼãha. Erémaramo rejapotaha nde prekursorádo regular, aníkena mbaʼeve ndejoko rehupyty hag̃ua upéva. Ohasa rire heta tiémpo, hetave mbaʼéma reikuaáta ha avei revyʼavéta.

Mbaʼépa ñanepytyvõta javyʼa hag̃ua

15. a) Mbaʼéichapa ñanepytyvõ ñane ermáno ohasavaʼekue ha oservímava Ñandejárape ymaiterei guivéma? b) Emombeʼu peteĩ ñane ermáno ohasavaʼekue tuicha nemokyreʼỹvaʼekue.

¹⁵ Mbaʼépa rehaʼarõkuaa reikóramo Ñandejára oipotaháicha? Ikatu reñeʼẽ heta ermáno ndive, ymaiterei guivéma oservíva Ñandejárape. Umíva apytépe umi are guivéma haʼéva precursor regular. Ajépa ningo iporãite ha ovyʼaiténe hikuái! (Proverbios 10:22.) Omombeʼúta ñandéve Jehová katuete oipytyvõhague chupekuéra ohupyty hag̃ua umi mbaʼe oikotevẽva ha hetave mbaʼe, oĩ vaivéramo jepe hikuái (Filipenses 4:​11-13). Umi áño 1955 ha 1962 rupi, La Atalaya-pe osẽ peteĩ artíkulo hérava “Siguiendo tras mi propósito en la vida”, oñeʼẽva heta ñane ermáno jeroviaha ohasavaʼekuére. Upe guive hetaitereíma osẽ umi artíkulo oñeʼẽva peteĩ ñane ermáno ohasavaʼekuére. Umívape ojehechakuaa mbaʼeichaitépa ñane ermanokuéra omombaʼe Ñandejárape ha ovyʼa hikuái, jaleeháicha pe lívro hérava Héchospe. Katuete relee vove umíva eréta: “Kóicha avei che aikose!”

16. Mbaʼépa ikatu jajapo javyʼa hag̃ua ñande rekovépe?

¹⁶ Aarón, ñañeʼẽhague iñepyrũme heʼi: “Áfricape aikuaa hetaiterei mitãrusúpe oviaháva opa henda rupi oikuaaségui mbaʼerãpa jaikove. Upéicharamo jepe, ndoikuaái mbaʼépa ojapóta hikuái. Ore katu romosarambi pe marandu porã Ñandejára goviérno rehegua, Jehová oipotaháicha. Ha upéva orembovyʼaiterei. Ikatu roʼe umi mbaʼe rohasavaʼekuére javyʼaveha ñameʼẽvo, ñandéve oñemeʼẽrõguágui”

17. Mbaʼérepa jaikovaʼerã Ñandejára oipotaháicha?

¹⁷ Ha nde, mbaʼépa rejapóta nde rekovépe? Ndereikuaáiramo gueteri mbaʼépa rehupytyse Ñandejára servísiope, oĩta katuete peteĩ mbaʼe remombaʼevétava nde rekovépe. Maʼerãpa reiporúta nde rekove reiko hag̃ua ko múndo oikuaveʼẽva rapykuéri? Koʼẽrõitéma og̃uahẽ vove pe “jehasa asy tuicháva”, umi mbaʼereta oĩva ko múndope ndovalemoʼãi mbaʼeverã. Iñimportantevéta hína mbaʼéichapa ñaime Jehová ndive. Javyʼaitétaningo upéramo jaservihaguére Jehovápe ha ñande rapichápe, ha jaikohaguére Ñandejára oipotaháicha! (Mateo 24:21; Revelación 7:​14, 15.)

[Nóta]

Ikatúpa ñamyesakã?

• Mbaʼéichapa ohecha Jehová umi mbaʼe jajapóva jaservi hag̃ua chupe?

• Mbaʼéichapa jaservi porãvéta Ñandejárape ha ñande rapichápe, ñaneakãguapýramo ha ñamohenda porãramo jajapótava?

• Mbaʼe mbaʼépa ikatúne jajapo Ñandejára servísiope?

• Mbaʼépa jajapovaʼerã javyʼa hag̃ua ñande rekovépe?

[Nóta oĩva taʼanga ndive páhina 26]

Hetaiterei mbaʼe ikatu jajapo Ñandejára servísiope