Mbaʼépa hína Ñandejára pytu marangatu?

JESÚS heʼírõ guare hemimboʼekuérape ojerure hag̃ua Ñandejárape ipytu marangatu heʼi avei: “Máva piko pende apytépe, pende raʼy ojeruréramo peẽme pira, omeʼẽtava chupe mbói, pira rangue? Térã ojerurérõ peẽme ryguasu rupiʼa, omeʼẽtava chupe alakrán?” (Lucas 11:11, 12, NM). Umi mitã Galileaygua ojerurémi ryguasu rupiʼa ha pira iñembyahýi vove oikuaágui umíva omoyg̃uatãtaha chupekuéra.

Peichaite avei ñande ñaikotevẽ Ñandejára pytu marangatúre. Ha upévare ku mitã ojerureháicha hoʼuvaʼerã iñembyahýi jave, ñande avei jajerure meme vaʼerã Ñandejárape ipytu marangatu (Lucas 11:9, 13). Mbaʼérepa ñaikotevẽterei? Ñambohovái mboyve ko porandu jaikuaa raẽ vaʼerã mbaʼépa heʼise pytu marangatu. Jahechamína mbaʼépa heʼi Ñandejára Ñeʼẽ.

“Ñandejára puʼaka”

Ñandejára Ñeʼẽme heʼi pytu marangatu haʼeha pe puʼaka Haʼe oiporúva ojapo hag̃ua hembipota. Upéva jahechakuaa ánhel Gabriel heʼírõ guare Maríape imembytaha vírhenramo jepe: ‘Pytu marangatu oúta nde ári ha Ñandejára puʼaka nemoʼãta. Upévare ne memby imarangatúta haʼégui Ñandejára raʼy’ (Lucas 1:35, NM). Péicha jahecha “Ñandejára puʼaka” ha ipytu marangatu peteĩcha lentoha.

Ambue téysto oĩva la Bíbliape omyesakãve upéva. Pór ehémplo, Miqueas heʼivaʼekue: ‘Che katu cherenyhẽ Ñandejára pytu marangatu ha ipuʼakágui’ (Miqueas 3:8, ÑÑB). Avei Jesús heʼivaʼekue hemimboʼekuérape: ‘Espíritu sánto oúvo pende ári perekóta pokatu’ (Hechos 1:8). Ha apóstol Pablo oiporúmi pe ñeʼẽ “espíritu sánto puʼaka rupi” (Romanos 15:13, 19).

Mbaʼépa ohechauka ñandéve koʼã téysto? Jehová ojevaleha ipytu marangatúre oiporu hag̃ua ipuʼaka. Ñapensamíntena, haʼe ningo ojapo opa mbaʼe oĩva yvága ha yvýpe ha upearã oiporu ipytu marangatu. Isaías 40:26 heʼi voi: ‘Pejesaupi ha pemaʼẽ mbyja atykuérare. Máva piko umi mbaʼe apohare? Pe heʼíva peteĩteĩme hembiaporã ha héra rupi ohenói. Haʼe ipokatu ha ipuʼaka mbarete rupi ndaipóri ouʼỹva ijapytepekuéra’.

Ajépa ñanemopirĩmba pe arapy ojejapo lája? Opa umíva Ñandejára ojapovaʼekue “ipokatu ha ipuʼaka” rupi. Ñapensamíntena, upevaʼỹre ñande yvypóra ni guaʼuhápe nañaimeivaʼerãmoʼã. Tuichaiterei mbaʼe ningo Ñandejára pytu marangatu! (Ehecha pe rrekuádro “Ñandejára oiporu ipytu marangatu”.)

Jehová ojapo opa mbaʼe ndetuicháva pe arapýre ipytu marangatu rupive. Ikatúne piko upéicharõ oiporu avei ñanepytyvõ hag̃ua? La Biblia heʼi oiporu hague oipytyvõ hag̃ua hembiguaikuéra yma guarépe. Jahechamína.

“Jehová espíritu oĩ chendive”

Jesús oĩrõ guare ko yvy ape ári Ñandejára oiporu ipytu marangatu ombopokatu hag̃ua chupe. Upévare heʼivaʼekue: “Jehová espíritu oĩ chendive” (Lucas 4:18, NM). Mbaʼe mbaʼépa ojapo Jesús ipokatu rupi? (Lucas 4:14.) Pór ehémplo, omonguera hasývape, ojoko torménta, omongaru hetaiterei héntepe ha omanóva jepe omoingove jey. Ndareíri ningo apóstol Pedro heʼivaʼekue Jesús rehe: ‘Ñandejára ohechauka pende apytépe Jesús Nazaretgua pokatu, ojapóvo haʼe rupi heta milágro ha ohechaukávo ipuʼaka’ (Hechos 2:22).

Jepevérõ Jehová koʼág̃a rupi nomeʼẽvéi ipytu marangatu yvyporakuérape ojapo hag̃ua milágro, oiporu gueteri ojapo hag̃ua heta mbaʼe porã ñanderehehápe. Ha Jesús heʼi haguéicha Jehová omeʼẽ ipytu marangatu umi ojerurévape chupe (Lucas 11:13). Avei apóstol Pablo heʼivaʼekue: ‘Opa mbaʼe ikatu ajapo Ñandejára chemombarete rupi’ (Filipenses 4:13). Ajépa igustoiténe Ñandejára ñanemombaretéramo avei upéicha! Pe artíkulo oúvape jahecháta mbaʼéichapa Ñandejára omeʼẽ ñandéve ipytu marangatu.

[Taʼanga ha rrekuádro oĩva páhina 5-pe]

Mbaʼérepa jaʼekuaa ndahaʼeiha peteĩ tekove?

Jehová heʼivaʼekue: ‘Che añohẽta y ijyʼuhéiva ári, ambosyrýta y yvy perõ ári. Che añohẽta che espíritu ha ahovasáta ne ñemoñaréme’ (Isaías 44:3). Péicha jahecha Jehová oñohẽtaha ijespíritu isiervokuéra ári ku oñeñohẽháicha y.

Ñandejára oñohẽ jave ijespíritu isiervokuéra ári la Biblia heʼi haʼekuéra ‘henyhẽha espíritu sántogui’, oiko haguéicha Jesús, Juan Bautista, Pedro, Pablo ha Bernabé rehe. Ha avei Jesús remimboʼekuéra ypykuére ijatyvaʼekue Pentecostés áño 33-pe (Lucas 1:15; 4:1; Hechos 4:8; 9:17; 11:22, 24; 13:9).

Ñapensamína, ikatúpa peteĩ tapicha ‘oñehẽ’ ambue tapicha ári? Térã ikatúpa peteĩ hénte aty ‘henyhẽ’ peteĩ tapichágui? Ajépa naisentídoi! La Biblia omboʼe ikatuha ñanerenyhẽ arandu ha mbaʼekuaágui, péro ndeʼíri mamove hendápe ikatuha ñanerenyhẽ peteĩ tapichágui (Éxodo 28:3; 1 Reyes 7:14; Lucas 2:40; Colosenses 1:9).

Pe ñeʼẽ griégo pnéuma ojetradusíva guaraníme “pytu marangatu”, heʼise peteĩ puʼaka ndajahecháiva. Peteĩ diccionario heʼi: “Ko ñeʼẽ pnéuma heʼise yvytu, [...] pytu térã espíritu, imbarete rupi ha ndaikatúigui jahecha ni japoko” (Diccionario expositivo de palabras del Antiguo y del Nuevo Testamento exhaustivo, de W. E. Vine).

Jaʼekuaa upéicharõ espíritu sánto ndahaʼeiha peteĩ tekove.a

[Nóta]

[Roagradese]

Photodisc/SuperStock