Oñeporandúva jepi

Mbaʼérepa Jesús heʼi peteĩ kuñáme operdonaha chupe hembiapo vaikue? (Luc. 7:37, 48.)

Peteĩ árape peteĩ fariséo hérava Simón, oinvita Jesúspe oho hag̃ua okaru hógape. Okaru aja hikuái og̃uahẽ peteĩ kuña, ‘oñemoĩ Jesús atukupépe ha oñepyrũ hasẽ’. Hesaýpe ombojepyhéi Jesúspe ha iñakãraguépe omokã chupe. Avei ohetũ vevyimi ipy ha omona hese aséite hyakuã asýva. Ñandejára Ñeʼẽ heʼi hese haʼeha ‘peteĩ kuña herakuã vaíva’. Upéva heʼise ojekuaaha chupe oparupiete hembiapo vaíre. Upéicharõ pe kuña ohovaʼekue Jesús rendápe haʼéneraʼe peteĩ kuña rekovai. Upéicharamo jepe Jesús heʼi chupe: ‘Opa mbaʼe vai rejapovaʼekue ojeheja reíma ndéve’ (Luc. 7:36-38, 48, NM). Mbaʼérepa Jesús heʼíneraʼe ko mbaʼe? Upérõ ningo neʼĩra gueteri ojejapo pe sakrifísio oñekotevẽva oñeperdona hag̃ua umi pekádo. Mbaʼérepa upéicharõ Jesús heʼi ojeheja reiha pe kuñáme hembiapo vaikue?

Pe kuña ombojepyhéi jave chupe, Jesús omoĩ peteĩ ehémplo omboʼe hag̃ua peteĩ mbaʼe iñimportantetereíva pe óga járape. Haʼe heʼi: ‘Mokõi kuimbaʼe oho oiporu pláta peteĩ karaígui. Peteĩva oiporu 500 denário ha ambue katu 50. Upéi ndorekói hikuái omyengovia hag̃ua, ha pe karai oheja rei mokõivépe. Upéicharõ, mávapa nde ere ohayhuvéne hag̃ua pe karaípe?’. Pe fariséo heʼi: ‘Chéverõ g̃uarã pe hetave odevéva’. Ha Jesús ombohovái chupe: ‘Upeichaite’ (Luc. 7:41-43, NM). Entéro yvypóra ñaneñeʼẽrenduvaʼerã Jehovápe. Upévare jajapo jave ivaíva haʼete japytáva jadeve heta hetave chupe. Péro Ñandejára heʼi ikatuha oheja rei ñandéve pe jadevéva. Jesús ñanemboʼe voi jajerure hag̃ua Ñandejárape: ‘Eheja reína oréve ore rembiapo vaikue ore roheja reiháicha avei umi ofallávape orendive’ (Mat. 6:12, NM).

Koʼág̃a ñapensami, mbaʼéicha rupípa Jehová operdona umi tapicha oikovaʼekuépe Jesús ou mboyve? Ñanemanduʼákena Jehová hekojojaha, ha haʼe heʼivaʼekue umi opekáva omanovaʼerãha katuete. Ha Adán omanovaʼekue naiñeʼẽrendúi haguére. Upéi Jehová omeʼẽ iléi umi Israelguápe, ha upépe heʼi operdonataha chupekuéra hembiapo vaikue oikuaveʼẽrõ hikuái mymba sakrifísioramo. Ohechaukaháicha apóstol Pablo: ‘Haimete opa mbaʼe oñemopotĩ tuguýpe. Ha ndojehejareíri tembiapo vaikue ndaipóriramo tuguy ñeñohẽ’ (Heb. 9:22). Umi hudío oikuaa porã tekotevẽha oñeñohẽ tuguy Ñandejára operdona hag̃ua chupekuéra ipekádo. Upévare oiméne umi oĩvaʼekue pe fariséo rógape ipochy lénto ohendúvo Jesús heʼíva pe kuñáme. Haʼekuéra heʼíneraʼe: ‘Máva piko kóva operdona hag̃ua tembiapo vai?’ (Luc. 7:49, NM). Mbaʼe rupivépa ikatúraʼe Jesús operdona upe kuñáme hembiapo vaikue?

Pe primera profesía oĩva Ñandejára Ñeʼẽme heʼimavaʼekue Jehová omopuʼãtaha peteĩ ñemoñare, péro Satanás ha iñemoñare oisuʼutaha chupe ipytápe (Gén. 3:15). Péva oiko Ñandejára enemigokuéra ojukárõ guare Jesúspe (Gál. 3:13, 16). Ha Jesús oñohẽvo huguy opaga entéro yvyporakuérare ñandepeʼa hag̃ua pekádo ha ñemano poguýgui. Añetehápe ndaipóri ojokovaʼerã Jehová rembipota. Upévare Génesis 3:15-pe heʼívo oĩtaha peteĩ ñemoñare, ikatúma oñeperdona yvyporakuéra pekádo ojeroviáramo Jehová promésare.

Jesús ou mboyve ko yvy ape ári oĩmavaʼekue heta tapicha oĩ porãva Jehová renondépe. Umíva apytépe oĩ Enoc, Noé, Abrahán, Rahab ha Job. Haʼekuéra ojeroviavaʼekue Jehová okumplitaha katuete oprometéva. Santiago heʼi: ‘Abrahán ojerovia Ñandejárare ha upévare Ñandejára oguereko chupe imarangatúvaramo’. Ha heʼive: ‘Upéicha vaʼekue avei Rahab ndive: Ñandejára oguereko chupe hembiapo vaiʼỹvaramo upe ojapovaʼekuére’ (Sant. 2:21-25).

Rréi David katu ojapovaʼekue heta mbaʼe ndevaipa jepéva, péro haʼe oñembyasy ipyʼaite guive ha ojeroviaiterei Ñandejárare. La Biblia heʼi voi: ‘Ñandejára omeʼẽvaʼekue Crístope oipeʼa hag̃ua ñande pekádo jajerovia rupi huguýre. Upéicha oiko ojehechauka hag̃ua Ñandejára hekojojaha, oheja rei rupi pekadokuéra ymaguare. Ohechauka haʼe imarangatu ha hekojojaha, ha oguereko hekojojávaramo umi ojeroviáva Jesús rehe’ (Rom. 3:25, 26, BNP). Jehová operdona Davídpe umi hembiapo vaikue oikuaágui amo gotyove Jesús omeʼẽtaha hekove opaga hag̃ua yvyporakuéra pekádore.

Ha pe kuña ombojepyheivaʼekue Jesúspe upéichante avei. Haʼe oñembyasyeterei hekovai haguére. Oikuaa oikotevẽha oñeperdona chupe, ha umi mbaʼe ojapóva rupive ohechauka omombaʼetereiha Jesúspe. Upérõ ningo Jesús nomanói gueteri, péro upéva oikóta katuete. Upéicha rupi ikatu ojeporu isakrifísio repykue oñeperdona hag̃ua umi tembiapo vai. Upévare Jesús heʼi pe kuñáme: ‘Opa mbaʼe vai rejapovaʼekue ojeheja reíma ndéve’.

Ohechaukaháicha ko káso, Jesús nomboykéi umi hembiapo vaívape. Upéva rangue akóinte imbaʼeporã hendivekuéra. Iporãveha katu, Jehová heʼi operdonataha entéro oñembyasývape hembiapo vaikuére. Ajépa javyʼaite ha ñandepyʼaguapy jaikuaávo koʼã mbaʼe!

[Nóta oĩva taʼanga ndive páhina 7]

Ojereko chupekuéra imarangatúvaramo