Ñaneñeʼẽrendúkena umi ovecharerekua Jehová omoĩvape

1, 2. ¿Mbaʼérepa Jehová oñekompara peteĩ ovecharerekua rehe?

JEHOVÁ voi oñembojoja peteĩ ovecharerekua rehe (Ezeq. 34:11-14). Ha upéva ñanepytyvõ ñantende hag̃ua mbaʼeichagua persónapa haʼe. Peteĩ ovecharerekua ohayhúva ijovechakuéra ningo oñangareko porã hesekuéra ha nombofaltái chupekuéra mbaʼeve. Ogueraha ijovechakuérape umi lugár oĩháme kapiʼipe hovyũ asýva ha y hoyʼu hag̃ua (Sal. 23:1, 2); oñatende hesekuéra ára ha pyhare (Luc. 2:8); oprotehe chupekuéra umi mymba ñarõgui (1 Sam. 17:34, 35); ohupi ijyva ári umi onase ramóvape (Is. 40:11); oheka umi okañývape ha oipohãno umi oikotevẽvape (Ezeq. 34:16).

² Ymave Israélpe oĩ vaʼekue heta ovecharerekua ha chokokue, upévare ontende porãiterei hikuái mbaʼépa Jehová heʼise oñekomparárõ guare peteĩ ovecharerekua rehe. Haʼekuéra oikuaa tekotevẽha oñeñatende porã umi ovecháre. Upéicha avei umi hénte oikotevẽ Jehová oñangareko hesekuéra ha oisãmbyhy chupekuéra (Mar. 6:34). Ndojejapóiramo upéva osufri hikuái, ikangy ha ndoikuaái mbaʼépa iporã térã ivai. Oiko hikuái “ovecha herekuaʼỹvaicha” ha isarambipa (1 Rey. 22:17). Péro Jehová mborayhúpe omeʼẽ isiervokuérape oikotevẽva.

 3. ¿Mbaʼépa ñahesaʼỹijóta ko artíkulope?

³ Ñande avei ñantende porã mbaʼérepa Jehová oñembojoja peteĩ ovecharerekua rehe. Haʼe ningo osegi oñangareko isiervokuérare oñekomparáva avei ovecháre. Ko artíkulope jahecháta mbaʼéichapa Jehová odirihi ha omeʼẽ chupekuéra hemikotevẽ, ha mbaʼépa umi ovecha ojapo vaʼerã Jehová imbaʼeporã haguére hendivekuéra.

 4. ¿Mbaʼe tembiapópa Jehová omeʼẽ Jesúspe?

⁴ Jehová omoĩ Jesúspe omoakã hag̃ua kongregasión (Efes. 1:22, 23). Jesús ningo pe “ovecharerekua imbaʼeporãva” ha ojoguaiterei Itúvape opa mbaʼépe, chupe oipyʼapy Jehovápe oipyʼapýva ha ohupytyse avei Itúva oipotáva. Haʼe “omeʼẽ hekove umi ovechakuéra rehehápe” (Juan 10:11, 15, NM). Jesús sakrifísio tuichaiterei ovenefisia yvyporakuérape (Mat. 20:28). La Biblia heʼi voi Jehová ndoipotaiha oñehundi ni peteĩva “umi [Jesús rehe] ojeroviáva”, síno oipota opavave ohupyty “jeikove opaveʼỹva” (Juan 3:16, NM).

5, 6. a) ¿Mávapepa onombra Jesús oñangareko hag̃ua ijovechakuérare? b) ¿Mbaʼépa ojapo vaʼerã umi ovecha ikatu hag̃uáicha oipytyvõ chupekuéra umi ovecharerekua Jesús onombra vaʼekue? c) ¿Mbaʼérepa ñaneñeʼẽrendu vaʼerã umi ansiánope?

⁵ ¿Mbaʼéichapa umi ovecha ohechauka oñemoĩha pe Ovecharerekua Imbaʼeporãva poguýpe? Jesús heʼi vaʼekue: “Che ovechakuéra ohendu che ñeʼẽ, che aikuaa chupekuéra ha haʼekuéra ou che rapykuéri” (Juan 10:27, NM). Ñahendu pe Ovecharerekua Imbaʼeporãvape heʼise jajapo vaʼerãha opaite mbaʼe haʼe heʼíva, por ehémplo, ñañemoĩ umi ansiáno haʼe onombra vaʼekue poguýpe. Jesús ontendeka vaʼekue umi ijapóstol ha idisipulokuéra osegitaha ojapo pe tembiapo haʼe omoñepyrũ vaʼekue. Haʼekuéra ‘omboʼe’ ha omongaru vaʼerã umi “ovecha mimi” (Mat. 28:20, NM; elee Juan 21:15-17). Pe marandu porã ojekuaavérõ guare ohóvo ha hetave héntegui oiko kristiáno, Jesús omoĩ umi kuimbaʼe iñakãguapýva oñangareko hag̃ua kongregasión rehe (Efes. 4:11, 12).

⁶ Apóstol Pablo heʼi vaʼekue umi ansiáno Efesoguápe pe espíritu sánto onombra hague chupekuéra ‘oñangareko hag̃ua ovecharerekuáicha Ñandejára kongregasiónre’ (Hech. 20:28, NM). Ñane tiémpope avei, umi ansiánope oñenombra espíritu sánto rupive. ¿Mbaʼérepa jaʼekuaa upeichaha? La Bíbliape oĩ umi rrekisíto okumpli vaʼerã kuimbaʼekuéra oserviséva ansiánoramo, ha umíva ojehai espíritu sánto rupive. Oñenombra mboyve peteĩ ansiáno, ojehecha raẽ oimépa hína pe kuimbaʼe okumpli ojejeruréva chugui. Upévare, ñaneñeʼẽrendúramo chupekuéra jahechauka jarrespetaha Jehová ha Jesúspe, umi Ovecharerekua iñimportantevéva (Luc. 10:16). Upéva ñanemomýi vaʼerã ñañemoĩ hag̃ua umi ansiáno poguýpe. Péro oĩ avei ambue mbaʼe ñanemomýiva ñaneñeʼẽrendu hag̃ua chupekuéra.

 7. ¿Mbaʼéichapa umi ansiáno nepytyvõ reime porã hag̃ua Jehovándi?

⁷ Ansianokuéra oiporu la Biblia omokyreʼỹ ha oakonseha hag̃ua umi ermánope. Ha ndojapói upéva oipotágui ojeiko haʼekuéra heʼiháichante (2 Cor. 1:24). Síno oipota umi ermáno oiporu Ñandejára Ñeʼẽ odesidi porã hag̃ua. Upéicha umi ansiáno oipytyvõ oĩ hag̃ua pyʼaguapy kongregasiónpe ha ojeiko hag̃ua peteĩ ñeʼẽme (1 Cor. 14:33, 40). La Biblia heʼi umi ansiánore: “Haʼekuéra ningo akóinte oñangareko penderehe”. Upéva heʼise umi ansiáno oipytyvõseha peteĩteĩme oñemoag̃ui hag̃ua Jehováre, ha oĩ voi oipytyvõ hag̃uáicha peteĩ ermánope “ohóramo tape vaíre” térã ohechakuaáramo oñepyrũha ojapo ivaíva (Gál. 6:1, 2, NM; Jud. 22). Koʼã mbaʼe ningo ñanemomýi vaʼerã jasegi hag̃ua ko konsého oĩva la Bíbliape: “Peneñeʼẽrendúkena umi penemoakãvape” (elee Hebreos 13:17).

 8. ¿Mbaʼéichapa umi ansiáno oprotehe Ñandejára ovechakuérape?

⁸ Apóstol Pablo ningo oñangareko vaʼekue avei kongregasión rehe peteĩ ovecharerekuáicha. Haʼe oskrivi umi ermáno Colosasguápe: “Peñatendéke ani avave oiporu yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare ha umi mbaʼe oñepensávare ko múndope, ha ndoiporúi Cristo omboʼéva” (Col. 2:8, NM). Ko téxto ohechauka avei ñandéve mbaʼérepa tekotevẽ ñahendu umi konsého omeʼẽva ñandéve umi ansiáno la Biblia rupive. Haʼekuéra oipytyvõ umi ermánope oñeñangareko hag̃ua umi hénte omomombyrysévagui chupekuéra Ñandejáragui. Pedro oavisa oĩtaha “proféta japu” ha “mboʼehára japu” oñehaʼãtava “ombotavy [...] umi ikangývape” ikatu hag̃uáicha opeka (2 Ped. 2:1, 14, NM). Koʼág̃a avei umi ansiáno omeʼẽ vaʼerã koʼãichagua konsého tekotevẽ jave. Haʼekuéra ningo kristiáno iñarandúva ha oreko heta experiénsia. Hiʼarive oiko mboyve chuguikuéra ansiáno, ohechaukáma hikuái ontende porãha la Biblia ha ikatupyryha omboʼe hag̃ua oĩva pype (1 Tim. 3:2; Tito 1:9). Jahechaháicha, la Biblia omoarandu umi ansiánope ha avei iñakãguapy hikuái, upéicha rupi ikatu odirihi porã ermanokuérape.

 9. ¿Mbaʼéichapa oñemongaru ha ojedirihi pe kongregasión koʼág̃arupi?

⁹ Iñorganisasión rupive, Jehová omeʼẽ enterove hembiguaikuérape opa mbaʼe oikotevẽva omombarete hag̃ua ijerovia. Umi puvlikasión rupive oñemeʼẽ ñandéve heta konsého oñeguenohẽva la Bíbliagui. Avei heta vése Jehová organisasión omeʼẽ instruksión ansianokuérape umi kárta ha superintendénte viahánte rupive. Péicha Jehová omeʼẽ ijovechakuérape umi instruksión oikotevẽva.

10. ¿Mbaʼépa ojapo vaʼerã umi ansiáno oĩramo oñemomombyrýva kongregasióngui?

¹⁰ Umi ansiáno ningo oreko tuicha rresponsavilida. Haʼekuéra oñangareko vaʼerã ermanokuérare ha oipytyvõ vaʼerã chupekuéra oĩ porã hag̃ua Jehovándi. Koʼýte ojepyʼapy umi ijerovia kangývare térã oho vaʼekuére tape vaíre (elee Santiago 5:14, 15). Umíva apytépe oĩ umi oñemomombyry vaʼekue kongregasióngui ha ndopredikavéi ni ndohovéi rreunionhápe. Upéicha jave, ansianokuéra ojapo ikatúva entéro ojuhu hag̃ua umi ovecha okañy vaʼekuépe ha oipytyvõ chupekuéra ou jey hag̃ua pe ovecha atýpe, térã kongregasiónpe. Jesús heʼi vaʼekue: “Che Ru oĩva yvágape ndoipotái oñehundi ni peteĩ koʼã michĩvéva jepe” (Mat. 18:12-14, NM).

11. ¿Mbaʼérepa ikatu hasy heta ermánope osegi hag̃ua umi konsého omeʼẽva ansianokuéra?

¹¹ Jehová ha Jesús haʼe hína umi ovecharerekua ndojavýiva arakaʼeve. Péro umi ansiáno Ñandejára onkarga vaʼekue oipytyvõ hag̃ua ijovechakuérape katu iñimperfékto. Upévare sapyʼánte ikatu hasy heta ermánope osegi hag̃ua umi konsého ansianokuéra omeʼẽva. Ikatu voi oime opensa hikuái: “Umi ansiáno ningo ñandeichagua imperféktonte avei. ¿Mbaʼére piko haʼekuéra heʼíta chéve ajapo vaʼerã?”. Añetehápe haʼekuéra iñimperfékto, péro ñande ndajaikói vaʼerã jaheka defékto hesekuéra.

12, 13. a) ¿Mbaʼéichapa heta vése ojavy umi kuimbaʼe Jehová oiporu vaʼekue ogia hag̃ua ipuévlope? b) ¿Mbaʼérepa oñemoĩ la Bíbliape umi kuimbaʼe Jehová onombra vaʼekue defékto?

¹² Jehová oiporu vaʼekue heta kuimbaʼépe omoakã hag̃ua ipuévlope, ha umi kuimbaʼe heta vése ojavy avei. Péro la Biblia noñomíri umi mbaʼe vai ojapo vaʼekue hikuái. Por ehémplo, Davídpe ojeporavo vaʼekue Israel rreirã, ha upéicharõ jepe upe rire ou ofalla. Haʼe oñeno kuri peteĩ tembireko ahénondi ha ojukauka pe kuña ménape (2 Sam. 12:7-9). Ñapensamína avei apóstol Pedro rehe. Chupe oñemeʼẽ vaʼekue heta rresponsavilida kongregasiónpe, upéicharõ jepe heta vése tuicha ojavy (Mat. 16:18, 19; Juan 13:38; 18:27; Gál. 2:11-14). Añetehápe, Adán ha Eva rire, Jesús añoite perfékto vaʼekue.

¹³ Jehová ohaika la Bíbliape umi kuimbaʼe haʼe onombra vaʼekue defékto. ¿Maʼerãpa ojapo upéva? Ohechauka hag̃ua haʼe ikatuha oiporu kuimbaʼe imperfékto ogia hag̃ua ipuévlope. Ha upéva Jehová ojapo ymaite guive. Upévare ndovaléi jajekeha umi kuimbaʼe ñanemoakãvagui ni jaapoʼi chupekuéra ojavy haguérente. Jehová oipota jarrespeta ha ñaneñeʼẽrendu chupekuéra (elee Éxodo 16:2, 8).

14, 15. ¿Mbaʼéichapa Jehová oñekomunika vaʼekue ipuévlondi, ha mbaʼépa ñaaprende upévagui?

¹⁴ Iñimportanteterei koʼág̃a ñaneñeʼẽrendu umi ñanemoakãvape. Ñapensamína mbaʼéichapa Jehová oñekomunika vaʼekue ipuévlondi ijetuʼu jave hendivekuéra. Umi isrraelíta osẽrõ guare Egíptogui, Jehová oiporu Moisés ha Aarónpe heʼi hag̃ua chupekuéra mbaʼépa ojapo vaʼerã. Por ehémplo, ani hag̃ua ohupyty chupekuéra pe plága número diez, umi isrraelíta ojapo vaʼerã peteĩ séna espesiál ha ohypýi vaʼerã hokẽ márko ovecha ruguýpe. ¿Oñeʼẽpa chupekuéra Jehová yvága guive heʼi hag̃ua mbaʼe mbaʼépa ojapo vaʼerã? Nahániri. Moisés omeʼẽ instruksión umi ansiáno isrraelítape, ha pe puévlo ohendu vaʼerã koʼã ansiánope (Éx. 12:1-7, 21-23, 29). Upérõ guare Jehová oiporu Moisés ha umi ansiánope oikuaauka hag̃ua ipuévlope mbaʼépa ojapo vaʼerã. Péicha avei ñane tiémpope umi ansiáno ojapo pe tembiapo iñimportantetéva.

¹⁵ Oime vaʼerã katuete nemanduʼa ambue ehémplore oĩva la Bíbliape ohechaukáva Jehová oiporu hague umi ánhel ha avei yvypórape heʼi hag̃ua ipuévlope mbaʼépa ojapo vaʼerã ojesalva hag̃ua. Entéro koʼã situasiónpe Ñandejára odesidi omeʼẽ autorida chupekuéra. Umi mensahéro oñeʼẽ Jehová rérape ha heʼi pe puévlope mbaʼépa tekotevẽ ojapo ani hag̃ua omano. Ág̃a og̃uahẽ vove Armagedón Jehová ikatu avei ojapo upéicha ipuévlo rehehápe. Umi ansiáno orrepresentáva Jehovápe térã iñorganisasiónpe, oñeñangareko porã vaʼerã ani hag̃ua oiporu vai pe autorida oñemeʼẽva chupekuéra.

16. ¿Mbaʼeichagua ‘ñeʼẽpa’ ñahendu vaʼerã?

¹⁶ Jehová puévlo ningo “peteĩ ovecha aty” oĩva “peteĩ ovecharerekua” poguýpe, haʼéva Jesucristo (Juan 10:16, NM). Jesús opromete vaʼekue umi idisípulope oĩtaha hendivekuéra “opa ára, og̃uahẽ meve huʼãme ko múndo ára paha” (Mat. 28:20, NM). ¿Mbaʼéichapa okumpli hína ko promésa? Haʼe ningo Rréi amo yvágape, ha ikatu omanehapaite umi mbaʼe oikótava ohundi hag̃ua ko múndo aña oĩva Satanás poguýpe. ¿Mbaʼépa jajapo vaʼerã ñaime porã hag̃ua Ñandejára organisasiónpe? Ñahendu vaʼerã pe “ñeʼẽ” ohechaukáva moõrupipa jaha vaʼerã. Pe “ñeʼẽ” ningo heʼise Jehová heʼíva la Biblia rupive, ha avei Haʼe ha Jesús heʼíva umi ansiáno rupive (elee Isaías 30:21 ha Revelación 3:22).

17, 18. a) ¿Mbaʼépa Satanás ojapose Ñandejára ovechakuérare? b) ¿Mbaʼépa ojapóta pe Ovecharaʼy umi ojesalvátavare? c) ¿Mbaʼépa jahecháta pe artíkulo oúvape?

¹⁷ Apóstol Pedro heʼi vaʼekue Satanás oikoha “peteĩ león pochýicha ha oñehaʼã omokõ oimeraẽvape” (1 Ped. 5:8, NM). Ojapoháicha peteĩ mymba ñarõ, Satanás opeska hína umi ovecháre ha ojagarrase umi noñatendeporãivape térã umi oñemomombyrývape pe ovecha atýgui. Upévare iñimportanteterei ñañemoag̃ui ermanokuérare ha Jehováre, pe ‘ovecharerekua [...] oñangarekóva hína ñane álmare’ (1 Ped. 2:25, NM). Oñeʼẽvo umi nomanomoʼãivare pe jehasa asy guasúpe, Revelación 7:17 heʼi: “Pe Ovecharaʼy [...] oñangarekóta hesekuéra ovecharerekuáicha ha ogueraháta chupekuéra oĩháme yvu orekóva y oporomoingovéva. Ha Ñandejára omokãmbaitéta hesaykuéra” (NM). ¡Ajépa iporãite ko promésa!

¹⁸ Ko artíkulo ñanepytyvõ jahechakuaa hag̃ua mbaʼeichaitépa iñimportánte pe tembiapo ojapóva kongregasiónpe umi ovecharerekua. Péro, ¿mbaʼéichapa umi ansiáno otrata vaʼerã Jesús ovechakuérape? Ko porandu ñambohováita pe artíkulo oúvape.