¿Jajapópa hína ikatúva guive predikasiónpe?

 1. ¿Mbaʼépa jajapose entéro Ñandejára siervokuéra, ha mbaʼérepa? (Ehecha pe taʼanga oĩva ko rrevísta apére).

JESUCRISTO omanda vaʼekue isegidorkuérape oho hag̃ua omboʼe “umi hénte opa tetãyguápe” oiko hag̃ua chuguikuéra idisípulo (Mat. 28:19). Entéro Ñandejára siérvo iñeʼẽrendúva chupe oikuaase mbaʼéichapa ikatu ojapo porãve ko tembiapo oñemeʼẽ vaʼekue chupekuéra (2 Tim. 4:5). Ko traváho ningo iñimportanteve, ideprovechove ha iñurhenteve oimeraẽ ótro traváhogui. Péro ikatu hína ijetuʼu ñandéve ñamboyke hetave tiémpo jajapo hag̃ua ko tembiapo.

 2. ¿Mbaʼérepa ikatu ijetuʼu ñakumpli porã hag̃ua ñande servísio?

² Oĩ heta mbaʼe iñimportánteva ikatúva hoʼupa ñane tiémpo ha ñanemokaneʼõ. Por ehémplo, ikatu hína ñambaʼapoiterei ñañemantene hag̃ua ha ñamantene hag̃ua ñane famíliape. Ikatu avei jareko rresponsavilida ñande rogapýpe, ñanderasykatu, ñañedeprimi, térã ijetuʼu ñanendive ñandeedáma rupi. ¿Mbaʼéichapa ikatu ñañemeʼẽmbaite predikasiónpe ñambohováiramo jepe koʼã situasión?

 3. ¿Mbaʼépa ohechauka ñandéve la Jesús heʼi vaʼekue Mateo 13:23-pe?

³ Aníkena ñañedesanima oiméramo ñane situasión nopermitíri jajapove Jehovápe g̃uarã. Jesús oikuaa ndaikatumoʼãiha enterove japrodusi peteĩchapa Jehová servísiope (elee Mateo 13:23). Jehová omombaʼeterei la jajapóva hesehápe, ñañehaʼãma guive jajapo la ikatúva entéro (Heb. 6:10-12). ¿Péro ñañandúpa ikatuha jajapove iservísiope? Ko artíkulope jahecháta mbaʼéichapa ikatu ñamotenonde pe predikasión, jaiko sensillove ha ñañembokatupyryve japredika ha ñamboʼe hag̃ua la Biblia. Péro jahecha mboyve koʼã mbaʼe, jaikuaáta mbaʼépa heʼise jajapoha ikatúva guive predikasiónpe.

 4. ¿Mbaʼépa heʼise jajapoha ikatúva guive predikasiónpe?

⁴ Jaʼe porãsérõ g̃uarã, jajapo ikatúva guive predikasiónpe heʼise ñañemeʼẽmbaiteha ñamombeʼu hag̃ua umi héntepe umi notísia porã ha ñamboʼe hag̃ua chupekuéra la Biblia. Péro la ointeresavéva Jehovápe ningo ndahaʼéi mboy tiémpopa ñamboyke japredika hag̃ua, síno mbaʼépa ñanemomýi jajapo hag̃ua upéva. Jahayhúramo Jehovápe ha ñande rapichakuérape, ñañemeʼẽmbaitéta Jehová servísiopeb (Mar. 12:30, 31; Col. 3:23). Jajapóramo la ikatúva guive Jehovápe g̃uarã, jaipurúta ñane mbaretekue ha ñande kapasida jajapo hag̃ua iporãveháicha ko servísio. Ñamombaʼéramo ko priviléhio, ñañehaʼãta ñamog̃uahẽ umi notísia porã opa ikatúvape.

5, 6. Emoĩmína peteĩ ehémplo ohechaukáva mbaʼéichapa peteĩ persóna ikatu omotenonde Jehová servísio saʼíramo jepe itiémpo.

⁵ Epensamína peteĩ mitãkariaʼy ogustaitereívape mbaraka, haʼe ombopu voi pe instruménto káda ke ija chupe. Tiémpo rire, haʼe okonsegi itravahorã ombopu hag̃ua mbaraka peteĩ várpe fin de semanakue. Péro la oganáva ndohupytýi chupe oñemantene hag̃ua. Upévare haʼe ombaʼapo kómo kahéro peteĩ supermerkádope éntre semanakue. Jepe ohasave tiémpo pe supermerkádope, hiʼãiterei chupe og̃uahẽma pe fin de semána ojapo hag̃ua la añetehápe ogustáva chupe. Pe mitãkariaʼy ombopu porãseve ohóvo pe mbaraka pórke kon el tiémpo ojededikase upévape. Upe aja, oaprovechapaite umi oportunida oñepresentáva chupe ombopu hag̃ua la imbaraka, sapyʼaitemíramo jepe.

⁶ Upéicha avei, jepe japredikase hetave tiémpo, sapyʼánte ndaikatúi jajapo ñandegustahaichaite. Péro pe predikasión la añetehápe ñandegustavéva. Upévare ñañehaʼãmbaite ñandekatupyryve jahávo japoko hag̃ua umi hénte korasõre japredika jave chupekuéra. Upéicharõ jepe, ñanerembiapo heta rupi oime vaʼerã ñañeporandu mbaʼéichapa ikatu ñamotenonde pe predikasión.

7, 8. ¿Mbaʼéichapa ikatu jasegi Jesús ehémplo?

⁷ Ñanepytyvõiterei Jesús ehémplo pórke ohechauka mbaʼéichapa jahecha vaʼerã Jehová servísio. Haʼe oñeʼẽ meme vaʼekue Ñandejára Rréinore, upéva la iñimportantevéva kuri chupe g̃uarã (Juan 4:34, 35). Hetaiterei oguata vaʼekue ikatu hag̃uáicha opredika ikatúva guivépe. Jesús oaprovecha voi tahaʼe haʼéva oportunida oñeʼẽ hag̃ua umi héntepe hogapekuéra ha avei umi lugár ijatyhápe heta persóna. Oiko aja ko yvy ape ári Jesús omotenonde kuri Jehová servísio.

⁸ Ikatu jasegi Jesús ehémplo ñañehaʼãvo jaheka oportunida ñañeʼẽ hag̃ua umi notísia porãre oimeha óra ha oimeraẽ lugárpe. Ñaĩ dispuésto jajesakrifikávo ikatu hag̃uáicha japredika (Mar. 6:31-34; 1 Ped. 2:21). Kongregasiónpe ikatu oĩ umi ermáno oservíva kómo prekursór espesiál, rregulár térã auxiliár. Avei ikatu oĩ umi oaprende vaʼekue ótro idióma térã umi ova vaʼekue peteĩ lugár oñekotevẽvehápe opredikávare. Upéicharõ jepe, heta mbaʼe ojehupyty predikasiónpe entéro umi puvlikadór oñehaʼãmbaite rupi ojapo la ikatúva guive. Tahaʼe haʼéva la situasión, Jehová ndojeruremoʼãi ñandéve peteĩ mbaʼe ndaikatumoʼãiva jajapo. Haʼe oipota javyʼa ñamombeʼúvo “umi marandu porã ojajaipáva”, Ñandejára ovyʼáva oheja vaʼekue ñande kárgope (1 Tim. 1:11; Deut. 30:11).

 9. a) ¿Mbaʼéichapa Pablo omotenonde pe predikasión tekotevẽramo jepe ombaʼapo oñemantene hag̃ua? b) ¿Mbaʼépa opensa Pablo pe predikasiónre asegún jatopa Hechos 28:16, 30, 31-pe?

⁹ Apóstol Pablo oheja avei ñandéve peteĩ ehémplo neporãva ikatu hag̃uáicha ñamotenonde Jehová servísio. Pe isegúndo viáhe misionálpe, haʼe oho vaʼekue Coríntope, ha upépe ojapo umi óga kárpa oñemantene hag̃ua. Péro Pablo nomotenondéi ko traváho. Haʼe ombaʼapónte upévape ikatu hag̃uáicha opredika umi Corintoguápe, ha ani hag̃ua ojerure chupekuéra pláta oñemantene hag̃ua (2 Cor. 11:7). Pablo ombaʼapóramo jepe, haʼe osegi omotenonde Jehová servísio ha opredika káda sábado. Péro omehoramie rire la isituasión, haʼe ikatúma kuri “oñemeʼẽmbaite opredika hag̃ua Ñandejára Ñeʼẽ umi judíope, ha ohechauka chupekuéra Jesús haʼeha pe Cristo” (Hech. 18:3-5; 2 Cor. 11:9). Tiémpo rire, oĩrõ guare préso peteĩ ógape 2 áñore Rómape, lomímonte osegi opredika umi ovisitávape chupe ha oskrivi avei kárta (elee Hechos 28:16, 30, 31). Pablo oĩ vaʼekue desidído nopermitimoʼãiha mbaʼeve ostorva chupe iservísiope. Haʼe oskrivi: “Rosegi rojapo ko tembiapo ha naorekaneʼõi” (2 Cor. 4:1). Pablo ojapo haguéicha, lomímonte ikatu ñamotenonde Ñandejára Rréino tekotevẽramo jepe ñambaʼapo ñañemantene hag̃ua.

10, 11. ¿Mbaʼéichapa ikatu ñañemeʼẽmbaite Jehová servísiope ñanderasykatúramo jepe?

¹⁰ ¿Mbaʼépa ikatu jajapo ñande salu térã ñandeeda nopermitíriramo ñandéve ñasẽ meme japredika ogahárupi? Péicha jave ikatu japredika ótro hendáicha. Umi kristiáno ypykue opredika vaʼekue oimeha lugárpe. Haʼekuéra oaprovecha káda oportunida oñepresentáva oñeʼẽ hag̃ua pe añeteguáre “umi otopávape” hógape, hetahápe umi hénte térã tahaʼe haʼéva lugár oĩhárupi (Hech. 17:17; 20:20). Ndaikatúiramo jaguata heta, jajekolokakuaa peteĩ lugár ikatutahápe japredika umi ohasávape. Térã ikatu japredika por kárta, por teléfono térã tahaʼe haʼéva lugár ñaimehárupi. Heta ermáno ndaikatúiva oguata, ovyʼa ha oñeñandu porãiterei ikatu haguére opredika de diferénte fórma.

¹¹ Ñanderasýramo jepe ikatúnte avei ñañemeʼẽmbaite Jehová servísiope. Jahechami jeýna Pablo ehémplo. Haʼe heʼi kuri: “Opa mbaʼerã chembarete Ñandejára omeʼẽgui chéve podér” (Filip. 4:13). Pablo oikotevẽ kuri upe podér oúramo guare hasy peteĩva umi iviáhepe. Haʼe heʼi vaʼekue umi Galaciaguápe: “Peikuaa avei che cherasykatu rupi, aikuaauka ypy hague peẽme umi marandu porã” (Gál. 4:13). Upéicha avei, ñanderasykatu jave jareko oportunida japredika hag̃ua ótrope. Por ehémplo ikatu japredika umi doktórpe, enfermerokuérape ha umícha. Koʼã persóna ningo pyʼỹinte noĩri hógape umi ermáno oho jave opredika hag̃ua chupekuéra.

12. ¿Mbaʼépa heʼise jajesarekoha “peteĩ mbaʼérente”?

¹² Jesús heʼi vaʼekue: “Nde resa ningo peteĩ lámpara ohesapéva nde rete. Upévare, nde resa ojesarekóramo peteĩ mbaʼérente, nde rete kompletoite avei omimbipáta” (Mat. 6:22). ¿Mbaʼépa la Jesús heʼise vaʼekue? Tekotevẽha jaiko sensillomi ikatu hag̃uáicha jajesareko peteĩ mbaʼe jahupytysévarente, ha ani hag̃ua ótra kósa ñanderesarea. Jesús voi ohechauka vaʼekue upéva ojesarekóvo iservísiore, ha omboʼe avei idisipulokuérape oñekonsentra hag̃ua Jehová servísiore ha pe Rréinore. Ñande ñahaʼangáta Jesúspe jahechaukáramo iñimportanteveha ñandéve g̃uarã Jehová rembipota, péicha ñamotenonde meméta “Ñandejára Rréino ha ihustísia” (Mat. 6:33).

13. ¿Mbaʼépa ikatu ñanepytyvõ jajesarekove hag̃ua Ñandejára servísiore?

¹³ ¿Mbaʼéichapa ikatu jajesareko Jehová servísiore? Ikatu jajapo upéva ñañehaʼãramo jaiko sensillomínte, péicha ñanetiempovéta ñaipytyvõ hag̃ua ñande rapichápe oikuaa ha ohayhu hag̃ua Jehovápe.c Por ehémplo, ¿ikatúpa saʼive ñambaʼapo japredikave hag̃ua éntre semanakue? ¿Térã ikatúpa menove jaipuru ñane tiémpo jajediverti hag̃ua?

14. ¿Mbaʼépa ojapo peteĩ matrimónio ikatu hag̃uáicha itiempove opredika hag̃ua?

¹⁴ Jahechamína la ojapo vaʼekue peteĩ ansiáno hérava Elías ha hembireko. Haʼe heʼi: “Ndaikatúi kuri rojagarra ore prekursorádo upe tiémpope, péro rohechakuaa tekotevẽha rojapo álgo. Upévare roñepyrũ rojapo arréglo mbeguekatúpe ropredikave hag̃ua rohóvo. Por ehémplo, roñehaʼã rogastaʼive, roipuru menove tiémpo umi vyʼarãme ha rojapo arréglo ore travahohápe ikatu hag̃uáicha ropredikave. ¿Mbaʼépa rohupyty upe haguére? Roreko tiémpo ropredika hag̃ua kaʼarupytũ ha rostudia la Biblia hetave héntendi. Péro ndahaʼéi voi upévante, ropredika avei 2 vése al mes éntre semána. ¡Añetehápe ningo rovyʼaiterei!”.

15, 16. Heʼiháicha 1 Timoteo 4:13, 15, ¿mbaʼéichapa ikatu ñamehorave jahávo ñande servísiope? (Ehecha avei pe rrekuádro “¿Mbaʼépa ñanepytyvõta jajapo hag̃ua ikatúva guive predikasiónpe?”).

¹⁵ Iñimportanteterei ñandekatupyryve jahávo predikasiónpe, péicha ikatúta jajapove ko tembiapópe. Heta profesionálpe pyʼỹinte oñemboliga osegi hag̃ua oñembokatupyryve. Péicha avei oiko entéro umi japredikávare. Tekotevẽ jasegi ñaaprende mbaʼéichapa ikatu japredika ha ñaporomboʼe porãve (Prov. 1:5; elee 1 Timoteo 4:13, 15).

¹⁶ ¿Mbaʼéichapa ikatu jasegi japrogresa ñande servísiope? Jahupytýta upéva ñañatende porãrõ umi instruksión oñemeʼẽvare umi rreunión éntre semanaguápe. Koʼã rreuniónpe ningo jarresivi peteĩ entrenamiénto iporãitereíva ñanepytyvõva ñandekatupyryve hag̃ua predikasiónpe. Por ehémplo, pe presidénte de la rreunión oakonseha jave umi estudiánte orekóvape iñasignasión, ikatu ñañatende porã umi suherénsia omeʼẽvare, upéva ñanepytyvõta avei ñandéve japredika porãve hag̃ua. Ikatu voi hína jasegi umi suherénsia ág̃a ñasẽ jey vove japredika. Ikatu avei jajerure pe superintendénte ñande grupopeguápe ñanepytyvõ hag̃ua térã ikatu hag̃uáicha haʼe osẽ opredika ñanendive. Jajerurekuaa avei osẽ hag̃ua ñanendive umi puvlikadór iñexperiénsiavape, peteĩ prekursórpe térã pe superintendénte de sirkuítope. Amáske ñandekatupyryve jaipuru hag̃ua umi erramiénta jarekóva ñande kit de enseñánsape, javyʼavéta japredika ha ñaporomboʼe jave.

17. ¿Mbaʼépa jahupytýta jajapóramo ikatúva guive predikasiónpe?

¹⁷ Ñamombaʼeterei ningo Jehová oheja haguére ñambaʼapo iñajudánteramo (1 Cor. 3:9). Jahechakuaáramo “umi mbaʼe iñimportantevéva” ha jajesareko Ñandejára servísiore, ‘vyʼápe jaservíta Jehovápe’ (Filip. 1:10; Sal. 100:2). Entéro jaservíva chupe jajerovia haʼe ñanemombaretetaha ñakumpli porã hag̃ua ko tembiapo, ñambohováiramo jepe umi situasión ijetuʼúva térã ndaikatúiramo jepe jajapo opa mbaʼe jajaposéva Ñandejárape g̃uarã (2 Cor. 4:1, 7; 6:4). Ñane situasión opermitíramo ñandéve japredika michĩmi jepe térã heta, ‘ikatúta javyʼa ñane rembiapóre’ pórke jaservi ñande pyʼaite guive (Gál. 6:4). Ñañemeʼẽmbaitéramo Jehová servísiope jahechauka jahayhuha chupe ha avei ñande rapichakuérape. ‘Jajapóramo péicha jajesalváta ñande ha avei umi ñanerendúva’ (1 Tim. 4:16).