¿Arakaʼépa Ñandejára Rréino oñepyrũta ogoverna ko yvy ape ári?

Jesús heʼi vaʼekue: “Peteĩ país opuʼãta ótro país rehe, ha umi goviérno opuʼãta ojuehe. Oĩta yvyryrýi tuicháva, ápe ha pépe oĩta ñembyahýi ha opaichagua mbaʼasy” (Lucas 21:10, 11). Opa koʼã mbaʼe oñekumpli vove oñondivepa, upéva ohechaukáta “Ñandejára Rréino og̃uahẽ mbotaitemaha”. ¿Ikatúpa jaʼe koʼã mbaʼe oikoha hína ojojapa ko múndo tuichakuére? Jahechamína.

1. GÉRRA

Áño 1914-pe oiko vaʼekue pe primera gérra mundiál, ha upéva tuichaitereive entéro umi ótra gérra oiko vaʼekuégui upe mboyve. Umi istoriadór heʼi voi tuichaiterei okambia hague ko múndo upe gérra guive. Upépe umi ehérsito oñepyrũ ypy vaʼekue oipuru meme umi tánke de gérra, avión oitýva vómba, ametralladóra, gas orekóva venéno, ha hetave árma oporojuka hag̃ua. Tiémpo rire oikóma avei pe segunda gérra mundiál, ha upépe katu ojepurúma voi umi vómba atómika. Áño 1914 guive, heta hendárupi oĩ umi gérra, ha umíva káusare omanóma hetaiterei persóna.

2. TERREMÓTO

Peteĩ infórme heʼi káda áño oikoha 100 terremótorupi imbaretéva ha “ikatúmava oporoperhudika” (Britannica Academic). Ha pe Servicio Geológico de Estados Unidos katu heʼi: “Umi rrehístro ojeguerekóva áño 1900 guive, ohechauka ikatuha voi oiko 16 terremóto tuicháva un áñope”. Oĩ sientífiko heʼíva ndahaʼeiha la hetavéva umi terremóto koʼág̃arupi. Upéva rangue, haʼekuéra heʼi ifasilventeha japilla hag̃ua oiko jave peteĩva. Péro tahaʼe haʼeháicha, ñane tiémpope umi terremóto tuicháva, operhudika ha ojuka hetaitereive héntepe ymave guarégui.

3. ÑEMBYAHÝI

Heta vése la hénte opyta iñembyahyipa oiko rire umi gérra, imboriahueterei rupi, oñembyaipa rupi umi kosécha, térã umi goviérno ikorrúpto rupi. Pe Programa Mundial de Alimentos heʼi kuri áño 2018-pe: “Ko múndo tuichakuére, 821 millón de persónape ofaltapa jepi la hoʼu vaʼerã. Umíva apytépe 124 millón ndoguerekoiete voi mbaʼeve ha iñembyahyieterei”. Káda áño katu omano 3 millón mitã ndokaruporãi térã iñembyahýi rupi. Upéva haimete voi el 45 por ciento umi mitã omanóvagui káda áño ko múndope.

4. MBAʼASY

Peteĩ puvlikasión onohẽ vaʼekue pe OMS heʼi: “Síglo 21-pe hetaiterei héntepe ojagarra umi mbaʼasy ha péste. Osegi gueteri oĩ umi mbaʼasy yma guaréva, por ehémplo pe cólera, ha fiebre amarilla. Ha avei oĩ umi mbaʼasy ipyahúva, por ehémplo SARS, influenza, MERS, ébola ha zika”. Ha pe pandémia de COVID-19 haʼe pe último kuri. Umi doktór ha sientífiko osegíramo jepe ostudia ha oaprende heta mbaʼe umi mbaʼasýgui, ndaikatúi ojoko hikuái umi péste oĩva ko múndope.

5. OJEPREDIKA OPÁRUPI

Jesús heʼi vaʼekue mbaʼépa oikéta avei pe señál haʼe omombeʼu vaʼekuépe: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mateo 24:14). Ko múndope oĩramo jepe hetaiterei provléma, mas de 8 millón de persóna oikóva diferénte paíspe, opredika hína umi notísia porã oñeʼẽva Ñandejára Rréinore 240 país ha territóriope, mas de 1.000 idiómape. Ha péva haʼe peteĩ mbaʼe arakaʼeve ndojehupytýiva ko múndope.

Ñane tiémpope oñekumplipaitéma entéro umi mbaʼe Jesús heʼi vaʼekue haʼetaha peteĩ señál ñandéve g̃uarã. ¿Mbaʼérepa iñimportánte vaʼerã ñandéve g̃uarã upéva? Pórke Jesús heʼi vaʼekue: “Pehecha vove oikoha koʼã mbaʼe, peikuaáke Ñandejára Rréino og̃uahẽ mbotaitemaha” (Lucas 21:31).

Pe señál omeʼẽ vaʼekue Jesús, ha umi mbaʼe heʼíva la Biblia ohechauka Ñandejára Rréino oñepyrũ hague ogoverna yvágape áño 1914-pe.a Upe áñope Ñandejára omoĩ Rréiramo Jesúspe (Salmo 2:2, 4, 6-9). Ñandejára Rréino ogoverna vove ko yvy, oipeʼaitéta entéro umi ótro goviérno, ha ojapo jeýta ko yvýgui peteĩ paraíso jaiko hag̃ua pype pára siémpre.

Saʼietereíma ofalta oñekumpli hag̃ua la Jesús heʼi vaʼekue jajerure hag̃ua ñane ñemboʼépe: “Tou ne Rréino, tojejapo ne volunta ko yvy ape ári ojejapoháicha yvágape” (Mateo 6:10). Péro, ¿mbaʼépa ojapóma hína Ñandejára Rréino oñepyrũ guive ogoverna áño 1914-pe? ¿Ha mbaʼépa ojapóta ñanderehehápe ogoverna vove ko yvy?