Ñandereko porãramo ñamombaʼeguasúta Ñandejárape

 1. ¿Mbaʼérepa opavave oikuaa jaha jave ñande aty guasuhápe?

¹ Jaha jave ñande aty guasuhápe opavave ñanderecha. Heta siudápe, umi notísia rupive ojekuaauka ñaimeha upe lugárpe. Umi otél ha rrestauránte henyhẽ Testígogui, ha kállere ojehecha avei heta ermáno orekóva itarhéta de solápa. Koʼág̃a jahecháta umi mbaʼe ñanepytyvõtava ñamombaʼeguasu hag̃ua Ñandejárape opa mbaʼe jajapóvape upe lugár ojejapohápe ñande aty guasu (1 Ped. 2:12).

 2. ¿Mbaʼéichapa ñamombaʼeguasúta Ñandejárape ñañemondéramo hekópe pe lugár ojejapohápe ñande aty guasu?

² Ñañemonde vaʼerã hekopete. Heta hénte oguerohoryeterei ñañemonde rupi hekópe ñaime aja ñande aty guasuhápe. Péro ñanemanduʼa vaʼerã oĩtaha katuete omañáva mbaʼéichapa ñañemonde ñag̃uahẽvo otélpe, ñasẽvo jakaru térã ñambaʼejogua hag̃ua. Natekotevẽi ningo ñañemonde jahatarõguáicha rreunionhápe, upéicharõ jepe ñañemonde vaʼerã hekópe ojekuaa hag̃uáicha ñanderehe ñande haʼeha kristiáno ha ñanediferenteha umi ótrogui (Rom. 12:2). Iporãta avei jagueraháramo ñande tarhéta de solápa, upéicha umi hénte oikuaáta oikoha peteĩ aty guasu upe lugárpe, avei jarekóta oportunida japredika hag̃ua ha umi ermáno oĩva upérupi ohechakuaáta ñande Testigoha.

 3. ¿Mbaʼéicha javépa ikatu jahechauka ñanepasiénsia ha ñanderoryha?

³ Ñanderory ha ñanepasiénsia vaʼerã. Koʼág̃arupi oĩ heta hénte oñemombaʼeguasu ha imalagradesídova. Upévare, ñanepasiénsia ha ñanderorýramo ñande rapichakuérandi haʼetéta peteĩ yvytu piroʼy asy oipejúva chupekuéra, koʼýte umi ombaʼapóvape otél ha rrestaurántepe (2 Tim. 3:1-5). Ñanembaʼerechakuaa vaʼerã avei jarreserváta jave asiénto térã jarretiráta jave umi puvlikasión pyahu (1 Cor. 10:23, 24). Peteĩ karai oho vaʼekue primera ves asambleahápe, heʼi: “Nachemanduʼái ni peteĩ mbaʼe ojeʼe vaʼekuére umi diskúrsope, péro arakaʼeve ndacheresaráiri mbaʼeichaitépa hory ha chetrata porã umi Testígo”.

 4. ¿Mbaʼérepa iñimportánte ñanekyreʼỹ ha ñaporopytyvõ?

⁴ Ñanekyreʼỹ ha ñaporopytyvõ vaʼerã. Umi kristiáno akóinte ikyreʼỹ ha oipytyvõse hapichakuérape (Sal. 110:3). ¿Ikatúpa nde avei reipytyvõ? Peteĩ aty guasurã 600 ermánorupi oipytyvõ oñemopotĩ hag̃ua pe lokál ojeporútava. Umi ombaʼapóva upe lugárpe ohecharamoiterei upéva ha heʼi: “Ndorohecháiva gueteri péicha oñembaʼapórõ. Ha noroimoʼãiete ni peteĩ ndokovraiha umi mbaʼe ojapóvare”. Hiʼãitereíma ñandéve og̃uahẽ umi aty guasu tres diagua ojejapótava 2013-pe, upépe ñaaprendéta heta mbaʼe ñanepytyvõtava ha iñimportantevéva katu ñamombaʼeguasúta ñane Mboʼehára Ijojahaʼỹva Jehovápe.

[Rrekuádro oĩva páhina 5 ha 6-pe]

Marandukuéra aty guasu tres diagua 2013-pe g̃uarã

◼ Mbaʼe órapa oñepyrũta. Pe portón ojeavríta las 8:00 ha káda pyhareve umi tres día aja ñahendúta musikapu las 9:20, ohechaukáva oñepyrũtamaha ñande aty guasu. Ha upévo enterove jaguapýma vaʼerã oñepyrũ hag̃ua hekoitépe pe prográma. Viernes ha sábado kaʼaru ñande aty opáta 4:50 ha domingo katu las 3:35.

◼ Moõpa jahejakuaa ñande veíkulo. Oiméramo ermanokuéra oñatendéta upépe ndojekovramoʼãi estasionamiénto, ha haʼekuéra voi ohechaukáta ñandéve moõpa ikatu ñamohenda ñande veíkulo. Ha ojehejáramo lugár umi orahávape g̃uarã diskapasitádo, haʼekuéra añoite ikatúta oheja upépe iveíkulo. Sapyʼánte ndatuichái pe estasionamiénto, upévare ñañemongetakuaa ñane ermanokuérandi jaha hag̃ua ikatúva guive peteĩ áutopente. Aníkena jaheja ñande veíkulo óga ahéno renondépe térã upérupi reínte.

◼ Jaguapy hag̃ua. Ikatu ñañongatu lugár ñande rogayguakuérape g̃uarã, umi ohóvape ñanendive ñande veíkulope térã ñane estudiántepe. Oñemoĩ avei asiénto umi hasy ha ijedávape g̃uarã, péro ndaikatumoʼãi enterove hogaygua oguapy hendive. Upévare, iporãta umi oñangarekóva hesekuérante oguapy hendivekuéra (1 Cor. 13:5).

◼ Hiʼupyrã. Jaguerahákena ñane rembiʼurã ha ani ñasẽ okápe jajogua. Upéicha jajapóramo ndaiporimoʼãi ombaʼevendéva ñande aty guasu jerére. Jaguerahakuaa ñane rembiʼurã peteĩ mbaʼyrúpe ija vaʼerãichagua ñane asiénto guýpe. Ñanemanduʼa vaʼerã ndovaleiha jagueraha konservadóra guasu ni mbaʼeveichagua mbaʼyru de vídrio.

◼ Kontrivusión. Ikatu jahechauka ñamombaʼeha ñande aty guasu ñamoĩvo ñane kontrivusión pe káha heʼihápe “Obra mundial”, oĩva ñande aty guasu oikohápe. Ñameʼẽtarõ chéke ñamoĩ vaʼerã “Asociación Torre de Vigía de Biblias y Tratados” rérape.

◼ Oĩramo hasýva térã oñeñandu vaíva. Oĩramo peteĩ hasyetéva asambleahápe oñehenói vaʼerã peteĩ akomodadórpe ha haʼe oavisáta pyaʼe porã umi ermáno oĩva Primeros Auxíliospe. Haʼekuéra oñatendéta upe hasývare ha tekotevẽramo ohenóita 911-pe. Upéicharõ natekotevẽmoʼãi enterove ñahenoijoa emerhénsiape.

◼ Pohã. Reguerekóramo pohã reʼu vaʼerã, aníkena nderesarái regueraha hag̃ua ndaiporimoʼãi rupi ñande aty guasúpe. Oiméramo nderuguy asuka (diabetes) ha reiporu heringaʼi remoĩ hag̃ua pohã, nemanduʼa vaʼerã ndovaleiha remombo umi vasurérope oĩva upe lugárpe térã pe otél repytahápe ipeligrosoiterei rupi.

◼ Ñande pyrehegua. Jagueraha vaʼerã ñande pyrehegua jaguata porã hag̃uáicha heseve oimehápe, ha ani umi ikatu vaʼerãichagua ñandereity ha jajegolpea.

◼ Umi nohenduporãivape g̃uarã. Ikatúta oñehedu avei pe prográma rrádio rupive (FM). Ha umi nohenduporãiva ogueraha vaʼerã peteĩ rrádio ha audífono.

◼ Karríto mitãme g̃uarã ha sílla. Ndojeguerahái vaʼerã aty guasuhápe sílla ha karríto mitãme g̃uarã. Péro ikatu ojegueraha pe mitã oguapyha oñemoĩva sílla ári.

◼ Formulário Sírvase visitar (S-43). Iporãta jagueraha peteĩ térã mokõi formulário Sírvase visitar ñamyenyhẽ hag̃ua oĩramo ñanerendu porãva japredika jave upe jaikohárupi. Upéi ñameʼẽ vaʼerã Departaménto de Puvlikasiónespe térã pe sekretário oĩvape ñane kongregasiónpe jaha rire ñande aty guasuhágui.

◼ Akomodadór. Oñemokyreʼỹ umi ermáno ikatupyrývape, koʼýte umi ansiáno ha siérvo ministeriálpe, ombaʼapo hag̃ua ko departaméntope ha oipytyvõ hag̃ua ermanokuérape. Upéva ningo Jehová omombaʼetereíta.

◼ Ipotĩ hag̃ua ñande lokál. Umi ermáno ha ermána ombaʼaposéva oho vaʼerã Departaménto de Servísio Voluntáriope. Umi ndoguerekóiva gueteri 16 áño ikatu avei oipytyvõ ohóramo hendive itúva, isy, térã peteĩ enkargádo.

◼ Ñag̃uahẽkena órape. Jahupytýta heta mbaʼe ñañehaʼãramo ñag̃uahẽ órape ñande aty guasuhápe. Ikatúta ñañemongeta ermanokuérandi, ñahendu pe musikapu, japurahéi pe kántiko, ñahendu pe ñemboʼe ha pe ermáno omoakãva ñanemomaiteívo. Avei nañamolestamoʼãi ermanokuérape ha jahechaukáta ñamombaʼe ha jarrespetaha Jehovápe (1 Cor. 14:40).

◼ Alojamiento. Oiméramo japytáta peteĩ otélpe térã ermáno rógape, ojehecha vaʼerã ñanderehe ñandeagradesidoha, ñanepasiénsia ha ñanembaʼerechakuaaha (Col. 4:6). Ha jajerurétaramo alojamiento pe aty guasu ojejapoha ypýrupi, ñañeʼẽ vaʼerã komite de servísio kongregasionpegua ndive, haʼekuéra omondóta pe solisitu Departaménto de Alojamiéntope.