¿Ndépa ikatúne avei eipytyvõ umi héntepe oiko hag̃ua chuguikuéra disípulo?

 1. ¿Mbaʼépa Jehová ojapóma nderehehápe?

¿MBAʼÉICHAPA oiko rakaʼe ndehegui testígo de Jehová? Primero, oiméne oñeʼẽ vaʼekue ndéve ‘umi notísia porãre’ nde tuakuéra, ne kompañéro de traváho térã de eskuéla, térã ojepredika raʼe ndéve nde rogaitépe voi (Mar. 13:10). Upéi peteĩ persóna oipurúne raʼe heta tiémpo ha oñehaʼãmbaite ostudia nendive la Biblia. Upe estúdio rupive, nde reju rehayhu Jehovápe ha reikuaa haʼe nderayhuha avei. Jehová ningo nemoag̃ui vaʼekue ijehe, ha koʼág̃a nde haʼéma rupi Jesucristo disípulo, ereko la esperánsa eikovévo pára siémpre (Juan 6:44). Katuete nde reagradeseterei Jehovápe omomýi haguére peteĩ ermáno térã ermánape nemboʼe hag̃ua la verda, ha Haʼe ndeasepta haguére isiervorã.

 2. ¿Mbaʼépa jahecháta ko artíkulope?

² Koʼág̃a nde reikuaáma rupi la verda, ereko pe priviléhio reipytyvõvo ótrope oguata hag̃ua avei pe tape oporoguerahávare jeikovépe. Ikatu oime ifásil ndéve epredika hag̃ua umi héntepe, péro ijetuʼu ndéve reofrese térã rejapo hag̃ua peteĩ estúdio bíblico. ¿Oikópa nderehe péicha? Upéicharõ, ideprovéchota ndéve umi suherénsia oĩva ko artíkulope. Jahecháta mbaʼépa ikatu ñanemomýi jajapose hag̃ua disípulo. Jahecháta avei mbaʼéichapa ikatu ñambohovái umi mbaʼe ñandejokóva hína jajapo hag̃ua estúdio bíblico. Péro primero jahecháta mbaʼérepa ndahaʼéi japredikánte vaʼerã la héntepe, síno ñamboʼe vaʼerã avei chupekuéra umi notísia porã.

 3. ¿Mbaʼérepa ñande japredika?

³ Jesús oĩrõ guare ko yvy ape ári omanda vaʼekue isegidorkuérape ojapo hag̃ua peteĩ traváho orekóva 2 párte. Primero heʼi chupekuéra opredika hag̃ua umi notísia porã oñeʼẽva Ñandejára Rréinore, ha ohechauka chupekuéra mbaʼéichapa ojapo vaʼerã upéva (Mat. 10:7; Luc. 8:1). Por ehémplo, Jesús heʼi vaʼekue idisipulokuérape mbaʼépa ojapo vaʼerã umi hénte ohenduse jave umi notísia porã, térã mbaʼépa ojapo vaʼerã nohenduséi jave hikuái (Luc. 9:2-5). Haʼe oprofetisa vaʼekue avei opredikataha hikuái hetaiterei héntepe ha heta lugárpe, heʼírõ guare upe mensáhe ojekuaataha “entéro tetãrupi” (Mat. 24:14; Hech. 1:8). Umi hénte ohendu térã nohenduséiramo jepe umi notísia porã, umi disípulo lomímonte oñeʼẽ vaʼerã kuri chupekuéra Ñandejára Rréinore ha umi mbaʼe ojapótavare.

 4. Heʼiháicha Mateo 28:18-20, ¿mbaʼépa jajapo vaʼerã avei?

⁴ ¿Mbaʼépa hína pe segundo mbaʼe Jesús omanda vaʼekue idisipulokuérape ojapo hag̃ua? Haʼe heʼi vaʼekue isegidorkuérape omboʼe vaʼerãha la héntepe ojapo hag̃ua entéro mbaʼe haʼe omanda vaʼekue. Oĩ umi heʼíva Jesús omanda hague umi kristiáno ypykuépente opredika ha oporomboʼe hag̃ua. ¿Péro siértopa upéva? No. Jesús ohechauka vaʼekue ko traváho iñimportantetéva osegitaha ñane tiémpo peve, “og̃uahẽ meve pe fin” (elee Mateo 28:18-20). Amalisia Jesús omeʼẽ vaʼekue upe mandáto ojaparesérõ guare mas de 500 disípulope (1 Cor. 15:6). Ha pe visión Juan oreko vaʼekuépe, Jesús ohechauka porã oipotaha entéro idisípulo oipytyvõ ótrope oikuaa hag̃ua Jehovápe (Apoc. 22:17).

 5. Heʼiháicha 1 Corintios 3:6-9, ¿mbaʼe ehémplopa oipuru Pablo ohechauka hag̃ua japredika vaʼerãha ha avei ñaporomboʼe vaʼerãha?

⁵ Apóstol Pablo ohechauka jajapo jave disípulo haʼeteha ñañemitỹva hína, pórke ndahaʼéi ñañotỹnte vaʼerã pe semílla. Haʼe omomanduʼa vaʼekue umi Corintoguápe: “Che añotỹ pe semílla, Apolos orrega [...]. Peẽ haʼe Ñandejára kokue haʼe oñemitỹva hína” (elee 1 Corintios 3:6-9). Ñande ningo ñambaʼapo hína ‘Ñandejára kokuépe’. Upévare ndahaʼéi ñañotỹnteva pe semílla, síno jarrega ha kontinuadoite jarrevisa okakuaa porãpa hína (Juan 4:35). Péro ñande ñarrekonose avei Ñandejára haʼeha pe omongakuaáva pe semílla.

 6. ¿Mbaʼe mbaʼépa jajapo vaʼerã ñaipytyvõ hag̃ua umi ostudiávape la Biblia?

⁶ Ñande ningo jaheka jaikóvo umi hénte “ipyʼaporãva ohupyty hag̃ua jeikove opaveʼỹva” (Hech. 13:48). Ikatu hag̃uáicha koʼã héntegui oiko disípulo, ñaipytyvõ vaʼerã chupekuéra 1) ontende, 2) oguerovia, ha 3) omoĩ hag̃ua en práktika umi mbaʼe oaprendéva la Bíbliagui (Juan 17:3; Col. 2:6, 7; 1 Tes. 2:13). Añetehápe enterove ñaiméva kongregasiónpe ikatu ñaipytyvõ umi ostudiávape la Biblia. Jajapo hína upéva jatratávo chupekuéra mborayhúpe, ha jarresivi porãvo chupekuéra rreunionhápe (Juan 13:35). Pe instruktór avei oipuru heta tiémpo ha imbaretekue oipytyvõ hag̃ua peteĩ estudiántepe. Por ehémplo, oheja hag̃ua umi mbaʼe vai ogueroviáva ha ojepokuaáva ojapo, koʼã mbaʼe imbaretéramo jepe “peteĩ tórreicha” iñakãme ha ikorasõme (2 Cor. 10:4, 5). Ikatu voi hína heta mésere ñañehaʼã pe persóna ojapo hag̃ua koʼã kámbio, ha tiémpo rire ojevautisa. Péro katuete nañañehaʼãreimoʼãi jajapóramo upéva.

 7. ¿Mbaʼérepa japredika ha jajapo disípulo?

⁷ ¿Mbaʼérepa ñande japredika ha ñamboʼe la héntepe oiko hag̃ua chuguikuéra disípulo? Primero, jahayhu rupi Jehovápe. Ñañehaʼãmbaite jave ñakumpli pe mandáto japredika ha jajapo hag̃ua disípulo, jahechauka hína jahayhuha Ñandejárape (1 Juan 5:3). Ñapensamína ko mbaʼére: Pe mborayhu ñañandúva Jehováre ñanemomýima japredika hag̃ua la héntepe. ¿Ifásilpa raʼe ñandéve jajapo upéva? Oiméne nahániri. ¿Ñanemanduʼápa mbaʼéichapa ñañeñandu raʼe ñasẽrõ guare primera ves japredika? Katuete oiméne jakyhyje ha ñanenervióso raʼe, ¿ajépa? Péro jaikuaa avei upéva haʼeha pe traváho Jesús oipota vaʼekue jajapo, ha upévare ñakumpli upe mandamiénto. Oiméne japredika rire peteĩ tiémpore, ifasilvéma ñandéve jajapo hag̃ua upéva. ¿Péro mbaʼéichapa ñañeñandu jaikuaávo jajapo vaʼerãha estúdio bíblico? ¿Ñandépa ñanenervióso ñapensa haguénte voi upévare? Ikatu oime upéicha hína. Péro ñañemboʼéramo Jehovápe ha jajerure chupe tañanembopyʼaguasu jaofrese hag̃ua peteĩ estúdio bíblico, haʼe katuete ñanepytyvõta jajapose hag̃ua disípulo.

 8. Heʼiháicha Marcos 6:34, ¿mbaʼépa avei ikatu ñanemomýi jajapo hag̃ua estúdio bíblico?

⁸ Segundo, ñande jahayhu rupi la héntepe ñamboʼe chupekuéra la verda. Peteĩ jey, Jesús ha idisipulokuéra ikaneʼõiterei vaʼekue opredika rire un día pytã. Haʼekuéra oikotevẽ kuri peteĩ lugár opytuʼumi hag̃ua, péro peteĩ hénte aty otopa hesekuéra. Ha Jesús ombyasyetereígui umi héntepe, “oñepyrũ omboʼe chupekuéra heta mbaʼe” (elee Marcos 6:34). Upérõ Jesús oñehaʼãmbaite vaʼekue ojapo hag̃ua upéva. ¿Mbaʼérepa Jesús oñepyrũ vaʼekue omboʼe chupekuéra? Haʼe oñemoĩ rupi ilugarpekuéra. Haʼe ningo oipytyvõse umi héntepe, pórke ohecha mbaʼéichapa osufri hikuái ha oikotevẽ esperánsa. Koʼág̃arupi avei la hénte oĩ upeichagua situasiónpe. Haʼekuéra iprovléma heta ha ndorekói esperánsa, haʼetéramo jepe ovyʼa ha oiko porãva. Ojogua hikuái umi ovecha okañy vaʼekuépe ha ndorekóivape pastór ogia vaʼerã chupekuéra. Apóstol Pablo heʼi vaʼekue koʼãichagua hénte ndoikuaaiha Ñandejárape ha ndorekoiha esperánsa (Efes. 2:12). ¡Haʼekuéra oĩ hína ‘pe tape oporoguerahávape ñehundípe’! (Mat. 7:13). Ñande ñapensávo mbaʼeichaitépa umi hénte oĩva ñande territóriope oikotevẽ Ñandejárare, ñambyasy chupekuéra ha pe mborayhu ñanemomýi ñaipytyvõ hag̃ua koʼã persónape. Ha jaofresévo peteĩ estúdio bíblico ñaipytyvõ porãvéta chupekuéra.

 9. Heʼiháicha Filipenses 2:13, ¿mbaʼéichapa Jehová ikatu ñanepytyvõ?

⁹ Ikatu oime nañañanimái jaofrese peteĩ estúdio bíblico, jaikuaágui ñaikotevẽha heta tiémpo jajeprepara ha jajapo hag̃ua upe estúdio. Oiméramo upéva la ñane situasión, ñamombeʼu vaʼerã Jehovápe mbaʼéichapa ñañeñandu. Jajerure chupe tañanepytyvõ jareko hag̃ua pe deséo jatopa hag̃ua peteĩ persóna ostudiaséva la Biblia (elee Filipenses 2:13). Apóstol Juan oasegura ñandéve Ñandejára okontestataha ñane ñemboʼe oĩ porãramo hembipotándi (1 Juan 5:14, 15). Upéicharõ ikatu ñaime segúro Jehová ñanepytyvõtaha jajapose hag̃ua disípulo.

10, 11. ¿Mbaʼépa ikatu hína ñandejoko jajapo hag̃ua estúdio bíblico?

¹⁰ Ñande ningo jaikuaa iñimportantetereiha ñaporomboʼe. Péro sapyʼánte oĩ umi mbaʼe ñandejokóva, ha upéicha rupi ndaikatúi jajapo disípulo ñandéve ñandegustahaichaite. Jahechamína koʼág̃a mbaʼépa hína umi mbaʼe ijetuʼúva ha mbaʼéichapa ikatu ñambohovái umíva.

¹¹ Ñapensa ñane situasión nomeʼẽiha jajapove hag̃ua. Por ehémplo, oĩ umi ermáno ijedámava térã hasykatúva. ¿Ndépa reime hína upe situasiónpe? Oiméramo upéicha, ñapensamínte umi mbaʼe ñaaprendémavare ko pandémia de COVID-19 aja. Jahechakuaáma ikatuha jajapo estúdio bíblico por teléfono térã videollamáda rupive. Upéva heʼise ñande ikatuha ñamoñepyrũ peteĩ estúdio bíblico, térã ñambostudia peteĩ persónape ñande rogaite guive voi. Ha oĩ avei umi ostudiaséva la Biblia, péro ndaikatúiva pe orário ñane ermanokuéra ojepokuaahápe opredika. Péro ikatu hína opyta porã chupekuéra ostudia pyhareve voi porã, térã katu pyharekue. ¿Ikatúnepa ñande jajeofrese jastudia hag̃ua la Biblia hendivekuéra koʼã oráriope? Jesús omboʼe vaʼekue Nicodémope pyharekue, pórke Nicodémope ogustave vaʼekue upe orário (Juan 3:1, 2).

12. ¿Mbaʼépa ikatu ñanepytyvõ jajeroviave hag̃ua ñandejehe ikatuha jajapo estúdio bíblico?

¹² Ndajajeroviái ñandejehe jajapokuaataha peteĩ estúdio bíblico. Ikatu ñapensa ñambostudia mboyve peteĩ persónape jaikuaa vaʼerãha hetave mbaʼe térã ñandevale vaʼerãha. Oiméramo ñañeñandu upéicha, jahechami mbohapy mbaʼe ñanekonvensétava ikatuha jajapo peteĩ estúdio bíblico. Primero, Jehová opensa ñanderehe ñandekatupyryha ñamboʼe hag̃ua ótrope (2 Cor. 3:5). Segundo, Jesús, ‘pe orekóva ipoguýpe entéro mbaʼe oĩva yvágape ha ko yvy ape ári’, omanda ñandéve ñamboʼe vaʼerãha ótrope. Ha upéva ohechauka haʼe ojeroviaha ñanderehe (Mat. 28:18). Ha tercero, ikatu jajerovia Jehová ha ñane ermanokuéra ñanepytyvõtaha. Jehová ningo oipytyvõ vaʼekue Jesúspe oikuaa hag̃ua mbaʼépa heʼíta, ha katuete ojapóta avei upéva ñanderehehápe (Juan 8:28; 12:49). Jajerurekuaa avei ñane superintendénte de grúpope, peteĩ prekursór térã puvlikadór ikatupyrývape tañanepytyvõ ñamoñepyrũ ha jajapo hag̃ua peteĩ estúdio bíblico. Ñande ikatu hína ñañembokatupyry ha jajeroviave ñandejehe ñamoirũramo koʼã ermánope ojapo jave ijestúdio bíblico.

13. ¿Mbaʼérepa tekotevẽ jajadapta peteĩ mbaʼe pyahúre?

¹³ Ijetuʼu ñandéve jaipurukuaa hag̃ua umi método ha erramiénta pyahu. Koʼág̃a ningo okambia jajapo lája umi estúdio bíblico. Pe puvlikasión iñimportantevéva jaipurúva ñamboʼe hag̃ua la héntepe haʼe hína ¡Jaikóta vyʼápe pára siémpre! Koʼág̃a jajeprepara ha jajapo lája umi estúdio ndahaʼevéima yma guaréicha. Por ehémplo, saʼive párrafo jalee ha hetave ñañemongeta pe estudiántendi, jaipuru hetave vidéo ha informasión oĩva ñande sítio de Internétpe ha JW Library-pe. Péro oiméramo ndajaipurukuaái koʼã erramiénta, ikatu jajerure ótrope tañanemboʼe jaipurukuaa hag̃ua. Ñandéve ningo ijetuʼu jepi ñakambia hag̃ua umi mbaʼe jajepokuaáva jajapo. Ndahaʼéi hína la ifásilva ñandéve g̃uarã ñaaprende peteĩ mbaʼe pyahu. Péro ñanepytyvõgui Jehová ha ñane ermanokuéra, ikatúma ifasilve ñandéve jajadapta hag̃ua koʼã mbaʼére, ha igústotama ñandéve jastudia la héntendi. Peteĩ prekursór heʼi vaʼekue voi ko método de estúdio pyahúre: “Igustoiterei pe estudiántepe ha avei pe instruktórpe”.

14. a) ¿Mbaʼérepa ñanemanduʼa vaʼerã japredikáramo peteĩ território ijetuʼuhápe ñamoñepyrũ estúdio bíblico? b) ¿Mbaʼéichapa ñanemokyreʼỹ 1 Corintios 3:6, 7 heʼíva?

¹⁴ Japredika peteĩ território ijetuʼuhápe ñamoñepyrũ estúdio bíblico. Oĩ umi hénte ndoikuaaséiva mbaʼeve pe mensáhe jaguerahávagui, térã oñemoĩ voi ñane kóntrape. ¿Mbaʼépa ñanepytyvõta jasegi hag̃ua ñandepositívo peichagua territóriope? Ñanemanduʼa vaʼerã umi hénte situasión ikatuha pyaʼe okambia ko múndo henyhẽtévape provlémagui. Ha umi anteve nohenduséi vaʼekue, ikatu upéi ohechakuaa oikotevẽha Ñandejárare (Mat. 5:3). Oĩ ningo umi ymave ndojagarraséi vaʼekue ñandehegui umi puvlikasión, péro upéi oasepta peteĩ estúdio bíblico. Ñande jaikuaa avei Jehová haʼeha pe kokue Jára (Mat. 9:38). Haʼe oipota ñande jasegi ñañotỹ pe semílla ha jarrega, péro haʼe hína pe oñenkargáva omongakuaa hag̃ua upéva (1 Cor. 3:6, 7). Ha ndaikatúiramo jepe koʼag̃aite jajapo peteĩ estúdio bíblico, aníkena ñanderesarái: Jehová ñanevendesi umi esfuérso jajapóvare ha ndahaʼéi umi mbaʼe jahupytývare.b

15. ¿Mbaʼéichapa Jehová oñeñandu oĩ jave peteĩ oñepyrũva ostudia la Biblia ha ojapo umi mbaʼe oaprendéva?

¹⁵ Jehová ningo ovyʼaiterei peteĩ persóna oasepta jave pe añetegua oĩva la Bíbliape, ha omombeʼu ótrope umi mbaʼe oaprende vaʼekue (Prov. 23:15, 16). ¡Jehová oiméne ovyʼaite ohechávo la oikóva koʼág̃arupi! Por ehémplo, oĩramo jepe pe pandémia ko múndo tuichakuére, pe áño de servísio 2020-pe ojejapo kuri 7.705.765 estúdio bíblico. Upéicha rupi 241.994 persóna oñemeʼẽ Jehovápe ha ojevautisa. Ha koʼã disípulo pyahu ojapóta avei estúdio bíblico ha oipytyvõta ótrope oiko hag̃ua chugui disípulo (Luc. 6:40). Ñande ningo ñaimekuaa segúro Jehová ovyʼaitereiha ohechávo ñaipytyvõha ótrope oiko hag̃ua chugui disípulo.

16. ¿Mbaʼépa iporã vaʼerã ñañehaʼã jajapo?

¹⁶ Añetehápe heta ñañehaʼã vaʼerã jajapo hag̃ua disípulo. Péro Jehová oĩ rupi ñande ykére ikatu ñaipytyvõ ótrope ohayhu hag̃ua ñande Ru yvagapeguápe. ¿Ikatúpa ñañehaʼã jajapo peteĩ estúdio bíblico jepe? Opyta porã jave jaofreséramo peteĩ estúdio bíblico entéro umi hénte jatopávape, ikatu hína ñanesorprende la oikóva. Ikatu ñaime segúro Jehová katuete ovendesitaha umi esfuérso jajapóva.

17. ¿Mbaʼéichapa ñañeñandúta jajapóramo peteĩ estúdio bíblico?

¹⁷ ¡Tuichaiterei priviléhio ningo japredika ha ñamboʼe ótrope pe añetegua! Añetehápe ko traváho ñanembovyʼaiterei voi. Apóstol Pablo ningo oipytyvõ vaʼekue heta Tesalonicaguápe oiko hag̃ua chuguikuéra disípulo, ha omombeʼu vaʼekue mbaʼéichapa oñeñandu heʼírõ guare: “Ág̃a oĩ aja ñande Ruvicha Jesús, ¿máva piko haʼéta ore esperánsa? ¿Máva piko orembovyʼáta, ha máva piko haʼéta ore prémio orembopyʼarorýva henondépe? ¿Ndahaʼéi piko peẽ? Añetehápe ore rovyʼa ha oreorgullóso pendereheve” (1 Tes. 2:19, 20; Hech. 17:1-4). Koʼág̃arupi avei heta ermáno oñeñandu upéicha. Peteĩ ermána hérava Stéphanie ha iména oipytyvõma heta persónape ojevautisa hag̃ua. Haʼe heʼi: “Javyʼaiterei ningo ñaipytyvõ jave la héntepe oñemeʼẽ hag̃ua Jehovápe. Ndaipóri voi ótra kósa ñanembovyʼave vaʼerã upévagui”.