Nde ikatu ehejaite ne “kondúkta yma guare”

 1. ¿Mbaʼéichapa nde reiko vaʼekue reñepyrũ mboyve restudia la Biblia?

¿MBAʼÉICHAPA nde reiko vaʼekue restudia mboyve la Biblia umi testígo de Jehovándi? Heta ningo ñande apytépe ni naimanduʼaséi upe tiémpore, pórke desastrete vaʼekue. Ha ikatu oime upéva ojekuaa voi rakaʼe ñañekomporta lájare ha ñane píntare jepe, pórke jajogua umi hénte oikóvape iñakãre. Ha oiméramo upéicha, upe tiémpope ‘jaiko vaʼekue esperansaʼỹre ha ndajaikuaái Ñandejárape’ (Efes. 2:12). Péro upéi jastudia rupi la Biblia, ¡tuichaiterei okambia la ñande rekove!

 2. ¿Mbaʼépa reaprende raʼe reñepyrũ rire restudia la Biblia?

² Restudiávo rehóvo la Biblia katu reaprende ñande Túa oĩva yvágape nderayhuetereiha ndéve. Upéi eñepyrũséma voi ejapo umi mbaʼe ogustáva Jehovápe ha eservi chupe ipuévlondi. Oiméne tekotevẽ raʼe rekambia heta mbaʼépe upearã, por ehémplo reiko lája, ne pínta, ha repensa lája jepe. Tekotevẽterei kuri rejapo koʼã mbaʼe ikatu hag̃uáicha reiko chupe ogustaháicha (Efes. 5:3-5).

 3. Ohechaukaháicha Colosenses 3:9, 10, ¿mbaʼépa Jehová oipota jajapo, ha mbaʼépa ñaanalisáta ko artíkulope?

³ Ñande Túa Jehová haʼe rupi ñande Kreadór oreko la derécho heʼi hag̃ua ñandéve mbaʼéichapa oipota ñañekomporta ñaimeséramo ifamíliape. Ha haʼe oipota peteĩ persóna ojevautisa mboyve ‘oipeʼaite ijehegui peteĩ aóicha pe kondúkta yma guare ha umi mbaʼe ojapo vaʼekue yma’ (elee Colosenses 3:9, 10).b Upévare ko artíkulo oipytyvõta umi ojevautisasévape orresponde hag̃ua koʼã pregúnta: 1) ¿Mbaʼépa hína pe ñane “kondúkta yma guare”? 2) ¿Mbaʼérepa Jehová oipota jahejaite upéva? 3) ¿Mbaʼéichapa ikatu jajapo la haʼe ojeruréva ñandéve? Avei ko artíkulo ñanepytyvõta oiméramo jajevautisáma, pórke jahecháta mbaʼépa jajapo vaʼerã ani hag̃ua ñapensa ha ñañekomporta ojapoháicha umi ndoservíriva Jehovápe.

 4. ¿Mbaʼéichapa oñekomporta umi ndohejáiva gueteri ‘ikondúkta yma guare’?

⁴ ¿Mbaʼéichapa oñekomporta peteĩ persóna ndoipeʼáiva ijehegui pe “kondúkta yma guare”? Peichagua hénte ningo opensa ijehénte, ipochypa rei, imalagradesído ha oñemombaʼeguasu. Avei ikatu oime ohecha jepi pornografía térã umi pelíkula itieʼỹ ha ivioléntova. Oiménengo oreko avei umi kualida iporãva, ha ikatu oime oñeñandu vai jepi heʼi térã ojapo jave peteĩ mbaʼe noĩporãiva. Upéicharõ jepe, ndorekói la fuérsa okambia hag̃ua la opensáva ha avei la ikondúkta (Gál. 5:19-21; 2 Tim. 3:2-5).

 5. ¿Ikatúpa jaipeʼa kompletoite voi ñandejehegui umi pensamiénto ha deséo naiporãiva? (Hechos 3:19).

⁵ Enterove ningo ñaneimperfékto, upéicha rupi ndaipóri la ikatúva kompletoite voi oipeʼa umi pensamiénto ha deséo vai orekóva. Ha upéicha rupi sapyʼánte jaʼe térã jajapo peteĩ mbaʼe upéi ñambyasýva (Jer. 17:9; Sant. 3:2). Péro ñañehaʼãmbáiteramo jaipeʼaite ñandejehegui ñane kondúkta yma guare, ndajaikomoʼãvéima tódo el tiémpo jajapo umi mbaʼe ivaíva ni ñapensa koʼã mbaʼére. Ha upéicha rupi ñakambiaite voi ñapensa lája ha ñañekomporta lája (Is. 55:7; elee Hechos 3:19).

 6. ¿Mbaʼérepa Jehová oipota jaipeʼaite ñandejehegui umi pensamiénto vai ha vísio?

⁶ Jehová ningo ñanderayhueterei ha oipota javyʼa, upéicha rupínte heʼi ñandéve jaipeʼaite hag̃ua ñandejehegui umi pensamiénto vai ha umi vísio (Is. 48:17, 18). Haʼe oikuaa porã umi persóna ohejáva odomina chupe umi deséo vai, ojeperhudikaha ijupe voi ha avei hapichakuérape. Ha Jehová ombyasyeterei ohechávo oĩha persóna ojapóva péicha ijehe voi ha ombohasa asýva avei ótrope.

 7. Ohechaukaháicha Romanos 12:1, 2, ¿mbaʼépa jaelehi vaʼerã káda uno?

⁷ Ikatu oime primerorã ñane amígo ha ñane hentekuéra jepe oñembohory ñanderehe ñañehaʼã rupi ñakambia ñañekomporta lája (1 Ped. 4:3, 4). Por ehémplo ikatu heʼi ñandéve jarekoha derécho jajapo hag̃ua ñandegustávante, ha nañapermitíri vaʼerãha avave heʼi ñandéve la jajapo vaʼerã. ¿Péro serápa siérto umi ndoservíriva Jehovápe ojapoha la chupekuéra ogustávante? Nahániri, pórke en rrealida haʼekuéra oheja hína Satanás múndo oreko chupekuéra ipoguýpe ha ojapoka chupekuéra haʼe oipotáva (elee Romanos 12:1, 2). Upévare ikatu jaʼe káda uno jadesidi vaʼerãha mbaʼépa jajapóta, ha jaguereko mokõi opsión: 1) Ikatu ñamantene pe ñane kondúkta yma guare ha péicha jasegi japeka ha japyta Satanás múndope, o 2) jaheja Jehová tañanepytyvõ ñakambia hag̃ua ha toiko ñandehegui koʼág̃ama voi peteĩ mehór persóna (Is. 64:8).

 8. ¿Mbaʼe mbaʼépa omeʼẽ ñandéve Jehová ikatu hag̃uáicha jahejaite umi pensamiénto vai ha umi vísio?

⁸ Jehová oikuaa ñaikotevẽtaha tiémpo ikatu hag̃uáicha jaipeʼa ñandejehegui umi pensamiénto vai ha avei umi vísio (Sal. 103:13, 14). Upévare, ikatu hag̃uáicha ñanepytyvõ haʼe oipuru iñorganisasión, Iñeʼẽ la Biblia ha ijespíritu sánto. Péicha haʼe ñanemombarete, ñanemoarandu ha ñandeapoja ñakambia hag̃ua jahávo tekotevẽhápe. Jehová ningo oiméne hetáma voi nepytyvõ hína ndéve koʼag̃aite peve. Ñaanalisamína koʼág̃a mbaʼe mbaʼépa nde ikatu rejapo rehejaite hag̃ua pe ne kondúkta yma guare ha péicha rekalifika rejevautisa hag̃ua.

 9. ¿Mbaʼéichapa ikatu nepytyvõ la Biblia?

⁹ Eipuru la Biblia eikuaa hag̃ua mbaʼéichapa eho hína hese. Ñandejára Ñeʼẽ ningo ojogua peteĩ espéhope ha ikatu nepytyvõ ehecha hag̃ua mbaʼetekópa oĩ hína umi mbaʼe repensáva, umi mbaʼe eréva ha avei eñekomporta lája (Sant. 1:22-25). ¿Mávapa ikatu nepytyvõ emehora hag̃ua? Ikatu ejerure ajúda por ehémplo ne instruktórpe térã algún ótro ermáno iñakãguapývape. ¿Ha mbaʼéichapa nepytyvõta hikuái? Por ehémplo oipurúta la Biblia ohechauka hag̃ua ndéve mbaʼe mbaʼépa ejapo porãma hína reikóvo ha avei mbaʼépepa tekotevẽ emehora. Ha ikatu avei nepytyvõ hikuái etopa hag̃ua umi informasión ñane puvlikasionkuérape orekóva umi konsého nde reikotevẽva eheja hag̃ua umi nde vísio. Ha Jehová voi avei siémpre oĩta ndéve g̃uarã reikotevẽha óra hese. Haʼe oikuaa mbaʼéichapa ikatu nepytyvõ, ha oikuaa avei mbaʼépa ereko nde pyʼapýpe (Prov. 14:10; 15:11). Upévare siémpre eñemboʼe vaʼerã chupe ha ejepokuaa estudia porã la Biblia káda día.

10. ¿Mbaʼépa ñanemboʼe Elie experiénsia?

¹⁰ Eime vaʼerã segúro la Jehová heʼíva siémpre iporãveha. Jajapóramo la Jehová heʼíva ningo katuete ñasẽ porãta. Umi oikóva Jehová oipotaháicha ningo rreálmente ovyʼa, isentído chupe la hekove ha ndahaʼéi ku oikóva oñeñandu yvýre hína (Sal. 19:7-11). Péro umi ndojapóiva la Jehová heʼíva katu osufri. Epensamína la heʼi vaʼekuére peteĩ ermáno hérava Elie. Ituakuéra ningo haʼe vaʼekue Testígo. Péro imitãrusúpe haʼe oñepyrũ vaʼekue ijúnta vai ha upéicha rupi ojapo heta mbaʼe vai, por ehémplo ojedroga, hekovai ha imonda. Haʼe ohechakuaa upe tiémpope iviolentoiterei hague ha oiko voi orrenegaháre. Haʼe heʼi: “Che tuakuéra chemboʼe vaʼekue mbaʼéichapa aiko vaʼerã Jehová cheguerohory hag̃ua, ha che katu alrrevete ajapo la aaprende vaʼekuégui”. Upéicharõ jepe, haʼe ndahesaráiri umi mbaʼe ituakuéra omboʼe vaʼekuégui chupe imitãrõ guare, ha tiémpo rire oñepyrũ jey ostudia la Biblia. Haʼe oñehaʼãmbaite oheja umi vísio ha upe rire ojevautisa áño 2000-pe. ¿Mbaʼépa ohupyty Elie ojapo rupi Jehová oipotáva? Haʼe heʼi ñandéve: “Koʼág̃a rreálmente aiko trankílo ha chekonsiénsia potĩ”.c Ko experiénsia ohechauka ñandéve umi ndojaposéiva la Jehová heʼíva tuichaiterei ojeperhudikaha ijupe voi. Péro upéicharõ jepe, Jehová siémpre oĩ oipytyvõ hag̃uáicha chupekuéra okambia jey hag̃ua.

11. ¿Mbaʼe mbaʼe rehepa Jehová ndaijaʼéi?

¹¹ Nderechaʼéi vaʼerã umi mbaʼe Jehová ndochaʼéivare (Sal. 97:10). La Biblia ohechauka porã ñandéve Jehovápe ombojeguaruha “umi oñemombaʼeguasúva, umi ijapúva, umi ojukáva hénte inoséntepe” (Prov. 6:16, 17). Avei heʼi porã ñandéve haʼe ‘ndochaʼeieteha umi ivioléntovare ha ndohayhuieteha umi ombotavývape hapichápe’ (Sal. 5:6). Jehovápe ningo ndogustaieterei koʼã mbaʼe, ha ñaimekuaa segúro upeichaha pórke Noé tiémpope ohundipaite vaʼekue umi hénte añáme, hústamente oñekomporta rupi péicha (Gén. 6:13). Ñapensamína avei la heʼi vaʼekuére proféta Malaquías. Jehová heʼi vaʼekue chupe haʼe ndochaʼeieteha umi otraisionávare hembiayhúpe ha ojedivorsia chugui. Ha koʼãichagua hénte heʼíramo jepe oadoraha Jehovápe, haʼe ndoaseptamoʼãi upéva ha okastigáta chupekuéra la ojapóvare (Mal. 2:13-16; Heb. 13:4).

12. ¿Mbaʼépa heʼise ‘ndajachaʼéi vaʼerãha umi mbaʼe vaíre’?

¹² Jehová heʼi ñandéve ‘ndajachaʼéi vaʼerãha umi mbaʼe vaíre’ (Rom. 12:9). Upéva heʼise ñanembojeguaru vaʼerãha voi umi mbaʼe ndogustáiva chupe, ha nañandegustaiete voi ni michĩmi koʼã mbaʼe. Ñamoĩmína peteĩ ehémplo. Epensamína álgien omeʼẽha ndéve heʼu hag̃ua peteĩ tembiʼu oñembyaipámava. ¿Mbaʼéichapa erreaksionáta? ¡Ndaipóri ningo ojeservi vaʼerã ndéve upéva! Ha upeichaite avei ñanembojeguaru vaʼerã umi mbaʼe Jehovápe ndogustáiva. Upévare ñande ni nañapensái voi jajapóvo koʼãichagua mbaʼe.

13. ¿Mbaʼérepa ñañatende vaʼerã umi mbaʼe ñapensávare?

¹³ Eñatendékena umi mbaʼe epensávare. Katuete ningo jajapo jepi umi mbaʼe ñapensáva jaikóvo. Upéicha rupi Jesús heʼi vaʼekue ñamboykete vaʼerãha umi pensamiénto ikatúva ñandegueraha vai ha upévare jaju japeka (Mat. 5:21, 22, 28, 29). Ñande ningo jaipotaiterei Jehová ovyʼa ñandereheve, ha upévare iñimportanteterei pyaʼe jaipeʼa umi pensamiénto vai ñane akãgui peichahágui oúramo ñandéve umíva.

14. ¿Mbaʼépa ohechauka umi mbaʼe jaʼéva, ha mbaʼe mbaʼépa iporã ñañeporandu?

¹⁴ Eñatendékena umi mbaʼe erévare. Jesús heʼi porã vaʼekue ‘umi mbaʼe jaʼéva osẽha ñane korasõgui’ (Mat. 15:18). Ha upéva siertoite, pórke umi mbaʼe jaʼéva ohechauka porãta mbaʼe rehepa ñapensa ha mbaʼépa jareko ñande pyʼapýpe. Jarekóvo enkuénta upéva, eñeporandumína koʼã mbaʼe: “¿Chépa aime desidído ni mbaʼevéicharõ ndachejapumoʼãiha, cheperhudikátaramo jepe haʼéramo la siertoguáva? ¿Amboyketépa umi chíste tieʼỹ ha oimeraẽ ótra kósa upeichagua? ¿Mbaʼéichapa arreaksiona jepi oĩ jave chemorrenegáva?”. Ha umi omendáva ikatu oñeporandu: “¿Añatendépa ani hag̃ua anovillea peteĩ ndahaʼéivare che ména térã che rembireko?”. Ñapensamína ko ehémplore: Ñadesprendéramo umi votón orekóva ñande ao, ifasilvéta ñandéve jaipeʼa hag̃ua la ñande ao. ¿Mbaʼépa ñaaprende upévagui? Vuéno, umi mbaʼe jaʼéva ojogua umi votón orekóvape ñande ao. Upévare ndajaikóiramo ñandejurutieʼỹ, ñaneñeʼẽ arhél ni ñandejapu, ifasilvéta avei hína ñandéve jahejaite hag̃ua pe ñane kondúkta yma guare haʼeramoguáicha peteĩ ao.

15. ¿Mbaʼépa heʼise jaklava vaʼerãha “pe yvyráre” pe ñane kondúkta yma guare?

¹⁵ Ejedesidíkena ekambiataha tekotevẽhápe. Apóstol Pablo oipuru vaʼekue peteĩ ehémplo iporãitereíva ohechauka hag̃ua mbaʼeichaite pevépa iñimportánte ñakambia tekotevẽhápe. Haʼe heʼi vaʼekue voi tekotevẽha jaklava “pe yvyráre” ñane kondúkta yma guare (Rom. 6:6). ¿Mbaʼépa heʼise upéva? Jaikuaaháicha Jesús oĩ vaʼekue dispuésto omanóvo pe yvyráre Jehová oguerohory hag̃ua chupe. ¿Ha mbaʼéichapa ñande ikatu jasegi la iñehémplo? Jaipotáramo Jehová ñandeguerohory ñaime vaʼerã avei dispuésto jajapóvo oimeraẽ mbaʼe. Por ehémplo jaipeʼaite ñane akãgui oimehaichagua pensamiénto vai ha ndajajapói mbaʼeve ndogustáiva Jehovápe. Sólamente jajapóramo koʼã mbaʼe ikatúta ñanekonsiénsia potĩ ha jareko la posivilida jaikóvo pára siémpre pe paraísope (Juan 17:3; 1 Ped. 3:21). Ñanemanduʼa vaʼerã Jehová nokambiamoʼãiha umi léi haʼe orekóva ñandéve nañandegustái haguérente umíva. Upéva rangue, ñande la ñakambia vaʼerã ikatu hag̃uáicha jaiko haʼe heʼiháicha (Is. 1:16-18; 55:9).

16. ¿Mbaʼérepa eime vaʼerã desidído esegitaha eñehaʼã esupera hag̃ua umi devilida erekóva?

¹⁶ Esegíkena eñehaʼã esupera hag̃ua umi devilida erekóva. Rejevautisa rire jepe tekotevẽta gueteri eñehaʼãmbaite ejapo hag̃ua upéva. Epensamína la ohasa vaʼekuére peteĩ ermáno hérava Maurício. Haʼe ningo haʼe vaʼekue omosexuál imitãrõ guare. Péro upéi oñepyrũ ostudia la Biblia ha okambiaite la oiko lája. Upéicha rupi ojevautisa áño 2002-pe. Koʼág̃a ojapóma hetaiterei áño oservi hague Jehovápe. Péro upéicharõ jepe Maurício heʼi: “Arrekonose vaʼerã heta vése añehaʼãmbaite vaʼerãha amboyke hag̃ua umi pensamiénto vai. Upéva ningo ijetuʼueterei”. Péro upéicharõ jepe Maurício noñedesanimái. Upéva rangue haʼe heʼi ñandéve: “Tuichaiterei chekonsola aikuaávo mbaʼépa opensa ñanderehe Jehová. Aikuaa porã sapyʼánte arekóramo jepe umi pensamiénto térã umi deséo vai, añehaʼãmbaitéramo ha ndajapói umíva, Jehová ovyʼáta chereheve”.d

17. ¿Mbaʼépa reaprende Nabiha experiénsiagui?

¹⁷ Ejerure Jehovápe tanepytyvõ, ha ani ejerovia ndejehénte síno ijespíritu sántore (Gál. 5:22; Filip. 4:6). Ñaime vaʼerã desidído jaipeʼaitetaha ñandejehegui ñane kondúkta yma guare haʼeramoguáicha peteĩ ao ha núnka nañamondemoʼãveimaha ñandejehe upéva. Epensamína la ohasa vaʼekuére peteĩ ermána hérava Nabiha. Itúa ningo oheja rei vaʼekue chupe orekórõ guare 6 áñonte, ha haʼe heʼi hetaiterei osufri hague upe rire. Upéicha rupi okakuaávo ohóvo Nabiha siémpre ijarhél ha iviolentaiterei, oho jepe voi kárselpe oike rupi tráfiko de drógape. Péro unos kuánto testígo de Jehová ovisita chupe pe kárselpe ha oñepyrũ ostudia hendive la Biblia. Ha upe rire Nabiha tuichaiterei ou okambia. Haʼe omombeʼu ñandéve: “Ndahasýi vaʼekue chéve aheja hag̃ua unos kuánto vísio arekóva, péro oĩ peteĩ si cheforsaiterei vaʼekue, ijetuʼueterei vaʼekue chéve aheja hag̃ua pe sigarríllo”. Nabiha hetaiterei oñehaʼã vaʼekue ha mas de un áñore voi oprokura ikatu hag̃uáicha oheja pe sigarríllo. ¿Mbaʼépa oipytyvõ chupe ohupyty hag̃ua upéva? Haʼe heʼi: “Che manterei ajerure vaʼekue Jehovápe ajúda ha upéicha rupínte ikatu kuri apoi la che vísiogui. Ha che ikatu rupi akambia Jehová ovyʼa hag̃ua chereheve, aime segúra oimeraẽva ikatuha ojapo upéva”.e

18. Ohechaukaháicha 1 Corintios 6:9-11, ¿mbaʼépa ojapo vaʼekue heta Ñandejára siérvo yma guare?

¹⁸ Síglo primérope oĩ kuri unhído ojapo vaʼekue heta mbaʼe vai oikuaa mboyve Jehovápe. Por ehémplo oĩ umi haʼe vaʼekue omosexuál, mondaha, ha omoakãratĩva iména térã hembirekópe. Péro Jehová oipytyvõ rupi chupekuéra ijespíritu sánto rupive, haʼekuéra ikatu vaʼekue okambiaite (elee 1 Corintios 6:9-11). Ha ñane tiémpope la Biblia oipytyvõma avei hetaiterei héntepe ojapo hag̃ua upéva.f Algúno umíva apytépe oñenvisia vaʼekue hetaiterei áño peteĩ mbaʼére, péro upéicharõ jepe ohejaite hikuái upe vísio. Ha koʼã ehémplo ohechauka porã nde avei ikatuha ekambia oimeraẽ mbaʼe tekotevẽvape, ha eheja umi vísio erekóva ikatu hag̃uáicha ejevautisa.

19. ¿Mbaʼépa ñaanalisáta pe sigiénte artíkulope?

¹⁹ Umi estudiánte ojevautisaséva oñehaʼãmbaite vaʼerã ohejaite hag̃ua ikondúkta yma guare, péro avei oñehaʼãmbaite vaʼerã omonde ijehe peteĩ aóicha pe kondúkta pyahu. Pe sigiénte artíkulope ñaanalisáta mbaʼéichapa ikatu rejapo upéva ha avei mbaʼéichapa umi ermanokuéra ikatu nepytyvõ.