Apocalipsis: ¿Mbaʼe vendisiónpa ohupytýta Jehová siervokuéra?

 1. ¿Mbaʼépa jadesidi vaʼerã káda uno?

ÑANDEJÁRA Jehová ningo oguereko la derécho ogoverna hag̃ua ko univérso. Péro pe ikontrário iñañaitéva Satanás katu oñemoĩ mbarete hese. Upévare si o si káda únomante jadesidi vaʼerã mávapepa jaapojáta, ndaikatúi japytánte mbytépe. Ha upéva ningo iñimportanteterei, pórke ñande futúro odepende hína upe jadesidívare (Mat. 25:31-33, 46). La Biblia ohechauka porã ñandéve pe jehasa asy guasu aja, ojehusgataha enterovépe ojekuaa hag̃ua mávapa ojesalváta ha mávapa oñehundíta (Apoc. 7:14; 14:9-11; Ezeq. 9:4, 6).

 2. a) ¿Mbaʼépa ñanemokyreʼỹ jajapo hag̃ua Hebreos 10:35-39? b) ¿Mbaʼéichapa ikatu ñanepytyvõ lívro de Apocalipsis?

² (Elee Hebreos 10:35-39). Oiméramo nde edesidíma eapojataha Jehová goviérno, upéicharõ rreálmente edesidi porãiterei. Ha katuete eipytyvõse avei ótrope ojapo hag̃ua upéva, ha upearã ikatu eipuru la heʼíva lívro de Apocalipsis. Pórke upépe ojehechauka mbaʼépa ojehúta umi oñemoĩvape Jehováre, péro avei ohechauka porã umi vendisión ohupytýtava entéro umi ifiélva chupe. Upévare ou porãitereíta ñandéve ñaanalisa koʼã mbaʼe ko artíkulope. Péva ñanepytyvõta ikatu hag̃uáicha jajedesidi ndajahejamoʼãiha Jehovápe. Ha avei ikatu jaipuru umi mbaʼe ñaaprendéva ñaipytyvõ hag̃ua ótrope odesidi porã hag̃ua ha ifiél hag̃ua Jehovápe.

 3. ¿Mbaʼe pregúntapa ñakontestáta ko artíkulope?

³ Ko artíkulope ñakontestáta koʼã mokõi pregúnta: Primero, ¿mbaʼe vendisiónpa ohupytýta umi oapojáva Jehová goviérno? Ha segundo, ¿mbaʼépa oikóta umi odesidívare oapojataha pe animál salváhe pytãitévape oñeñeʼẽha lívro de Apocalípsispe?

 4. ¿Mbaʼe grúpopepa apóstol Juan ohecha oĩha Jesús ndive yvágape?

⁴ Peteĩ visiónpe, apóstol Juan ohecha vaʼekue mokõi grúpo oapojáva Jehová goviérno ha haʼekuéra iñeʼẽrendu rupi, Jehová omeʼẽ chupekuéra vída etérna. Pe primer grúpope oĩ en totál 144.000 persóna (Apoc. 7:4). Koʼãvape ojeporavo ko yvýgui ha oñemeʼẽ chupekuéra pe priviléhio ohóvo yvágape ogoverna hag̃ua Jesúsndi umi oĩvape ko yvy ape ári (Apoc. 5:9, 10; 14:3, 4). Pe visiónpe Juan ohecha voi koʼã 144.000 oñemboʼyha Jesús ndive pe Sérro Siónpe (Apoc. 14:1).

 5. ¿Mbaʼépa oikóta umi unhído oĩvare gueteri ko yvy ape ári?

⁵ Hetaiterei tiémporema Jehová oiporavo oikóvo máva mávapa oĩta koʼã 144.000 apytépe (Luc. 12:32; Rom. 8:17). Péro pe visiónpe oñemombeʼu Juánpe koʼãvagui unos kuántontema oĩtaha ko yvy ape ári umi ára pahápe. Koʼã hembýva orresivíta pe “séllo” finál ohechaukáva Jehová oguerohoryha chupekuéra oñepyrũ mboyvemi pe jehasa asy guasu (Apoc. 7:2, 3; 12:17). Ha en algún moménto oñepyrũ rire pe jehasa asy guasu ojegueraháta chupekuéra yvágape oĩ hag̃ua umi ótro 144.000 ifiél vaʼekuéndi omano meve. Ha upépe oikóta chuguikuéra rréi ogoverna hag̃ua Jesús ndive Ñandejára Rréinope (Mat. 24:31; Apoc. 5:9, 10).

6, 7. a) ¿Mbaʼe grúpopepa ohecha avei apóstol Juan, ha mbaʼépa jaikuaa chuguikuéra? b) ¿Mbaʼérepa iñimportánte mokõive grúpope g̃uarã heʼíva Apocalipsis kapítulo 7-pe?

⁶ Ohecha rire umi 144.000-pe, apóstol Juan ohecha avei “peteĩ aty guasu”. Péro péva pe grúpope oĩ hetaiterei persóna, ha upéicha rupi ndaikatúi voi ni oñekonta mboýpa oĩ (Apoc. 7:9, 10). ¿Mbaʼépa jaikuaa ko grúpogui? Peteĩ ánhel oexplika Juánpe: “Koʼãva hína umi osẽva pe jehasa asy guasúgui, haʼekuéra ojohéi ijao pe Ovecha Raʼy ruguýpe ha ijaokuéra opyta morotĩ asy” (Apoc. 7:14). Ko grúpo ningo ojesalva pe jehasa asy guasu aja, ha opa rire upéva ohupytýta hikuái hetaiterei vendisión iporãitereíva ko yvy ape ári (Sal. 37:9-11, 27-29; Prov. 2:21, 22; Apoc. 7:16, 17).

⁷ Umi mokõi grúpo oñeñeʼẽha lívro de Apocalipsis kapítulo 7-pe ningo ohupytýta hetaiterei vendisión. ¿Ikatúpa ñañeimahina ñande ñaimeha ijapytepekuéra? Oiméramo upéicha iporãiterei upéva. Jehová ningo tuichaiterei ovendesíta mokõive grúpope, ha upe tiémpope javyʼaitereíta jadesidi haguére jaapojataha Jehová goviérno. Péro jahechamína koʼág̃a mbaʼe mbaʼépa omombeʼu avei ñandéve lívro de Apocalipsis oikotaha pe jehasa asy guasu aja (Mat. 24:21).

 8. ¿Mbaʼéichapa oñepyrũta pe jehasa asy guasu, ha mbaʼépa ojapóta la majoría umi hénte?

⁸ Jahecha haguéicha pe ótro artíkulope, koʼẽrõitéma umi goviérno ohundíta umi rrelihión japúpe haʼéva hína Babilonia Guasu (Apoc. 17:16, 17). Ha oiko vove upéva oñepyrũta pe jehasa asy guasu. ¿Serápa upe tiémpope oĩta hetaiterei hénte oñemoag̃uíva Jehováre ha oserviséva chupe? Nahániri. Apocalipsis kapítulo 6-pe katu heʼi voi umi ndoservíriva Jehovápe ojeruretaha oprotehe hag̃ua chupekuéra umi goviérno ha pe sistéma komersiál oĩva ko múndope. Ha la Bíbliape oñekompara voi koʼã mbaʼe umi montáñare. Koʼã hénte ningo en rrealida ndoapojamoʼãi Jehová goviérno, ha upéicha rupi haʼe heʼíta hesekuéra haʼeha ikontrário (Luc. 11:23; Apoc. 6:15-17).

 9. ¿Mbaʼépepa idiferénteta Jehová siervokuéra umi ótra héntegui pe jehasa asy guasu aja, ha mbaʼépa oikóta upe haguére?

⁹ La hénte ningo opárupi ojedesesperapáta pe jehasa asy guasu aja. Péro Jehová puévlo katu tuicha idiferénteta, pórke upe tiémpope ndaiporimoʼãi ótro grúpo ko yvy ape ári oservíva Jehovápe ha ndoapojáiva pe ‘animál salváhepe’ (Apoc. 13:14-17). Jehová siervokuéra ndojapói rupi upéva, oĩta hetaiterei oñemoĩva hesekuéra. Upéicha rupi oĩta voi peteĩ grúpo de nasión oataka vaipaitétava Jehová siervokuérape ko múndo tuichakuére. Péva pe grúpo de nasiónpe la Biblia ohenói Gog de Magog (Ezeq. 38:14-16).

10. Ohechaukaháicha Apocalipsis 19:19-21, ¿mbaʼépa ojapóta Jehová ojeataka vove ipuévlope?

¹⁰ ¿Mbaʼéichapa orreaksionáta Jehová ojeataka vove ipuévlope? Haʼe omombeʼu ñandéve: “Arrenegaitereíta” (Ezeq. 38:18, 21-23). Ha Apocalipsis kapítulo 19 omombeʼu ñandéve mbaʼépa oikóta upe rire. Jehová omboúta itaʼýrape odefende hag̃ua ipuévlope ha ohundipaite hag̃ua iñenemigokuérape. Péro Jesús ndoumoʼãi haʼeño, oipytyvõta avei chupe “umi ehérsito yvagapegua”, umíva apytépe oĩ umi ánhel ha avei umi 144.000 (Apoc. 17:14; 19:11-15). ¿Mbaʼéichapa opáta péva pe gérra? Oñehundipaitéta entéro umi oñemoĩva guive Jehováre (elee Apocalipsis 19:19-21).

11. ¿Mbaʼe iporãitereívapa omombeʼu ñandéve lívro de Apocalipsis?

¹¹ Eñeimahinamíntena mbaʼeichaitépa ovyʼáta Jehová siervokuéra oñehundipaite vove entéro umi Ñandejára enemigokuéra. ¡Yvágape voi ningo ojevyʼaitereíta ág̃a oñehundi vove Babilonia Guasu! Péro upe rire oikóta álgo iporãitereivéntemava (Apoc. 19:1-3). ¿Mbaʼépa upéva? Lívro de Apocalipsis omombeʼu ñandéve pe Ovecha Raʼy omendataha (Apoc. 19:6-9).

12. Ohechaukaháicha Apocalipsis 21:1, 2, ¿arakaʼépa oikóta pe Ovecha Raʼy kasamiénto?

¹² ¿Arakaʼépa oikóta pe kasamiénto? Entéro umi 144.000 ningo oĩtama yvágape oñepyrũ mboyvemi pe gérra de Armagedón. Péro upe tiémpope ndoikomoʼãiti péva pe kasamiénto (elee Apocalipsis 21:1, 2). Upéicharõ, ¿arakaʼépa la oikóta? Pe Ovecha Raʼy ningo omendáta opa rire ae pe gérra de Armagedón ha oñehundi riréma entéro umi Ñandejára kontrariokuérape (Sal. 45:3, 4, 13-17).

13. ¿Mbaʼépa heʼise pe Ovecha Raʼy omendataha?

¹³ ¿Mbaʼépa orrepresenta pe Ovecha Raʼy kasamiénto? Buéno, peteĩ kuimbaʼe ha kuña ningo omenda vove oñekompromete oĩtaha oñondive pára siémpre. Upéicha avei kóva ko kasamiénto heʼise hína pe rréi Jesucristo ha umi 144.000 oĩtaha oñondive pára siémpre. Upéicha rupi oñekompara voi umi unhídope inóviare. Péva pe kasamiénto omoñepyrũta hína peteĩ goviérno pyahu ogovernátava ko yvy ape ári 1.000 áñore (Apoc. 20:6).

14, 15. Ohechaukaháicha Apocalipsis 21, ¿mbaʼe rehepa oñekompara umi 144.000-pe? (Ehecha pe taʼanga oĩva ko rrevísta apére).

¹⁴ Apocalipsis kapítulo 21 katu heʼi umi 144.000 ojoguaha peteĩ siuda iporãitereívape ha oñembohéra chupekuéra pe “Jerusalén Pyahu” (Apoc. 21:2, 9). Ko siuda iporãitéva simiéntope ningo oĩ 12 ita ha káda uno umi itáre ojeskrivi “umi 12 apóstol réra, koʼãva hína pe Ovecha Raʼy apóstol”. ¿Mbaʼérepa péva oiméne osorprendeterei raʼe Juánpe? Pórke haʼe ohecha héra voi oĩha peteĩva koʼã itáre. ¡Ajépa iporãite la priviléhio orekóva hikuái! (Apoc. 21:10-14; Efes. 2:20).

¹⁵ Péva pe siuda ningo iporãiterei devísio. Oreko voi peteĩ kálle prinsipál ojejapóva de óro puroite, avei oreko 12 okẽ ha káda uno koʼã okẽ haʼe peteĩ pérla tuichaitereíva, umi imurálla ha umi isimiénto katu iporãiterei ha oñemoĩ voi hese umi piédra presiósa, ha entéro mbaʼe oĩva pype ojejapo porã asy (Apoc. 21:15-21). Péro oĩ peteĩ mbaʼe ofaltáva ko siudápe. Apóstol Juan heʼi voi: “Ndahechái pype ni peteĩ témplo, pórke Ñandejára Todopoderóso Jehová haʼe hína pe siuda témplo, ha pe Ovecha Raʼy haʼe avei. Pe siuda noikotevẽi ni pe kuarahy ni pe jasy ohesape hese, pórke Ñandejára podér omimbipáva ohesape chupe, ha pe siuda lámpara haʼe hína pe Ovecha Raʼy” (Apoc. 21:22, 23). Umi 144.000 térã pe Jerusalén Pyahu ikatúta oĩ en persóna Jehovándi (Heb. 7:27; Apoc. 22:3, 4). Upévare la Biblia heʼi Jehová ha Jesús haʼeha péva pe siuda témplo.

16. ¿Mbaʼépa ohupytýta umi oikóva ko yvy ape ári pe Rreinádo de Mil áño aja?

¹⁶ Umi unhídope ningo ombovyʼaiterei ko profesía. Péro umi orekóva la esperánsa oikóvo pára siémpre ko yvy ape ári peteĩ paraísope, oñeinteresa vaʼerã avei la heʼívare pype. ¿Mbaʼérepa? Pórke pe Rréino de Mil áño aja, pe Jerusalén Pyahu oguerúta hetaiterei vendisión chupekuéra g̃uarã. Juan ohecha voi pe visiónpe “peteĩ rrío orekóva y oporomoingovéva”. Ha mokõive ládo pe rrío oríllare oĩ umi “yvyramáta oporomoingovéva”, ha “umi yvyramáta rogue omonguera umi tetãnguérape” (Apoc. 22:1, 2). Upe tiémpope, enterovete oĩva ko yvy ape ári orekóta la oportunida oñevenefisia hag̃ua koʼã mbaʼe porãitégui. Umi iñeʼẽrendúva mbeguekatúpe iperfékto jeýta, ha ndaiporimoʼãvéitama mbaʼasy, sufrimiénto ni umi hasẽva oñembyasýgui algúna kósare (Apoc. 21:3-5).

17. Ohechaukaháicha Apocalipsis 20:11-13, ¿máva mávapepa oñevendesíta pe Rreinádo de Mil áño aja?

¹⁷ ¿Mávapepa oipytyvõta entéro koʼã mbaʼe? Primeroite voi pe aty guasu osovrevivívape pe gérra de Armagedón, ha upe rire avei umi mitã onasévape pe múndo pyahúpe. Péro ndahaʼéi chupekuérante, pórke lívro de Apocalipsis kapítulo 20 omombeʼu avei ñandéve oĩtaha hetaiterei oñemoingove jeýva (elee Apocalipsis 20:11-13). Koʼãva apytépe oĩ umi “ihústova”, ha avei umi ‘iñinhústova’ térã umi ndorekói vaʼekue la oportunida oikuaávo Jehovápe (Hech. 24:15; Juan 5:28, 29). ¿Heʼisépa upéva enterovete umi omano vaʼekue oikove jeytaha pe Rreinádo de Mil áño aja? Nahániri. Umi iñañágui odesidi vaʼekue ndoservimoʼãiha Jehovápe omano mboyve, ndorresusitamoʼãi. Haʼekuéra orekóma kuri la iñoportunida oikuaa hag̃ua Jehovápe ha odesidi voi orrechasataha upéva. Upéicha rupi haʼekuéra ndorekói derécho oĩvo pe paraísope (Mat. 25:46; 2 Tes. 1:9; Apoc. 17:8; 20:15).

18. ¿Mbaʼépa oikóta opa rire umi 1.000 áño?

¹⁸ Opa rire umi 1.000 áño, enterove umi oikóva ko yvy ape ári haʼe jeýtama perfékto. Jaikuaaháicha entéro umi Adán familiare haʼe pekadór, péro upe tiémpope ndaiporimoʼãvéima ni peteĩ osufríva pe pekádo káusare (Rom. 5:12). Opaitéta entéro mbaʼe vai oñepyrũ vaʼekue oĩ ko múndope Adán opeka rire. Ha upéicha entéro oĩva ko yvy ape ári ohupytýta pe perfeksión opa rire pe Rreinádo de Mil áño (Apoc. 20:5).

19. ¿Mbaʼérepa ojejapómante vaʼerã peteĩ pruéva finál?

¹⁹ Jaikuaaháicha Jesús haʼe vaʼekue peteĩ kuimbaʼe perfékto oĩrõ guare ko yvy ape ári ha osegi vaʼekue ifiél Jehovápe otanteáramo jepe chupe Satanás oñemomombyry hag̃ua chugui. Ha jaʼéma haguéicha, entéro umi opytáva ko yvy ape ári umi 1.000 áño rire haʼéta avei perfékto. Upévare ikatu oime jaikuaase mbaʼépa oikóta ág̃a Satanás oreko vove la oportunida oprova jeývo chupekuéra. Vuéno, káda uno ikatúta ohechauka mávapepa ifiélta, pórke Satanáspe ojeliveráta pe yvykua pypukúgui ohasa rire umi 1.000 áño (Apoc. 20:7). Umi ifiélva pe pruéva finál aja ikatúta ohupyty la vída etérna ha osẽta pára siémpre pe pekádo ha ñemano poguýgui (Rom. 8:21). Umi opuʼãva Jehováre katu oñehundíta pára siémpre Satanás ha idemoniokuérandi (Apoc. 20:8-10).

20. ¿Mbaʼéichapa nde reñeñandu ñaanalisa rire umi profesía oĩva Apocalípsispe?

²⁰ ¿Mbaʼéichapa reñeñandu ñaanalisa rire mbykymi pe lívro de Apocalipsis? Oiméne katuete ndéve avei nemopirĩmba reikuaávo ikatuha repartisipa oñekumpli hag̃ua umi profesía oĩva pype. Ha katuete reinvitaseterei voi umi ótrope oĩ hag̃ua avei Ñandejára puévlope ha oadora hag̃ua chupe haʼe oipotaháicha (Apoc. 22:17). Legálmenteko enterovévape hiʼãitereíma oñekumpli umi mbaʼe iporãitéva heʼíva ñandéve lívro de Apocalipsis, ha upévare ñaime de akuérdo la heʼi vaʼekuéndi apóstol Juan: “Amén! Eju che Ruvicha Jesús” (Apoc. 22:20).