Éxodo

39 Umi kuimbaʼe ikatupyrýva oipuru ílo hovy, lána líla ha ílo pytã asýva+ ojapo hag̃ua umi ao oñembovyvy porãva oipurútava umi ombaʼapótava pe lugár sagrádope. Avei ojapo hikuái umi ao sagrádova Aarónpe g̃uarã.+ Haʼekuéra ojapo koʼã ao Jehová omanda hagueichaite Moiséspe.

2 Haʼe ojapo avei pe delantál,*+ ha upearã oipuru ílo de óro, ílo hovy, lána líla, ílo pytã asýva ha líno trensádo iporãva. 3 Ojapo hag̃ua hikuái pe ílo de óro, Bezalel omopererĩ porã martíllope umi chápa de óro, ha upe rire oikytĩ poʼi asy. Upéi ko ílo de óro omoĩ pe ílo hovýndi, lána lílandi, pe ílo pytã asývandi ha pe ílo de línondi, ha oipoka hikuái ojuehe oiko hag̃ua chugui peteĩ ílonte. 4 Upe rire omoĩ hikuái mokõi téla pedáso ijatiʼýpe g̃uarã, ha ombojoaju umi mokõi ijoríllape. 5 Ha pe sinturón vordádo oñemoĩ vaʼerã pe delantál rehe, ani hag̃ua okuʼe ha opyta hatã hag̃ua pe delantál.+ Ha ojejapo hag̃ua ojepuru ílo de óro, ílo hovy, lána líla, ílo pytã asýva ha líno trensádo iporãva. Haʼekuéra ojapo Jehová omanda hagueichaite Moiséspe.

6 Upe rire haʼekuéra omboguapy mokõi itaʼi ónise mokõi vaseʼi de órope ha oskrivi umívare Israel raʼykuéra réra, ojejapoháicha peteĩ séllore.+ 7 Umi mokõi ita ivaseʼi reheve Bezalel omoĩ umi mokõi téla oĩvare pe delantál atiʼýre. Koʼã itaʼi omomanduʼáta umi israelítape Ñandejárare.+ Haʼe ojapo Jehová omanda hagueichaite Moiséspe. 8 Upéi ojapo hikuái pe pechéra*+ ojapoháicha peteĩ ovordakuaáva. Pe pechéra ojejapo pe delantál ojejapo haguéicha voi, upearã ojepuru ílo de óro, ílo hovy, lána líla, ílo pytã asýva ha líno trensádo iporãva.+ 9 Ko pechéra ojedovla jave mbytépe opyta kuadradoite, ipuku 22 sentímetro* ha ipe 22 sentímetro.* 10 Upéi haʼekuéra omoĩ pe pechérare ita iporãva, ha omoĩ en 4 fíla. Pe primera fílape oĩ: rruvi, topásio ha esmerálda. 11 Pe segunda fílape oĩ: turkésa, safíro ha háspe. 12 Pe tercera fílape oĩ: léschem,* ágata ha amatísta. 13 Pe cuarta fílape oĩ: krisólito, ónise ha háde. Koʼã ita omboguapy hikuái vaseʼi de órope. 14 Umi ita orrepresenta hína umi 12 trívupe. Káda itáre ojeskrivi peteĩ Israel raʼy réra, ha ojeskrivi hese ojejapoháicha peteĩ séllore.

15 Upéi ojapo hikuái piolín de óro ha omboja pe pechérare.+ 16 Haʼekuéra ojapo umi mokõi vaseʼi de óro ha mokõi argollaʼi de óro, ha omoĩ umi mokõi argollaʼi pe pechéra rehe opyta hag̃uáicha umi mokõi eskínape yvate gotyo. 17 Káda eskínape, pe argollaʼi kuárupi ombohasa peteĩ piolín de óro. 18 Ha umi mokõi piolín púnta ombohasa umi vaseʼi de óro kuárupi, koʼãva oĩ hína umi télare oĩva pe delantál atiʼýpe. 19 Ojapo avei hikuái mokõi argollaʼi de óro ha omoĩ pe pechéra oríllare, iguy gotyo, oja hag̃uáicha pe delantál rehe.+ 20 Upéi haʼekuéra ojapo avei mokõi argollaʼi de óro ha omoĩ pe delantál renonde gotyo, og̃uahẽháme umi mokõi téla osẽva pe delantál atiʼýgui, opyta hag̃uáicha pe sinturón vordádo arimi, ojoajuhápe pe delantál. 21 Koʼã mokõi argollaʼíre oñeñapytĩ mokõi sínta hovy, ha koʼã sínta oñeñapytĩ avei umi argollaʼi oĩvare pe pechéra oríllape, iguy gotyo. Péicha pe pechéra ndokuʼemoʼãi ha opyta hatãta pe delantál ári ha pe sinturón vordádo arimi. Haʼekuéra ojapo Jehová omanda hagueichaite Moiséspe.

22 Bezalel ojapo ílo hovýgui peteĩ ao ipuku ha ijyvakuareíva pe delantál guýpe g̃uarã.+ 23 Pe ao ikua mbytépe pe saserdóte omoinge hag̃ua iñakã. Ha ani hag̃ua osoro upe ao kuéllo rembeʼy, oñembovyvy mbarete porã oñembovyvyháicha umi soldádo ao juru. 24 Ojapo hikuái granadaʼi ílo hovýgui, lána líla ha ílo pytã asývagui, upearã oipoka hikuái ojuehe koʼã ílo oiko hag̃ua chugui peteĩ ílonte. Koʼã granadaʼi oñemosaingo pe ao ijyvakuareíva ruguái rruédore kompletoite. 25 Ojapo avei hikuái kampanaʼi de óro. Ha umi granadaʼi ha kampanaʼi de óro oñemosaingo interkaládo pe ao ruguái rruédore. Péicha haʼekuéra omoĩ kompletoite pe ao ipuku ha ijyvakuareíva ruguáire. 26 Haʼekuéra omosaingo umi kampanaʼi ha granadaʼi interkaládo pe ao ijyvakuareíva ruguáire. Ko ao omonde vaʼerã pe ombaʼapóva de súmo saserdóte. Haʼekuéra ojapo Jehová omanda hagueichaite Moiséspe.

27 Ojapo avei hikuái umi ao puku akuádrova téla de líno iporãvagui, Aarón ha itaʼyrakuérape g̃uarã.+ Koʼã ao ojapo kuri umi ivaléva ombovyvy hag̃ua. 28 Haʼekuéra ojapo avei peteĩ turvánte*+ de líno iporãva, umi turvánte+ de líno Aarón raʼykuérape g̃uarã, ha umi kalsonsíllo ojejapóva téla de líno+ trensádo iporãvagui. 29 Avei ojapo hikuái umi sinturón líno trensádo iporãvagui, ílo hovy, lána líla ha ílo pytã asýgui. Koʼã sinturón ojapo kuri peteĩ ivaléva ombovyvy hag̃ua. Haʼekuéra ojapo Jehová omanda hagueichaite Moiséspe.

30 Haʼekuéra ojapo avei pe pláka de óro púro sagrádova* ha oskrivi hese ojejapoháicha peteĩ séllore, ha heʼi hese: “Jehová mbaʼe hína pe santida”.+ 31 Ko pláka ojokua hikuái sintaʼi hovýpe pe turvántere ha opyta pe ifrénte gotyo. Haʼekuéra ojapo Jehová omanda hagueichaite Moiséspe.

32 Entéro mbaʼe oñekotevẽva pe tavernákulope* g̃uarã ojejapopaite, umi israelita ojapo Jehová omanda hagueichaite Moiséspe,+ upeichaite ojapo hikuái.

33 Upéi haʼekuéra ogueru Moiséspe pe tavernákulo ha entéro umi párte orekóva+ ha hembiporukuéra: umi prendedór,+ umi armáhe,+ umi yvyra puku,+ umi orkón, umi vaseʼi ikuáva mbytépe+ 34 ha pe kortína odividítava pe tavernákulo.+ Ogueru avei hikuái umi ovecha mácho kuerokue oñeteñi vaʼekue pytãme+ ha umi fóka* pirekue oñemoĩtava pe tavernákulo ári. 35 Avei pe Árka del Pákto,* itápa+ ha umi yvyra puku,+ 36 pe mesa, hembiporukuéra+ ha umi pan oñepresentátava Ñandejárape. 37 Ogueru avei hikuái pe kandelávro de óro púro, hembiporukuéra,+ umi lamparaʼi+ oĩva en fíla pe kandelávrope ha pe aséite ojepurútava oñemyendy hag̃ua,+ 38 pe altár+ de óro, pe aséite ojepurúva ojejapo hag̃ua nombramiénto,+ insiénso hyakuã asýva+ ha pe kortína+ oñemoĩtava pe tavernákulo entrádape. 39 Ogueru avei hikuái pe altár de kóvre+ ha entéro hembiporukuéra,+ iparrílla, umi yvyra puku,+ pe palangána guasu de kóvre ha pe hendag̃ua de kóvre,+ 40 umi téla ojepurútava oñemongora hag̃ua pe tavernákulo korapy, umi póste ha umi vaseʼi ikuáva mbytépe,+ pe téla+ oñemoĩtava pe tavernákulo korapy entrádape, umi estáka,+ umi piolín ha entéro tembiporu ojepurútava oñembaʼapo hag̃ua pe tavernákulope. 41 Ogueru avei hikuái umi ao oñembovyvy porã vaʼekue oipurútava umi ombaʼapóva pe tavernákulope, umi ao sagrádova pe saserdóte Aarónpe g̃uarã,+ ha umi ao oipurútava itaʼyrakuéra ombaʼapo hag̃ua de saserdóte.

42 Umi israelita ojapo opa mbaʼe, Jehová omanda hagueichaite Moiséspe.+ 43 Moisés orrevisárõ guare opa mbaʼe ojejapóva, ohecha ojejapo hague Jehová omanda hagueichaite, upévare Moisés oguerohory ha ovendesi chupekuéra.