Umi ikatútava oisãmbyhy Ñandejára Rréinope

‘Koʼã mbaʼe rupi ojehechauka Ñandejára oporohusgaha hekopete ha ikatutaha peisãmbyhy Ñandejára rréinope.’ (2 TESALONICENSES 1:​5, BNP.)

1, 2. Mbaʼéichapa Jehová oporohusgáta koʼẽrõite ha mávapa ojapóta upéva?

APÓSTOL Pablo ohovaʼekue Aténaspe áño 50 rupi. Upe siudápe ohecha oñemombaʼeguasuha hetaiterei taʼanga. Upéva ombopochyeterei chupe ha omomýi opredika hag̃ua umi héntepe. Ha umi mbaʼe heʼivaʼekue omohuʼãvo idiskúrso oiméne nohaʼarõiete ohendutaha hikuái. Heʼi chupekuéra: ‘Koʼág̃a katu Ñandejára heʼi opavavépe opa rupi ojevy hag̃ua hembiapo vaikuégui, omoĩhaguére peteĩ ára ombojovake hag̃ua opa yvypórape tekojojápe, peteĩ kuimbaʼe rupi, haʼe oiporavovaʼekue, ha upéva ohechauka opavavépe omoingove jeývo chupe’ (Hechos 17:​30, 31).

² Ñandejára omoĩ peteĩ ára ohusgataha yvyporakuérape, ha upéva ndahaʼéi vyrorei. Péro Jehová oheja ótrope ojapo hag̃ua upéva. Mávapepa? Apóstol Pablo ndeʼíriramo jepe héra, jaikuaa oñeʼẽhague Jesús rehe. Haʼe ohusga vove yvyporakuérape oĩta oikovéva ha omanóva.

 3. Mbaʼérepa Jehová ojapo peteĩ pákto Abrahán ndive, ha máva rupivépa Jehová oporohusgáta?

³ Pe ára Jehová oporohusgataha oikóta mil áño pukukue aja, ha Jesús haʼéta Rréi Ñandejára Rréinope ha oporohusgáta Itúva rérape. Péro haʼe ndojapomoʼãi upéva haʼeño. Jehová oiporavo yvyporakuérape oisãmbyhy ha ohusga hag̃ua Jesús ndive upe mil áño pukukue (embojojami Lucas 22:​29, 30 rehe). Ohasáma cuatro mil áño rupi Jehová ojapohague Abrahán ndive peteĩ pákto térã kompromíso. Upéicha ojehechamavaʼekue Jehová oporohusgataha, ha pe pákto oñepyrũvaʼekue áño 1943-pe Jesús ou mboyve (jaleemína Génesis 22:​17, 18). Abrahán ndoikuaaporãi mbaʼépa oguerúta yvyporakuérape upe pákto ojapovaʼekue Ñandejára ndive. Péro koʼág̃a ñantende porãve umi mbaʼe heʼivaʼekue. Jahechakuaa iñimportanteha pe Abrahán ñemoñare oñekumpli hag̃ua umi mbaʼe Ñandejára ojapótava ohusga hag̃ua yvyporakuérape.

4, 5. a) Mávapa pe Abrahán ñemoñare iñimportantevéva, ha mbaʼépa heʼivaʼekue Ñandejára Rréinore? b) Arakaʼépa Ñandejára oiporavo ñepyrũvaʼekue umi ohótavape yvágape?

⁴ Pe Abrahán ñemoñare iñimportantevéva haʼe Jesús, ha Jehová oiporavo chupe áño 29-pe. Upéicha oiko chugui pe Mesías térã Cristo oñeprometevaʼekue (Gálatas 3:16). Upe rire, tres áño imédio pukukue, Jesús opredika pe marandu porã Ñandejára Rréino rehegua umi hudiokuérape. Ojejagarra rire Juan el Bautístape, omombeʼu ikatuha avei ótro tapicha oho yvágape ogoverna hag̃ua, heʼívo: “Juan Bautista ou guive koʼág̃a peve oñeñehaʼãmbaitevaʼerã ojehupyty hag̃ua pe [Ñandejára] Rréino ha umi oñehaʼãvamante oike ipype” (Mateo 11:​12, JMP).

⁵ Oñeʼẽ mboyvemi umi ohótavare yvágape, Jesús heʼi: “Che haʼe peẽme Juan Bautista ndahuvichaiha gueteri koʼág̃a peve yvyporakuéra apytépe. Ha katu, pe [Ñandejára] renondépe michĩvéva upéva tuichave hína ichugui” (Mateo 11:​11, JMP). Mbaʼérepa heʼi upéva? Umi ohótava yvágape ojeporavo ñepyrũvaʼekue espíritu sánto rupive Pentecostés áño 33-pe, ha upérõ omanóma Juan el Bautista (Hechos 2:​1-4).

Abrahán ñemoñare ihústo Ñandejára renondépe

6, 7. a) Mbaʼérepa ojeʼe Abrahán ñemoñare hetataha ‘mbyjakuéra yvagapeguáicha’? b) Mbaʼeichagua mbaʼe porãpa ohupyty Abrahán, ha mbaʼépa ohupyty umi iñemoñare?

⁶ Ñandejára heʼivaʼekue Abrahánpe iñemoñare hetaitereitaha, ‘mbyjakuéra yvagapegua ha yvykuʼi már rembeʼypeguáicha’ (Génesis 13:16; 22:17). Upéva heʼise Abrahán tiémpope avave ndoikuaaihague mboýpa umi iñemoñare ohótava yvágape. Heta tiémpo haguépe oñemyesakã oĩha 144.000 ohótava yvágape, omoirũ hag̃ua Jesúspe (Revelación 7:4; 14:1).

⁷ Ñandejára Ñeʼẽ heʼi: “Abrahán oguerovia Ñandejárape, ha upe guive Ñandejára oguereko chupe [ihústovaramo]” (Génesis 15:​5, 6). Péro ndaipóri ni peteĩ yvypóra ihústo térã hekojojáva (Santiago 3:2). Abrahán ojeroviaiterei rupi Ñandejárare, Jehová heʼi hese hekojojaha ha avei iñamigoha (Isaías 41:8). Jehová ohecha avei ihústovaramo umi Abrahán ñemoñare omoirũtava Jesúspe yvágape. Upéicha rupi ohupyty hikuái hetaitereive mbaʼe porã Abrahán ohupytyvaʼekuégui.

 8. Mbaʼeichagua mbaʼe porãpa ohupyty umi Abrahán ñemoñare ohótava yvágape?

⁸ Jehová heʼi ihustoha umi ojeporavovaʼekue oho hag̃ua yvágape ojerovia rupi Jesucristo omanohague hesehapekuéra (Romanos 3:​24, 28). Jehová operdona chupekuéra hembiapo vaikue, upévare oiporavo chupekuéra ijespíritu sánto rupive oĩ hag̃ua Jesucristo ndive yvágape (Juan 1:​12, 13). Upéicha haʼekuéra oike pe pákto pyahúpe ha oiko chuguikuéra pe tetã pyahu, umi ohótava yvágape oisãmbyhy hag̃ua Jesús ndive (Gálatas 6:16; Lucas 22:20). Tuichaite mbaʼe niko upéva chupekuéra! Upévare umi ohótava yvágape ndaikatúi ohaʼarõ pe jeikove opa ára g̃uarã ko Yvy ape ári. Upéva haʼekuéra omboyke oho hag̃ua oipytyvõ Jesúspe ha oisãmbyhy hendive yvága guive pe ára ojehusgataha yvyporakuérape (jaleemína Romanos 8:17).

9, 10. a) Arakaʼépa ojeporavo ñepyrũ umi ohótavape yvágape, ha mbaʼépa ombohováita hikuái? b) Mbaʼéichapa oñepytyvõ chupekuéra?

⁹ Pe Pentecostés áño 33-pe, ciento veinte kuimbaʼe ha kuña ojeporavo oho hag̃ua yvágape oisãmbyhy hag̃ua Jesús ndive, pe ára ojehusgataha yvyporakuérape. Umi Jesús remimboʼe oñembyatyvaʼekue upérõ ojevautisa espíritu sánto rupive, ha upéicha chupekuéra raẽvete ojeporavo. Péro upéva ndeʼiséi natekotevẽimaha ojapo mbaʼeve oho hag̃ua yvágape. Upe guive Satanás oñehaʼãmbaitéta omboyke hag̃ua chupekuéra Jehová rapégui. Haʼekuéra katu ojepytaso mbarete vaʼerã Jehová ykére. Iñeʼẽrendúramo Jehovápe omanoite peve ikatúta ohupyty hikuái jeikove opaveʼỹva (Revelación 2:10).

¹⁰ Jehová oñemoñeʼẽ ha omokyreʼỹ umi ohótavape yvágape ojepytaso meme hag̃ua ijykére. Upearã oiporu ikongregasión ha la Biblia. Pór ehémplo, Apóstol Pablo ohaivaʼekue umi ohótavape yvágape oĩva Tesalónicape: ‘Peteĩteĩme roñeʼẽ oñeʼẽháicha túva taʼýrape; pomokyreʼỹ ha roʼe jey jey peẽme peiko hag̃ua Ñandejára oipotaháicha, penerenóiva peiko hag̃ua hendive irréinope’ (1 Tesalonicenses 2:​11, 12, JMP).

11. Mbaʼépa Jehová ohaika oipytyvõ hag̃ua umi ‘Israel Ñandejára mbaʼévape’?

¹¹ Oñepyrũ rire ojeporavo umi ohovaʼerã yvágape, Jehová ohecha iporãha ojehai umi mbaʼe Jesús omboʼe ha ohasavaʼekue oĩrõ guare ko Yvy ape ári. Avei oipotavaʼekue ojehai mbaʼéichapa otrata ha oñemoñeʼẽ umi kristiáno ypykuépe ohótava yvágape. Upévare ohaika pe Escrituras Griegas Cristianas, oñemoĩ hag̃ua pe Escrituras Hebreas ndive. Pe Escrituras Hebreas ojehaivaʼekue pe tetã Israélpe g̃uarã, oĩ porãrõ guare hikuái Jehová renondépe. Pe Escrituras Griegas Cristianas katu ojehaivaʼekue pe ‘Israel Ñandejára mbaʼévape’ g̃uarã, umi ojeporavovaʼekue oĩ hag̃ua Jesucristo ndive yvágape. Umi ndahaʼéiva Israelguápe oipytyvõhaguéicha pe Escrituras Hebreas, pe Escrituras Griegas oipytyvõ avei umi kristiáno ndohomoʼãivape yvágape ostudia ha ojapóramo upépe heʼiháicha (jaleemína 2 Timoteo 3:​15-17).

12. Mbaʼépa omomanduʼa apóstol Pablo umi kristiáno ohótavape yvágape?

¹² Umi kristiáno ypykuépe Ñandejára ohecha ihústovaramo ha oiporavo chupekuéra espíritu sánto rupive oho hag̃ua yvágape, péro oĩ aja ko Yvy ape ári noñemeʼẽi gueteri chupekuéra ogoverna hag̃ua. Péro oĩ ijapytepekuéra nontendéiva upéicha, ha oimoʼã oikomaha chuguikuéra rréi ha oipotáma oñemombaʼe chupekuéra. Upévare apóstol Pablo heʼi chupekuéra: “Ñaimoʼã ku pene mbaʼeretámava, ha perekóva opa mbaʼe peipotáva, ha peñeñandu mburuvicha guasúicha oikoteveʼỹva mbaʼeve orehegui. Mburuvicha guasungaʼu raʼe añete, ore roime hag̃ua penendive” (1 Corintios 4:8). Avei omomanduʼa chupekuéra: ‘Ndahaʼéi niko roñemombaʼeséva penderehe ha pende jeroviáre, poipytyvõsénte niko pevyʼa hag̃ua’ (2 Corintios 1:​23, JMP [1:​24, NM]).

Mbaʼéichapa oñembyaty umi ohovaʼerã yvágape

13. Mbaʼéichapa Ñandejára oiporavo umi ohótavape yvágape áño 33 guive?

¹³ Umi 144.000 ohovaʼerã yvágape noñembyatypái primer síglope. Umi apóstol tiémpo guive ojeporavo ypy vaʼekue chupekuéra. Upe rire haʼetéramo jepe ndahetáiva umi ojeporavóva, Ñandejára osegi oiporavo chupekuéra ko tiémpo peve (Mateo 28:20). Jesús oñepyrũ rire oisãmbyhy yvágape 1914-pe, heta mbaʼe oiko.

14, 15. Mbaʼéichapa ojeporavo koʼág̃a peve umi ohótavape yvágape?

¹⁴ Jesús omosẽmbaite raẽ yvágagui umi oñemoĩvape Ñandejára goviérnore (jaleemína Revelación 12:​10, 12). Upe rire oñepyrũ oiporavo umi ohótava yvágape oisãmbyhy hag̃ua hendive, oñembyatypa peve umi 144.000. Pe áño 1935 rupi haimetéma ojeporavopa umívape. Upéva ojehecha oĩ rupi heta ohendúva pe marandu porã ha ohechakuaáva ndohomoʼãiha yvágape. Pe espíritu sánto ndohechaukái chupekuéra ojeporavohague (embojojami Romanos 8:16). Haʼekuéra ohaʼarõ uvei oikove opa ára g̃uarã ko Yvy ape ári, umi ‘ambue ovechakuéra’ ndive (Juan 10:16). Pe áño 1935 rire, oñembyaty ñepyrũ pe “aty guasu” osẽtava pe “jehasa asy guasúgui”, ohechahaguéicha apóstol Juan peteĩ visión rupive (Revelación 7:​9, 10, 14, BNP).

¹⁵ Upéicharamo jepe, pe áño 1930 guive oĩ gueteri ojeporavóva oho hag̃ua yvágape. Mbaʼérepa upéva? Ikatu upéva oiko oĩ rupi omboykéva Ñandejárape ha tekotevẽva oñemyengovia (embojojami Revelación 3:16). Apóstol Pablo oikuaavaʼekue heta kristiánope omboykéva Jehovápe (Filipenses 3:​17-19). Mbaʼeichaguápa oiporavóne Jehová omyengovia hag̃ua umívape? Jaikuaa haʼe mante odesidivaʼerãha upéva. Péro ndoiporavoichéne umi oikuaaramóvape chupe, oiporavóne uvei umi heta árarema ojepytasóva ijykére. Upéicha heʼivaʼekue Jesús hemimboʼekuérape omoñepyrũrõ guare pe Conmemoración (Lucas 22:28).a

16. Mbaʼépa oiméne Ñandejára ohecha tekotevẽha ko ára pahápe, ha mbaʼérepa ikatu jajerovia?

¹⁶ Upéicharamo jepe, naentéroi ojeporavóva oho hag̃ua yvágape 1930 guive omyengovia umi omboykevaʼekue Jehovápe. Oiméne Jehová ohecha tekotevẽha oĩ ñanendive umi ohótava yvágape og̃uahẽ meve huʼãme ko ára paha, oñehundi peve ‘Babilonia Guasu’ (Revelación 17:5).b Ikatu jajerovia Ñandejára ombyatypataha hiʼárape umi 144.000 ohótava yvágape ha oisãmbyhytaha hikuái Jesucristo ndive. Ikatu avei jajerovia pe aty guasu ojepytaso mbaretetaha Jehová ykére heʼiháicha pe profesía. Osẽmbotáma hikuái pe jehasa asy guasúgui oútava ko múndo añáme oĩva Satanás poguýpe, ha ohasáta vyʼápe Ñandejára múndo pyahúpe.

Oñembyatypapotaitéma umi oisãmbyhýtava Ñandejára goviérno!

17. Ohechaukaháicha 1 Tesalonicenses 4:​15-17 ha Revelación 6:​9-11, mbaʼépa oiko omano rire umi ojeporavovaʼekue oho hag̃ua yvágape?

¹⁷ Pe áño 33 guive umi ohótava yvágape ohechauka ojeroviaitereiha Jehováre ha oaguanta omano meve. Chupekuéra oñemeʼẽta oisãmbyhy hag̃ua Ñandejára goviérno. Ha oñemoingove jey chupekuéra yvágape oñepyrũ riremi Cristo ogoverna upépe (jaleemína 1 Tesalonicenses 4:​15-17; Revelación 6:​9-11).

18. a) Mbaʼérepa ojerovia umi ohótava yvágape? b) Mbaʼépa opensa umi ambue ovechakuéra umi ohótavare yvágape?

¹⁸ Umi ohótava yvágape ojerovia oñemoingove jeytaha chupekuéra ojepytaso meméramo Jehová ykére. Umi ‘ambue ovechakuéra’ katu ojerovia hesekuéra, ha heʼi avei apóstol Pablo heʼihaguéicha umi Tesalonicayguápe: ‘Che ryvykuéra roagradese meme vaʼerã Ñandejárape penderehe, pende jerovia mbarete ha pejoayhuvehaguére. Upéicha rupi roñeʼẽ porã penderehe kongregasiónpe, pegueropuʼaka rupi opa mbaʼe oñemoĩva penderehe ha umi jehasa asy’. Ha upéi heʼive: ‘Koʼã mbaʼe rupi ojehechauka Ñandejára oporohusgaha hekopete ha ijaha peẽme peike hag̃ua Ñandejára Rréinope, upéva rehe niko pehasa asy peína’ (2 Tesalonicenses 1:​3-5, BNP). Omano vove pe último ohótava yvágape, Ñandejára goviérno oĩmbaitétama. Mbaʼeichaitépa oporombovyʼáta upéva yvágape ha ko Yvy ape ári!

[Nóta]

Ñambohovaimi koʼã porandu

• Mbaʼe oprometérõ guare Abrahánpepa Jehová oñeʼẽ pe ára oporohusgataháre?

• Mbaʼérepa Jehová heʼi Abrahán hekojojaha?

• Mbaʼeichagua mbaʼe porãpa ohupyty umi Abrahán ñemoñare ihustohaguére?

• Mbaʼérepa jajerovia koʼág̃a?

[Nóta oĩva taʼanga ndive páhina 21]

Jesús omokyreʼỹ hemimboʼekuérape oñehaʼãmbaite hag̃ua oisãmbyhy Ñandejára Rréinope

[Nóta oĩva taʼanga ndive páhina 23]

Pentecostés áño 33-pe, Jehová oñepyrũ oiporavo umi Abrahán ñemoñare ohótava yvágape

[Nóta oĩva taʼanga ndive páhina 24]

Umi ambue ovechakuéra oagradeseterei oĩhaguére hendivekuéra umi ohótava yvágape