¿Mbaʼéichapa oñeñangareko rakaʼe Jesúsre?

JEHOVÁ oikuaa umi imitãva ndaikatuiha oñangareko ijehe, upévare ojapo jepi heta mbaʼe pono ojehu mbaʼeve ivaíva chupekuéra. Rehóramo kokuépe térã ñúre, ikatu rehecha peteĩ mbaʼe ojoguáva Jehová ojapóvape, péro ñepyrũrã ikatu nderepillái la oikóva.

Ñamoĩ chupe reguataha rehóvo kokuére ha rehecha peteĩ guyra oñenóvaicha hína hupápe. Nde repensa upépe oĩtaha umi guyraraʼy ha reñemboja rehecha hag̃ua. Upévo pe guyra osẽ upégui ha repilla ndaiporiha mbaʼeve upépe. ¡Nembotavyete voi! Upéi pe guyra opereréma katu nderehe. ¿Ndépa reikuaa mbaʼére ojapo upéva?...

Oreko rupi ag̃uieténte imembykuéra ha ndoipotáigui rejapo hesekuéra mbaʼeve. Upévare oñeno guaʼu ótro hendápe ani hag̃ua retopa hupa ha operere nderehe odefende hag̃ua imembykuérape. ¿Reikuaápa nde mávapa ikatu avei oñangareko nderehe?... La Biblia ombojoja Jehovápe peteĩ ágila rehe, umi ágila oñatende porãiterei rupi imembykuérare (Deuteronomio 32:11, 12).

Jehová ningo ohayhueterei itaʼýra Jesúspe. Oikórõ guare yvágape, Jesús ipoderóso vaʼekue Itúvaicha, upévare ikatu oñangareko ijehe. Péro onasérõ guare ko yvy ape ári, Jesús haʼe vaʼekue peteĩ mitãraʼy, upévare oikotevẽ oñatendéva hese ha odefendéva chupe.

Okumpli hag̃ua umi mbaʼe Jehová omanda vaʼekue chupe, tekotevẽ vaʼekue Jesús okakuaa ha oiko chugui peteĩ kuimbaʼe ikatúmava odesidi ijehegui. Péro oiko mboyve upéva Satanás ojukase chupe. La Biblia omombeʼu Satanás ojukase hague Jesúspe michĩrõ guare, péro Jehová odefende chupe. ¿Reikuaasépa la oiko vaʼekue?...

Jesús onase rire, Satanás omoĩ yvágape peteĩ estrélla joguaha omimbi hag̃ua kuarahyresẽ gotyo. Unos kuánto astrólogo, haʼéva hína umi karai oadivináva omañávo estrellakuérare, oñepyrũ osegi kilómetrore pe estrélla ha og̃uahẽ hikuái Jerusalénpe. Upépe haʼekuéra oporandu moõpa onase umi hudío rréi. Upémarõ oñeporandu umi kuimbaʼe oikuaávape mbaʼépa heʼi la Biblia ha haʼekuéra heʼi: “Belén oĩva Judéape” (Mateo 2:1-6).

Herodes ningo peteĩ rréi ñaña ogovernáva Jerusalénpe, ha oikuaávo onase hague pe rréi pyahu Belénpe, heʼi umi astrólogope: “Tapeho peheka porã pe mitãʼi, ha ág̃a petopa vove, peju pemombeʼu chéve”. ¿Reikuaápa mbaʼérepa Herodes oikuaase moõpa oĩ Jesús?... Ndoipotáigui oĩ ótro rréi ha upévare ojukase chupe.

¿Mbaʼéichapa Jehová oñangareko Itaʼýrare?... Umi astrólogo otopa Jesús rehe ha omeʼẽ chupe heta rregálo. Upe rire, Jehová heʼi chupekuéra iképe anive hag̃ua oho Herodes oĩháme. Upévare oho hikuái hetãme ótro tapérupi, ha ndohovéima Jerusalénpe. Herodes ipochyeterei oikuaávo umi astrólogo ohóma hague. Ha ojukaségui Jesúspe, omanda ojejukapaite hag̃ua umi mitã ndorekóiva gueteri dos áño oikóva Belénpe. Péro Jesús ndaiporivéima upépe.

¿Reikuaápa mbaʼéichapa ojesalva?... Umi astrólogo oho rire, Jehová heʼi Josépe oho hag̃ua Egíptope, José ningo María ména. Upépe Herodes ndaikatuvéima ojapo mbaʼeve Jesús rehe. Tiémpo rire, José ha María osẽ jey Egíptogui, ha Jehová oñeʼẽ Josépe iképe heʼi hag̃ua chupe oho hag̃ua Nazarétpe, pórke upépe ndojehumoʼãi mbaʼeve Jesúspe (Mateo 2:7-23).

¿Rehechápa mbaʼéichapa Jehová oñangareko Itaʼýrare?... Epensamína koʼág̃a, ¿mávapa ojogua umi guyraʼi onase ramóvape ha Jesúspe michĩrõ guare?... Nde rejogua chupekuéra, oĩ rupi avei ojaposéva nderehe mbaʼe vai. ¿Reikuaápa mávapa umíva?...

La Biblia heʼi Satanás ojoguaha peteĩ león pochy ñandejukasévape. Umi león oiporavo jepi umi mymba ikangyvéva ojagarra hag̃ua. Upéicha avei, Satanás ha idemoniokuéra heta vése oiporavo umi mitãme ojapo hag̃ua hesekuéra mbaʼe vai (1 Pedro 5:8). Péro Jehová ipoderosove Satanásgui ha ikatu odefende umi mitãme, térã osolusiona umi mbaʼe vai Satanás ojapóva hesekuéra.

Jahecha haguéicha kapítulo 10-pe, ¿mbaʼépa oipota jajapo Satanás ha idemoniokuéra?... Haʼekuéra oipota umi nomendáiva ojuehe oreko rrelasión sexuál, ha upéva ndogustaiete Ñandejárape. ¿Nemanduʼápa máva añoitépa ikatu oreko rrelasión sexuál oñondive?... Peteĩ kuña ha peteĩ kuimbaʼe omendáva ojuehe.

Péro oĩ kakuaa orekóva rrelasión sexuál mitã ndive, ha upéva ivaieterei. Upéi koʼã mitã oaprende umi mbaʼe vai umi kakuaágui ha ojapóma avei haʼekuéraicha. Upéva káusare oĩ mitã orekoséva rrelasión sexuál ótro mitãndi. Por ehémplo, la Biblia omombeʼu mbaʼépa oiko vaʼekue yma peteĩ puévlo héravape Sodoma. Heʼi umi “imitãva ha itujáva” orekose hague rrelasión sexuál umi kuimbaʼéndi opyta vaʼekue Lot rógape (Génesis 19:4, 5).

Jesús oikotevẽ vaʼekue oñangarekóva hese imitãme ha nde avei. Nemanduʼáke ikatuha oĩ kakuaa térã ótro mitã orekoséva rrelasión sexuál nendive. Sapyʼánte koʼãichagua tapicha oñemoamígo guaʼu nderehe, ha ikatu heʼi omeʼẽtaha ndéve peteĩ rregálo neremombeʼúirõ la ojaposéva nderehe. Péro haʼekuéra opensa ijehénte, Satanás ha idemoniokuéra ojapoháicha. Koʼã tapicha ovyʼasénte ha upearã orekose rrelasión sexuál mitãndi. ¡Ha upéva ivaieterei!

¿Ndépa reikuaa mbaʼépa ojapo hikuái ovyʼa hag̃ua?... Ikatu opokose ha ohugase ne órgano sexuál rehe, térã ombojase hiʼórgano sexuál nembaʼe rehe. Péro ni mbaʼevéicharõ nderehejái vaʼerã ojejapo upéva nderehe. Tahaʼe jepe ne ermáno, ne ermána, nde sy térã nde túva, avave ndopokói vaʼerã nderehe umi pártepe.

¿Mbaʼéichapa ikatu reñeñangareko umi hénte tieʼỹgui?... Ani reheja avave opoko ne órgano sexuál rehe. Ha oĩramo ojaposéva upéva, hatã porã ere chupe: “¡Aníke epoko cherehe! ¡Cháke ajaguáta nderehe!”. Ha ndekulpasérõ la oiko vaʼekuére, ani eguerovia chupe, ijapu hína. Tahaʼe haʼéva pe tapicha ojapóva péicha nderehe, remombeʼu vaʼerã. Ikatu heʼi ndéve peẽ mokõinte peikuaa vaʼerãha la oiko vaʼekue, ha omeʼẽtaha ndéve peteĩ rregálo neremombeʼúirõ. Térã ikatu voi nemongyhyje pono rejagua hese. Péro lomímonte reho vaʼerã upégui ha emombeʼu la ojapóva.

Upéva ndeʼiséi reiko vaʼerãha kyhyjeháre, péro reñatende vaʼerã ndejehe. Nde tuvakuéra heʼíramo ndéve mávarepa ndovaléi rejeheʼa, térã ani hag̃ua reho peteĩ lugár ipeligrosohápe, rehendu vaʼerã chupekuéra. Péicha umi hénte tieʼỹ ndaikatumoʼãi ojapo nderehe mbaʼeve ivaíva.