¿Jahechaukápa ñañemonde lájare ñambotuichaha Ñandejárape?

1, 2. ¿Mbaʼérepa Testigokuérape g̃uarã iñimportánte oñemonde hekoitépe? (Ehecha pe taʼanga oĩva iñepyrũme.)

HOLÁNDAPE, osẽ vaʼekue peteĩ diáriope mbaʼéichapa oñemonde umi líder rrelihióso oho jave irreunionkuérape. Avei omombeʼu umi líder rrelihióso apytépe heta oĩha oñemondéva chupekuéra ogustaháichante, koʼýte haku rupi. Ko diáriope oñeñeʼẽ avei umi testígo de Jehováre, ha heʼi haʼekuéra oñemonde porãha oho jave iñasambleahápe. Heʼi avei umi mitãʼi ha kuimbaʼe oipuruha korváta ha tráhe. Ha umi mitãkuñaʼi ha kuña katu omonde umi polléra iporãva ha idesénteva. Pyʼỹinte ningo umi testígo de Jehovápe ojeguerohory oñemonde lájare. Apóstol Pablo heʼi vaʼekue entéro kristiánope “toñemonde hekópe ha taiñakãguapy”, pórke péicha ojapo vaʼerã oservíva guive Ñandejárape (1 Tim. 2:9, 10). Ko konsého osegi vaʼerã avei kuimbaʼekuéra, Pablo oñeʼẽramo jepe kuri kuñanguérare.

² Entéro jaservíva Jehovápe ningo ñañehaʼã ñañemonde hekópe porã, pórke jaikuaa chupe g̃uarã iñimportantetereiha upéva (Gén. 3:21). Ñandejára ningo pe orekóva derécho heʼi hag̃ua ñandéve mbaʼépa jajapo vaʼerã, ha Iñeʼẽme omombeʼu mbaʼéichapa oipota ñañemonde. Upévare, jaiporavóta jave mbaʼépa ñamondéta, nañapensái vaʼerã mbaʼépa ñandévente ñandegusta, síno mbaʼépa ogusta avei Jehovápe.

 3. Heʼiháicha pe Léi Mosáika, ¿mbaʼéichapa Jehová oipota ñañemonde?

³ Pe Léi Mosáikape oĩ vaʼekue unos kuánto mandamiénto oprotehéva umi israelítape. Por ehémplo, ani hag̃ua ou hekovai hikuái ojapo haguéicha umi ótro tetã oĩva ijerére. Pe Léi ohechauka Jehovápe ombojeguaruha oĩramo kuña oñemondéva kuimbaʼéicha, térã kuimbaʼe oñemondéva kuñáicha. Ha koʼág̃a oĩ de modaite upéva (elee Deuteronomio 22:5). Pe Léi ñanemboʼe Jehovápe ndogustaieteha umi ao ojejapóva kuimbaʼekuérape g̃uarã, péro omopínta kuñáva chupekuéra. Ha avei ndoguerohorýi umi ao omondéva kuñanguéra, péro omopínta kuimbaʼéva chupekuéra.

 4. ¿Mbaʼépa ikatu oipytyvõ umi ermáno ha ermánape odesidi porã hag̃ua mbaʼéichapa oñemondéta?

⁴ La Bíbliape oĩ heta téxto ikatúva ñanepytyvõ jadesidíta jave mbaʼéichapa ñañemondéta. Koʼãva ideprovécho ñandéve haku tiémpo térã roʼy tiémpope, tahaʼe haʼéva pe tetã jaikoha térã pe kostúmbre ojesegíva upépe. Ñande ningo nañaikotevẽi peteĩ lísta ohechaukáva mbaʼeichagua aópa jaipurukuaa, ha mbaʼépa ndovaléi jaipuru. Jajegiáramo la Biblia heʼívare, ikatútante avei ñamonde umi ao ñandegustáva. Jahechamína unos kuánto téxto ñanepytyvõtava ñantende hag̃ua “Ñandejára rembipota iporãva, hekopeguáva ha haʼe oguerohorýva”. Péicha ikatúta jadesidi porã mbaʼéichapa ñañemondéta (Rom. 12:1, 2).

5, 6. ¿Mbaʼépa umi hénte ikatu opensa ñañemonde lájare?

⁵ Jehová oskrivika apóstol Páblope pe jatopáva 2 Corintios 6:4-pe (elee). Umi hénte omañávo ñane píntare, oñeimahina jepi mbaʼeichagua persónapa ñande (1 Sam. 16:7). Jaservi rupi Jehovápe, nañamondeséi peteĩ ao ñandegusta rupínte, térã ikómodogui reínte ñandéve. Ñande ningo jarahase enkuénta la Biblia heʼíva. Upévare, ndajaipuruiete umi ao ñandejopypáva, mbykýva térã iséxiva, ha péicha jaju jahechauka umi mbaʼe ndajahechaukái vaʼerã. Sapyʼánte oĩ oñeñandu vaíva pórke ótro oñemonde vai, térã omaña vaʼerã ótro ládo ani hag̃ua omaña hese. Péro ñande arakaʼeve ndajaipotái umi hénte oñeñandu vai ñande káusare.

⁶ Umi hénte ñanderrespetavéta ha omombaʼevéta Jehová organisasión, ñanepotĩramo, jajearregla porãrõ, ha ñamondéramo umi ao idesénteva. Ñane ehémplo ikatu avei omomýi chupekuéra oñemoag̃uise hag̃ua Jehováre, ha oĩve hag̃ua dispuésto ñanerendúvo japredika jave chupekuéra.

7, 8. ¿Mbaʼéicha javépa iñimportánte ñañemonde porã?

⁷ Ñande ningo jarrespeta Jehovápe, ñane ermanokuérape ha umi hénte oĩva ñande territóriope. Upévare, ñañemonde lájare jahechaukase ñambotuichaha Jehovápe ha ñamombaʼeha pe mensáhe japredikáva (Rom. 13:8-10). Iñimportanteterei ñañemonde hekópe porã, koʼýte jaha jave rreunionhápe térã predikasiónpe. Ñañemonde lájare, ojekuaa vaʼerã jaserviha Jehovápe (1 Tim. 2:10). Jaikuaaháicha, oĩ ao ikatúva jaipuru peteĩ lugárpe, péro ndaikatúiva jaipuru ótro hendápe. Upévare, tahaʼe haʼéva pe lugár jaikoha, entéro jaservíva Jehovápe nañaofendéi vaʼerã avavépe ñañemonde lájare.

⁸ (Elee 1 Corintios 10:31.) Jaha jave asambleahápe, ñañatende vaʼerã avei ñane vestiméntare. Ñande ningo ndajajoguaséi umi hénte ko mundopeguápe. Péro ndahaʼéi asambléa ajánte la ñañemonde porã vaʼerã, síno entéro lugárpe. Upévare, japytáramo peteĩ otélpe asambléa tiémpope, ndajaipurúi vaʼerã ao ikachafáva. Péicha jajapóramo, nañatĩmoʼãi jaʼe hag̃ua ñande haʼeha testígo de Jehová, ha ñaiméta preparádo japredika hag̃ua oñepresenta jave ñandéve peteĩ oportunida.

9, 10. ¿Mbaʼérepa iporã jareko enkuénta Filipenses 2:4 jadesidíta jave mbaʼépa ñamondéta?

⁹ (Elee Filipenses 2:4.) Siémpre iporã ñapensa mbaʼéichapa oñeñandúta ñane ermanokuéra ohechávo ñañemonde lája. ¿Mbaʼérepa? Pórke entéro jaservíva Jehovápe ñañehaʼã jasegi ko konsého: “Pejukáke pende rete rembipota vai, ani penderekovai, ani penderekokyʼa, ani penembaʼepota vai” (Col. 3:2, 5). Oĩ ermáno hekovai vaʼekue oiko mboyve chugui Testígo, ha ikatu voi koʼág̃a peve olucha ipuʼaka hag̃ua umi deséo vaíre. Nañañatendéiramo ñañemonde lájare, ikatu hína ñande káusare koʼã ermánope ijetuʼuve ojapo hag̃ua la Biblia heʼíva, ha ovense umi deséo vai orekóva (1 Cor. 6:9, 10). Péro, ñande ni mbaʼevéicharõ ndajaipotái oiko upéva.

¹⁰ Ñande ningo jajeprotehe ñaime jave ñane ermanokuérandi, pórke haʼekuéra ndahekovaíri heta hénte ko mundopeguáicha. Ñañemonde jave hekópe porã, tahaʼe jaha jave Salónpe térã oimeraẽ ótro lugárpe, japrotehe hína ñane ermanokuérape. Añetehápe ningo ñande jareko derécho jaelehívo mbaʼe aópa jaipurúta. Péro avei jareko pe rresponsavilida ñamondévo umi ao oipytyvõtava ótrope opensa, oñeʼẽ ha ojapo hag̃ua opa mbaʼe Jehová oipotaháicha (1 Ped. 1:15, 16). Jaikuaaháicha, “pe mborayhu ningo ndojapói mbaʼeve hekopeʼỹ”, ha “nopensái ijehénte” (1 Cor. 13:4, 5).

11, 12. ¿Mbaʼéichapa Eclesiastés 3:1, 17 ñanepytyvõ jadesidi hag̃ua mbaʼépa ñamondéta?

¹¹ Jadesidíta jave mbaʼéichapa ñañemondéta, entéro jaservíva Jehovápe jaikuaa “oĩha peteĩ tiémpo opa mbaʼerã” (Ecl. 3:1, 17, TNM). Ñande ningo ñakambia ñañemonde lája asegún pe klíma. Por ehémplo, haku jave ñañemonde peteĩ hendáicha, ha roʼy jave ótro hendáicha. Péro ani ñanderesarái Jehová omandáva arakaʼeve nokambiaiha (Mal. 3:6).

¹² Umi lugár hakuvehárupi hasyve jaelehi hag̃ua ao idesénteva. Ñane ermanokuéra oguerohorýne katuete ndajaipurúiramo umi ao ñandejopypáva, hesakãva térã iséxiva (Job 31:1). Ñaime jave umi pláyape térã valneáriope, ñande tráhe de váño idesénte vaʼerã (Prov. 11:2, 20). Heta persóna ko mundopegua oipuru umi tráhe de váño nomoʼãguasúiva chupekuéra. Péro ñande jaservíva Jehovápe ñamondese umi ao nomotĩmoʼãitava chupe.

13. ¿Mbaʼérepa iporã ñanemanduʼa 1 Corintios 10:32, 33 heʼívare jaelehi jave ñande aorã?

¹³ Oĩ avei ótro téxto jaraha vaʼerã enkuénta jadesidíta jave mbaʼépa ñamondéta. Iporã ningo ñañatende mbaʼéichapa ñañemonde, ani hag̃ua ñamoñeñandu vai ñane ermanokuérape (elee 1 Corintios 10:32, 33). Ndajaipurúi vaʼerã umi ao ikatúva oofende ñane ermanokuérape ha umi ndoservírivape Jehovápe. Apóstol Pablo oskrivi kuri: “Káda uno jajapo vaʼerã umi mbaʼe ideprovéchotava ñande rapichápe ha iporãtava omombarete hag̃ua chupe”. Upéi heʼi avei: “Cristo jepe nomeʼẽi ijupe gústo” (Rom. 15:2, 3). Jesúspe g̃uarã iñimportanteve ojapo Itúa oguerohorýva ha oipytyvõ umi héntepe, omotenonde rangue chupe ogustávante. Iporãta avei ñande jasegíramo iñehémplo. Upévare, arakaʼeve nañamondéi vaʼerã umi ao ñandévente ñandegustáva, péro ikatúva omolesta umi héntepe, ha upéva káusare nohenduséi pe mensáhe japredikáva.

14. ¿Mbaʼéichapa tuakuéra omboʼekuaa ifamíliape iñimportanteha oñemonde porã?

¹⁴ Umi sy ha túa oreko pe rresponsavilida omboʼévo ifamíliape ojapo hag̃ua la Biblia heʼíva. Upéva heʼise oipytyvõ vaʼerãha chupekuéra ikatu hag̃uáicha oñemonde ha ojearregla Jehová oipotaháicha (Prov. 22:6; 27:11). ¿Mbaʼéichapa tuakuéra ikatu omboʼe ifamíliape orrespeta hag̃ua Jehovápe ha umi mbaʼe omandáva? Iporãta haʼekuéra voi omoĩramo la ehémplo, ha omboʼérõ mborayhúpe chupekuéra mbaʼéichapa ha moõpa ikatu okonsegi umi ao idesénteva. Sy ha túa omboʼe vaʼerã ifamíliape ani hag̃ua opensa ijehénte odesidíta jave mbaʼépa omondéta, síno opensa vaʼerãha avei oñeñeʼẽ porãtapa Jehováre.

15. ¿Mbaʼépa ñanepytyvõta jadesidi porã hag̃ua?

¹⁵ La Biblia ningo ideprovechoiterei jadesidi hag̃ua Jehová oipotaháicha. Péro péva ndeʼiséi ñande ndaikatumoʼãiha jaelehi umi ao ñandegustáva. Añetehápe káda uno ikatu jadesidi upéva, ha mboýpa jagastáta jajogua hag̃ua ñande aorã. Péro iporã ñanemanduʼa ñande ao tekotevẽha ipotĩ ha idesénte. Avei odepende hína pe okasiónre ha pe lugár jaikoháre jadesidi hag̃ua mbaʼéichapa ñañemondéta.

16. ¿Mbaʼérepa iñimportánte ñañemonde hekoitépe?

¹⁶ Ndaikatúi ningo jaʼe ifasilha ñakonsegi hag̃ua ao idesénteva. Heta negosioháre oñevende umi ao oĩva a la módante. Upévare, kuñanguéra oñemotiémpo vaʼerã ikatu hag̃uáicha otopa umi polléra, vlúsa ha vestído idesénteva. Kuimbaʼekuéra katu oñehaʼãmbaite vaʼerã avei otopa hag̃ua umi tráhe ha pantalón idesénteva ha ndojopypáiva chupekuéra. ¿Mbaʼérepa iñimportánte jajapo koʼã mbaʼe? Primero, pórke umi ermáno ohechakuaáta ñañehaʼãha, ha oagradeséta ñañemonde haguére hekoitépe. Ha segundo katu, ñambotuicháta Jehovápe. Upévare, tahaʼe haʼéva pe sakrifísio jajapóva Jehová rehehápe, ñanembovyʼaitereíta.

17. ¿Mbaʼépa oreko vaʼerã enkuénta umi ermáno oipuruséramo várba?

¹⁷ ¿Iporãpa umi ermáno oipuru várva? Pe Léi Mosáika heʼi vaʼekue kuimbaʼekuéra oheja vaʼerãha ivárva. Péro ñande kristianokuéra nañaimevéima pe Léi poguýpe, ni nañaĩri ovligádo jasegívo katuete (Lev. 19:27; 21:5; Gál. 3:24, 25). Oĩ lugár umi kuimbaʼe oipuruhápe várva vién rrekortádo, ha umírupi ndojehechavaíri upéva. Umichahárupi, umi ermáno oipuru várva, ha umi persóna territoriopeguápe nomolestái. Upéicharõ jepe, umírupi oĩ ermáno odesidíva ndoipurúi (1 Cor. 8:9, 13; 10:32). Ótro lugár rupi katu kuimbaʼekuéra ndojepokuaái oipuru várva, ha ermanokuéra apytépe ndojehechaporãmoʼãi ojepurúramo. Umichahárupi oĩramo ermáno oipurúva várva, ohechaukáta nomombaʼeiha Ñandejárape, ha ndosegimoʼãi ko konsého bíblico: “Ndorekói vaʼerã mbaʼeve ivaíva ojeʼe vaʼerã hese” (1 Tim. 3:2, 7; Rom. 15:1-3).

18, 19. ¿Mbaʼéichapa ñanepytyvõ Miqueas 6:8 heʼíva?

¹⁸ ¡Ajépa jaagradesete Jehovápe oheja haguére jadesidi mbaʼéichapa ñañemonde ha jajearregláta! Haʼe omeʼẽ ñandéve umi konsého bíblico ikatu hag̃uáicha jasegi, ha ñandete jadesidi. Upéicharõ, jadesidíta jave mbaʼéichapa ñañemondéta ha jajearregláta, jahechaukase ñaneakãguapyha (Miq. 6:8).

¹⁹ Tekotevẽ ningo ñanedesénte ha ñarrekonose Jehová ipotĩ ha isantoha. Avei iñimportánte jahechakuaa opa mbaʼe haʼe omandáva katuete ñanepytyvõitereiha. Ñanedesénte ha ñaneumildeséramo, jajapóta Ñandejára omandáva ñandéve, ha jarekóta enkuénta ñande rapichakuéra opensáva ha oñandúva.

20. ¿Mbaʼéichapa ikatu oipytyvõ umi héntepe ñañemonde ha jajearregla porãrõ?

²⁰ Ñande aóre ojekuaa porã vaʼerã jaserviha Jehovápe. Haʼe omandáva ñandéve iporãiterei, upévare nañaneprovlémai jajapo hag̃ua umíva. Entéro ermáno ha ermána omerese ojefelisita chupekuéra oñemonde haguére hekoitépe ha ojeporta porã haguére. Koʼã mbaʼe ningo oipytyvõ ikatu hag̃uáicha umi hénte ipyʼaporãva oñeinteresa pe mensáhe oĩvare la Bíbliape. Avei ombotuicha Jehovápe ha ombovyʼa chupe. Ñañemondéramo hekoitépe, katuete “opárupi ojehecháta Jehová podér omimbipáva, ha ojekuaáta tuichaha ijautorida” (Sal. 104:1, 2, TNM).